1. O ile wa ithuta dilo dife mo Baebeleng?

 A O GOPOLA dilo tse o ileng wa di ithuta fa o ne o simolola go ithuta Baebele? Gongwe o ne o gakgametse tota fa o utlwa gore Modimo o na le leina, e bile o ka tswa o ne o imologile fa o utlwa gore ga a fise batho kwa diheleng. Mme ntle le pelaelo, o ne o itumetse tota fa o utlwa gore o tla boa o bona batho ba o ba ratang ba ba tlhokafetseng le gore o tla tshela le bone mo lefatsheng la paradaise.

2. O ile wa dira diphetogo dife fa o ntse o ithuta ka Jehofa? (Baefeso 5:1, 2)

² Fa o ntse o ithuta Baebele, o ile wa rata Jehofa le go feta, mme seo se ile sa go tlhotlheletsa gore o dirise se o se ithutileng. O ile wa simolola go dirisa melaometheo ya Baebele fa o dira ditshwetso. O ile wa fetola botho jwa gago le tsela e o neng o itshwara ka yone ka gonne o batla go itumedisa Modimo. Mme fela jaaka ngwana a etsa motsadi wa gagwe yo o lorato, le wena o ile wa simolola go etsa Jehofa.​—Bala Baefeso 5:1, 2.

3. Re ka ipotsa dipotso dife?

³ Re ka nna ra ipotsa go re: ‘A ke rata Jehofa go feta kafa ke neng ke mo rata ka teng fa ke ne ke simolola go ithuta? Fa e sa le ke kolobediwa, a ke leka ka natla go etsa botho jwa ga Jehofa? A ke dira jalo segolobogolo ka go bontsha bakaulengwe le bokgaitsadi gore ke a ba rata?’ Fa o lemoga gore ga o tlhole o  rata Jehofa le batho ba bangwe jaaka pele, o se ka wa kgobega marapo. Bakeresete ba bogologolo ba ile ba diragalelwa ke se se tshwanang. Le fa go ntse jalo, Jesu ga a ka a ba tlhoboga, mme le rona ga a kitla a re tlhoboga. (Tshen. 2:4, 7) Jesu o a itse gore re ka boa ra rata Jehofa le ba bangwe ka tsela e re neng re ba rata ka yone pele.

4. Re tla tlotla ka eng mo setlhogong seno?

⁴ Mo setlhogong seno, re tla bona gore ke eng se se ka re thusang gore re rate Jehofa le ba bangwe le go feta. Gape re tla bona gore go dira jalo go tla tswela rona le ba bangwe mosola jang.

5-6. Paulo o ile a nna le mathata afe fa a ntse a direla Jehofa, mme ke eng se se mo thusitseng gore a se ka a ineela?

⁵ Moaposetoloi Paulo o ne a itumelela go direla Jehofa, mme gone o ile a nna le mathata a le mantsi. Go le gantsi o ne a tsamaya sekgala se seleele a etela diphuthego, mme go dira jalo go ne go se motlhofo. Ka dinako tse dingwe o ne a lebana le “dikotsi mo dinokeng,” mme ka dinako tse dingwe o ne a kopana le dinokwane. Gape batho ba ba neng ba mo tlhoile ba ne ba tle ba mo iteye. (2 Bakor. 11:23-27) Mo godimo ga moo, ka dinako tse dingwe bakaulengwe ba ne ba sa lebogele matsapa a a neng a a tsaya go ba thusa.​—2 Bakor. 10:10; Bafil. 4:15.

⁶ Ke eng se se thusitseng Paulo gore a tswelele a direla Jehofa? O ne a ithutile go le gontsi ka botho jwa ga Jehofa mo Dikwalong le mo dilong tse di mo diragaletseng mo botshelong. O ne a tlhatswegile pelo gore Jehofa o a mo rata. (Bar. 8:38, 39; Baef. 2:4, 5) Mme le ene o ne a rata Jehofa fela thata. Paulo o ile a bontsha gore o rata Jehofa ka go tswelela ‘a direla badumedimmogo le ene.’​—Baheb. 6:10.

