1, 2. Moaposetoloi Paulo o ne a bontsha jang gore o anaanela bopelonomi jo bo sa re tshwanelang jwa Modimo?

MOAPOSETOLOI PAULO o ne a bua jaana a tlhatswegile pelo: “Bopelonomi jo bo sa re tshwanelang jwa [Modimo] jo bo neng bo le ka ga me e ne e se lefela.” (Bala 1 Bakorintha 15:9, 10.) E re ka Paulo a ne a kile a bogisa Bakeresete, o ne a itse gore ga a tshwanelwe ke kutlwelobotlhoko e kgolo ya Modimo.

² Pele ga Paulo a tlhokafala, o ne a kwalela modirimmogo le ene e bong Timotheo a re: “Ke leboga Keresete Jesu Morena wa rona, yo o neng a nnaya maatla, ka gonne o ntsere ke ikanyega ka go nkabela bodiredi.” (1 Tim. 1:12-14) Bodiredi joo e ne e le eng? Paulo o ne a bolelela bagolwane ba phuthego ya Efeso gore bo ne bo akaretsa eng, fa a ne a re: “Ga ke tseye moya wa me e le o o botlhokwa o o rategang mo go nna, fa fela ke ka wetsa lobelo lwa me le bodiredi jo ke neng ka bo amogela jwa Morena Jesu, gore ke neye bosupi ka botlalo jwa dikgang tse di molemo tsa bopelonomi jo bo sa re tshwanelang jwa Modimo.”—Dit. 20:24.

3. Paulo o ne a newa bodiredi bofe jo bo kgethegileng? (Bona setshwantsho se se simololang setlhogo.)

 ³ Ke ‘dikgang dife tse di molemo’ tse Paulo a neng a di rera tse di neng di tlhomolola bopelonomi jo bo sa re tshwanelang jwa ga Jehofa? O ne a bolelela Bakeresete ba kwa Efeso a re: “Lo utlwile ka ga tiro ya bolebedi ya bopelonomi jo bo sa re tshwanelang jwa Modimo jo ke neng ka bo newa go akantswe ka lona.” (Baef. 3:1, 2) Paulo o ne a laetswe gore a itsise batho ba e seng Bajuda dikgang tse di molemo gore le bone ba tle ba akarediwe mo bathong ba ba tla busang le Keresete mo pusong ya Bogosi Jwa Bomesia. (Bala Baefeso 3:5-8.) Paulo o ne a tlhomela Bakeresete ba motlha wa gompieno sekao se se molemo sa go tlhagafala mo bodireding le go ba bontsha gore bopelonomi jo bo sa re tshwanelang jwa Modimo jo a neng a bo bontshiwa “e ne e se [jwa] lefela.”

4, 5. Ke eng fa re ka re “dikgang tse di molemo tsa bogosi” di tshwana le dikgang tse di molemo tsa “bopelonomi jo bo sa re tshwanelang jwa Modimo”?

⁴ Mo metlheng eno ya bofelo, batho ba ga Jehofa ba laetswe gore ba rere “dikgang tse di molemo tseno tsa bogosi . . . mo lefatsheng lotlhe le le nang le banni gore e nne bosupi mo ditšhabeng tsotlhe.” (Math. 24:14) Molaetsa o re o rerang le one ke “dikgang tse di molemo tsa bopelonomi jo bo sa re tshwanelang jwa Modimo,” ka gonne ditshegofatso tsotlhe tse re solofetseng go di bona fa Bogosi bo busa, di nna gone ka ntlha ya go bo Jehofa a re bontshitse bopelonomi a dirisa Keresete. (Baef. 1:3) A le rona re etsa sekao sa ga Paulo sa go anaanela bopelonomi jo bo sa re tshwanelang jwa ga Jehofa mme re dira jalo ka go rera ka tlhagafalo?—Bala Baroma 1:14-16.

⁵ Mo setlhogong se se fetileng, re ithutile ka ditsela di le dintsi tse ka tsone rona baleofi re solegelwang molemo ka gone ke bopelonomi jo bo sa re tshwanelang jwa ga Jehofa. Ka jalo, ruri go a tshwanela gore re dire sotlhe se re ka se kgonang go bolelela batho kafa Jehofa a bontshang lorato lwa gagwe ka gone le kafa lo ka ba solegelang molemo ka gone. Ke dikarolo dife tsa bopelonomi jo bo sa re tshwanelang jwa Modimo tse re tshwanetseng go thusa ba bangwe go di itse?

6, 7. Fa re tlhalosetsa batho ka thekololo, re anamisa jang dikgang tse di molemo tsa bopelonomi jo bo sa re tshwanelang jwa Modimo?

