Lefoko la Modimo la Boporofeti le Neela Tsholofelo  ka Isagwe

KA NTLHA ya Lefoko la Modimo e leng Baebele e e Boitshepo, Bakeresete ba boammaaruri ba leba isagwe ba na le tumelo, tsholofelo e bile ba na le tshepo. E re ka ba tlhomamisegile ka kamano ya bone le Jehofa Modimo, ba lebeletse pele mo isagweng. Jaaka puo e e simololang ya Dikopano Tsa Kgaolo tsa “Lefoko la Modimo la Boporofeti” e ile ya tlhalosa, Basupi ba ga Jehofa e nnile baithuti ba Baebele ba ba tlhaga ba boporofeti jwa Baebele ka dingwaga tse dintsi. Ka gone, Jehofa o ne a tshwaretse batho ba gagwe eng kwa dikopanong tseno? Batho botlhe ba ba neng ba tlile, ba tshwere Dibaebele tsa bone, ba ne ba tlhoafaletse go itse. Setlhogo sa letsatsi lengwe le lengwe la kopano se beilwe e le setlhogwana se se farologaneng.

LETSATSI LA NTLHA: Go Tsamaya mo Leseding la Lefoko la Modimo

Puo e e reng “Lefoko la Modimo le re Kaetse” e ne ya tlhalosa gore batho ba ga Jehofa ba tshwana le motho yo o simololang loeto mo lefifing la bosigo. Fa letsatsi le ntse le tlhaba, o bona meriti, mme fa letsatsi le setse le phatsima kwa godimo ga tlhogo, o bona sengwe le sengwe sentle. Jaaka go boleletswe pele mo go Diane 4:18, batho ba ga Jehofa ba bona tsela ya bone sentle mo leseding le le galalelang la boammaaruri jo bo tswang mo lefokong la Modimo la boporofeti. Ga ba a tlogelwa gore ba kgopiwe mo lefifing la semoya.

Puo ya setlhogo, e e reng “Ela Tlhoko Lefoko la Modimo la Boporofeti,” e ne ya gakolola bareetsi gore batho ba ba ikanyang Jehofa ba ka se ka ba kgobega marapo le go swabisiwa jaaka batho ba ba latelang bomesia ba maaka le baporofeti ba maaka. Go farologana le seo, ditshwanelego tsa Mesia wa boammaaruri, Jesu Keresete di tlhomologile! Ka sekai, go fetolwa ponalo ga ga Jesu ka tsela ya kgakgamatso e ne e le ponelopele ya gagwe fa a setse a le Kgosi e e tlhomilweng mo Bogosing jwa Modimo. Fa e sa le Jesu a nna mo setulong sa Bogosi ka 1914, o bile a nna “mphatlalatsane” e e umakilweng mo go 2 Petere 1:19. Sebui se ile sa bolela jaana: “Jaaka Mphatlalatsane yo e leng Mesia, o bolela ka letsatsi le lesha, kgotsa motlha o mosha, o o tlhabelang batho botlhe ba ba kutlo.”

Thulaganyo ya thapama e ne ya simololwa ka puo e e reng “Go Phatsima Jaaka Dibonesi” e e neng e tlhalosa Baefeso 5:8, e mo go yone moaposetoloi Paulo a re gakololang gore re ‘tswelele re tsamaya jaaka bana ba lesedi.’ Bakeresete ke dibonesi, e seng fela ka go bo ba bolelela ba bangwe ka Lefoko la Modimo mme gape ka go bo ba dirisa Baebele mo matshelong a bone ba etsa Jesu.

Go nna sebonesi sa mofuta ono, re tshwanetse gore re “Itumelele go Bala Lefoko la Modimo.” Setlhogo seno se ne sa tlhalosiwa mo simphosiamong sa dikarolo tse tharo. Fa sebui sa ntlha se sena go nopola Abraham Lincoln, yo o neng a re Baebele ke “mpho e e di gaisang tsotlhe e Modimo o kileng wa e naya batho,” o ne a botsa bareetsi gore mekgwa ya bone ya go bala e senola eng malebana le kafa ba anaanelang Lefoko la ga Jehofa ka teng. Bareetsi ba ne ba kgothadiwa gore ba bale Baebele ka kelotlhoko, ba iphe nako ya go bona dipego tsa Dikwalo ka matlho a tlhaloganyo le go golaganya dintlha tse disha le dilo tse ba setseng ba di ithutile.

