Go ise go ye kae, Bogosi Jwa Modimo bo tlile go busa lefatshe mme batho ba ba tlileng go tshela mo go lone ba tlile go itumelela go dira ditiro tse di ba itumedisang. Modimo o tlhomile Jesu Keresete gore a buse lefatshe. Gompieno babusi ba le bantsi ga ba kgathalele batho ba ba ba busang, mme Jesu ene o farologane ka gonne ka metlha dilo tse a di dirang di solegela batho molemo. Sengwe le sengwe se a tla bong a se dira se tla bo se tlhotlhelediwa ke lorato ka gonne o bonolo, o kutlwelobotlhoko e bile ga a tlhaole batho.​—Isaia 11:4.

Batho ga ba kitla ba tlhola ba tlhaolana ka ditso le gore ba tswa kwa dinageng dife. Botlhe fela ba tla bo ba utlwana. (Tshenolo 7:9, 10) Batho botlhe ba ba tla bong ba tshela mo lefatsheng ba tla bo ba rata Modimo e bile ba ratana, gape ba tla diragatsa maikaelelo a Modimo a go tswa kwa tshimologong, a go dira gore lefatshe le nne lentle.​—Dipesalema 115:16.

Fa Bogosi Jwa Modimo bo busa mo lefatsheng Mmopi wa dilo tsotlhe o tlile go laola maemo a bosa. (Dipesalema 24:1, 2) Jesu o ne a bontsha gore Modimo o mo neile maatla fa a ne a kgalemela phefo. (Mareko 4:39, 41) Fa Keresete a busa ga go na ope yo o tla tlholang a tshaba masetlapelo a tlholego. Fa Bogosi Jwa Modimo bo busa re tla bo re tshela ka kagiso le diphologolo e bile re tla bo re tshela mo lefatsheng le lentle le le le phepa.​—Hosea 2:18.

Batho ba tla nna le botsogo jo bo siameng. Ga go na ope yo o tla tsofalang, a lwala a bo a swa. (Isaia 35:5, 6) Batho ba tlile go itumelela go tshela mo lefatsheng le lentle le le le phepa fela jaaka banyalani ba ntlha ba ne ba tshela kwa tshimong ya Edene. Kwa lefatsheng le lesha, go tla nna le dijo tse dintsi fela jaaka go ne go ntse kwa Edene. (Genesise 2:9) Batho ba tla itumelela go ‘ja senkgwe sa bone ba bo ba kgora.’​—Lefitiko 26:4, 5.

Kwa lefatsheng le lesha, batho botlhe ba tla nna ka kagiso e bile ba tla dirisana sentle. Go tla bo go se na dintwa, ga go na ope yo o tla gatelelang ba bangwe, e bile batho botlhe ba tla bo ba na le dilo tse ba di tlhokang. Baebele e solofetsa gore: “Mongwe le mongwe o tla nna ka fa tlase ga setlhare sa gagwe sa morara le ka fa tlase ga setlhare sa gagwe sa mofeige, mme ga go na ope yo o tla ba tshosang.”​—Mika 4:3, 4.

Malapa otlhe a tla nna le matlo, e bile ga a kitla ba tshaba gore tsatsi lengwe a tla tlosiwa mo matlong a one. Sengwe le sengwe se re tla bong re se dira, se tla atlega. Go tla nna fela jaaka Baebele e tlhalosa, fa e re: “Ga ba kitla ba dira ka natla ba direla lefela.”​—Isaia 65:21-23.

Baebele e a re: “Lefatshe le tla bo le tletse kitso ya ga Jehofa.” (Isaia 11:9) Batho ba ba tla bong ba tshela mo lefatsheng ba tla ithuta ka botlhale jwa ga Jehofa le dilo tse a di bopileng. Ga ba kitla ba dirisetsa botlhale jwa bone go dira dibetsa kgotsa go gobatsa batho ba bangwe. (Isaia 2:4) Go na le moo, ba tla ithuta gore ba ka tshela jang ka kagiso le batho ba bangwe le gore ba ka tlhokomela jang lefatshe.​—Dipesalema 37:11.

Modimo o ile a tsaya matsapa fa a ne a bopa lefatshe gore re itumelele go tshela mo go lone. Maikaelelo a gagwe e ne e le gore batho ba tshelele ruri mo go lone. (Dipesalema 37:29; Isaia 45:18) E le gore Modimo a diragatse maikaelelo a gagwe, o tlile go “kometsa loso ka bosakhutleng.” (Isaia 25:8) Baebele e re solofetsa gore “loso lo tla bo lo sa tlhole lo le teng, e bile go tla bo go sa tlhole go na le khutsafalo kgotsa selelo kgotsa botlhoko.”(Tshenolo 21:4) Modimo o tlile go naya batho ba ba tla falolang fa a fedisa batho ba ba bosula, tshono ya go tshelela ruri, a bo a e naya le batho ba ba tla tsosiwang.​—Johane 5:28, 29; Ditiro 24:15.

 Gone jaanong, batho ba le bantsi ba setse ba ipaakanyetsa go tshela kwa lefatsheng le lesha ka gonne le gaufi. Le fa gone ba sa itekanela, ba leka go tshela ka tsela e Modimo a tla batlang gore batho ba ba tla tshelang kwa lefatsheng le lesha ba tshele ka yone. Ba dira seo jang? Ba ithuta ka Jehofa Modimo le ka yo a mo romileng e bong Jesu Keresete.​—Johane 17:3.

Fa o batla go itse gore ke eng se o tshwanetseng go se dira gore o falole fa lefatshe leno le fedisiwa le gore o kgone go tshela kwa lefatsheng le lesha, ithute Baebele mahala le Basupi ba ga Jehofa ka buka ya Itumelele go Tshelela Ruri!