Batsadi ba me ba ile ba ithuta Baebele morago ga 1920. Ka nako eo, ba ne ba ise ba nyalane. Ke tshotswe ka 1939. Re ne re nna kwa England, mme fa ke le monnye ke ne ke tlhola ke ya dipokanong le batsadi ba me. Fa nako e ntse e tsamaya, ke ne ka ikwadisa mo Sekolong sa Bodiredi sa Puso ya Modimo. Ke gopola fa ke ne ke neela puo ya me ya ntlha, ke ne ka tlhoka go palama lebokoso gore ke kgone go bona bareetsi. Ka nako eo, ke ne ke na le dingwaga di le thataro mme ke tshogile ka gonne ke eme fa pele ga batho ba ba godileng.

Fa ke ya bodireding, papa o ne a nkwalela sengwe se ke neng ke tla se bua le batho mo karateng. Lekgetlho la ntlha fa ke rerela mongwe ke fa ke na le dingwaga di le robedi. Ke ne ke itumetse tota fa motho yoo a bala karata ya me, a bo a dumela go tsaya buka ya “Let God Be True”! Ke ne ka tabogela kwa go papa ke bo ke mmolelela se se diragetseng. Go ya dipokanong le go ya bodireding go ne go dira gore ke itumele le gore ke batle go direla Jehofa mo go oketsegileng.

Ke ne ka rata go ithuta Baebele le go feta fa papa a sena go ntirela thulaganyo ya gore ke newe dimakasine tsa Tora ya Tebelo kgwedi le kgwedi. Fela fa ke sena go newa makasine, ke ne ke o bala ka yone nako eo. Ke ne ka tshepa Jehofa le go feta mme fa nako e ntse e ya, ke ne ka ineela mo go ene.

Ka 1950, nna le batsadi ba me re ne ra ya kopanong ya setlhogo se se reng, Koketsego ya Puso ya Modimo, kwa New York. Setlhogo sa letsatsi la Labone se ne se re “Letsatsi la Barongwa.” Mo letsatsing leo, mokaulengwe Carey Barber yo moragonyana a ileng a nna leloko la Setlhopha se se Laolang, o ne a neela puo ya kolobetso. Fa a konela puo ya gagwe o ile a botsa batho ba ba yang kolobetsong dipotso tse pedi mme ke ne ke le mongwe wa batho ba ba  neng ba araba dipotso tseo. Ke ne ke na le dingwaga di le 11 mme ke ne ka lemoga gore ke dirile tshwetso ya botlhokwa. Mme gone, e re ka ke ne ke sa itse go thuma, ke ne ke tshaba go tsena mo metsing. Rangwane o ne a tsamaya le nna a bo a nthaya a re dilo di tlile go tsamaya sentle. Dilo di ne tsa direga ka bonako mo e leng gore fa ke le mo phulong, maoto a me ga a ka a kgoma fa fatshe. Mokaulengwe mongwe o ne a nkuka a bo a nnaya mokaulengwe yo a neng a nkolobetsa. Fa mokaulengwe a sena go nkolobetsa o ne a nnaya yo mongwe mme mokaulengwe yoo o ne a nthusa go tswa mo phulong. Go simolola ka lone letsatsi leo, Jehofa o ne a tswelela go tlhamalatsa ditselana tsa me.

Fa ke fetsa sekolo, ke ne ke batla go nna mmulatsela. Mme barutabana ba ne ba nkgothaletsa go ya yunibesithing. Ke ne ka ineela, ke bo ke ya yunibesithing. Fa ke le koo, ke ne ka lemoga gore nka se kgone go tswelela ke direla Jehofa ke bo ke dira le tiro ya sekolo. Ka jalo, ke ne ka dira tshwetso ya go tlogela yunibesithi. Ke ne ka rapela Jehofa, ke bo ke kwalela barutabana ke ba bolelela gore fa ngwaga o fela, ke tlile go tlogela yunibesithi. Ka gonne ke ne ke tshepa Jehofa, ka yone nako eo, ke ne ka nna mmulatsela.

Ka July 1957 ke ne ka ya go direla kwa toropong ya Wellingborough. Ke ne ka kopa bakaulengwe ba kwa Bethele ya London gore ba nthuse go batla mokaulengwe yo ke tla berekang le ene. Ke ne ka abelwa go bereka le Mokaulengwe Bert Vaisey, mme o ile a nthuta dilo di le dintsi tota. O ne a tlhagafetse mo tirong ya go rera e bile o ne a nthusa gore ke itirele thulaganyo ya go ya tshimong. Kwa phuthegong e re neng re kopanela kwa go yone re ne re le robedi. E ne le nna, Mokaulengwe Vaisey le bokgaitsadi ba le thataro ba ba godileng. Go baakanyetsa le go tsaya karolo kwa dipokanong, go ile ga nthusa gore ke tshepe Jehofa le go bontsha gore ke dumela mo go ene.

