Kgang ya Botshelo

Go Gakologelwa Mmopi wa Rona go Tloga Bosheng

JAAKA GO BOLETSE DAVID Z. HIBSHMAN

“Fa go ka direga gore ke swe, ruri ke solofela gore ke ntse ke ikanyega mo go Jehofa. Ke mo kopa gore a tlhokomele David wa me. Ke leboga go bo o nneile ene Jehofa, le lenyalo la rona. Le ne le le monate thata, e le le le itumetseng!”

AKANYA fela gore ke ile ka ikutlwa jang fa e ne ya re ke sena go fitlha mosadi wa me ka March 1992, ke bo ke bona mokwalo ono wa bofelo mo tayaring ya gagwe. Dikgwedi di le tlhano pelenyana, re ne re sa tswa go keteka segopotso sa bo60 sa ga Helen a le mo bodireding jwa nako e e tletseng.

Ke gakologelwa sentle ka 1931 letsatsi le nna le Helen re neng re ntse mmogo ka lone kwa kopanong ya Columbus, Ohio, U.S.A. Helen o ne a ise a tshware dingwaga tse 14, mme o ne a anaanela thata botlhokwa jwa tiragalo eo go feta nna. Tsela e Helen a neng a tlhagafalela bodiredi ka yone e ne ya bonala ka bonako fela morago ga gore ene le mmaagwe wa motlholagadi ba nne babulatsela, jaaka bareri ba nako e e tletseng ba Basupi ba ga Jehofa ba bidiwa. Ba ne ba tlogela legae la bone le lentle ba ya go rera kwa metseng ya selegae kwa borwa jwa United States.

Boswa Jwa me Jwa Bokeresete

Ka 1910 batsadi ba me ba ne ba fuduga le bana ba bone ba bannye kwa botlhaba jwa Pennsylvania ba ya Grove City, kwa bophirima jwa naga. Ba ne ba reka ntlonyana e ntle gone koo mme ba nna maloko a a tlhagafetseng a Reformed Church. Ka bonako fela morago ga moo ba ne ba etelwa ke William Evans, Moithuti mongwe wa Baebele, jaaka Basupi ba ga Jehofa ba ne ba bidiwa ka nako eo. Rre, yo ka nako eo a neng a le mo dingwageng tsa bo20, le Mmè, yo o neng a le monnye mo go ene ka dingwaga tse tlhano, ba ne ba reetsa monna yono yo o botsalano wa kwa Wales mme ba mo laletsa dijo. Go ise go ye kae ba ne ba amogela boammaaruri jwa Baebele jo ba neng ba bo ithuta.

Gore lelapa le nne gaufi le phuthego, Rre o ne a le fudusetsa kwa toropong ya Sharon mo e ka nnang dikilometara di le 40. Dikgwedi moragonyana,  ka 1911 kana 1912, Rre le Mmè ba ne ba kolobediwa. Charles Taze Russell, moporesidente wa ntlha wa Mokgatlho wa Watch Tower, o ne a neela puo ya kolobetso. Ke tshotswe ka December 4, 1916, fa batsadi ba me ba ne ba setse ba na le bana ba banè. Fa ke ne ke tsholwa, go ne ga itsisiwe jaana: “Morwarre yo mongwe yo o tla ratiwang.” Ke gone ka moo ke neng ka bidiwa David, le le rayang “Yo o Rategang.”

Fa ke ne ke na le dibeke di le nnè fela, ba ne ba tsamaya le nna kwa kopanong e le lekgetlho la ntlha. Mo metlheng eo ya bogologolo, rre le barwarre ba bagolo ba ne ba tsamaya dikilometara di le dintsi go ya kwa dipokanong tsa phuthego ka maoto, fa Mmè ene a ne a tsamaya le nna le kgaitsadiake ka thekisi. Dipokano di ne di tshwarwa mo mosong le ka thapama. Fa re le kwa gae, gantsi re ne re tlotla ka ditlhogo tsa Tora ya Tebelo le The Golden Age, e leng leina la bogologolo la Tsogang!

Go Solegelwa Molemo ke Dikao Tse di Molemo

Baeng ba le bantsi ba sedumedi, jaaka dibui tse di etang di ne di bidiwa ka nako eo, ba ne ba etela phuthego ya rona. Gantsi ba ne ba nna letsatsi kana a le mabedi le rona. Sebui se sengwe se ke se gakologelwang sentle e ne e le Walter J. Thorn, yo o neng a gakologelwa Mmopi wa gagwe yo Mogolo mo ‘metlheng ya bokau jwa gagwe.’ (Moreri 12:1) Fa ke sa ntse ke le mosimane, ke ne ke tsamaya le Rre re bontsha batho “Photo-Drama of Creation,” filimi ya dikarolo tse nnè ya ditshwantsho le mantswe a a gatisitsweng e e kaga hisitori ya batho.

