1. Bakaulengwe le bokgaitsadi bangwe ba ikutlwa jang ka go rera? (Bona le setshwantsho.)

 RE RERELA batho ka gonne re rata Jehofa e bile re batla go ba thusa gore ba mo itse. Baboledi ba le bantsi ba itumelela tiro ya go rera. Ba bangwe bone ba e tsaya e le namane e tona ya tiro. Goreng? Ka gonne bangwe ba ditlhong, ba tsaya gore ga ba itse go ruta sentle, e bile ga ba a tlwaela go ya kwa matlong a batho ba ba sa ba itseng. Ba bangwe ba tshaba gore batho ba ba ba rerelang ba tla ba galefela e bile ga ba batle go ba kgopisa. Le fa gone bakaulengwe le bokgaitsadi bano ba rata Jehofa, ba thatafalelwa ke go rerela ba bangwe. Le fa go ntse jalo, ba a itse gore tiro eno e botlhokwa go le kana kang e bile ba a e dira. Ruri Jehofa o itumelela matsapa a bone fela thata!

2. Goreng o sa tshwanela go kgobega marapo fa o sa itumelele bodiredi?

² A le wena ga o itumelele bodiredi ka gonne o ikutlwa jalo? O se ka wa kgobega marapo. Fa e le gore o tsaya gore ga o rute sentle, seo se ka tswa se bontsha gore o boikokobetso e bile ga o batle gore batho ba go tlotlomatse. Gape se ka tswa se bontsha gore ga o batle go ngangisana le batho ba bangwe. Ke boammaaruri gore ga go na ope yo o batlang go kgopisa ba bangwe, segolobogolo fa a leka go ba thusa. Jehofa o itse dikgwetlho tse o lebanang le tsone e bile o batla go go thusa. (Isa. 41:13) Mo setlhogong seno, re tla tlotla ka dilo di le tlhano tse di tla go thusang gore o se ka wa  kgobega marapo, mme o itumelele bodiredi.

LETLA BAEBELE GORE E GO NONOTSHE

3. Ke eng se se thusitseng moporofeti Jeremia gore a rerele batho ba bangwe?

³ Tota le mo nakong e e fetileng, fa batlhanka ba ga Jehofa ba tshwanelwa ke go dira tiro nngwe e e thata, ba ne ba kgothadiwa ke molaetsa o o tswang kwa go Jehofa. Ka sekai, moporofeti Jeremia o ne a okaoka fa Jehofa a ne a mo laela gore a ye go rera. O ne a re: “Ga ke itse go bua, ka gonne ke mosimanyana fela.” (Jer. 1:6) Ke eng se se ileng sa mo thusa gore a nne pelokgale? O ne a thusiwa ke molaetsa o o tswang kwa go Jehofa. O ne a re: “Lefoko la gagwe le ne la nna jaaka molelo o o tukang o o tswaletsweng mo marapong a me.” (Jer. 20:8, 9) Le fa batho ba Jeremia a neng a ba rerela ba ne ba sa mo reetse, molaetsa o a neng a ba bolelela one o ne o mo thusa gore a dire tiro e a neng a e neilwe.

4. Go bala Baebele le go akanyetsa kwa teng ka yone go re thusa jang? (Bakolosa 1:9, 10)

⁴ Le rona re ka kgothadiwa ke se Jehofa a se buang mo Baebeleng. Fa moaposetoloi Paulo a ne a kwalela phuthego ya kwa Kolosa, o ne a re go ithuta ka se Jehofa a batlang gore re se dire, go ne go tla ba thusa gore ba tshele ka tsela e e itumedisang Jehofa le gore ba dire “ditiro tse di molemo.” (Bala Bakolosa 1:9, 10.) Ditiro tse di molemo tse temana eno e buang ka tsone, di akaretsa go rera dikgang tse di molemo. Ka jalo, fa re bala Baebele re bo re akanyetsa kwa teng ka se re se balang, tumelo ya rona e tla nonofa e bile re tla lemoga gore go botlhokwa gore re rere dikgang tse di molemo.

