1. Batho ba le bantsi ba ba neng ba phuthegile ba ne ba bolelelwa gore ba dire eng?

BANNA le basadi ba le bantsi ba ba tswang mo dinageng tse dintsi e bile ba bua dipuo tse di farologaneng, ba ne ba phuthegile mmogo. Go ne ga direga sengwe se se kgatlhang mo letsatsing leo. Bajuda bangwe ba ne ba simolola go bua dipuo tsa batho ba ba neng ba etile! Le fa seno se ne se gakgamatsa, se Bajuda bao ba neng ba se bua le se moaposetoloi Petere a neng a ba bolelela sone se ne se kgatlha tota. Sengwe sa dilo tse ba neng ba bua ka tsone ke gore ba ne ba ka bolokiwa fa ba ka dumela mo go Jesu Keresete. Batho bao ba ne ba amiwa thata ke molaetsa oo. E bile o ne wa ba tlhotlheletsa gore ba botse ba re: “Re tla dirang?” Petere o ne a ba raya a re: “A mongwe le mongwe wa lona a kolobediwe.”—Dit. 2:37, 38.

2. Re tlile go sekaseka eng mo setlhogong seno? (Bona setshwantsho se se mo khabareng.)

² Go ne ga direga sengwe se se kgatlhang. Mo go lone letsatsi leo, batho ba ka nna 3 000 ba ne ba kolobediwa gore e nne barutwa ba ga Keresete. Eno e ne e le tshimologo ya tiro e kgolo ya go dira batho barutwa, e Jesu a laetseng balatedi ba gagwe gore ba e dire. Balatedi ba ga Jesu ba sa ntse ba dira tiro eo le gompieno. Mme gone, rona ga re ka ke ra thusa motho ka diura di le mmalwanyana fela gore a kolobediwe. Go ka tsaya dikgwedi kgotsa ngwaga tota le e leng go feta go thusa motho gore a kolobediwe. Fa e le gore go na le mongwe yo o ithutang Baebele le ene, o a itse gore go thusa motho gore e nne morutwa wa ga Keresete go tsaya nako. Mo setlhogong seno, re tlile go sekaseka se o ka se dirang go thusa motho yo o ithutang le ene gore a kolobediwe.

3. Mathaio 28:19 le 20 e bontsha gore motho yo o ithutang Baebele o tshwanetse go dira eng gore a kolobediwe?

³ Pele motho a ka kolobediwa, o tshwanetse go dirisa se a se ithutang mo Baebeleng. (Bala Mathaio 28:19, 20.) Fa motho yo o ithutang le ene a dirisa se a se ithutang, o tla tshwana le “monna yo o botlhale” yo Jesu a buang ka ene mo setshwantshong sengwe, yo o neng a epa a bo a ya kwa tlase gore a age ntlo ya gagwe mo lefikeng. (Math. 7:24, 25; Luke 6:47, 48) Re ka thusa jang motho yo o ithutang Baebele gore a dirise se a se ithutang? A re tlotleng ka dikakantsho tse tharo tse re ka di dirisang.

4. Re ka thusa jang motho yo o ithutang Baebele gore a tshwanelegele go kolobediwa? (Gape bona lebokoso le le reng “ Thusa Motho yo o Ithutang le Ene Gore a Ipeele Mekgele le Gore a e Fitlhelele.”)

⁴ Thusa motho yo o ithutang le ene gore a ipeele mekgele. Goreng o tshwanetse go dira jalo? Akanya ka sekai seno: A re re o ipaakanyetsa go tsaya loeto lo loleele, o ka nna wa rulaganya gore o eme mo mafelong mangwe a a kgatlhang. Seo se ka go thusa gore o se ka wa kgobiwa marapo ke loeto loo lo loleele. Ka tsela e e tshwanang, fa motho yo o ithutang Baebele le ene a ipeela mekgele gone jaanong a bo a e fitlhelela, a ka kgona go lemoga gore o tla kgona go fitlhelela mokgele wa go kolobediwa. Dirisa karolo ya “Leka go Dira Seno” e e mo bukeng ya Itumelele go Tshelela Ruri! go thusa motho yo o ithutang le ene gore a gatele pele. Kwa bofelong jwa thuto nngwe le nngwe, tlotlang gore mokgele o a ipeetseng one o ka mo thusa jang gore a dirise se a se ithutileng. Fa e le gore go na le mokgele o mongwe o o akanyang gore motho yo o ithutang le ene a ka ipeela one, o kwale mo karolong ya “Gape o ka Dira Seno.” Nna o dirisa karolo eno go tlotla le motho yo o ithutang le ene ka mekgele e a ka e fitlhelelang gone jaanong le e a tla e fitlhelelang mo nakong e e tlang.