7. Ke eng se se ka re thusang gore re rate Jehofa le go feta?

⁷ Go ithuta Baebele ka tlhoafalo go ka re thusa gore re rate Modimo le go feta. Fa o bala Baebele, leka go bona gore pego nngwe le nngwe e go ruta eng ka Jehofa. Ipotse go re: ‘Pego eno e bontsha jang gore Jehofa o a nthata? Nna e nthusa jang gore ke rate Jehofa?’

8. Go rapela go ka re thusa jang gore re rate Modimo le go feta?

⁸ Sengwe gape se se ka re thusang gore re rate Jehofa le go feta ke go rapela letsatsi le letsatsi, re bolelela Jehofa gore re ikutlwa jang. (Pes. 25:4, 5) Fa re dira jalo, o tla araba dithapelo tsa rona. (1 Joh. 3:21, 22) Kgaitsadi mongwe wa kwa Asia yo o bidiwang Khanh a re: “Kwa tshimologong, dilo tse ke neng ke di ithuta ka Jehofa ke tsone tse di neng di dira gore ke mo rate, mme fa ke bona a araba dithapelo tsa me, ke ne ka mo rata le go feta. Seno se ile sa ntlhotlheletsa gore ke dire dilo tse di siameng.” b

9. Ke eng se se bontshang gore Timotheo o ne a rata bakaulengwe le bokgaitsadi fela thata?

⁹ Dingwaga di se kae fa Paulo a sena go nna Mokeresete, o ile a kopana le lekawana lengwe le le bidiwang Timotheo. Timotheo o ne a rata Jehofa e bile o ne a rata batho. Paulo o ne a raya Bakeresete ba kwa Filipi a re: “Ga go na ope yo nka mo romelang yo o tshwanang le [Timotheo] yo ruri a tla lo thusang ka dilo tse lo di tlhokang.” (Bafil. 2:20) Le fa Timotheo a ne a na le bokgoni jwa go rulaganya dilo sentle le go ruta, Paulo o ne a kgatlhiwa thata ke gore Timotheo o rata bakaulengwe le bokgaitsadi. Ntle le pelaelo, bakaulengwe le  bokgaitsadi ba ne ba itumela tota fa Timotheo a ba etela.​—1 Bakor. 4:17.

10. Anna le monna wa gagwe ba ile ba bontsha jang gore ba rata bakaulengwe le bokgaitsadi?

¹⁰ Le rona re dira sotlhe se re ka se kgonang go thusa bakaulengwe le bokgaitsadi. (Baheb. 13:16) Akanya ka se Anna yo re buileng ka ene mo setlhogong se se fetileng a ileng a se dira. Nako nngwe morago ga setsuatsue, Anna le monna wa gagwe ba ile ba etela lelapa lengwe la Basupi, ba bo ba fitlhela marulelo a ntlo ya bone a senyegile. Ka jalo, diaparo tsa bone tsotlhe di ne di le leswe. Anna a re: “Re ne ra di tsaya, ra ya go di tlhatswa re bo re di aena. Le fa rona re ne re tsaya gore se re se dirileng ga se sepe se se kalo, ba ne ba itumetse tota. Fa e sa le go tloga ka letsatsi leo, re ile ra nna ditsala.” E re ka Anna le monna wa gagwe ba rata bakaulengwe le bokgaitsadi, ba ile ba ba thusa ka dilo tse ba di tlhokang.​—1 Joh. 3:17, 18.

11. (a) Go le gantsi batho ba ikutlwa jang fa re bontsha gore re a ba rata? (b) Go ya ka Diane 19:17, Jehofa o tla dira eng fa re thusa ba bangwe?

