“Yo Monnye” o Nnile “Sekete”

“Yo monnye o tlaa tla a nna sekete, le yo mmotlana a nna morafe o o thata.”—ISAIA 60:22.

1, 2. (a) Ke eng fa lefifi le bipile lefatshe gompieno? (b) Lesedi la ga Jehofa le ile la phatsimela batho ba gagwe jang kgato ka kgato?

“LEFIFI le tlaa bipa lefatshe, le lefifi le lentshontsho le tlaa bipa ditšhaba; mme wena Jehofa o tlaa go tlhabela, le kgalalelo ya gagwe e tlaa bonala mo go wena.” (Isaia 60:2) Mafoko ano a tlhalosa sentle maemo a lefatshe fa e sa le ka 1919. Labokeresete o ile a gana go dumela sesupo sa go nna gone ga segosi ga ga Jesu Keresete, “lesedi la lefatshe.” (Johane 8: 12; Mathaio 24:3) Ka ntlha ya “bogale jo bogolo” jwa ga Satane, kgosi ya “babusi ba lefatshe ba lefifi leno,” lekgolo la bo20 la dingwaga le nnile nako e e setlhogo le e e maswe go gaisa tsotlhe mo hisitoring ya motho. (Tshenolo 12:12; Baefeso 6:12) Bontsi jwa batho ba mo lefifing la semoya.

² Le fa go ntse jalo, lesedi le a phatsima gompieno. Jehofa o ‘tlhabela’ batlhanka ba gagwe, masalela a batlodiwa, ba e leng baemedi ba mo lefatsheng ba “mosadi” wa gagwe wa selegodimo. (Isaia 60:1) Ba ile ba phatsimisa kgalalelo ya Modimo ba ba ba dira gore ‘lesedi la bone le phatsime fa pele ga batho,’ segolobogolo fa e sa le ba gololwa mo botshwarong jwa Babelona ka 1919. (Mathaio 5:16) Go tloga ka 1919 go fitlha ka 1931, lesedi la Bogosi le ile la phatsimela pele fa ba ntse ba itlhotlhora dikgole tsa Sebabelona tse di neng di sa ntse di ba bofile. Ba ile ba oketsega ka dikete di le masomesome fa Jehofa a diragatsa tsholofetso eno ya gagwe: “Ruri ke tlaa phutha masalela a Iseraele, ke tlaa ba baya mmogo jaaka dinku tsa Bosera, jaaka letsomane mo gare ga bohulo jwa lone, ba tlaa tsosa modumo o mogolo ka ntlha ya bontsi jwa batho.” (Mika 2:12) Ka 1931, kgalalelo ya ga Jehofa mo bathong ba gagwe e ne ya bonala le e leng go feta ka nako ya fa ba ne ba amogela leina Basupi ba ga Jehofa.—Isaia 43:10, 12.

3. Go ile ga lemotshega jang gore lesedi la ga Jehofa le ne le tla phatsimela batho ba bangwe kwantle ga batlodiwa?

³ A Jehofa o tla phatsimela masalela a “letsomanyane” fela? (Luke 12:32) Nnyaa. Makasine wa Tora ya Tebelo wa September 1, 1931, (ka Seesemane) o ne wa bua ka setlhopha se sengwe. Fa e tlhalosa Esekiele 9:1-11 ka tsela e e molemo, e ne ya bontsha gore monna yo o tshotseng kurwana ya enke ya mokwadi yo go buiwang ka ene mo ditemaneng tseo o emela masalela a a tloditsweng. Ke bomang ba “monna” yono a ba tshwayang mo  diphatleng? Ke “dinku tse dingwe,” tse di solofetseng go tshela ka bosakhutleng mo lefatsheng la paradaise. (Johane 10:16; Pesalema 37:29) Ka 1935 setlhopha seno sa “dinku tse dingwe” se ne sa lemogiwa e le “boidiidi jo bogolo, jo . . . bo [tswang] mo merafeng yotlhe” jo Johane a neng a bo bona mo ponatshegelong. (Tshenolo 7:9-14) Go tloga ka 1935 go fitlha jaanong, go ile ga tlhongwa mogopolo thata mo tirong ya go phutha boidiidi jo bogolo.