5. Mo go Mareko 10:17 go ya go 22, Jesu o ne a re monna yo o humileng a dire eng, mme ka ntlha yang?

 ⁵ Thusa motho yo o ithutang le ene gore a dire diphetogo mo botshelong. (Bala Mareko 10:17-22.) Jesu o ne a itse gore go ne go tla nna thata gore monna yo o humileng a rekise dilo tsotlhe tse a neng a na le tsone. (Mar. 10:23) Le fa go ntse jalo, Jesu o ne a bolelela monna yoo gore a dire phetogo eo e kgolo mo botshelong jwa gagwe. Ka ntlha yang? Ka gonne o ne a mo rata. Ka dinako dingwe, re ka nna ra se ka ra kgothaletsa motho yo re ithutang le ene gore a dirise se a se ithutang ka gonne re akanya gore ga a ise a siamele go dira diphetogo. Go ka tsaya nako gore batho ba tlogele mekgwa ya bogologolo mme ba apare botho jo bosha. (Bakol. 3:9, 10) Mme gone, fa o sa diege go bua le motho yo o ithutang le ene, o tla dira diphetogo tse di tlhokegang ka bonako. Fa o tlotla le ene ka diphetogo tse a tshwanetseng go di dira, o bontsha gore o amega ka ene.—Pes. 141:5; Dia. 27:17.

6. Goreng re tshwanetse go dirisa dipotso tse di fatang maikutlo?

⁶ O ka botsa motho yo o ithutang Baebele le ene dipotso tse di fatang maikutlo gore o utlwe gore o akanya eng ka kgang e lo tlotlang ka yone. Gape o ka dirisa dipotso tseo go utlwa gore o tlhaloganya eng le gore o dumela eng. Go dira jalo go tla thusa gore fa nako e ntse e tsamaya, lo kgone go tlotla ka dilo tse go seng motlhofo go tlotla ka tsone. Buka ya Itumelele go Tshelela Ruri! e na le dipotso tse dintsi tse di fatang maikutlo. Ka sekai, thuto 04 e na le potso e e reng: “O akanya gore Jehofa o ikutlwa jang fa o dirisa leina la gagwe?” Mme thuto 09 yone e na le potso e e reng: “O ka rata go rapelela eng?” Kwa tshimologong, motho yo o ithutang le ene a ka tlhoka nako ya go akanya gore a ka araba jang dipotso tseo tse di fatang maikutlo. O ka mo ruta gore a dirise ditemana le ditshwantsho tse di tsamaisanang le se lo tlotlang ka sone.

7. Re ka dirisa maitemogelo a batho ba bangwe jang go thusa batho ba re ithutang le bone?

⁷ Fa motho yo o ithutang le ene Baebele a sena go tlhaloganya gore o tshwanetse go dira eng, dirisa maitemogelo a batho ba bangwe go mo thusa go bona gore a ka dira seo jang. Ka sekai, fa e le gore motho yo o ithutang le ene ga a tle dipokanong, o ka nna wa mmontsha bidio ya Jehofa o Ile a Ntlhokomela, e e mo karolong ya “Dintlha Tse Dingwe” e e mo thuto 14. O ka fitlhela maitemogelo a batho ba bangwe mo dithutong tse dintsi tsa buka ya Itumelele go Tshelela Ruri! mo karolong ya “Ithute mo go Oketsegileng” kgotsa ya “Dintlha Tse Dingwe.” * Nna kelotlhoko gore o se ka wa bapisa motho yo o ithutang le ene le motho yo mongwe gongwe o re, “Fa a kgonne, le wena o ka kgona.” Letla moithuti gore e nne ene a lemogang ntlha eo. Gatelela dintlha tsa botlhokwa tse di thusitseng motho yo go buiwang ka ene mo bidiong gore a dirise se a se ithutileng mo Baebeleng. Gongwe o ka umaka temana e e mo thusitseng kgotsa sengwe se a se dirileng. Fa go kgonega, gatelela tsela e Jehofa a thusitseng motho yoo ka yone.

