BASHA
12: Se o Batlang go se Dira
GO KAYA ENG?
Fa go na le sengwe se o batlang go se dira, o tlhoka go ithulaganya, go se tseela matsapa le go itse gore o tla dirang fa dilo di sa tsamaye jaaka o ne o rulagantse.
Dilo tse o batlang go di dira di ka tsaya malatsi, tse dingwe dikgwedi mme tse dingwe ngwaga kgotsa go feta. Fa go na le sengwe se se ka go tsayang dingwaga, o tlhoka go se dira kgato ka kgato.
GORENG GO LE BOTLHOKWA?
Fa o kgonne go fitlhelela sengwe se o neng o batla go se dira, o tla itshepa, o tla nna le ditsala e bile o tla itumela.
Go itshepa: Fa o ipoleletse gore o batla go fetsa porojeke e e rileng mo nakong e khutshwane, o bo o e dira, ga o kitla o tshaba go dira porojeke e e ka go tsayang lobaka lo loleele. Gape o tla kgona go ikemela go na le go dira dilo tse di sa siamang tse dithaka tsa gago di reng o di dire.
Ditsala: Batho ba rata motho yo o itseng se a se batlang e bile a ikemiseditse go se dira. Fa o na le tsala mme lo batla go fitlhelela selo se se tshwanang, go dira mmogo go ka aga botsala jwa lona.
Go itumela: Go a itumedisa fa o fitlheletse selo se o neng o batla go se dira.
“Ga ke rate go nna fela ke sa dire sepe. Ke leka gore go nne le sengwe se ke batlang go se fitlhelela mme fa ke kgonne ke ikutlwa ke le motlotlo thata!”—Christopher.
BAEBELE YA RE: “Yo o lebeletseng phefo ga a na go jala peo; mme yo o lebileng maru ga a na go roba.”—Moreri 11:4.
SE O KA SE DIRANG
Dirisa dintlha tse di latelang go rulaganya dilo tse o batlang go di dira.
Itse se o batlang go se dira. Kwala dilo tse o batlang go di dira o bo o di rulaganya go ya ka lenaneo.
Rulaganya. Mo go sengwe le sengwe se o batlang go se dira, kwala dintlha tse di latelang:
-
Letlha le o batlang go se fetsa ka lone.
-
Dilo tse o tla di dirang.
-
Dilo tse di ka nnang tsa go kgoreletsa le gore o tla dirang go leka go di rarabolola.
Tsaya kgato. Se lete lobaka lo loleele pele o simolola go dira selo se o batlang go se dira. Ipotse gore selo sa ntlha se o tla se tlhokang ke eng, go tswa foo, se dire. Tshwaya sengwe le sengwe se o se feditseng.
BAEBELE YA RE: “Dithulaganyo tsa yo o tlhoafetseng ruri di solegela molemo.”—Diane 21:5.
Tse Dingwe Tse O ka Di Kgatlhegelang
TSOGANG!
Nka Fitlhelela Mekgele ya me Jang?
SE DITHAKA TSA GAGO DI SE BUANG
Botshelo jo bo Monate Tota
A o batla botshelo jo bo itumedisang? Utlwa fa Cameron a bolela kafa a boneng botshelo jo bo kgotsofatsang ka gone mo lefelong le a neng a sa le akanya.
TSOGANG!
Ditsela Tsa go Atlega Kwa Sekolong—Nna le Mokgele
A o itse kwa o yang gone ka thuto ya gago? Ke dintlha dife tse o tshwanetseng go di ela tlhoko?