Le mororo Mokaulengwe Evans le mosadi wa gagwe, Miriam, ba ne ba sena bana, ba ne ba nna batsadi le batsadi ba batsadi ba semoya ba lelapa la gaetsho. Ka metlha William o ne a bitsa Rre a re “Morwa,” mme ene le Miriam ba ne ba tsenya moya wa go rera mo lelapeng la gaetsho. Mo masimologong a lekgolo la bo20 la dingwaga, Mokaulengwe Evans o ne a kile a boela kwa Wales go ya go bolela boammaaruri jwa Baebele mo karolong e e dikologileng Swansea. Fa a le koo o ne a bidiwa moreri yo o tswang kwa Amerika.

Ka 1928, Mokaulengwe Evans o ne a tlogela tiro mme a simolola go rera kwa dithoteng tsa West Virginia. Bonkgonne ba babedi, Clarence wa dingwaga di le 21 le Carl wa dingwaga di le 19, ba ne ba tsamaya le ene. Ka bonè jwa rona basimane re ne ra dirisa dingwaga di le dintsi mo bodireding jwa nako e e tletseng. Tota e bile, rotlhe re kile ra nna balebedi ba ba etang ba Basupi ba ga Jehofa fa re sa ntse re le basha. Bosheng fela jaana Mmangwane, Mary, yo jaanong a leng mo dingwageng tsa bo90, o ne a nkwalela jaana: “A bo re itumela jang ne go bo Mokaulengwe Evans a ile a tlhagafalela bodiredi le go etela Grove City!” Mmangwane Mary ke mongwe wa ba ba neng ba gakologelwa Mmopi wa bone ba sa ntse ba le basha.

Go Nna Gone Kwa Dikopanong

E ne e le Rre le Clarence fela ba ba neng ba kgona go nna gone kwa kopanong e e sa lebalegeng ya kwa Cedar Point, Ohio, ka 1922. Le fa go ntse jalo, ka 1924 re ne ra nna le koloi, mme lelapa lotlhe la gaetsho le ne la ya kwa kopanong ya Columbus, Ohio. Rona bana re ne re tshwanetse go dirisa madi a re neng re a ipoloketse go ithekela dijo mo kopanong eo ya malatsi a robedi. Batsadi ba me ba ne ba na le kgopolo ya gore maloko otlhe a lelapa a ne a tshwanetse go ithuta go itlamela. Ka jalo re ne re ruile dikoko le mebutla le dinotshi, mme basimane botlhe ba ne ba isetsa batho dipampiri tsa dikgang.

Fa go tla nako ya kopano ya Toronto, Canada, ka 1927, re ne re na le monnaarona wa dikgwedi tse thataro, Paul. Ke ne ka abelwa go sala mo gae go tlhokomela Paul ke thusiwa ke mmangwane yo o nyetsweng, fa batsadi ba me ba ne ba ya kwa Toronto le bana ba bangwe. Ke ne ka lebogiwa ka didolara di le lesome (R40), tse ke neng ka di dirisa go  ithekela sutu. Ka metlha re ne re rutiwa go apara sentle kwa dipokanong le go tlhokomela diaparo tsa rona.

Ka nako ya kopano e e sa lebalegeng ka 1931 kwa Columbus, Ohio, Clarence le Carl ba ne ba setse ba nyetse mme ba ne ba dira tiro ya bobulatsela le basadi ba bone. Mongwe le mongwe wa bone o ne a itiretse kharabane. Carl o ne a nyala Claire Houston wa kwa Wheeling, West Virginia, mme ke gone ka moo ke neng ke ntse fa thoko ga monnawe Claire, e bong Helen kwa kopanong ya Columbus.

Bodiredi Jwa Nako e e Tletseng

Ke ne ka aloga kwa sekolong se segolwane ka 1932 fa ke na le dingwaga di le 15, mme mo ngwageng o o latelang oo ke ne ka isetsa morwarre Clarence, yo e neng e le mmulatsela kwa South Carolina, koloi e e dirisitsweng. Ke ne ka dira kopo ya tirelo ya bobulatsela mme ka simolola go dira mmogo le Clarence le mosadi wa gagwe. Ka nako eo Helen e ne e le mmulatsela kwa Hopkinsville, Kentucky, mme ke ne ka mo kwalela e le lekgetlho la ntlha. Fa a araba, o ne a botsa jaana: “A o mmulatsela?”