8. Re ka thusa jang batho ba re ithutang le bone gore ba rate Jehofa?

⁸ Thusa motho yo o ithutang le ene gore a rate Jehofa. O ka dira seo jang? Batla ditshono tsa go thusa motho yo o ithutang le ene gore a ithute mo go oketsegileng ka dinonofo tsa ga Jehofa. Mo thuse go tlhaloganya gore Jehofa ke Modimo yo o itumetseng yo o emang batho ba ba mo ratang nôkeng. (1 Tim. 1:11; Baheb. 11:6)  Bontsha moithuti gore go dirisa tshedimosetso eo go ka mo thusa jang, o bo o mo tlhalosetsa gore eno ke tsela e Jehofa a mmontshang ka yone gore o a mo rata. (Isa. 48:17, 18) Fa tsela e motho yoo a ratang Jehofa ka yone e ntse e gola, o tla tlhotlheletsega go dira diphetogo dipe fela tse a tlhokang go di dira.—1 Joh. 5:3.

9. Molaomotheo o o mo go Mareko 10:29 le 30, o ka thusa motho jang go ithontsha dilo dingwe gore a kgone go kolobediwa?

⁹ Gore moithuti a kolobediwe, o tshwanetse go ithontsha dilo dingwe. Fela jaaka monna yo o humileng yo re mo umakileng pelenyana, bangwe ba batho ba re ithutang le bone ba ka tshwanelwa ke go tlhopha go latlhegelwa ke dilo tse ba nang le tsone. Fa e le gore tiro ya bone ya boitshediso ga e dumalane le melaometheo ya Baebele, ba ka tshwanelwa ke go batla tiro e nngwe. Ba le bantsi ba ka tshwanelwa ke go tlogela ditsala tse di sa rateng Jehofa. Ba bangwe ba ka nna ba tlogelwa ke ba malapa a bone ba ba sa rateng Jehofa. Jesu o ne a itse gore go ne go ka se nne motlhofo gore batho ba bangwe ba dire diphetogo tseo. Le fa go ntse jalo, o ne a solofetsa gore ba ba mo latelang ga ba kitla ba swabisiwa. Ba ne ba tla segofadiwa ka lelapa le le ratang Jehofa. (Bala Mareko 10:29, 30.) O ka thusa jang motho yo o ithutang le ene Baebele gore a solegelwe molemo ke mpho eno e ntle?

10. O ithuta eng mo maitemogelong a ga Manuel?

¹⁰ Nna tsala ya motho yo o ithutang le ene. Go botlhokwa gore o bontshe motho yo o ithutang le ene gore o a mo kgathalela. Goreng? Utlwa gore Manuel, yo o nnang kwa Mexico a re go ne ga direga eng fa a ne a ithuta Baebele. A re: “Ka metlha pele re ithuta, motho yo o neng a nthuta o ne a mpotsa gore go ntse go ya jang. O ne a nthusa gore ke phuthologe e bile ke mmulele mafatlha. Ke ne ka lemoga gore ruri o a nkgathalela.”