⁶ Mo lefatsheng leno le le letlelelang sengwe le sengwe, batho ga ba akanye gore ke baleofi, ke ka moo bontsi jwa bone ba sa itseng gore ba tlhoka thekololo. Mo godimo ga moo, batho ba le bantsi ba a bona gore go itshelela fela jaaka ba batla ga go ba leretse boitumelo jwa mmatota. Fa batho ba le bantsi ba simolola go bua le Basupi ba ga Jehofa, ke gone ba tlhaloganyang gore boleo ke eng, bo re ama jang le gore ke eng se re tlhokang go se dira gore re gololwe mo go jone. Batho ba le bantsi ba itumelela go ithuta gore Jehofa o a re rata e bile o re bontshitse bopelonomi jo bo sa re tshwanelang ka go romela Morwawe mo lefatsheng gore a tle go re golola mo boleong le mo losong.—1 Joh. 4:9, 10.

⁷ Paulo o ne a bua jaana ka Morwa yo o rategang wa ga Jehofa: “Ka ene, re gololwa ka thekololo ka madi a gagwe, ee, boitshwarelo jwa ditlolo tsa rona, go ya ka dikhumo tsa bopelonomi jwa gagwe jo bo sa re tshwanelang.” (Baef. 1:7) Setlhabelo sa thekololo sa ga Keresete ke bosupi jwa gore Modimo o re rata thata e bile se bontsha bopelonomi jo bo sa re tshwanelang jo Jehofa a re bontshitseng jone ka tsela e kgolo. Ruri go nametsa pelo go itse gore fa re dumela mo setlhabelong sa ga Jesu, re tla itshwarelwa maleo e bile re tla  nna le segakolodi se se phepa! (Baheb. 9:14) Ruri tseo ke dikgang tse di molemo tse re tshwanetseng go di bolelela ba bangwe!

8. Ke eng fa batho ba ba nang le boleo ba tlhoka go letlana le Modimo?

⁸ Re na le boikarabelo jwa go bolelela batho ba bangwe gore ba ka kgona go nna le kamano e e molemo le Mmopi wa bone. Fa batho ba ise ba bontshe tumelo mo setlhabelong sa ga Jesu, Modimo o ba tsaya e le baba ba gagwe. Moaposetoloi Johane o ne a kwala jaana: “Yo o supang tumelo mo go Morwa o na le botshelo jo bo sa khutleng; yo o sa utlweng Morwa ga a kitla a bona botshelo, mme bogale jwa Modimo bo ntse mo go ene.” (Joh. 3:36) Se se itumedisang ke gore setlhabelo sa ga Keresete se dira gore re kgone go letlana le Modimo. Paulo o ne a re: “Lona ba lo kileng lwa bo lo fapogile e bile lo le baba ka gonne megopolo ya lona e ne e le mo ditirong tse e neng e le tse di boikepo, jaanong gape o lo letlantse ka mmele wa senama wa ga yoo ka loso lwa gagwe.”—Bakol. 1:21, 22.

9, 10. (a) Ke boikarabelo bofe jo Keresete a neng a bo naya bomorwarraagwe ba ba tloditsweng? (b) Ba “dinku tse dingwe” ba thusa batlodiwa jang?

⁹ Keresete o neile bomorwarraagwe ba ba tloditsweng ba ba mo lefatsheng se Paulo a se bitsang “bodiredi jwa tetlanyo.” Fa Paulo a kwalela Bakeresete ba ba tloditsweng ba lekgolo la ntlha la dingwaga a tlhalosa kgang eno, o ne a re: “Mme dilo tsotlhe di tswa kwa Modimong, yo o neng a re letlanya le ene ka Keresete a ba a re naya bodiredi jwa tetlanyo, e leng, gore Modimo o ne a letlanya lefatshe le ene ka Keresete, a sa ba balele ditlolo tsa bone, mme o ne a re naya lefoko la tetlanyo. Jalo re baemedi ba ba emetseng Keresete, jaaka e kete Modimo o rapela ka rona. Jaaka baemedi ba ga Keresete re a kopa: ‘Letlanang le Modimo.’”—2 Bakor. 5:18-20.

¹⁰ Ba “dinku tse dingwe” ba go leba e le tshiamelo go thusa batlodiwa mo bodireding jono. (Joh. 10:16) E re ka ba dinku tse dingwe e le barongwa ba ga Keresete, ba nna le seabe se segolo mo go ruteng batho boammaaruri le go ba thusa gore ba nne le kamano e e gaufi le Jehofa. Eno ke karolo ya botlhokwa ya tiro ya go neela bosupi ka botlalo ka dikgang tse di molemo tsa bopelonomi jo bo sa re tshwanelang jwa Modimo.