Mo lekwalong la me—le Helen a neng a le baya go fitlhela a tlhokafala mo e ka nnang dingwaga tse 60 moragonyana—ke ne ka araba jaana: “Ke ene, e bile ke solofela gore ke tla nna ene ka metlha.” Mo lekwalong leo, ke ne ka bolelela Helen ka go tsamaisetsa baruti le baatlhodi bukana ya The Kingdom, the Hope of the World mo tirong ya me ya go rera.

Ka 1933, Rre o ne a ntirela tente e e nang le maotwana—kharabane e e boleele jwa dimetara di le 2,4 le bophara jwa dimetara di le pedi e mabota a yone a neng a dirilwe ka saile e e bapotsweng go e dikologa, e le tshesane go ya kwa godimo mme e na le fensetere kwa pele le kwa morago. E ne e le legae la me la maemo a a kwa tlase ka dingwaga tse nnè tse di neng tsa latela ke le mmulatsela.

Ka March 1934, nna, Clarence le Carl, le basadi ba bone, Helen le mmaagwe, monnawe mogatsa Clarence—re le robedi—re ne ra leba bophirima go ya kwa kopanong kwa Los Angeles, California. Ba bangwe ba ne ba palame le go robala mo kharabaneng ya me. Ke ne ka robala mo koloing, fa ba bangwe ba ne ba hirile marobalo. E re ka re ile ra nna le bothata jwa koloi, re ne ra goroga kwa Los Angeles mo letsatsing la bobedi la kopano ya malatsi a mararo. Ka March 26, fa re fitlha koo nna le Helen kgabagare re ne ra tshwantshetsa boineelo jwa rona go Jehofa ka go kolobediwa mo metsing.

Kwa kopanong eno Joseph F. Rutherford, moporesidente wa nako eo wa Mokgatlho wa Watch Tower, o ne a kopana le babulatsela botlhe. O ne a re kgothatsa, a bolela gore re batlhabani ba ba pelokgale ba boammaaruri jwa Baebele. Mo lekgetlhong leo, go ne ga nna le thulaganyo ya go thusa babulatsela ka madi gore ba tswelele pele mo bodireding jwa bone.

Go Ithuta Botshelo

Fa re tswa kwa kopanong kwa Los Angeles, rotlhe re ne ra nna le seabe sa go neela batho molaetsa wa Bogosi kwa dikgaolong tsotlhe tsa South Carolina, Virginia, West Virginia le Kentucky. Dingwaga moragonyana Helen o ne a kwala jaana malebana le nako eo: “Go ne go se na phuthego e e neng e ka re thusa, go se na ditsala tse di neng di ka re thusa, ka gonne re ne re le batswakwa mo nageng e re sa e itseng. Mme jaanong ke a itse gore ke ne ke ithuta sengwe. Ke ne ke huma.”

O ne a botsa jaana: “Mosetsanyana o dirisa nako ya gagwe jang fa a le kgakala le ditsala tsa gagwe le tikologo ya gagabo? Legale e ne e se bothata jo bo kalo. Ga ke gakologelwe ke lapa pelo le ka motlha ope. Ke ne ke bala thata. Re ne re sa salele kwa morago mo go baleng dibuka tsa rona tsa Baebele le go ithuta. Ke ne ke le gaufi thata le mmè, ke ithuta go dirisa madi a re neng re na le one sentle, ke reka, ke ntsha dithaere tse di duleng moya, ke apaya, ke roka le go rera. Ga ke ikotlhaele seo mme nka itumelela go se dira gape.”

Helen le mmaagwe ba ne ba kgotsofaletse go nna  mo kharabaneng e nnye mo dingwageng tseo, le mororo mmaagwe a ne a na le ntlo e ntle. Morago ga kopano ya Columbus, Ohio, ya 1937, mmaagwe Helen o ne a lwala thata, mme o ne a robadiwa kwa kokelong. O ne a tlhokafala a le mo kabelong ya gagwe kwa Philippi, West Virginia, ka November 1937.