4. “Dikgosi” le “merafe” e go buiwang ka yone mo go Isaia 60:3 ke bomang?

⁴ Tiro eno ya go phutha e umakwa mo boporofeting jwa ga Isaia fa bo re: “Merafe e tlaa tla leseding la gago, le dikgosi di tlaa tla phatsimong ya go tlhaba ga gago.” (Isaia 60:3) “Dikgosi” tse go buiwang ka tsone fano ke bomang? Masalela a ba ba 144 000 le Jesu Keresete, ke baruaboswammogo mo Bogosing jwa selegodimo, mme ba eteletse dilo pele mo tirong ya go neela bosupi. (Baroma 8:17; Tshenolo 12:17; 14:1) Gompieno, dikete di sekae tse di sa ntseng di setse tsa masalela a batlodiwa di fetwa ka palo ke “merafe,” batho ba ba nang le tsholofelo ya go tshela mo lefatsheng ba ba tlang kwa go Jehofa go tla go rutwa mme ba laletsa batho ba bangwe gore le bone ba dire jalo.—Isaia 2:3.

Batlhanka ba ga Jehofa ba ba Tlhoafetseng

5. (a) Ke dintlha dife tse di bontshang gore tlhoafalo ya batho ba ga Jehofa ga ya ka ya ngotlega (b) Ke dinaga dife tse di ileng tsa nna le koketsego e kgolo go gaisa ka 1999? (Bona tšhate e e mo go tsebe 17-20.)

⁵ A bo Basupi ba ga Jehofa ba segompieno ba bontshitse tlhagafalo e kgolo jang ne go ralala lekgolo leno la bo20 la dingwaga! Mme le fa go ile ga nna le mathata a a golelang pele, tlhoafalo ya bone ga ya ka ya ngotlega fa ngwaga wa 2000 o ntse o atamela. Ba sa ntse ba tsaya taelo eno ya ga Jesu masisi: “Lo dire batho ba merafe yotlhe barutwa.” (Mathaio 28:19, 20) Mo ngwageng wa bofelo wa tirelo wa lekgolo la bo20 la dingwaga, palo ya baboledi ba ba tlhagafetseng ba dikgang tse di molemo e ne ya tshwara tlhora e ntšha ya 5 912 492. Ba ile ba dirisa palo e e boitshegang ya diura di le 1 144 566 849 ba bua le batho ba bangwe ka Modimo le maikaelelo a gagwe. Ba ile ba boela kwa bathong ba ba kgatlhegang ka makgetlo a le 420 047 796 ba ba ba tshwara dithuto tsa mahala tsa magae tsa Baebele di le 4 433 884. A bo seo e le rekoto e e molemo jang ne ya go dira ka tlhoafalo!

6. Ke thulaganyo efe e ntšha e e neng ya direlwa babulatsela, mme e ne ya tsibogelwa jang?

⁶ Ngogola ka January Setlhopha se se Laolang se ile sa itsise fa go fetolwa palo ya diura tse go lebeletsweng gore di dirwe ke babulatsela. Bontsi bo ile jwa solegela seno molemo ka go nna babulatsela ba ka metlha kana ba ba thusang. Ka sekai, mo dikgweding tsa ntlha tse nnè tsa khalentara ya 1999, lekala la Netherlands le ne la amogela dikopo tsa bobulatsela jwa ka metlha tse di fetang tsa ngwaga pele ga oo go menagane ganè. Ghana e bega jaana: “Fa e sa le go tlhongwa mokgele o mosha wa diura tsa babulatsela, palo ya babulatsela ba rona ba ka metlha e ile ya oketsega ka lobelo.” Mo ngwageng wa tirelo wa 1999, palo ya babulatsela mo lefatsheng lotlhe e ne ya tshwara 738 343—sesupo se se molemo sa go ‘tlhoafalela ditiro tse di molemomogolo.’—Tito 2:14.