11, 12. Ke eng fa batho ba itumela fa ba ithuta gore ba kgona go rapela Jehofa?

¹¹ Batho ba le bantsi ba rapela ka gonne ba batla go ikutlwa botoka, mme gone, tota ga ba dumele gore Modimo o utlwa dithapelo tsa bone. Ba tlhoka go itse gore Jehofa ke “Moutlwi wa thapelo.” Mopesalema Dafide o ne a kwala jaana: “Wena Moutlwi wa thapelo, batho ba nama yotlhe ba tla tla kwa go wena. Dilo tsa tlolo di nnile thata go mpheta. Fa e le ditlolo tsa rona, wena o tla di bipa.”—Pes. 65:2, 3.

¹² Jesu o ne a bolelela barutwa ba gagwe jaana: “Fa lo kopa sengwe ka leina la me, ke tla se dira.” (Joh. 14:14) Ga go pelaelo gore Jesu o ne a bua ka sengwe le sengwe se se dumalanang le thato ya ga Jehofa. Johane o re tlhomamisetsa jaana: “Eno ke tshepo e re nang le yone mo go ene, gore, go sa kgathalesege gore ke eng se re se kopang kafa thatong ya gagwe, o a re utlwa.” (1 Joh. 5:14) Ruri go itumedisa tota go ruta batho gore thapelo ga se sengwe fela se se re thusang go ikutlwa botoka, go na le moo, ke tsela ya go atamela ‘setulo sa bogosi sa bopelonomi jo bo sa re tshwanelang’ sa ga Jehofa! (Baheb. 4:16) Fa re ba ruta gore ba rapele jang, ba rapele mang le gore ba rapelele eng, seo se ka ba thusa gore ba atamalane le Jehofa le gore ba gomotsege ka dinako tsa mathata.—Pes. 4:1; 145:18.

13, 14. (a) Batlodiwa ba tla itumelela ditshiamelo dife tse di molemo mo isagweng? (b) Batlodiwa ba tla direla batho eng se se molemo?

¹³ Jehofa o tla tswelela a bontsha batho bopelonomi jo bo sa re tshwanelang le fa a sena go fedisa lefatshe leno le le bosula. Fa Paulo a bua ka tshiamelo e kgolo e Modimo a e neileng batlodiwa ba le 144 000 ba ba tla busang le Keresete mo Bogosing jwa kwa legodimong, o ne a re: “Modimo, yo o humileng kutlwelobotlhoko, ka ntlha ya lorato lo logolo lwa gagwe lo a neng a re rata ka lone, o ne a re tshedisa mmogo le Keresete, le fa re ne re sule mo ditlolong—lo bolokilwe ka bopelonomi jo bo sa re tshwanelang—mme o ne a re tsosa mmogo a ba a re nnisa mmogo mo mafelong a selegodimo re le seoposengwe le Keresete Jesu, gore mo ditsamaisong tse di tlang tsa dilo go tle go bonadiwe dikhumo tse dikgolo thata tsa bopelonomi jwa gagwe jo bo sa re tshwanelang mo bopelontleng jwa gagwe mo go rona seoposengweng le Keresete Jesu.”—Baef. 2:4-7.

¹⁴ Ga re kgone go tlhaloganya ka botlalo masego a Jehofa a tla a nayang Bakeresete ba ba tloditsweng fa ba setse ba le mo ditulong tsa Bogosi ba busa le Keresete kwa legodimong. (Luke 22:28-30; Bafil. 3:20, 21; 1 Joh. 3:2) Jehofa o tla ba ‘bontsha dikhumo tse dikgolo thata tsa bopelonomi jwa gagwe jo bo sa re tshwanelang.’ Ba tla nna “Jerusalema yo mosha,” monyadiwa wa ga Keresete. (Tshen. 3:12; 17:14; 21:2, 9, 10) Ba tla thusa Jesu go “alafa ditšhaba,” go golola batho ba ba kutlo mo boleong le mo losong le go ba thusa gore ba itekanele.—Bala Tshenolo 22:1, 2, 17.

15, 16. Mo isagweng, Jehofa o tla bontsha jang ba “dinku tse dingwe” bopelonomi jwa gagwe jo bo sa re tshwanelang?