11. Batho ba re ithutang le bone Baebele ba ka solegelwa molemo jang fa re fetsa nako le bone?

¹¹ Fetsa nako le batho ba o ithutang le bone  fela jaaka Jesu a ne a fetsa nako le balatedi ba gagwe. (Joh. 3:22) Fa maemo a letla, laletsa motho yo o ithutang le ene yo o gatetseng pele gore lo tle go nwa tee kgotsa go ja dijo mmogo kgotsa gore a tle go leba nngwe ya dithulaganyo tsa kgwedi le kgwedi tsa JW Broadcasting^® le wena. A ka itumelela seo thata ka nako ya fa ba malapa le ditsala ba keteka malatsi a boikhutso a a sa dumalaneng le Dikwalo mme ene a jewa ke bodutu. Kazibwe, yo o nnang kwa Uganda a re: “Motho yo a neng a nthuta Baebele o nthutile go le gontsi ka Jehofa, mme gape ke solegetswe molemo ke go fetsa nako le ene. Ke kgonne go lemoga gore Jehofa o tlhokomela batho ba gagwe le gore ba itumetse. Ke ne ke batla go tshela botshelo jo bo ntseng jalo.”

12. Ke eng fa re tshwanetse go tsamaya le baboledi ba ba farologaneng fa re ya go tshwara thuto?

¹² Kopa baboledi ba ba farologaneng gore ba tsamaye le wena fa o ya go tshwara thuto. Ka dinako dingwe re ka bona go le motlhofo go tsamaya re le nosi kgotsa go tsamaya le mmoledi a le mongwe nako le nako. Mme gone, motho yo re ithutang le ene a ka solegelwa molemo thata fa re nna re tla le baboledi ba ba farologaneng. Dmitrii, yo o nnang kwa Moldova a re: “Mmoledi mongwe le mongwe yo o neng a tla le motho yo o nthutang, o ne a tlhalosa dilo ka tsela e e kgatlhang. Seo se ne sa nthusa go bona ditsela tse dingwe tsa go dirisa se ke se ithutang. E bile ke ne ke sa tshoga lekgetlo la ntlha fa ke ya dipokanong ka gonne ke ne ke setse ke kopane le bakaulengwe le bokgaitsadi ba le bantsi.”

13. Ke ka ntlha yang fa re tshwanetse go thusa motho yo re ithutang le ene gore a tle dipokanong?

¹³ Thusa motho yo o ithutang le ene gore a tle dipokanong. Goreng? Ka gonne Jehofa o laela gore batho ba ba mo obamelang ba kopane mmogo; eo ke karolo ya kobamelo ya rona. (Baheb. 10:24, 25) Mo godimo ga moo, bakaulengwe le bokgaitsadi ba nna jaaka lelapa la rona. Fa re na le bone kwa dipokanong, go nna jaaka e kete re iketlile mmogo kwa lapeng e bile re ja dijo tse di monate. Fa o thusa motho yo o ithutang le ene gore a tle dipokanong, o mo thusa gore a tseye kgato e nngwe e e botlhokwa e e tla dirang gore a kolobediwe. Mme gone, go ka tswa go se motlhofo gore a dire jalo. Buka ya Itumelele go Tshelela Ruri! e ka mo thusa jang gore a fenye dikgoreletsi dipe fela tse di dirang gore a se ka a tla dipokanong?

14. Re ka rotloetsa jang motho yo re ithutang le ene gore a tle dipokanong?

¹⁴ Dirisa thuto 10 ya buka ya Itumelele go Tshelela Ruri! go kgothaletsa motho yo o ithutang le ene gore a tle dipokanong. Baboledi ba ba nang le maitemogelo ba ba neng ba kopilwe gore ba lekeletse thuto eno pele buka eno e gololwa, ba ne ba kgona go thusa batho ba ba ithutang le bone gore ba tle dipokanong. Mme gone, o se ka wa emela gore lo fitlhe mo thuto 10 pele o mo laletsa gore a tle dipokanong. Mo laletse di tloga fela mme o nne o dira jalo ka metlha. Batho ba re ithutang le bone ba na le dikgoreletsi tse di sa tshwaneng. Ka jalo, leka go bona gore motho yo o ithutang le ene o tlhoka eng le gore o ka mo thusa jang. O se ka wa kgobega marapo fa o bona go feta lobaka a ise a tle dipokanong. Nna pelotelele mme o nne o mo rotloetsa gore a tle dipokanong.