Karolo e e latelang ya simphosiamo e ile ya gatelela botlhokwa jwa go ithuta, e seng go bala ka go itlhaganela fela, fa e le gore re batla “dijo tse di tiileng.” (Bahebera 5:13, 14) Sebui se ile sa bolela gore go ithuta go ka aga thata fa re ‘tlhomamisa dipelo tsa rona’ go sa le gale, jaaka moperesiti wa Iseraele e bong Esera a ile a dira. (Esera 7:10) Mme ke eng fa go ithuta go le botlhokwa jaana? Ka gonne go amana thata le botsalano jo re nang najo le Jehofa. Ka jalo, go ithuta Baebele e tshwanetse ya nna selo se se monate se se itumedisang le se se lapolosang, tota le fa go tlhoka gore re thapise mogopolo le go dira maiteko. Re ka bona kae nako ya go ithuta ka tsela e e molemo? Sebui sa bofelo sa simphosiamo se ile sa re ke ka go ‘ithekela nako nngwe le nngwe e e siametseng’ mo dilong tse di seng botlhokwa thata. (Baefeso 5:16) Ee, selotlolo sa go bona nako ke go dirisa nako e re nang le yone ka tsela e e molemolemo.

Puo e e reng “Modimo o Naya yo o Lapileng Maatla” e ne ya dumela gore batho ba le bantsi ba lapile mo malatsing ano. Gore re tle re nne le “maatla a a fetang a a tlwaelegileng” mo bodireding jwa Bokeresete, re tlhoka gore re ikaege ka Jehofa, yo o ‘nayang yo o lapileng maatla.’ (2 Bakorintha 4:7; Isaia 40:29, NW) Dilo tse di thusang go re nonotsha di akaretsa Lefoko la Modimo, thapelo, phuthego ya Bokeresete, go nna le seabe ka metlha mo bodireding, balebedi ba Bakeresete le sekao sa boikanyegi sa ba bangwe. Setlhogo se se reng “Nnang ba ba Rutang ka Ntlha ya Nako” se ne sa gatelela botlhokwa jwa gore Bakeresete e nne barutisi le bareri le go dira ka natla gore ba tlhagolele “botswerere jwa go ruta.”—2 Timotheo 4:2.

Puo ya bofelo ya letsatsi leo e e neng e re “Ba ba Tlhabanang le Modimo Ga ba Na go Fenya,” e ne ya umaka maiteko a a ileng a dirwa bosheng jaana mo dinageng dingwe a go dira gore Basupi ba ga Jehofa ba tsewe e le lekoko le le kotsi. Mme ga re tlhoke go boifa ka gonne Isaia 54:17 e bolela jaana: “‘Ga go na sebolao sepe se se thudilweng ka ga gago se se tlaa segofalang; le loleme longwe le longwe lo lo tlaa go tsogelang mo tshekong, o tlaa lo sekisa. Selo se, ke boswa jwa batlhanka ba Jehofa, le tshiamo ya bone e e tswang mo go nna.’ Go bua Jehofa.”

LETSATSI LA BOBEDI: Dilo Tse di Itsisitsweng ka Dikwalo Tsa Boporofeti

Fa go sena go sekasekiwa temana ya Baebele ya letsatsi batho ba ba neng ba phuthegile moo ba ne ba reetsa simphosiamo sa bobedi sa kopano se se nang le setlhogo se se reng “Go Galaletsa Jehofa  Jaaka Baphatsimisi ba Lesedi.” Puo ya ntlha e ne ya bontsha gore mokgele wa Mokeresete ke go galaletsa Jehofa ka go rera gongwe le gongwe. Karolo e e latelang e ne ya umaka botlhokwa jwa go kaela batho ba ba arabelang mo phuthegong ya Modimo. Jang? Ka gore re dirise metsotso e le metlhano kana e le lesome pele kana morago ga thuto nngwe le nngwe ya Baebele ya legae go bontsha kafa phuthego ya Modimo e dirang ka teng. Puo ya boraro ya simphosiamo seno e ne ya gatelela botlhokwa jwa go galaletsa Modimo ka ditiro tse di molemomogolo.

Puo e e reng “Rata Dikgakololo Tsa ga Jehofa Thata” e ne ya sekaseka ditemana tse di rileng tsa Pesalema 119. Kwantle ga pelaelo, re tlhoka dikgakololo, ka gonne rotlhe re a lebala. A bo go le botlhokwa jang ne, gore re rate dikgakololo tsa ga Jehofa, fela jaaka mopesalema!

Morago ga foo go ne ga latela selo se se botlhokwatlhokwa—puo ya kolobetso e e neng e na le setlhogo se se reng “Go Tsaya Lefoko la Boporofeti Tsia go Isa Kolobetsong.” Bayakolobetsong ba ne ba gakololwa gore ga ba etse Keresete ka go kolobediwa fela mme gape le ka go latela dikgato tsa gagwe sentlentle. (1 Petere 2:21) A bo e le tshiamelo jang ne gore batho ba basha bano ba bo ba na le seabe mo go diragatseng Johane 10:16 mo Jesu a neng a bolelela pele gore o tla phutha “dinku tse dingwe” gore di dire mmogo le barutwa ba gagwe ba ba tloditsweng ka moya!

