1. Ke leng go ka nnang thata go direla Jehofa?

KE LENG go ka nnang thata go direla Jehofa? Fa go le thata kgotsa fa dilo di go tsamaela sentle? Fa re na le mathata, go motlhofo gore re ikaege ka Jehofa. Mme fa dilo di re tsamaela sentle, re ka nna ra lebala gore go direla Jehofa go botlhokwa. Jehofa o ne a tlhagisa Baiseraele gore seno se ka nna sa ba diragalela.—Dute. 6:10-12.

2. Kgosi Asa o ile a dira eng?

² Kgosi Asa o ile a bontsha gore o botlhale ka gonne o ne a ikaegile ka Jehofa. O ne a direla Jehofa fa go ne go le monate le fa dilo di ne di sa mo tsamaele sentle. Asa o ne a direla Jehofa ka pelo ya gagwe yotlhe go tloga fela a sa ntse a le mosha. (1 Dikg. 15:14) O ile a bontsha gore o ne a ineetse mo go Jehofa ka pelo yotlhe fa a ne a fedisa kobamelo ya medingwana kwa Juda. Baebele ya re o ne a tlosa “dibeso tsa seeng le mafelo a a kwa godimo a ba a thuba dipilara tse di boitshepo a ba a rema dikota tse di boitshepo.” (2 Ditir. 14:3, 5) Gape o ne a tlosa mmêmogoloagwe e bong Maaka mo maemong a gagwe a segosi. Ka ntlha yang? Ka gonne o ne a dira gore batho ba le bantsi ba obamele medingwana.—1 Dikg. 15:11-13.

3. Re tla tlotla ka eng mo setlhogong seno?

³ Asa ga a ka a senya medingwana fela. Gape o ne a thusa batho ba Juda gore ba boe ba obamele Jehofa gape. Jehofa o  ne a segofatsa Asa le Bajuda ka go dira gore go nne le kagiso * mo lefatsheng la bone. Go ne ga feta dingwaga di le lesome ‘lefatshe le se na matshwenyego.’ (2 Ditir. 14:1, 4, 6) Mo setlhogong seno, re tla bona gore Asa o ile a dira eng ka nako ya fa go ne go se na dintwa. Go tswa foo, re tla bona gore Bakeresete ba lekgolo la ntlha bone ba ile ba dira eng fa dilo di ne di ba tsamaela sentle. Kwa bofelong re tla tlotla ka potso eno: Fa e le gore kwa nageng e o nnang kwa go yone lo sa ntse lo na le kgololesego ya go obamela Jehofa, o dirisa kgololesego eo jang?   

4. Go ya ka 2 Ditiragalo 14:2, 6 le 7 Asa o ile a dira eng ka nako ya fa go ne go na le kagiso?

⁴ Bala 2 Ditiragalo 14:2, 6, 7. Asa o ne a bolelela batho ba Juda gore Jehofa ke ene a ba neileng “boikhutso mo tikologong yotlhe” ya bone. Mme gone, o ne a sa tseye gore eo e ne e le nako ya gore a tlhabe kgobe ka mmutlwa. Go na le moo, o ne a aga metse, ditora le dikgoro. O ne a raya batho ba Juda a re: “Lefatshe le sa ntse le le mo taolong ya rona.” O ne a raya jang? O ne a raya gore go ne go sena ope yo o ba tshwenyang, ka jalo, ba ne ba ka kgona go aga ba gololesegile. O ile a kgothaletsa batho gore ba le aramele le sa ntse le ba tlhabetse.

5. Goreng Asa a ile a nonotsha masole a gagwe?

⁵ Gape Asa o ile a dirisa nako eo go nonotsha masole a gagwe. (2 Ditir. 14:8) A seno se raya gore o ne a sa tshepe Jehofa? Le eseng! Go na le moo, o ne a itse gore ke boikarabelo jwa gagwe go thusa batho gore ba ipaakanyetse mathata a ba neng ba ka kopana le one mo nakong e e tlang. Gape o ne a itse gore ga ba kitla ba nna mo kagisong go ya go ile, mme go ne ga nna fela jalo.