7. Jehofa o ile a segofatsa jang tiro e batlhanka ba gagwe ba e dirang ka tlhoafalo?

⁷ A Jehofa o ile a segofatsa tiro eno e e dirwang ka tlhoafalo? Ee. O bua jaana a dirisa Isaia: “Tsholetsa matlho a gago o lebe, o kobakobe; ba phuthega botlhe mmogo ba tla kwa go wena; bomorwao ba tla, ba tswa kgakala, le bomorwadio ba tlaa tsholwa ka mabogo.” (Isaia 60:4) ‘Barwa’ le ‘barwadi’ ba ba tloditsweng ba ba ileng ba phuthwa ba sa ntse ba direla Modimo ka tlhoafalo. Mme gone jaanong, dinku tse dingwe tsa ga Jesu di ntse di phuthelwa kafa letlhakoreng la masalela a ‘barwa’ le ‘barwadi’ ba ga Jehofa ba ba tloditsweng mo dinageng le ditlhaketlhake tsa lewatle di le 234.

“Tiro Nngwe le Nngwe e e Molemo”

8. Basupi ba ga Jehofa ba dira ‘ditiro dife tse di molemo’?

⁸ Bakeresete ba na le boikarabelo jwa go rera dikgang tse di molemo tsa Bogosi le go thusa batho ba ba kgatlhegang go nna barutwa. Mme gone, ba “[tlhomeletswe] tiro nngwe le nngwe e e molemo.” (2 Timotheo 3:17) Ka gone, ba tlhokomela malapa a bone ka lorato, ba bontsha moya wa go rata baeng, le go etela ba ba lwalang. ( 1 Timotheo 5:8; Bahebera 13:16) E bile go na le baithaopi ba ba nnang le seabe mo ditirong tse di jaaka tsa go aga Diholo Tsa Bogosi—tiro e le yone e neelang bosupi. Kwa Togo, morago ga gore go agiwe holo, baeteledipele ba kereke nngwe ba ne ba batla go itse gore ke eng fa Basupi ba ga Jehofa ba ne ba kgona go ikagela dikago tsa bone fa kereke yone e tshwanelwa ke go hira batho go dira tiro eo! Togo e bega gore go agiwa ga Diholo Tsa Bogosi tsa maemo a a kwa godimo go ile ga nna le tlhotlheletso e e molemo thata mo metseng ya teng mo bangwe ba batho ba teng ba lekang go hira kana go aga matlo gaufi le mafelo a diholo di tlileng go agiwa mo go one.