5. Re tshwanetse go dira eng gore go bala Baebele go re tswele mosola?

⁵ Gore Baebele e re tswele mosola, ga re a tshwanela go itlhaganelela go fetsa fa re e bala le fa re akanyetsa kwa teng ka se re se ithutang. Nna o gopotse gore lepotlapotla le ja potsane. Fa o bala temana nngwe mme o sa e tlhaloganye, o se ka wa e feta fela. Go na le moo, leka go bona gore temana eo e tlhalosiwa jang mo Watch Tower Publications Index kgotsa mo Kaedi ya go Dira Dipatlisiso ya Basupi ba ga Jehofa. Fa o ipha nako ya go ithuta, o tla tlhatswega pelo le go feta gore se Baebele e se buang se boammaaruri. Seo se tla go thusa gore o itumelele go bolelela ba bangwe se o se ithutileng.​—1 Bathes. 5:21.

 BAAKANYETSA SENTLE PELE O YA BODIREDING

6. Goreng re tshwanetse go baakanyetsa sentle pele re ya bodireding?

⁶ Fa o baakanyetsa sentle pele o ya bodireding, o ka se tshoge thata fa o bua le batho. Pele Jesu a laela barutwa ba gagwe gore ba ye go rera, o ne a ba thusa gore ba baakanyetse sentle. (Luke 10:1-11) Ka jalo, ba ile ba kgona go dira dilo tse dintsi tse dintle e bile ba ile ba itumela ka gonne ba ne ba dirisa se Jesu a neng a ba rutile sone.​—Luke 10:17.

7. Re ka baakanyetsa jang pele re ya bodireding? (Bona le setshwantsho.)

⁷ Re ka baakanyetsa jang pele re ya bodireding? Re tshwanetse go akanya ka se re batlang go se bua, mme re se bue ka mafoko a rona. Gape leka go akanyetsa ditsela tse di farologaneng tse batho ba ka itshwarang ka tsone fa o ba rerela, mme o bone gore o ka ba araba jang. Fa o le kwa tshimong, leka go phuthologa, o smaele o bo o nne botsalano fa o bua le batho.

8. Bakeresete ba tshwana jang le dijana tsa letsopa tse Paulo a neng a bua ka tsone?

⁸ Moaposetoloi Paulo o ne a raya bakaulengwe le bokgaitsadi ba gagwe a re: “Re tshwana le dijana tsa letsopa, re amogetse letlotlo leno.” (2 Bakor. 4:7) Letlotlo le Paulo a buang ka lone ke eng? Ke tiro e e bolokang matshelo ya go rera molaetsa wa Bogosi. (2 Bakor. 4:1) Dijana tsa letsopa tsone ke eng? Ke batlhanka ba Modimo ba ba bolelelang batho ba bangwe dikgang tse di molemo. Mo motlheng wa ga Paulo, batho ba ba rekisang ba ne ba dirisa dinkgo tsa letsopa go tsenya dilo tsa botlhokwa, jaaka dijo, beine le madi. Ka tsela e e tshwanang, le rona Jehofa o re neile boikarabelo jwa go bolelela batho molaetsa wa botlhokwa wa dikgang tse di molemo. Se se itumedisang ke gore o re naya maatla a re a tlhokang gore re kgone go rera molaetsa oo.

KOPA JEHOFA GORE A GO THUSE GO NNA PELOKGALE

9. Re ka dira eng fa re boifa batho kgotsa re tshaba gore ba tla re ganetsa? (Bona le setshwantsho.)

⁹ Ka dinako dingwe re ka boifa batho kgotsa ra tshaba gore ba tla re ganetsa. Fa go le jalo re ka thusiwa ke eng? Ela tlhoko gore baaposetoloi ba ile ba rapelela eng fa ba  ne ba laelwa gore ba se ka ba rera. Go na le gore ba boife, ba ile ba kopa Jehofa gore a ba thuse gore ba “tswelele ba bua lefoko la [gagwe] ka bopelokgale.” Jehofa o ile a ba araba ka ponyo ya leitlho. (Dit. 4:18, 29, 31) Fa e le gore go boifa batho go dira gore re se ka ra itumelela go rera, re tshwanetse go kopa Jehofa gore a re thuse go rata batho gore re kgone go ba rerela.