6. Bakeresete ba lekgolo la ntlha la dingwaga ba ile ba dira eng ka nako ya fa ba ne ba sa bogisiwe?

⁶ Le fa gone Bakeresete ba lekgolo la ntlha ba ne ba bogisiwa, ka dinako tse dingwe, dilo di ne di ba tsamaela sentle. Ba ne ba dirisa nako eo jang? Ba ne ba dira ka natla mo tirong ya go rera dikgang tse di molemo e bile ba ne ba tlhomile mogopolo mo tirong eo. Ka ntlha ya seo, ba ne ba nna ba oketsega. Seno se ne se bontsha gore Jehofa o segofatsa tiro ya bone ya go rera.—Dit. 9:26-31.

7-8. Paulo le Bakeresete ba bangwe ba ile ba dira eng fa ba ne ba bulegetswe ke tshono ya go rera? Tlhalosa.

⁷ Bakeresete bao ba ne ba dirisa tshono nngwe le nngwe go rerela batho dikgang tse di molemo. Ka sekai, fa Paulo a ne a lemoga gore batho ba le bantsi kwa Efeso ba kgatlhegela dikgang tse di molemo, o ne a sala kwa motseng oo gore a kgone go ba rerela.—1 Bakor. 16:8, 9.

⁸ Gape Paulo le Bakeresete ba bangwe ba ile ba kgona go rerela batho ba le bantsi ka ngwaga wa 49, fa baaposetoloi le bagolwane ba kwa Jerusalema ba sena go rarabolola kgang ya go rupa. (Dit. 15:23-29) Fa Bakeresete botlhe ba sena go bolelelwa ka tshwetso e baaposetoloi le bagolwane ba neng ba e dirile, ba ile ba ntsha ga tshwene mo tirong ya go rera “dikgang tse di molemo tsa lefoko la ga Jehofa.” (Dit. 15:30-35) Go ne ga felela jang? Baebele ya re: “Diphuthego tsa tswelela di nitamisiwa mo tumelong e bile di oketsega ka palo letsatsi le letsatsi.”—Dit. 16:4, 5.

9. Maemo a ntse jang mo dinageng di le dintsi, mme re tshwanetse go ipotsa potso efe?

⁹ Mo dinageng di le dintsi, batlhanka ba ga Jehofa ba sa ntse ba na le kgololesego ya go rera. A go ntse jalo le mo nageng ya lona? Fa go le jalo, ipotse jaana: ‘Ke dirisa jang nako ya me e re ka re sa ntse re na le kgololesego ya go rera?’ Re tshela mo dinakong tse di kgatlhang ka gonne re dira ka natla mo tirong e e seng kana ka sepe ya go rera le go ruta. (Mar. 13:10) Go na le dilo di le dintsi tota tse re ka di dirang mo tirelong ya ga Jehofa.

10. 2 Timotheo 4:2 e re kgothaletsa go dira eng?

¹⁰ Re tshwanetse go dira eng fa re sa ntse re na le kgololesego ya go rera? (Bala 2 Timotheo 4:2.) Leka go bona gore a wena kgotsa mongwe mo lelapeng la lona a ka kgona go dira diphetogo a bo a oketsa tirelo ya gagwe gongwe ka go nna mmulatsela wa ka metlha. Nnete fela ke gore, eno ga se nako ya gore re ikgobokanyetse dikhumo ka gonne ga re kitla re tsena le tsone kwa lefatsheng le lesha.—Dia. 11:4; Math. 6:31-33; 1 Joh. 2:15-17.   

