Mo setlhogong se se fetileng re ithutile gore Modimo o tlile go fedisa batho ba ba bosula mo lefatsheng, le mathata otlhe a a mo go lone. Ga re belaele gore seno se tlile go direga. Goreng? Ka gonne Lefoko la Modimo Baebele le a re:

“Lefatshe le a feta.”​—1 JOHANE 2:17.

Re a itse gore go tlile go nna le ba ba falolang ka gonne temana e e fa godimo ya Baebele e a re:

“Motho yo o dirang thato ya Modimo o ntse ka bosakhutleng.”

Ka jalo, fa re batla go falola re tshwanetse go dira thato ya Modimo. Fa re batla go itse gore thato ya Modimo ke eng, re tshwanetse go mo itse pele.

Jesu o ne a re: “Ba tshwanetse go go itse, wena Modimo yo o esi wa boammaaruri.” (Johane 17:3) E le gore re falole le gore re tshelele ruri, re tshwanetse ‘go itse’ Modimo. Go mo itse ga se kgang ya go itse dilo di le mmalwa fela ka ene. Re tlhoka go nna ditsala tsa gagwe. Fa re batla go nna tsala le mongwe re tshwanetse go fetsa nako le ene. Go ntse fela jalo le ka Modimo. Akanya ka dilo di le mmalwa tse re di ithutang mo Baebeleng tse di ka re thusang go nna ditsala tsa gagwe.

Re tlhoka go nna re ja dijo gore re kgone go tshela. Mme Jesu o ne a re: “Motho ga a tshwanela go tshela ka senkgwe fela, mme o tshwanetse go tshela ka lefoko lengwe le lengwe le le tswang mo molomong wa ga Jehofa.”​—Mathaio 4:4.

Gompieno, Jehofa o bua le rona a dirisa Baebele. Fa re ithuta buka eno e e sa tshwaneng le epe, re ithuta gore Modimo o ile a dira eng, o dira eng gone jaanong le gore ke eng se a tlileng go se dira.

Ke eng se o ka se dirang fa o leka go ikobela ditaelo tsa Modimo mme go le thata go tlogela go dira dilo tse Modimo a re bolelelang gore ga di a siama? Fa go le jalo, go itse Modimo sentle ke gone go ka go thusang.

Akanya ka mosadi mongwe yo re tla mmitsang Sakura, yo o ne a rata go dira boitsholo jo bo sa siamang jwa tlhakanelodikobo. Fa a simolola go ithuta Baebele, o ne a ithuta gore o tshwanetse go “Tshaba boitsholo jo bo sa siamang jwa tlhakanelodikobo.” (1 Bakorintha 6:18) Sakura o ne a rapela Modimo, a mo kopa gore a mo thuse go tlogela boitsholo jono jo bo sa siamang. Mme o ne a sa ntse a tlhoka go lwa le dikeletso tseo tsa gagwe. A re “Fa ke simolola go akanya ka dilo tseno ke rapela Jehofa ke mo kopa gore a nthuse ka gonne ke itse gore nka se kgone go fenya dikakanyo tseo ka bonna fela. Go rapela go dirile gore ke atamalane le Jehofa.” Fela jaaka Sakura, batho ba le bantsi ba ithuta ka Modimo. O ba naya maatla a gore ba kgone go fetola matshelo a bone le gore ba tshele ka tsela e e mo itumedisang.​—Bafilipi 4:13.

Fa o ntse o ithuta ka Modimo le ene o tla go itse, o bo o nna tsala ya gagwe. (Bagalatia 4:9; Dipesalema 25:14) Mme seo se tla dira gore o kgone go tshela kwa lefatsheng le lesha. Go tla bo go ntse jang kwa lefatsheng le lesha? Re tla araba potso eno mo setlhogong se se latelang.