9. Basupi ba ga Jehofa ba ile ba tsiboga jang fa masetlapelo a ganyaola batho?

⁹ Ka dinako tse dingwe, go tlhokega gore go dirwe mofuta o mongwe wa ditiro tse di molemo. Mo ngwageng wa tirelo o o fetileng dinaga tse dintsi di ile tsa ganyaolwa ke masetlapelo, mme gantsi batho ba ba neng ba fitlha pele go tla go thusa batho e ne e nna Basupi ba ga Jehofa. Ka sekai, karolo e kgolo ya naga ya Honduras e ile ya ganyaolwa ke Kgwanyape e e bidiwang Mitch. Ka bonako lekala la teng le ne la tlhoma dikomiti tsa maemo a tshoganyetso go rulaganya ditiro tsa go namola batho. Basupi ba Honduras le ba dinaga tse dingwe tse dintsi ba ile ba ntsha moneelo wa diaparo, dijo, melemo, le dilo tse dingwe tse di botlhokwa thata. Dikomiti Tsa Kgaolo Tsa Kago di ile tsa dirisa bokgoni jwa tsone go aga matlo sesha. Go ise go ye kae, bakaulengwe ba rona ba ba neng ba ganyaotswe ke masetlapelo ano ba ne ba thusiwa go boela mo ditirong tsa bone tsa ka metlha. Kwa Ecuador, Basupi ba ga Jehofa ba ile ba thusa bakaulengwe ba bone fa merwalela e megolo e ne e senya magae a bone. Modiredi mongwe wa puso o ile a bua jaana morago ga go bona tsela e go neng ga lebanwa le maemo ao ka manontlhotlho ka teng: “Fa batho bano e ka bo e le ba me, ke ne ke tla dira dilo tse di gakgamatsang! Batho ba ba tshwanang le lona ba tshwanetse go fitlhelwa mo lefatsheng lotlhe.” Ditiro tse di ntseng jalo tse di molemo, di dira gore Jehofa Modimo a bakwe e bile ke bosupi jwa “boineelo [jwa rona] jwa bomodimo [jo] bo [tswelang] mosola mo dilong tsotlhe.”—1 Timotheo 4:8.

Ba Tla ba ‘Fofa Jaaka Leru’

10. Le fa palo ya batlodiwa e ntse e ngotlega, ke eng fa leina la ga Jehofa le bolelwa go feta le fa e le leng pele?

¹⁰ Jaanong Jehofa o botsa jaana: “Ke bomang ba, ba ba fofang jaaka leru, le jaaka maeba a ya marobeng a one? Ruri ditlhake di tlaa nteta, le dikepe tsa Tarešiše pele, go lere bomorwao ba tswa kgakala . . . Baeng ba tlaa tsosa ba aga dithako tsa gago, le dikgosi tsa bone di tlaa go direla.” (Isaia 60:8-10) Ba ntlha go tsibogela ‘go tlhaba’ ga Jehofa e ne ya nna ‘barwa’ ba gagwe, Bakeresete ba ba tloditsweng. Go tswa foo ga latela “baeng,” boidiidi jo bogolo, jo ka boikanyegi bo thusang bakaulengwe ba bone ba ba tloditsweng, ba ba ikobela fa ba ntse ba ba eteletse pele mo go rereng dikgang tse di molemo. Ka gone, le fa palo ya batlodiwa e ntse e ngotlega, leina la ga Jehofa le ntse le bolelwa mo lefatsheng lotlhe go feta lefa e le leng pele.

11. (a) Ke eng se se sa ntseng se tswelela pele, mme go ne ga nna le matswela afe ka 1999? (b) Ke dinaga dife tse di nang le dipalo tse di kwa godimo thata tsa ba ba ileng ba kolobediwa ka 1999? (Bona tšhate mo go tsebe 17-20.)

¹¹ Ka ntlha ya seno, dimilione tsa batho di tla ka makatlanamane “jaaka maeba a ya marobeng a one,” di tshabela mo phuthegong ya Bokeresete. Ngwaga le ngwaga go tla diketekete mme tsela e sa ntse e bulegetse ba bangwe ba bantsi. Isaia a re: “Dikgoro tsa gago le tsone di tlaa nna di bulegile ka gale le ka gale.” (Isaia 60:11) Ngogola go ne ga kolobediwa ba le 323 439 e le sesupo sa go ineela go Jehofa, mme o sa ntse a butse dikgoro. “Dilo tse di eletsegang tsa merafe,” ba boidiidi jo bogolo, di sa ntse di tsena ka bontsintsi. (Hagai 2:7) Ga go ope wa batho ba ba batlang go tlogela lefifi yo o kganelwang go tsena. (Johane 12:46) E kete le ka motlha bano botlhe ba se ka ba felelwa ke tsela e ba anaanelang lesedi ka yone!