Lenyalo le go Tsweledisa Tirelo

Ka June 10, 1938, nna le Helen re ne ra nyalana re dirile moletlonyana fela kwa legaeng le a tsholetsweng kwa go lone kwa Elm Grove, gaufi le Wheeling, kwa West Virginia. Mokaulengwe wa rona yo o rategang Evans, yo o neng a ruta lelapa la gaetsho boammaaruri dingwaga di le mmalwa pele ke tsholwa, o ne a neela puo ya lenyalo. Morago ga lenyalo, nna le Helen re ne ra rulaganya go boela kwa tirong ya bobulatsela kwa botlhabatsatsi jwa Kentucky, mme se se neng sa re gakgamatsa le go feta ke gore, re ne ra lalediwa go ya go dira tiro ya kgaolo. Tiro eno e ne e akaretsa go etela ditlhopha tsa Basupi ba ga Jehofa ka fa bophirima jwa Kentucky le kwa dikarolong tsa Tennessee gore re ba thuse mo bodireding jwa bone. Ka nako eo go ne go na le baboledi ba ba ntseng jalo ba Bogosi ba ka nna 75 fela mo mafelong otlhe a re neng re a etela.

Ka nako eo, bosetšhaba bo ne jwa fetola tsela e batho ba le bantsi ba neng ba akanya ka yone, mme ke ne ke lebeletse gore nka nna ka tsenngwa mo kgolegelong nako nngwe le nngwe ka ntlha ya boitlhaodi jwa me jwa Bokeresete. (Isaia 2:4) Le fa go ntse jalo, ke thusitswe ke rekoto e ke neng ke na le yone mo tirong ya go rera gore boto e e kwadisang batho mo bosoleng e ntetle go tswelela pele mo bodireding jwa nako e e tletseng.

Fa re ne re simolola bodiredi jwa go eta, mongwe le mongwe o ne a akgela ka gore re sa ntse re le basha. Kwa Hopkinsville, Kentucky, kgaitsadi mongwe wa Mokeresete o ne a dumedisa Helen ka go mo tlamparela mme a mmotsa jaana: “A o a nkgakologelwa?” Ka 1933, Helen o ile a mo neela bosupi kwa lebenkeleng la motse le rraagwe e neng e le motsamaisi wa lone. E ne e le morutisi wa sekolo sa Sontaga, mme fa a sena go bala buka e Helen a neng a mo neela yone, o ne a ema fa pele ga setlhopha sa gagwe mme a kopa maitshwarelo go bo a ile a ba ruta dithuto tse di sa tsweng mo Baebeleng. Fa a sena go tlogela kereke, o ne a simolola go bolela boammaaruri jwa Baebele mo tikologong ya gagabo. Nna le Helen re ne re direla kwa bophirima jwa Kentucky ka dingwaga di le tharo, mme gantsi re ne re gorogela kwa ga kgaitsadi yoo le monna wa gagwe.

Mo metlheng eo re ne re nna le dikopano tse dinnye, mme A. H. Macmillan o ne a tla go tshwara e nngwe ya tsone. O ne a tle a gorogele kwa legaeng la batsadi ba ga Helen fa Helen a ne a sa ntse a le ngwana, ka jalo ka nako ya kopano, o ne a tlhopha go nna le rona mo kharabaneng ya boleele jwa dimetara tse tlhano, mme re ne re na le bolao jo re neng re sa bo dirise. Le ene o ne a gakologelwa Mmopi wa gagwe yo Mogolo mo malatsing a bokau jwa gagwe, e re ka a ne a neela botshelo jwa gagwe go Jehofa ka 1900, fa a ne a na le dingwaga di le 23.

Ka November 1941 tiro ya bakaulengwe ba ba etang e ne ya emisiwa ka nakwana, mme ke ne ka abelwa go nna mmulatsela kwa Hazard, Kentucky. Re ne ra dira gape le morwarre Carl le mosadi wa gagwe, Claire. Fa re le koo, Joseph Houston, setlogolo sa ga Helen, o ne a nna le rona mme a simolola go nna mmulatsela. O ne a tswelela pele mo bodireding jwa nako e e tletseng mo e ka nnang dingwaga di le 50, go fitlhela a tlhokafala ka ntlha ya go ema pelo ka tshoganyetso ka 1992 a ntse a direla ka boikanyegi kwa ntlokgolong ya lefatshe lotlhe ya Basupi ba ga Jehofa kwa Brooklyn, New York.