10. Jehofa o re thusa jang gore re kgone go rera? (Isaia 43:10-12)

¹⁰ Jehofa o re neile tshiamelo e e seng kana ka sepe ya go nna Basupi ba gagwe e bile o solofetsa gore o tla re thusa go nna pelokgale. (Bala Isaia 43:10-12.) Go na le dilo di le nnê tse a re thusang ka tsone. Sa ntlha, Jesu o ne a re o tla nna le rona fa re rera dikgang tse di molemo. (Math. 28:18-20) Sa bobedi, Jehofa o dirisa baengele go re thusa. (Tshen. 14:6) Sa boraro, Jehofa o dirisa moya o o boitshepo go re thusa go gopola dilo tse re di ithutileng. (Joh. 14:25, 26) Sa bonê, Jehofa o re neile bakaulengwe le bokgaitsadi gore ba bereke le rona mo tshimong. Ka jalo, re ka kgona go atlega ka gonne Jehofa le bakaulengwe ba re ema nôkeng.

FETOFETOGA LE MAEMO, MME O TSWELELE O RERA

11. O ka dira eng gore o kgone go rerela batho fa o le mo bodireding? (Bona le setshwantsho.)

¹¹ A o kgobega marapo fa o sa fitlhele batho mo matlong fa o le mo tshimong? Ipotse go re: ‘Batho ba tshimo ya rona ba kwa kae gone jaanong?’ (Dit. 16:13) ‘A ba kwa tirong kgotsa ba ile dishopong?’ Fa go le jalo, leka go dira bodiredi jwa phatlalatsa. Mokaulengwe mongwe yo o bidiwang Joshua a re: “Ke kgona go rerela batho ba le bantsi fa ke tsamaya kwa dishopong kgotsa kwa batho ba phakang dikoloi gone.” Ene le mosadi wa gagwe ba kgona go fitlhela batho fa ba ba founela go le maitseboa kgotsa ka Sontaga thapama.​—Baef. 5:15, 16.

12. Ke eng se se ka go thusang go itse gore batho ba o ba rerelang ba dumela eng le gore ba tshwenyegile ka eng?

¹² Fa e le gore batho ga ba kgatlhegele se o se buang, leka go bona gore ba dumela eng le gore ba tshwenyegile ka eng. Joshua  le Bridget ba dirisa potso e e tlhagang mo pampitshaneng go simolola motlotlo. Ka sekai, fa ba dirisa pampitshana ya O Leba Baebele Jang? ba raya motho yo ba tlotlang le ene ba re: “Batho ba le bantsi ba re Baebele ke Lefoko la Modimo, mme ba bangwe bone ga ba e bone jalo. Wena o akanya eng?” Seo se dira gore batho ba batle go tlotla le bone.

13. Goreng re ka re re atlegile mo bodireding le fa batho ba sa re reetse? (Diane 27:11)

¹³ Fa batho ba sa re reetse mo bodireding, re tshwanetse go nna re gopotse gore re dirile se Jehofa le Morwawe ba batlang gore re se dire. Ba batla gore re rerele batho. (Dit. 10:42) Le fa gone re sa fitlhele ope kgotsa batho ba gana molaetsa wa rona, re a itumela ka gonne re itse gore re itumedisa Jehofa.​—Bala Diane 27:11.