¹¹ Fa re le pelonomi e bile re bontsha ba bangwe gore re a ba rata, ba tla lemoga gore re leka go etsa Jehofa. Le fa re ka tswa re sa itse, ba lebogela tsela e re ba bontshang bopelonomi ka yone. Khanh yo re buileng ka ene mo dirapeng tse di fetileng, ga nke a lebala bokgaitsadi ba ba ileng ba mo thusa. A re: “Ke leboga tota gore go ne go na le bokgaitsadi ba ba neng ba tsamaya le nna kwa tshimong. Ba ne ba tla go ntsaya re bo re ya go ja sengwenyana, ba bo ba mpusa. Ke a itse gore go dira jalo e ne e se kgetsi e potlana, mme ba ne ba dira jalo ba itumetse.” Ka dinako tse dingwe batho ga ba kgone go re leboga fa re ba diretse sengwe. Khanh a re: “Ke eletsa e kete nka dira sengwe go leboga bokgaitsadi ba ba neng ba tlhola ba nthusa, mme ga ke itse gore ba nna kae gone jaanong. Le fa go ntse jalo, Jehofa  ene o a itse gore ba nna kae, mme ke rapelela gore a ba segofatse.” Khanh o bua nnete. Jehofa o bona sengwe le sengwe se re se dirang go thusa ba bangwe le fa se ka tswa se le sennye go le kae. O tsaya seo e le setlhabelo se re mo ntshetsang sone, e bile e le sekoloto se a tla se duelang.​—Bala Diane 19:17.

12. Bakaulengwe ba ka bontsha jang gore ba rata badumedimmogo le bone? (Bona le ditshwantsho.)

¹² Fa o le mokaulengwe, o ka dira eng go bontsha ba bangwe gore o a ba rata, e bile o ka ba thusa jang? Mokaulengwe mongwe yo mosha yo o bidiwang Jordan, o ile a botsa mogolwane mongwe gore a ka thusa jang mo phuthegong. Mogolwane yoo o ne a simolola ka go mo akgolela dilo tse a neng a setse a di dira mo phuthegong, a bo a mo naya maele a gore a ka tokafatsa kae. Ka sekai, o ile a akantsha gore a goroge ka nako gore a kgone go dumedisa ba bangwe, a akgele mo dipokanong, a ye tshimong ka metlha le gore a leke go bona gore a ka thusa ba bangwe jang. Go dirisa kgakololo eno go ile ga thusa Jordan gore a ithute go dira dilo dingwe le gore a rate bakaulengwe le bokgaitsadi le go feta. O ile a ithuta gore mokaulengwe ga a simolole go thusa batho fa e nna motlhanka wa bodiredi.​—1 Tim. 3:8-10, 13.

13. Go rata Jehofa le batho ba bangwe go ile ga thusa jang Christian gore e nne mogolwane gape?

¹³ Fa e le gore o kile wa nna motlhanka wa bodiredi kgotsa mogolwane, itse gore Jehofa o gopola tiro e o neng o mo direla yone mo nakong e e fetileng, e bile o a itse gore o ne o e dira ka gonne o mo rata. (1 Bakor. 15:58) Gape Jehofa o bona dilo tse o di dirang gone jaanong go bontsha gore o a mo rata le gore o rata batho ba bangwe. Mokaulengwe mongwe yo o bidiwang Christian o ne a utlwile botlhoko tota fa a ne a sa tlhole a tshwanelega go nna mogolwane. A re: “Ke ne ka ipolelela gore  ke tlile go dira sotlhe se nka se kgonang go tswelela ke direla Jehofa le fa ke sa tlhole ke le mogolwane.” Fa nako e ntse e tsamaya, o ne a nna mogolwane gape. A re: “Ke ne ke ipotsa gore a ke tla kgona. Mme ke ile ka ipolelela gore fa e le gore Jehofa o ntetla gore ke boe ke nne mogolwane, ke tla dira jalo ka gonne ke a mo rata e bile ke rata bakaulengwe le bokgaitsadi.”