Ka 1943 re ne ra abelwa kwa Rockville, Connecticut. E ne e le lefatshe le nna le Helen re neng re bona le farologane thata, jaaka go ka tualo, ka gonne re ne re tlwaetse go rera ka fa borwa. Kwa Rockville, Helen o ne a tshwara dithuto tsa magae tsa Baebele ka metlha tse di fetang 20 ka beke. Kgabagare, re ne ra hira kamorenyana go nna Holo ya Bogosi, mme go ne ga rulaganngwa gore go thewe phuthego e nnye.

Fa re ntse re direla kwa Rockville, re ne ra lalediwa go nna gone kwa setlhopheng sa botlhano sa Sekolo sa Baebele sa Watchtower sa Gileate kwa South Lansing, New York. Se se itumedisang ke gore, re ne ra utlwa gore Aubrey le Bertha Bivens, ditsala tse re neng ra nna babulatsela le tsone kwa Kentucky, ba tlile go nna teng mo setlhopheng sa rona.

Sekolo le Kabelo ya Rona e Ntšha

Le mororo re ne re sa ntse re le basha, bontsi jwa ba re neng re tsena le bone mo setlhopheng ba ne ba le babotlana mo go rona. Ee, ba ne ba gakologelwa Mmopi wa bone yo Mogolo mo bosheng jwa bone. Re alogile ka July 1945, fa Ntwa ya Lefatshe II e ya bokhutlong. Fa re ntse re emetse dikabelo tsa rona tsa borongwa, re ne re kopanela le Phuthego  ya Flatbush kwa Brooklyn, New York. Kgabagare, ka October 21, 1946, mmogo le maloko a mangwe a setlhopha a le marataro go akaretsa le ba ga Bivens, re ne ra tsaya sefofane ra ya kwa legaeng la rona le lesha kwa Guatemala City, kwa Guatemala. Ka nako eo, go ne go na le Basupi ba ga Jehofa ba ba sa feteng 50 mo nageng eo yotlhe ya Amerika Bogare.

Ka April 1949 barongwa ba le mmalwanyana ba rona ba ne ba fudugela kwa Quetzaltenango, e leng toropo ya bobedi ka bogolo e bile e le botlhokwa mo nageng eo. Toropo eno e bogodimo jwa dimetara tse di fetang 2 300 go tswa mo boalong jwa lewatle, mme phefo ya dithaba tsa teng e monatšana e bile e phepa. Helen o ne a sobokanya tiro ya rona fano, fa a ne a kwala jaana: “Re ne re na le tshiamelo ya go rera mo ditoropong le mo metsaneng e le mentsi. Re ne re tle re tsoge ka ura ya bonè mo mosong mme re palame bese (e gantsi e neng e tsentswe diseile mo boemong jwa difensetere) re ya kwa toropong e e kgakala. Fa re le koo re ne re ka rera diura di ka nna robedi pele re boa maitseboa.” Gompieno go na le diphuthego mo mafelong ano a mantsi, go akaretsa tse thataro kwa Quetzaltenango.

Go ise go ye kae go ne ga batliwa barongwa go ya go direla kwa Puerto Barrios kwa Lotshitshing lwa Caribbean, e leng toropo ya boraro ka bogolo kwa Guatemala. Ditsala tsa rona tse di rategang, ba ga Bivens, ba re dirileng le bone ka dingwaga tse tlhano kwa Guatemala, e ne e le bangwe ba ba neng ba fudugela kwa kabelong eno e ntšha. Go kgaogana go ne go se monate mme ga dira gore re tlhoafalelane thata. E re ka e ne e le nna le Helen fela ba ba neng ba setse mo legaeng la barongwa, re ne ra fudugela mo ntlong e nnye. Ka 1955, nna le Helen re ne ra amogela kabelo e ntšha ya go ya kwa toropong e e ka fa boboatsatsi jwa Mazatenango. Morwarre yo mmotlana, Paul, le mosadi wa gagwe, Dolores, ba ba neng ba aloga kwa Gileate ka 1953, ba kile ba direla koo pele re goroga.

Ka 1958 re ne re na le Basupi ba ba fetang 700, diphuthego di le 20, le dikgaolo di le tharo kwa Guatemala. Nna le Helen re ne ra nna le seabe gape mo tirong ya go eta, re ne re etela ditlhotshwana tsa Basupi le diphuthego di le mmalwa, go akaretsa le e e kwa Quetzaltenango. Go tswa foo, ka August ya 1959, re ne ra lalediwa go boela kwa Guatemala City, koo re neng ra nna kwa ofising ya lekala teng. Ke ne ka abelwa go direla kwa lekaleng, fa Helen ene a ne a tswelela pele mo tirelong ya borongwa ka dingwaga tse 16 tse di neng tsa latela. Morago ga moo le ene o ne a simolola go direla mo ofising ya lekala.