Fa ke sena go gololwa kwa kgolegelong ka gonne ke ne ke gana go tsenela tirelo ya bosole, ke ne ka kopana le Barbara yo e neng e le mmulatsela yo o kgethegileng. Re ne ra nyalana ka 1959, mme re ne re ikemiseditse go direla gongwe le gongwe kwa re neng re abetswe gone. Re ne ra abelwa go direla kwa Lancashire e e kwa England. Ka January 1961, ke ne ka lalediwa kwa Sekolong sa Bodiredi sa Bogosi se se neng se tsaya kgwedi mme se ne se tshwaretswe kwa Bethele ya London. Fa sekolo seo se fela, ke ne ke gakgametse tota fa ke newa kabelo ya go nna molebedi wa potologo. Ke ne ka fetsa dibeke di le pedi ke katisiwa ke mokaulengwe mongwe wa molebedi wa potologo kwa toropong ya Birmingham mme Barbara o ne a letleletswe go tsamaya le nna. Go tswa foo, re ne ra boela kwa mafelong a re neng re abetswe go direla kwa go one e leng, Lancashire le Cheshire.

Ka August 1962, fa re ntse re le mo malatsing a boikhutso, re ne ra romelelwa lekwalo le le tswang kwa ofising ya lekala. Mo teng go ne go na le diforomo tsa go tsenya kopo ya go ya Sekolong sa Gileade! Fa re sena go rapela, re ne ra di tlatsa re bo re di romela kwa ofising ya lekala. Morago ga dikgwedi di le tlhano, ke fa ba araba kopo ya rona. Mme re ne ra tsenela tlelase ya bo 38 ya Sekolo sa Gileade e e neng e tshwaretswe kwa Brooklyn, kwa New York.

 Fa re le kwa Sekolong sa Gileade re ne ra ithuta go le gontsi mo Lefokong la Modimo, ka phuthego ya gagwe le ka bakaulengwe le bokgaitsadi mo lefatsheng lotlhe. E re ka ke ne ke na le dingwaga di le 24 mme Barbara a na le di le 23, re ne ra ithuta go le gontsi mo baithuting ba bangwe ba re neng re na le bone mo tlelaseng. Letsatsi le letsatsi ke ne ke bereka le mongwe wa batlhatlheledi ba me e bong Mokaulengwe Fred Rusk, mme ke ne ke itumelela go bereka le ene. Sengwe sa dilo tse a ileng a nthuta tsone ke gore fa ke naya mongwe kgakololo ke tshwanetse go tlhomamisa gore e tswa mo Lefokong la Modimo. Bangwe ba bakaulengwe ba e neng e le batlhatlheledi ba rona e ne e le mokaulengwe Nathan Knorr, Frederick Franz le Karl Klein. Bakaulengwe bano ba ne ba na le maitemogelo. Mokaulengwe Hugh Macmillan o ile a re tlhalosetsa gore Jehofa o ile a thusa jang batho ba gagwe fa ba ne ba lebane le mathata go tloga ka ngwaga wa 1914 go fitlha ka 1919! Mme gape re ne ra ithuta go le gontsi mo sekaong sa gagwe.

Fa re tloga re aloga, Mokaulengwe Knorr o ile a bolelela nna le Barbara gore re tlile go direla kwa nageng ya Burundi e e kwa Afrika. Re ne ra ya kwa laeboraring ka bonako re bo re lebelela mo Bukeng ya Ngwaga gore go na le baboledi ba le bakae kwa Burundi. Re ne re gakgametse tota ka gonne go sena gope fa go kwadilweng gone gore go na le baboledi ba le bakae kwa nageng eo! Seo se ne se raya gore re ne re ya go bereka kwa tshimong e e iseng e berekwe gotlhelele. Mme gape re ne re ya kwa kontinenteng e re neng re sa itse sepe ka yone. Re ne re tshwenyegile tota! Mme fa re sena go rapela, re ne ra wela makgwafo.

Kwa Burundi sengwe le sengwe se ne se le sesha; maemo a bosa, setso le puo ya koo. Jaanong re ne re tlhoka go ithuta Sefora. Gape re ne re tlhoka go batla lefelo le re neng re tla nna kwa go lone. Malatsi a le mabedi fa re sena go goroga kwa Burundi, mokaulengwe Harry Arnott yo re neng re na le ene mo tlelaseng ya Gileade, o ne a re etela fa a ne a boela kwa kabelong ya gagwe kwa Zambia. O ile a re thusa go bona lefelo le re neng re tla nna kwa go lone. Fa nako e ntse e ya, badiredipuso ba ne ba nna kgatlhanong le rona ka gonne ba sa itse sepe ka Basupi ba ga Jehofa. Fa re sa ntse re re re itumelela kabelo ya rona mo nageng eo, badiredipuso ba ne ba re bolelela gore re ka se nne mo nageng eo ka gonne re sena lekwalotetla. Ka jalo, re ne ra tshwanelwa ke go tswa mo nageng eo, re bo re ya go direla kwa nageng ya Uganda.

