Batho ba le bantsi ba dirisitse melaometheo e go ntseng go buiwa ka yone mo ditlhogong tse di fetileng mme ba ile ba latlha mokgwa ono wa go tlhaola ba bangwe. Le fa go ntse jalo, re sa ntse re tlhoka thuso e e ntsi ya go lwantshana le mokgwa wa go tlhaolana. A mme jaanong seno se raya gore tlhaolele ga e kitla e fela?

Dipuso di palelwa ke go lwantsha tlhaolele . A seno se raya gore ga gona puso epe e e ka fedisang tlhaolele?

Puso e e tla fedisang tlhaolele e tla tshwanelwa ke go dira dilo tse di latelang:

1. 1. Go thusa batho gore ba lebe ba bangwe ka tsela e e siameng.

2. 2. Go thusa batho gore ba se ka ba tlhaola ba bangwe ka gonne ba tsaya gore batho bao le bone ba a ba tlhaola.

3. 3. Go dira gore go nne le baeteledipele ba ba sa tlhaoleng batho ba bangwe.

4. 4. Go dira gore batho botlhe ba nne le kagiso.

Baebele e re bolelela gore Modimo o tlile go dira gore go nne le puso e e ntseng jalo mme ya re puso eo ke “bogosi jwa Modimo.”—Luke 4:43.

Puso eno e tlile go dira dilo tseno:

“Banni ba naga e e ungwang ruri ba tla ithuta tshiamo.”—ISAIA 26:9.

“Mme tiro ya tshiamo ya boammaaruri e tla nna kagiso; le tirelo ya tshiamo ya boammaaruri, e nne tidimalo le polokesego ka bosakhutleng.”—ISAIA 32:17.

Dikwalo tseno di re ruta eng? Bogosi Jwa Modimo bo tlile go ruta batho dilo tse di siameng. Fa Bogosi jono bo ntse bo ruta batho dilo tse di siameng, ba tlile go simolola go dirisana sentle le go tlotlana mme batho ba le bantsi ba tlile go lemoga gore lorato ke selo sa botlhokwa.

Modimo “o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.”—TSHENOLO 21:4.

Lekwalo leno le re ruta eng? Bogosi Jwa Modimo bo tla dira gore batho ba se ka ba tlhola ba dirisana ka tsela e e sa siamang le gore ba se ka ba tlhola ba tlhaolana.

“Mme ga a kitla a atlhola go ya ka sepe fela se a se bonang ka matlho, le fa e le go kgalemela go ya fela ka se a se utlwileng ka ditsebe. O tla atlhola batho ba maemo a a kwa tlase ka tshiamo, mme o tla naya ba ba pelonolo ba lefatshe kgalemelo ka thokgamo.”—ISAIA 11:3, 4.

Lekwalo leno le re ruta eng? Jesu jaaka kgosi ya Bogosi jwa Modimo o tla busa ka tsela e e siameng. Jesu o rata batho botlhe ba ba tswang mo dinageng tse di farologaneng ka tsela e e tshwanang mme e bile melao ya gagwe e tla ikobelwa lefatshe lotlhe.

Bogosi Jwa Modimo bo tla ruta batho “go nna ba mogopolo o o tshwanang e bile [ba] na le lorato lo lo tshwanang, [ba] kopane mmogo mo moyeng, [ba] tshegeditse kakanyo e le nngwe mo mogopolong”—BAFILIPI 2:2.

Lekwalo leno le re ruta eng? Batho ba ba tla bong ba busiwa ke Bogosi Jwa Modimo, ga ba tle go ipolela fela gore ba a utlwana mme gone ba sa utlwane, go na le moo ba tla bo ba le seoposengwe e bile ba bontshana lorato.