Go Nna Pelokgale fa ba Lebane le Kganetso

12. Batho ba ba ratang lefifi ba ile ba leka go tima lesedi jang?

¹² Batho ba ba ratang lefifi ba ila lesedi la ga Jehofa.  (Johane 3:19) Bangwe e bile ba leka go tima lesedi leno. Seno ga se gakgamatse. Tota le Jesu, “lesedi la boammaaruri le le nayang motho wa mofuta mongwe le mongwe lesedi,” o ne a sotlwa, a ganediwa, mme kgabagare a bolawa ke bagagabo. (Johane 1:9) Go ralala lekgolo la bo20 la dingwaga, Basupi ba ga Jehofa le bone ba ile ba sotlwa, ba latlhelwa mo dikgolegelong, ba thibelwa le e leng go bolawa, fa ba ntse ba phatsimisa lesedi la ga Jehofa ka boikanyegi. Mo dingwageng tsa bosheng jaana, baganetsi ba ile ba dirisa bobegadikgang go bua maaka ka ba ba phatsimisang lesedi la Modimo. Bangwe ba bone ba batla go dira gore batho ba dumele gore Basupi ba ga Jehofa ba kotsi le gore ba tshwanetse go ilediwa kana go thibelwa. A baganetsi bano ba ile ba atlega?

13. Go tlhalosetsa ba bobegadikgang sentle ka se e leng boammaaruri malebana le tiro ya rona go ile ga tlhagisa matswela afe?

¹³ Nnyaa. Fa go tlhokega, Basupi ba ga Jehofa ba ile ba ya kwa go ba bobegadikgang go ya go tlhalosa se tota e leng boammaaruri. Ka ntlha ya seno, leina la ga Jehofa le ile la anamisiwa thata mo makwalodikgannyeng le mo dimakasineng le mo radiong le thelebishene. Seno se ile sa nna le matswela a a molemo mo tirong ya go rera. Ka sekai, kwa Denmark, thulaganyo nngwe ya thelebishene e ile ya bua ka kgang e e reng “Lebaka la go bo tumelo ya batho ba Denmark e koafala.” Basupi ba ga Jehofa ba ne ba botsolodiwa ba na le batho ba bangwe. Morago ga foo, mosadi mongwe yo o neng a lebile thulaganyo eno o ile a akgela jaana: “Go ne go bonala sentle gore ke bomang ba ba nang le moya wa Modimo.” Go ne ga simololwa thuto le ene.

14. Baganetsi ba tla kotlomana pelo fa ba patelesega go lemoga eng?

¹⁴ Basupi ba ga Jehofa ba a itse gore batho ba le bantsi mo lefatsheng leno ba tla ba ganetsa. (Johane 17:14) Le fa go ntse jalo, ba nonotshiwa ke boporofeti jono jwa ga Isaia: “Bomorwaa bone ba ba kileng ba ne ba go patika ba tlaa tla ba go ikobetse; botlhe ba ba kileng ba ne ba go nyatsa, ba tlaa khutšhama fa dipatong tsa dinao tsa gago; mme ba tlaa go raya leina ba re: Motse wa ga Jehofa, Sione wa Moitshepi wa Iseraele.” (Isaia 60:14) Baganetsi ba tla tloga ba kotlomanngwa pelo ke go lemoga gore tota ba ntse ba lwa le Modimo ka boene. Ke mang yo o ka fenyang mo ntweng e e ntseng jalo?

15. Basupi ba ga Jehofa ba “anya maši a merafe,” jang, mme seno se ile sa bonala jang mo tirong ya bone ya go ruta le go rera?