¹⁵ Mo go Baefeso 2:7, re ithuta gore Modimo o tla bontsha bopelonomi jwa gagwe jo bo sa re tshwanelang “mo tsamaisong e e tlang ya dilo.” Ga go pelaelo gore kwa lefatsheng le lesha, Jehofa o tla re bontsha “dikhumo tse dikgolo thata tsa bopelonomi jwa gagwe jo bo sa re tshwanelang.” (Luke 18:29, 30) Sengwe sa dilo tse dikgolo tse Jehofa a tla di dirang go bontsha bopelonomi jwa gagwe jo bo molemo ke go tsosa batho “mo Sheole [kgotsa mo Lebitleng].” (Jobe 14:13-15; Joh. 5:28, 29) Banna le basadi ba ba ikanyegang ba bogologolo ba ba neng ba swa pele Keresete a ntsha botshelo jwa gagwe setlhabelo, mmogo le ba “dinku tse dingwe” ba ba swang ba ikanyega mo metlheng ya bofelo, ba tla tsosiwa gore ba kgone go tswelela ba direla Jehofa.

¹⁶ Gape go tla tsosiwa dimilione tsa batho ba ba suleng ba sa itse Modimo. Ba tla newa tshono ya gore ba ikobele bolaodi jwa ga Jehofa. Johane o ne a kwala jaana: “Mme ka bona baswi, ba bagolo le ba bannye, ba eme fa pele ga setulo sa bogosi, mme dikwalo tsa momeno tsa bulwa. Mme lokwalo lwa momeno lo longwe lo ne lwa bulwa; ke lokwalo lwa momeno lwa botshelo. Mme baswi ba ne ba atlholwa go ya ka dilo tse di kwadilweng mo dikwalong tseno tsa momeno go ya ka ditiro tsa bone. Mme lewatle la ntsha baswi ba ba mo go lone, le loso le Hadese tsa ntsha baswi ba ba mo go tsone, mme ba atlholwa mongwe le mongwe go ya ka ditiro tsa bone.” (Tshen. 20:12, 13) Ke boammaaruri gore, ba ba tsositsweng ba tla tshwanelwa ke go ithuta kafa ba ka dirisang ka gone melaometheo ya Modimo e e mo Baebeleng. Mo godimo ga moo, ba tla tshwanelwa ke go latela ditaelo tse disha tse di tla bong di le mo ‘memenong,’ e e tla tlhalosang dilo tse Jehofa a batlang gore batho ba ba tshelang mo lefatsheng le lesha ba di dire. Go senolwa ga dintlha tse di mo memenong eno e tla bo e le tsela e nngwe e Jehofa a tla re bontshang ka yone bopelonomi jwa gagwe jo bo sa re tshwanelang.

17. Re tshwanetse go nna re gopotse eng fa re le mo bodireding?

¹⁷ Tiro ya rona e kgolo ke go bolelela batho dikgang tse di molemo tsa Bogosi fa bokhutlo bo ntse bo atamela! (Mar. 13:10) Ga go pelaelo gore dikgang tse di molemo di tlhomolola bopelonomi jo bo sa re tshwanelang jwa ga Jehofa. Re tshwanetse go nna re gopotse seno fa re le mo bodireding. Mokgele wa rona fa re rera ke go tlotlomatsa Jehofa. Re ka dira seno ka go bontsha batho gore ditsholofetso tsotlhe tse di malebana le masego a lefatshe le lesha, di bontsha gore Jehofa o pelonomi.

18, 19. Re galaletsa jang bopelonomi jo bo sa re tshwanelang jwa ga Jehofa?

¹⁸ Fa re rerela batho ba bangwe, re ka ba tlhalosetsa gore fa Bogosi jwa ga Keresete bo busa, batho ba tla solegelwa molemo ka botlalo ke setlhabelo sa thekololo e bile ka iketlo ba tla itekanela. Baebele ya re: “Popo ka boyone le yone e tla gololwa mo go nneng motlhanka wa go bola mme e nne le kgololesego e e galalelang ya bana ba Modimo.” (Bar. 8:21) Bopelonomi jo bogolo jwa ga Jehofa ke jone bo tla dirang gore seno se kgonege.

¹⁹ Re na le tshiamelo ya go bolelela botlhe ba ba tla reetsang tsholofetso eno e e itumedisang e e mo go Tshenolo 21:4, 5: “[Modimo] o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.” Mme yo o dutseng mo setulong sa Bogosi e bong Jehofa, a re: “Bona! Ke dira dilo tsotlhe disha.” Gape a re: “Kwala, ka gonne mafoko ano a a ikanyega e bile a boammaaruri.” Fa re rerela batho dikgang tseno tse di molemo ka tlhagafalo, ruri re a bo re galaletsa bopelonomi jo bo sa re tshwanelang jwa ga Jehofa!