14. Goreng re itumela fa mmoledi a bona mongwe yo o kgatlhegang mo tshimong?

¹⁴ Gape re a itumela fa mmoledi a bona mongwe yo o kgatlhegang mo tshimong. Makasine mongwe wa Tora ya Tebelo o ile wa tshwantsha tiro ya rona ya go rera le go batla ngwana yo o latlhegileng. Batho ba le bantsi ba ka tswa letsholo la go mmatla mo mafelong a a farologaneng. Mme fa ngwana yoo a bonwa, batho botlhe ba itumela mmogo le motho yo o boneng ngwana yoo. Ka tsela e e tshwanang, batho ba le bantsi mo phuthegong ba thusa mo tirong ya go dira batho barutwa. Ka jalo, mongwe le mongwe wa bone o tsaya matsapa go rerela batho botlhe mo tshimong e ba e abetsweng. Fa mongwe a simolola go tla dipokanong, botlhe ba a itumela.

RATA JEHOFA LE BATHO BA O BA RERELANG

15. Go dirisa se se mo go Mathaio 22:37-39 go tla re thusa jang gore re itumelele bodiredi? (Bona le setshwantsho se se mo )

¹⁵ Go rata Jehofa le batho ba re ba rerelang, go tla re thusa gore re itumelele tiro ya go rera. (Bala Mathaio 22:37-39.) Jehofa o a itumela fa a bona re dira tiro ya go rera. Batho ba ba simololang go ithuta Baebele le bone ba a itumela. Nna o gopotse gore fa batho ba re ba rerelang ba ka reetsa molaetsa wa rona ba bo ba simolola go direla Jehofa, ba ka tshelela ruri.​—Joh. 6:40; 1 Tim. 4:16.

16. Re ka dira eng gore re itumelele bodiredi fa re sa kgone go tswa mo matlong a rona? Naya dikai.

 ¹⁶ A go na le maemo mangwe a a dirang gore o nne fela o le mo ntlong o sa tswe? Fa go le jalo, tlhoma mogopolo mo go se o ka kgonang go se dira go bontsha gore o rata Jehofa le batho ba bangwe. Ka nako ya bolwetse jwa COVID-19, Samuel le Dania ba ne ba sa kgone go tswa mo ntlong. Mo nakong eo e e thata, ba ne ba rerela batho ka founu, ba kwala makwalo e bile ba ne ba tshwara dithuto tsa Baebele ba dirisa Zoom. Fa Samuel a ne a ya go tsaya dipilisi tsa gagwe tsa bolwetse jwa kankere kwa tliliniking, o ne a rerela batho ba a kopanang le bone. A re: “Fa re na le mathata, re a tshwenyega e bile re a lapa. Seo se ka leka tumelo ya rona. Mme gone, re batla go itumelela go direla Jehofa.” Ka yone nako eo, Dania o ne a wa a bo a tshwanelwa ke go nna fela mo bolaong ka dikgwedi di le tharo. Mo dikgweding di le thataro tse di neng tsa latela, o ne a dirisa wheelchair. A re: “Ke ne ke leka go dira sotlhe se nka se kgonang. Nako nngwe ke ile ka rerela mooki yo o neng a tlile go ntlhola, e bile ke ne ke rerela batho ba ba neng ba tlisa dilo mo ntlong ya rona. Gape ke ile ka kgona go rerela mosadi mongwe yo o berekang kwa khampaneng ya melemo mo founong.” Le fa Samuel le Dania ba ne ba sa tlhole ba kgona go dira go le gontsi mo bodireding jaaka pele, ba ile ba dira sotlhe se ba ka se kgonang gore ba bo itumelele.

17. O ka dira eng gore dikakantsho tse re tlotlileng ka tsone mo setlhogong seno di go tswele mosola?

¹⁷ Gore dikakantsho tse tlhano tse re tlotlileng ka tsone mo setlhogong seno di go tswele mosola, leka go di dirisa tsotlhe. Kakantsho nngwe le nngwe e tshwana le dilo tse o di tlhokang fa o apaya. Fa o setse o di kopantse tsotlhe, di dira gore dijo di rokotse mathe. Ka jalo, fa re dirisa dikakantsho tseno tsotlhe, re ka kgona go itshokela dikgwetlho tse di kgobang marapo tse re nnang le tsone fa re le mo bodireding e bile re tla itumela.