14. O ithuta eng mo go se Elena a ileng a se bua?

¹⁴ Gape batlhanka ba ga Jehofa ba rata baagelani ba bone. (Math. 22:37-39) Ka sekai, kgaitsadi mongwe wa kwa Georgia yo o bidiwang Elena a re: “Kwa tshimologong, ke ne ke rerela ba bangwe ka gonne ke rata Jehofa. Mme fa tsela e ke mo ratang ka yone e ntse e oketsega, ke ile ka simolola go rata batho. Ke ne ke ipotsa gore ba ka tswa ba na le mathata afe le gore ba ka kgatlhegela go tlotla ka eng. Go dira jalo go ile ga ntlhotlheletsa gore ke batle go ba thusa.”​—Bar. 10:13-15.

15-16. Jaaka re bona mo ditshwantshong, Jehofa o tla re segofatsa jang fa re rata ba bangwe?

¹⁵ Fa re rata bakaulengwe le bokgaitsadi, seo se tswela ba bangwe mosola. Ka sekai, fa bolwetse jwa COVID-19 bo sena go simologa, mokaulengwe mongwe yo o bidiwang Paolo le mosadi wa gagwe ba ile ba ruta bokgaitsadi bangwe ba ba godileng gore ba ka dirisa jang didirisiwa tsa ileketeroniki go rerela ba bangwe. Kgaitsadi mongwe yo a neng a thatafalelwa ke go dirisa mokgwa ono wa go rera o ile  a feleletsa a atlegile. O ile a kgona go laletsa ba masika a gagwe kwa Segopotsong, mme ba le 60 ba ile ba kgona go lebelela thulaganyo ya Segopotso. Se Paolo le mosadi wa gagwe ba ileng ba se dira se ile sa tswela kgaitsadi yono le ba masika a gagwe mosola. Moragonyana kgaitsadi yoo o ile a kwalela Paolo a re: “Re leboga tota go bo o ile wa re thusa. Eleruri Jehofa o a re rata, mme re lebogela matsapa a gago fela thata.”

¹⁶ Paolo o ile a ithuta gore selo sa botlhokwa ga se gore o na le bokgoni kgotsa kitso e e kana kang, mme ke gore o rate batho ba bangwe. A re: “Nkile ka bo ke le molebedi wa potologo. Le fa bakaulengwe le bokgaitsadi ba sa gopole dipuo tse ke ileng ka di neela, ke a itse gore ba sa ntse ba gopola dilo tse ke ba diretseng tsone.”

17. Go rata ba bangwe go tla tswela bomang mosola?

¹⁷ Fa re rata ba bangwe, seno se ka re tswela mosola ka ditsela tse re neng re sa di lebelela. Mokaulengwe mongwe wa kwa New Zealand yo o bidiwang Jonathan o ile a bona boammaaruri jwa seo. Letsatsi lengwe ka Matlhatso, o ile a bona mokaulengwe mongwe wa mmulatsela a rera a le nosi. Jonathan o ile a dira tshwetso ya gore o tla nna a tsamaya le mokaulengwe yoo mo tshimong ka Matlhatso. Ka nako eo o ne a sa itse gore go dira jalo le ene go tla mo tswela mosola. A re: “Boammaaruri ke gore, ke ne ke sa rate go ya tshimong. Mme mokaulengwe yono o ne a ruta monate e bile o ne a atlega mo tshimong. Seno se ile sa dira gore ke simolole go rata tshimo. Re ne ra nna ditsala, mme o ne a nthusa gore ke atamalane le Jehofa le gore ke itumelele bodiredi.”

18. Jehofa o batla gore re dire eng?

¹⁸ Jehofa o batla gore re mo rate re bo re rate le ba bangwe. Jaaka re ithutile, re ka rata Jehofa le go feta fa re bala Lefoko la gagwe, re akanyetsa kwa teng ka lone, e bile re bua le ene ka metlha. Re ka rata bakaulengwe le bokgaitsadi le go feta fa re ba thusa ka dilo tse ba di tlhokang. Fa re dira dilo tseno, re tla atamalana thata le Jehofa le bakaulengwe le bokgaitsadi ba rona. Mme se se itumedisang ke gore re tla nna ditsala go ya go ile!