 E re ka re ne re sena lekwalo la go nna kwa nageng ya Uganda, re ne re tshwenyegile re ipotsa gore re tlile go bereka jang. Mme re ile ra ikanya Jehofa. Mokaulengwe wa kwa Canada yo o neng a direla kwa Uganda, o ile a tlhalosetsa rre mongwe wa lepodise seemo sa rona. Lepodise leo le ile la re bolelela gore re ka nna mo nageng eo dikgwedi di le mmalwa go fitlha re newa lekwalo la go nna mo nageng eo. Re ne ra lemoga gore tota Jehofa o ne a re thusa.

Botshelo jwa kwa Uganda bo ne bo farologane thata le botshelo jwa kwa Burundi. Kwa Uganda, go ne go setse go na le Basupi ba le 28 mo nageng eo yotlhe. Batho ba le bantsi ba koo ba ne ba bua Seesemane. Mme gone, re ne ra lemoga gore fa re batla go thusa batho ba kwa Uganda gore ba direle Jehofa, re ne re tshwanetse go ithuta nngwe ya dipuo tsa koo. Re ne ra simolola go rera kwa Kampala mme kwa lefelong leo, go ne go buiwa Se-Luganda. Ka jalo, re ne ra dira tshwetso ya gore re simolole pele ka go ithuta Se-Luganda. Go re tsere dingwaga di le mmalwa pele re kgona go itse puo eo sentle mme fa re sena go e ithuta, re ne ra kgona go rerela batho ba le bantsi! Re ne ra simolola go tlhaloganya botoka gore ke dilo dife tse batho ba re neng re ithuta Baebele le bone ba neng ba tlhoka go di itse. Fa batho ba simolola go lemoga gore tota re a ba rata, ba ne ba re bolelela mathata a bone le gore ba ikutlwa jang ka se ba neng ba se ithuta.

Re ne re itumela tota fa re thusa batho go itse Jehofa. Mme re ne ra itumela le go feta fa re kopiwa go potologa. Lekala la kwa Kenya le ile la re laela gore re etele mafelo a a farologaneng gore re bone gore ke lefelo lefe le le tlhokang babulatsela ba ba kgethegileng. Mo makgetlhong a le mantsi re ne ra amogelwa ke batho ba ba neng ba ise ba kopane le Basupi gotlhelele. Ba ile ba re amogela ka diatla tsoopedi, e bile ba ne ba re apeela dijo.

Re ne ra tsaya maeto a mangwe gape. Fa re ne re le kwa Kampala, ke ne ka tsaya loeto lwa malatsi a le mabedi ke ya kwa toropong ya Mombasa kwa Kenya. Go tswa foo ke bo ke palama sekepe ke ya kwa ditlhaketlhakeng tsa Seychelles. Moragonyana, go tloga ka 1965 go fitlha ka 1972, Barbara o ne a nna a tsamaya le nna fa ke etela kwa Seychelles. Ka nako eo, go ne go na le baboledi ba le babedi fela ba ba neng ba nna kwa lefelong leo. Mme fa nako e ntse e ya go ne ga nna le setlhopha se sennye sa baboledi, moragonyana go bo go nna le phuthego. Gape ke ne ka etela bakaulengwe ba kwa Eritrea, Ethiopia le Sudan.

Dilo di ile tsa fetoga kwa Uganda fa masole a sena go menola puso. Mo dingwageng tse di latelang, dilo di ile tsa nna maswe le go feta mme ke ne ka ithuta botlhokwa jwa go ikobela kgakololo ya Baebele ya go ikobela badiredipuso. (Mar. 12:17) Nako nngwe, batho botlhe ba ba neng ba tswa kwa dinageng tse dingwe, ba ne ba bolelelwa gore ba ye go ikwadisa kwa diofising tsa mapodise tse di neng di le gaufi le kwa ba nnang gone. Ka yone nako eo, re ne ra dira jalo. Morago ga malatsi a le mmalwa fa re ne re feta kwa Kampala, lepodise lengwe le ne la re emisa. Ke ne ke na le mokaulengwe mongwe wa morongwa. Re ne re tshogile tota! Ba ne ba re latofatsa ka gore re tlile go senya, ba bo ba re isa kwa ofising e kgolo ya mapodise. Fa re le koo, re ne ra leka go ba tlhalosetsa gore re barongwa. Re ne ra ba tlhalosetsa gore re setse re ikwadisitse kwa mapodiseng mme ba ne ba sa batle go re reetsa. Ba ile ba re golega ba bo re isa kwa ofising ya mapodise e e neng e le gaufi le ntlo ya barongwa. Fa re lemoga gore lepodise le le neng le re kwadisa le sa ntse le re gopola, re ne ra wela makgwafo! Lepodise leo, le ile la laela lepodise le le neng le re tlhokometse gore le re golole.

