A lobopo lo sa le lo le gone?

Genesise 1:1 e a re: “Kwa tshimologong Modimo o ne a bopa magodimo le lefatshe.”

Pele ga 1950 baitsesaense ba ba tumileng ba ne ba dumela gore lobopo ga lo bolo go nna gone. Gone jaanong baitsesaense ba le bantsi ba dumela gore go na le kwa lobopo lo simologileng gone, mme ba dumela seo ka ntlha ya dipatlisiso tsa bosheng.

Lefatshe le ne le ntse jang la ntlha?

Genesise 1:2, 9 e a re “lefatshe le ne le se na sepe e bile le ne le sa nniwe” le na le metsi fela.

Baitsesaense ba dumalana le se Baebele e se buang. Moitsesaense, Patrick Shih a re kwa tshimologong lefatshe “le ne le se na moya o re o hemang . . . e bile le ne le sa lebege sentle.” Makasine wa Astronomy o tlhalosa jaana: “Dipatlisiso tsa bosheng di bontsha gore Lefatshe la bogologolo le ne le tletse metsi, go se na fa go omileng teng.”

 Lefaufau la rona le fetogile jang?

Genesise 1:3-5 e tlhalosa gore fa lesedi le simo- lola go bonesa mo lefatsheng go ne go sa bonale gore le tswa kae. Letsatsi le ngwedi di ne tsa simolola go bonala sentle moragonyana mo lefatsheng.​—Genesise 1:14-18.

The Smithsonian Environmental Research Center e a re lefaufau le ne le letla lesedi le sekaenyana gore le fitlhe mo lefatsheng. E tlhalosa gore: “Go ne go tletse mouwane fela mo Lefatsheng.” Moragonyana, “mouwane o ne wa nyelela mme loapi lo ne lwa kgona go bonala sentle.”

Ke ditshedi dife tse di bopilweng pele mo lefatsheng?

Genesise 1:20-27 e tlhalosa gore go bopilwe ditlhapi, dinonyane, diphologolo tse di tsamayang mo lefatsheng mme kwa bofelong go ne ga bopiwa batho. Baitsesaense ba dumela gore go  nnile le ditlhapi pele go ka nna le diphologolo, le gore batho ba tlile morago thata.

Bangwe ba re se Baebele e se buang se farologane thata le dipatlisiso tsa saense. Le fa go ntse jalo, gantsi batho ba bua seno ka gonne ba sa tlhaloganye se Baebele e se buang.

Baebele ga e re bolelele gore lefatshe kgotsa lobopo lo na le dingwaga di le 6 000 fela.

Go na le moo, e re bolelela gore magodimo le lefatshe di ne tsa dirwa go tswa “kwa tshimologong.” (Genesise 1:1) Baebele ga e re bolelele gore di na le nako e kae di le teng.

Go na le moo e dirisa lefoko “letsatsi” go kgaoganya nako e Modimo a neng a e dirisa fa a bopa. Ka sekai, e re bolelela gore lobopo lotlhe lo bopilwe “mo letsatsing le Jehofa a Modimo a neng a dira lefatshe le legodimo ka lone.” (Genesise 2:4) Ka jalo, “malatsi” a le marataro a Modimo a neng a a dirisa fa a bopa le nako e a e tshotseng fa a baakanya lefatshe, e ka tswa e le nako e telele thata.

Baebele ga e tlhalose gore ga go ka ke ga nna le diphetogo dingwe mo mofuteng o o rileng wa diphologolo

Buka ya Baebele ya Genesise e re bolelela gore Modimo o bopile “mefuta yotlhe ya diphologolo.” (Genesise 1:24, 25) Lefoko “mefuta” le kaya diphologolo di le dintsi tse di batlileng di tshwana. Ka jalo mo ‘mefuteng’ e e rileng wa diphologolo go ka tswa go na le diphologolo di le dintsi tse di farologaneng. Seno se raya gore go ka nna le diphetogo di se kae mo ‘mofuteng’ o o rileng wa diphologolo go ikaegile ka gore di nna kae.

 O akanya eng?

Baebele e re tlhalosetsa gore Modimo o bopile jang lobopo, gore lefatshe le ne le ntse jang le gore go tlile jang gore go nne le ditshedi mo lefatsheng. Gape Baebele le yone e tlhalosa gore ke mang yo O bopileng dilo tseno tsotlhe. Encyclopædia Britannica e a re go na le mongwe yo mogolo go feta batho, yo o bopileng dilo tsotlhe mme seno se dumalana le dipatlisiso tsa saense. b