Masego a a Oketsegileng

Mo dingwageng tse di fetileng, ka metlha go ne go lebega e kete ke nna yo monnye thata mo go ba ba neng ba direla Jehofa. Jaanong ka metlha ke nna yo motona, jaaka fa ke ne ke le kwa sekolong sa makala kwa Patterson, New York, ka 1996. Fela jaaka ke ne ke amogela thuso e ntsi ke sa ntse ke le mosha mo go ba ba godileng, ke sa ntse ke na le tshiamelo mo masomeng a dingwaga a bosheng jaana go thusa basha ba le bantsi ba ba eletsang go gakologelwa Mmopi wa bone mo bosheng jwa bone.

Jehofa o tswelela pele a tshololela masego mo bathong ba gagwe kwa Guatemala. Ka 1999 go ne go na le diphuthego tse di fetang 60 kwa Guatemala City. Mme kwa bokone, borwa, botlhabatsatsi le kwa bophirima, go na le diphuthego tse dingwe tse dintsi le diketekete tsa baboledi ba dikgang tse di molemo tsa Bogosi jwa Modimo. Baboledi ba Bogosi ba ba sa feteng 50 fa re ne re goroga koo mo e ka nnang dingwaga di le 53 tse di fetileng ba oketsegile go nna ba ba fetang 19 000!

Mo Gontsi Mo re Ka go Lebogelang

Ga go ope yo o ka tshelang fela a se na mathata, mme ka metlha re ka latlhela “morwalo wa [rona] mo go Jehofa.” (Pesalema 55:22) Gantsi o re tlamela ka gore re thusiwe ke ditsala tse di lorato. Ka sekai, dingwaga di sekae pele Helen a tlhokafala, o ne a nneela sekwalelonyana se se foreimilweng se kwadilwe temana ya Baebele e e mo go Bahebera 6:10: “Modimo ga a tshiamololo mo a ka lebalang tiro ya lona le lorato lo lo Mo bontshitseng lone ka lo ne lo direla batho ba Gagwe mme lo sa ntse lo ba direla.”—Weymouth.

 Karolo e nngwe ya molaetsa wa gagwe e ne e re: “Moratiwa, ga go na sepe se nka go neelang sone, fa e se LORATO LWA ME LOTLHE . . . Temana eno e go tshwanela tota, mme ke kopa gore o e beye fa tesekeng ya gago, e seng ka gonne e tswa mo go nna, mme ka gonne e tshwanela wena ka ntlha ya dingwaga tse dintsi tse o di feditseng o le mo tirelong.” Foreimi eno e sa ntse e le mo tesekeng ya ofisi ya me gompieno kwa lekaleng la Guatemala.

Ke sa le ke direla Jehofa ke sa le mosha, mme jaanong jaaka ke tsofetse, ke leboga Jehofa go bo a nneile botsogo jo bontle jo bo ntetlang gore ke dire dikabelo tsa me. Fa ke ntse ke bala Baebele, gantsi ke kopana le ditemana tse ke akanyang gore Helen wa me yo o rategang o ne a ka bo a di thaletse mo Baebeleng ya gagwe. Seno se ne sa ntiragalela fa ke ne ke bala Pesalema 48:14 gape: “Modimo one, ke Modimo wa rona ka bosakhutleng le ka bosaengkae; one o tlaa nna mosupatsela wa rona le go ya fela mo losong.”

Ke itumelela go itsise batho ba bangwe ka tsholofelo ya letsatsi la tsogo fa batho ba ditšhaba tsotlhe tsa bogologolo ba tla bong ba amogela baratiwa ba bone go tswa mo baswing go tsena mo lefatsheng le lesha. A bo e le tebelelo e e molemo jang ne! A bo go tla bo go tshologa dikeledi tsa boitumelo jang ne ka nako eo, fa re gakologelwa gore tota Jehofa ke Modimo “o o gomotsang ba ba sulafetseng pelo”!—2 Bakorintha 7:6.

[Setshwantsho mo go tsebe 25]

Go tloga molemeng kwa godimo go ya mojeng: Mmè, Rre, Rakgadi Eva le barwarre Carl le Clarence, 1910

[Ditshwantsho mo go tsebe 26]

Ke na le Helen ka 1947 le ka 1992