 Nako le nako fa re ne re ya kwa mafelong a mangwe, masole a ne a re emisa. Mme ka dinako dingwe, go ne go se motlhofo ka gonne re emisiwa ke masole a a neng a nole thata. Ka metlha re ne re rapela mme seo se bo se re thusa go ritibala, morago ga moo, ba ne ba re letla go feta. Ka maswabi, ka 1973, barongwa botlhe ba ba tswang kwa dinageng tse dingwe ba ile ba laelwa gore ba tswe mo Uganda.

Re ne ra newa kabelo ya go direla kwa Côte d’Ivoire. Botshelo jwa rona bo ne bo fetogile gape. Re ne re tshwanetse go itlwaetsa botshelo jwa kwa nageng eo, go tlwaela go bua Sefora gape, le go tlwaela go tshela le barongwa ba bangwe ba ba tswang kwa dinageng tse di farologaneng. Mme fa re bona batho ba le bantsi ba batla go ithuta ka Jehofa, re ne ra lemoga gore Jehofa o re eme nokeng. Re ne ra lemoga gore fa re tshepa Jehofa, o tla re kaela.

Ka maswabi dingaka di ile tsa re Barbara o na le bolwetse jwa kankere. Re ne ra nna re ya kwa Yuropa makgetlho a le mantsi gore Barbara a kgone go newa kalafi. Mme ka 1983, re ne ra lemoga gore re ka se tlhole re kgona go direla kwa Afrika. Kgang eno e ne e re utlwisitse botlhoko tota!

Fa re ntse re direla mo Bethele ya London, Barbara o ne a lwala le go feta a bo a tlhokafala. Bakaulengwe le bokgaitsadi ba mo Bethele ba ne ba nthusa fela thata. Banyalani bangwe ba ile ba nthusa go tlwaela botshelo jwa me jo bosha, le gore ke tswelele ke tshepa Jehofa. Moragonyana, ke ne ka kopana le kgaitsadi yo o ratang Jehofa fela thata mme o ne a direla mo Bethele ka malatsi a a rileng. Gape o ne a kile a nna mmulatsela yo o kgethegileng. Nna le Ann, re ne ra nyalana ka 1989 mme go tloga ka nako eo, re ntse re direla mo Bethele ya London.

Go tloga ka 1995 go fitlha ka 2018, ke ne ke direla ke le moemedi wa ntlokgolo. Mme ke ne ka etela dinaga di ka nna 60. Fa ke ntse ke di etela, ke ne ka lemoga gore Jehofa o tlhokomela batho ba gagwe go sa kgathalasege gore ba diragalelwa ke eng.

Ka 2017, ke ne ka ya gape kwa Afrika. Ke ne ke itumeletse go ya le Ann kwa Burundi. Re ne re gakgametse tota fa re fitlhela go na le Basupi ba le bantsi kwa nageng eo! Gone jaanong, go na le Bethele mo seterateng se ke neng ke tlhola ke rera mo go sone ka 1964. Mme go na le baboledi ba feta 15 500 mo nageng ya Burundi.

Ke ne ke itumetse tota fa ke newa lenaane la mafelo a ke tla yang kwa go one ka 2018. Mme naga nngwe e ke neng ke tshwanetse go ya kwa go yone e ne e le Côte d’Ivoire. Fa ke fitlha mo toropong ya Abidjan e e kwa Côte d’Ivoire ke ne ka ikutlwa e kete ke tlile gae. Fa ke ntse ke lebile lenaane la dinomoro tsa founu tsa bakaulengwe ba ba nnang mo Bethele, ke ne ka lemoga gore mokaulengwe Sossou o nna mo kamoreng e e fa thoko ga ya rona. Ke ne ka gopola gore fa ke ne ke nna mo toropong ya Abidjan, mokaulengwe Sossou e ne e le molebedi wa toropo. Mme ke ne ke fositse. E ne e se mokaulengwe Sossou yo ke neng ke mo itse, e ne e le ngwana wa gagwe.

Jehofa ga a ise a ko a ntshwabise. Mathata a ke ileng ka lebana le one a ile a nthuta gore fa ke ikanya Jehofa, o tla tswelela a nkaela kgotsa go tlhamalatsa ditselana tsa me. Ke ikemiseditse go tswelela ke direla Jehofa le go tsamaya mo tseleng e a reng ke tsamaye mo go yone go fitlha ke tsena kwa lefatsheng le lesha.—Dia. 4:18.