11. Bakaulengwe le bokgaitsadi bangwe ba ile ba dira eng gore ba kgone go thusa batho gore ba ithute ka Jehofa?

¹¹ Bakaulengwe le bokgaitsadi bangwe ba ile ba ithuta puo e nngwe gore ba kgone go thusa batho gore ba ithute ka Jehofa. Phuthego ya Modimo e re diretse dikgatiso ka dipuo di le dintsi mme dikgatiso tseno di re thusa fela thata mo tirong ya go rera. Ka sekai, ka 2010 dikgatiso tsa rona di ne di ranolelwa mo dipuong di ka nna 500. Mme gone jaanong, di ranolelwa mo dipuong di feta 1 000.

12. Batho ba solegelwa molemo jang fa ba utlwa molaetsa wa Bogosi ka puo e ba e antseng letseleng? Naya sekai.

¹² Batho ba ikutlwa jang fa ba ithuta ka Jehofa ka puo e ba e antseng letseleng? Kgaitsadi mongwe o ne a ya kopanong ya Se-Kinyarwanda kwa United States. Puo eo e buiwa kwa Rwanda, Congo (Kinshasa), le Uganda. Morago ga kopano o ne a re: “Ke na  le dingwaga di le 17 ke nna mo United States, mme leno ke lekgetlo la ntlha ke tlhaloganya sengwe le sengwe se se buiwang mo kopanong.” Eleruri kgaitsadi yono o ile a solegelwa molemo ke go ya kopanong ya puo e a e tlhaloganyang. A o ka kgona go ithuta puo e nngwe gore o kgone go thusa batho ba ba buang puo eo mo lefelong la lona? Gongwe mongwe mo tshimong ya lona a ka itumelela go reetsa dikgang tse di molemo fa o bua le ene ka puo ya gagwe. Fa o tsaya matsapa, o tla itumela fela thata.

13. Bakaulengwe ba kwa Russia ba ile ba dirisa kgololesego ya bone jang?

¹³ Bakaulengwe bangwe ba rona ga ba kgololesego na ya go rera ka gonne puso e thibetse tiro ya rona ya go rera mo dinageng tsa bone. Ka sekai, go ne ga feta dingwaga di le dintsi batlhanka ba ga Jehofa ba bogisiwa kwa Russia mme ka March 1991, puso e ne ya ba naya kgololesego ya go obamela Jehofa. Ka nako eo, go ne go na le baboledi ba le 16 000, mme gone jaanong go na le baboledi ba le 160 000. Seno se bontsha gore bakaulengwe bao ba ile ba dirisa kgololesego ya bone sentle. Le fa gone jaanong ba sa tlhole ba na le kgololesego eo, ba sa ntse ba tshwere ka natla mo tirong ya ga Jehofa e bile ba dira sotlhe se ba ka se kgonang gore ba tswelele ba mo direla.

14-15. Jehofa o ile a thusa Asa jang?

¹⁴ Ka nako ya ga Asa, Bajuda ga ba a ka ba tswelela ba le mo kagisong go ya go ile. Masole a feta milione a Ethiopia a ile a ba tlhasela. Molaodi wa masole ao e bong Sera o ne a tlhatswegile pelo gore ba tlile go nyeletsa Bajuda. Mme Asa ene, o ne a tshepetse mo go  Jehofa. O ne a rapela a re: “Re thuse, tlhe Jehofa Modimo wa rona, gonne re ikaegile ka wena, mme re tsogologetse boidiidi jono ka leina la gago.”—2 Ditir. 14:11.

¹⁵ Le fa gone masole a Ethiopia a ne a le mantsi thata go feta masole a Juda, Asa o ne a itse gore Jehofa o na le maatla go ba feta, e bile o ne a itse gore Jehofa o tla ba thusa. Jehofa ga a ka a swabisa Asa. Masole a Juda a ne a fenya masole a Ethiopia.—2 Ditir. 14:8-13.