¹⁵ Gape Jehofa o solofetsa jaana: “Ke tlaa go dira go nna boitlotlomatso jo bo sa khutleng . . . Le gone o tlaa anya maši a merafe, o tlaa anya a dikgosi; mme o tlaa itse fa Nna Jehofa ke le Mmoloki wa gago.” (Isaia 60:15, 16) Ee, Jehofa ke Mmoloki wa batho ba gagwe. Fa ba ikaega ka ene, ba tla nna ka “bosakhutleng.” Mme ba tla “anya maši a merafe,” ba dirisa dilo dingwe tse di leng teng go dira gore kobamelo ya boammaaruri e gatele pele. Ka sekai, go dirisa dikhomputara le boranyane jwa tsa tlhaeletsano ka tsela e e molemo go ile ga thusa gore Tora ya Tebelo e gatisiwe ka nako e le nngwe ka dipuo di le 121 mme Tsogang! ka di le 62. Go tlhamilwe thulaganyo nngwe ya khomputara go thusa go ranolela Thanolo ya Lefatshe le Lesha mo dipuong tse dingwe mme thanolo eno e itumedisa tota. Fa thanolo ya Se-Croatia ya Dikwalo Tsa Segerika Tsa Bokeresete e ne e gololwa ka 1999, diketekete tsa bone di ne tsa putsaputsa dikeledi tsa boitumelo. Mokaulengwe mongwe yo o godileng o ile a re: “Ga ke bolo go letela Baebele eno. Jaanong nka itshwela ka kagiso!” Go anamisiwa ga Thanolo ya Lefatshe le Lesha, e feletse kana sephatlo sa yone, go fetile dimilione di le 100 ka dipuo di le 34.

Boitsholo Jwa Maemo a a Kwa Godimo

16, 17. (a) Ke eng fa go le botlhokwa go nna re kgomaretse melao ya ga Jehofa ya maemo a a kwa godimo le fa go le boima? (b) Ke tiragalo efe e e bontshang gore basha ba ka kgona go tila go leswafadiwa ke lefatshe?

¹⁶ Jesu o ile a re: “Yo o dirang dilo tse di bifelesegang e le tlwaelo o tlhoile lesedi.” (Johane 3:20) Ka fa letlhakoreng le lengwe, batho ba ba tswelelang pele ba le mo leseding ba rata melao ya ga Jehofa ya maemo a a kwa godimo. Jehofa  o bua jaana a dirisa Isaia: “Batho ba gago le bone ba tlaa nna tshiamo botlhe.” (Isaia 60:21a) Ga go motlhofo go tshela o ikobela melao ya maemo a a kwa godimo ya boitsholo mo lefatsheng leno le le tletseng ka boitsholo jo bo maswe jwa tlhakanelodikobo, go aka, bogagapa le boikgogomoso. Ka sekai, kwa dinageng dingwe, ikonomi e gatela pele thata mme go motlhofo gore motho a raraediwe ke boikutlo jwa bogagapa jwa go gwalalela dikhumo. Le fa go ntse jalo, Paulo o ile a tlhagisa jaana: “Ba ba ikemiseditseng go huma ba wela mo thaelong le mo serung le mo dikeletsong tse dintsi tsa bosenangtlhaloganyo le tse di utlwisang botlhoko, tse di thabuetsang batho mo tshenyegong le mo tshenyakong.” (1 Timotheo 6:9) A bo go utlwisa botlhoko jang ne go bona motho a tsena ka tlhogo mo kgwebong gore a bo a lebale ka dilo tse di leng botlhokwa thata, tse di jaaka go kopana mmogo le Bakeresete ba bangwe, tirelo e e boitshepo, melao ya boitsholo le maikarabelo a lelapa!