15. Ke dilo dife tse di ka dirang gore motho yo re ithutang le ene a boife?

¹⁵ A o sa ntse o gopola kafa o neng o boifa go nna Mosupi wa ga Jehofa ka gone? Gongwe o ne o akanya gore ga o ka ke wa kgona go rera ka ntlo le ntlo. Kgotsa gongwe o ne o boifa gore ba lelapa le ditsala ba tla go ganetsa. Fa e le gore go ntse jalo, o ka kgona go tlhaloganya gore motho yo o ithutang le ene o ikutlwa jang. Jesu o ne a itse gore go a kgonega gore motho a boife. Le  fa go ntse jalo, o ne a kgothaletsa balatedi ba gagwe gore ba se ka ba letla gore poifo e ba thibele go direla Jehofa. (Math. 10:16, 17, 27, 28) Jesu o ne a thusa balatedi ba gagwe jang gore ba fenye poifo? Mme o ka etsa sekao sa gagwe jang?

16. Re ka thusa jang motho yo re ithutang le ene gore a bolelele ba bangwe se a se ithutang?

¹⁶ Nna o thusa motho yo o ithutang le ene gore a bolelele ba bangwe se a se ithutang. Barutwa ba ga Jesu ba ka tswa ba ne ba tshogile fa a ne a ba laela gore ba ye go rera. Le fa go ntse jalo, Jesu o ne a ba thusa ka go ba bolelela gore ba rere kwa kae le gore ba reng. (Math. 10:5-7) O ka etsa Jesu jang? Thusa motho yo o ithutang le ene gore a lemoge gore a ka rera kwa kae. Ka sekai, mmotse gore a go na le mongwe yo a mo itseng yo a ka solegelwang molemo ke thuto nngwe e Baebele e e rutang. Go tswa foo, mmontshe tsela e e motlhofo e a ka e dirisang go bolelela motho yoo ka thuto eo. Gongwe lo ka ikatisa lo dirisa karolo ya “Batho Bangwe ba Re” le ya “Mongwe a ka Botsa a Re” tse di mo bukeng ya Itumelele go Tshelela Ruri! Fa lo ntse lo dira jalo, thusa motho yo o ithutang le ene gore a dirise Baebele go araba ka tsela e e motlhofo le e e botlhale.

17. Re ka dirisa jang Mathaio 10:19, 20, 29 go ya go 31 fa re thusa motho yo re ithutang le ene gore a ikanye Jehofa?

¹⁷ Thusa motho yo o ithutang le ene gore a ikanye Jehofa. Jesu o ne a tlhomamisetsa barutwa ba gagwe gore Jehofa o ne a tla ba thusa ka gonne o ne a ba rata. (Bala Mathaio 10:19, 20, 29-31.) Bolelela moithuti gore le ene Jehofa o tla mo thusa. O ka mo thusa gore a ikanye Jehofa ka go umaka mekgele ya gagwe fa o rapela le ene. Franciszek, yo o nnang kwa Poland a re: “Gantsi motho yo a neng a nthuta Baebele o ne a umaka mekgele ya me fa a rapela. Fa ke bona tsela e Jehofa a neng a araba dithapelo tsa gagwe ka yone, le nna ke ne ka simolola go rapela. Ke ile ka lemoga gore Jehofa o a nthusa fa ke ne ke kopa malatsi kwa tirong ya me e ntšha gore ke kgone go nna gone kwa dipokanong le kwa kopanong.”

18. Jehofa o ikutlwa jang ka tiro e baboledi ba e dirang?

¹⁸ Jehofa o amega thata ka batho ba re ithutang le bone Baebele. O a itse gore baboledi ba dira ka natla go thusa batho gore ba atamalane le ene e bile o a ba rata ka gonne ba dira jalo. (Isa. 52:7) Fa e le gore gone jaanong ga go na motho yo o ithutang Baebele le ene, o ka kgona go thusa batho ba ba ithutang Baebele gore ba kolobediwe ka go tsamaya le baboledi ba bangwe fa ba ya go tshwara dithuto.