16. Re itse jang gore ga nkitla re nna le kgololesego go ya go ile?

¹⁶ Ga re itse gore re tla diragalelwa ke eng mo nakong e e tlang, mme gone, re a itse gore ga re kitla re nna le kgololesego go ya go ile. Tota e bile, ga re a tshwanela go lebala gore Jesu o ne a re mo malatsing a bofelo, barutwa ba gagwe ba tla ‘tlhoiwa ke ditšhaba tsotlhe.’ (Math. 24:9) Moaposetoloi Paulo le ene o ne a re “botlhe ba ba eletsang go tshela ka boineelo jwa bomodimo ba le seoposengwe le Keresete Jesu le bone ba tla bogisiwa.” (2 Tim. 3:12) Baebele ya re Satane o na le “bogale jo bogolo,” mme go ise go ye kae, rotlhe re tlile go utlwa manokonoko a bogale jwa gagwe.—Tshen. 12:12.

17. Tumelo ya rona e ka nna ya lekwa jang?

¹⁷ Rotlhe tumelo ya rona e tlile go lekwa ka gonne go ise go ye kae, lefatshe lotlhe le tlile go lebana le “pitlagano e kgolo e e jaaka e e iseng e ko e nne fa e sale ka tshimologo ya lefatshe go fitlha jaanong.” (Math. 24:21) Ka nako eo, ba malapa ba ka nna ba re tlhanogela e bile tiro ya rona e ka nna ya thibelwa. (Math. 10:35, 36) A re tla tshwana le Asa ka go tshepa gore Jehofa o tla re thusa e bile o tla re sireletsa mo nakong eo e e thata?

18. Go ya ka Bahebera 10:38, 39, ke eng se se tla re thusang go ipaakanyetsa dinako tsa mathata?

¹⁸ Jehofa o re baakanyetsa nako eo e e thata ka go re thusa gone jaanong gore re nne le tumelo e e nonofileng. O dirisa “motlhanka yo o boikanyego le yo o botlhale” go re ‘naya dijo ka nako e e tshwanetseng’ gore re tswelele re na le tumelo e e nonofileng. (Math. 24:45) Mme gone, mongwe le mongwe wa rona o tshwanetse go tsaya matsapa gore a nonotshe tumelo ya gagwe.—Bala Bahebera 10:38, 39.   

19-20. Fa o sena go bala 1 Ditiragalo 28:9, o tshwanetse go ipotsa dipotso dife, mme ka ntlha yang?

 ¹⁹ Re tshwanetse go ‘batla Jehofa’ fela jaaka Kgosi Asa a ile a dira. (2 Ditir. 14:4; 15:1, 2) Re bontsha gore re batla Jehofa fa re ithuta ka ene re bo re kolobediwa. Mme fa re sena go kolobediwa, re tshwanetse go dira sotlhe se re ka se kgonang gore re tswelele re rata Jehofa. Fa re batla go bona gore re rata Jehofa go le kana kang, re ka ipotsa dipotso tseno: ‘A ke ya dipokanong ka metlha?’ Go ya dipokanong go re thusa gore re tswelele re direla Jehofa, e bile fa re le kwa dipokanong, bakaulengwe le bokgaitsadi ba a re kgothatsa. (Math. 11:28) Gape re tshwanetse go ipotsa go re: ‘A ke bala Baebele letsatsi le letsatsi?’ Fa e le gore o na le lelapa, a lo tshwara kobamelo ya lelapa beke le beke? Fa e le gore o nna o le nosi, a o nna le thuto ya botho beke le beke? A o dira ka natla mo tirong ya go rera ka Bogosi?

²⁰ Ke eng fa re tshwanetse go ipotsa dipotso tseno? Baebele ya re Jehofa o tlhatlhoba dilo tse re di akanyang le tse di mo dipelong tsa rona, mme le rona re tshwanetse go dira jalo. (Bala 1 Ditiragalo 28:9.) Fa re itlhatlhoba re bo re bona gore re tlhoka go fetola mekgele e re ipeetseng yone kgotsa re tlhoka go fetola tsela e re akanyang le e re ikutlwang ka yone, re tshwanetse go kopa Jehofa gore a re thuse. A re tseyeng matsapa go ipaakanyetsa dinako tsa mathata tse di larileng kwa pele! Gape a re diriseng nako ya kgololesego e re nang le yone gone jaanong sentle!