¹⁷ Go kgomarela melao e e siameng go ka nna boima segolobogolo mo basheng, e re ka bontsi jwa balekane ba bone ba inaakantse le go se dirise  diokobatsi sentle le boitsholo jo bo maswe. Kwa Suriname, mosetsana wa dingwaga tse 14 o ne a atamelwa ke mosimane mongwe wa maratagolejwa kwa sekolong mme a mo kopa gore a nne le kamano ya tlhakanelodikobo le ene. O ne a gana, a mo tlhalosetsa gore Baebele e iletsa dilo tse di ntseng jalo fa batho ba sa nyalana. Basetsana ba bangwe kwa sekolong ba ile ba mo tshega mme ba leka go mo gatelela gore a fetole mogopolo, ba bolela gore basetsana botlhe ba eletsa go tlhakanela dikobo le mosimane yono. Mosetsana yono o ne a nna a gana a tlhomame. Dibeke di se kae moragonyana, go ne ga lemotshega fa mosimane yono a na le kokwana ya HIV mme a lwala thata. Mosetsana yono o ne a itumeletse gore o ile a ikobela taelo ya ga Jehofa ya gore a ‘ikehe mo kgokafalong.’ (Ditiro 15:28, 29) Basupi ba ga Jehofa ba motlotlo tota ka basha ba bone ba ba emelang tshiamo ba tlhomame. Tumelo ya bone le ya batsadi ba bone e ‘galaletsa’—e tlotlomatsa—leina la ga Jehofa Modimo.—Isaia 60:21b.

Jehofa o Okeditse

18. (a) Ke selo sefe se segolo se Jehofa a se diretseng batho ba gagwe? (b) Ke bosupi bofe jo bo bontshang gore koketsego e tla tswelela pele, mme ke dilo dife tse di molemo tse di solofetsweng ke batho ba ba tswelelang pele ba le mo leseding?

¹⁸ Ee, Jehofa o phatsimisetsa batho ba gagwe lesedi, a ba segofatsa, a ba kaela, le go ba nonotsha. Mo lekgolong la bo20 la dingwaga, ba ile ba bona mafoko ano a ga Isaia a diragala: “Yo monnye o tlaa tla a nna sekete, le yo mmotlana a nna morafe o o thata; nna Jehofa ke tlaa go akofisa mo motlheng wa gone.” (Isaia 60:22) “Yo monnye” o nnile go feta “sekete” go tswa mo palong e e neng e ka tlala seatla ka 1919. Mme koketsego eo ga e ise e fele! Ngogola batho ba le 14 088 751 ba ne ba nna gone kwa moketeng wa Segopotso sa loso lwa ga Jesu. Bontsi jwa batho bano e ne e se Basupi ba ba tlhagafetseng. Re itumelela go bo ba ile ba nna gone mo moketeng oo o o botlhokwa, mme re ba kopa gore ba gatele pele go ya kwa leseding. Jehofa o sa ntse a phatsimela batho ba gagwe ka phatsimo e kgolo. Kgoro e e tsenang mo phuthegong ya gagwe e sa ntse e butswe. Ka jalo, a botlhe ba ititeye sehuba go tswelela ba le mo leseding la ga Jehofa. A bo seo se re leretse masego a magolo jang ne gone jaanong! E bile a bo seo se tla re leretse masego a magolo jang ne mo isagweng fa popo yotlhe e tla bo e baka Jehofa e bile e itumelela kgalalelo e kgolo ya gagwe!—Tshenolo 5:13, 14.

A o Ka Tlhalosa?

• Ke bomang ba ba phatsimisang kgalalelo ya ga Jehofa mo malatsing ano a bofelo?

• Ke eng se se bontshang gore tlhoafalo ya batho ba ga Jehofa ga ya ngotlega?

• Ke ditiro dife tse di molemo tse Basupi ba ga Jehofa ba semeletseng mo go tsone?

• Re tlhatswegile pelo ka eng le mororo re lebana le dipogiso tse di setlhogo?

 [Dipotso Tsa Thuto]

[Tšhate mo go tsebe 17-20]

PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1999

 (Leba kgatiso)

[Ditshwantsho mo go tsebe 15]

Batho ba sa ntse ba tla ka makatlanamane mo phuthegong ya ga Jehofa

[Setshwantsho mo go tsebe 16]

Re itumelela gore Jehofa o sa ntse a buletse batho ba ba ratang lesedi dikgoro