Puo e e neng e simolola thulaganyo ya thapama e e reng “Utlwa se Moya o se Buang” e ne ya tlhalosa gore moya wa ga Jehofa o bua le rona ka Baebele, “motlhanka yo o boikanngo le yo o bonokopela,” le ka segakolodi sa rona se se thapisitsweng ka Baebele. (Mathaio 24:45) Ka jalo, Bakeresete ga ba tlhoke go utlwa lentswe la mmatota le tswa kwa legodimong gore ba tle ba itse gore ba tshwanetse go itumedisa Modimo jang. Puo e e latelang e e reng “Go Nitama mo Thutong e e Dumalanang le Boineelo Jwa Bomodimo,” e ne ya gakolola Bakeresete gore ba se ka ba tlhotlhomisa megopolo e e senyang e e tlhotlhelediwang ke lefatshe leno. Ee, go rata go itse go ka dira gore re nne le tshedimosetso e e gobatsang e e jadilweng ke batlhanogi le baemedi ba bangwe ba ga Satane. A bo go le botoka thata jang ne go bala Baebele ka metlha mmogo le ditlhogo tsotlhe tse di mo dimakasineng tsa Tora ya Tebelo le Tsogang!

Puo e e latelang e e nang le setlhogo se se reng “Nna o Tshegeditse Sekao sa Mafoko a a Itekanedisang,” e ne ya gatelela botlhokwa jwa go tlwaelana thata le “sekao,” kana boammaaruri jotlhe jaaka bo ntse. (2 Timotheo 1:13) Go tlhaloganya sekao seno ga se fela tsela ya go nna le poifomodimo mme gape ke tsela ya go lemoga dilo tse di sa dumalaneng le boammaaruri.

A ko o akanye fela Jehofa a go leba jaaka selo se se eletsegang. A bo e le tlotlo jang ne! Puo e e neng e theilwe mo boporofeting jwa ga Hagai e e reng “‘Dilo Tse di Eletsegang’ di Tlatsa Ntlo ya ga Jehofa” e ne e kgothatsa tota ka gonne e ne e tlhomamisetsa bareetsi gore mongwe le mongwe wa “boidiidi jo bogolo” ke selo se se eletsegang thata mo go Jehofa. (Tshenolo 7:9) Ka jalo, Jehofa o tla ba sireletsa fa a “reketlisa” ditšhaba la bofelo ka nako ya “sepitla se segolo” se se tlang. (Hagai 2:7, 21, 22; Mathaio 24:21) Le fa go ntse jalo, go ntse go le jalo, batho ba ga Jehofa ba tshwanetse go nna ba disitse mo semoyeng, jaaka go tlhalositswe mo karolong ya puo e e reng “Dikwalo Tsa Boporofeti di re Tlhagisa Gore re Nne re Disitse.” Sebui se ne sa nopola mafoko ano a ga Jesu: “Jalo, nnang lo disitse, ka gonne ga lo itse gore Morena wa lona o tla ka letsatsi lefe.” (Mathaio 24:42) Re ka nna jang re tlhagafetse mo semoyeng? Ka go nna re tshwaregile mo tirelong ya ga Jehofa, re rapela ka metlha le go nna re lebeletse letsatsi le legolo la ga Jehofa.

Puo ya bofelo ya letsatsi leo e ne e na le setlhogo se se reng “Lefoko la Boporofeti mo Motlheng wa Bokhutlo.” Puo eno e tla gopolwa mo dingwageng tse dintsi tse di tlang. Ka ntlha yang? Ka gonne sebui se ne sa itsise go gololwa ga buka e ntšha—Ela Tlhoko Boporofeti Jwa ga Daniele! Sebui se ne sa bolela jaana: “Kgatiso eno ya ditsebe di le 320 e e nang le ditshwantsho tse dintle e tlotla ka karolo nnngwe le nngwe ya buka ya Daniele.” A bo e le bosupi jo bo nonotshang tumelo jang ne jwa gore Jehofa o phatsimisa lesedi mo Lefokong la gagwe la boporofeti!

LETSATSI LA BORARO: Lefoko la Modimo la Boporofeti Ga le Ke le Tlhaela

Letsatsi la bofelo la kopano le ile la simologa ka simphosiamo se se reng “Mafoko a Boporofeti a Nako e e Tlhomilweng.” Dikarolo tse tharo tseno di ile tsa sekaseka dipolelo tse tharo tsa ga moporofeti  Habakuke kaga dikatlholo tsa ga Jehofa tsa tshenyego. Ya ntlha e ne e le kgatlhanong le Juda yo o neng a fapogile mme ya bobedi e ne e le kgatlhanong le Babelona yo o gatelelang. Ya bofelo, e e sa ntseng e tla diragadiwa, e bua ka tshenyego e e gaufi ya batho botlhe ba ba boikepo. Fa mokaulengwe wa bofelo mo simphosiamong a ne a bua ka Aramagedona, o ne a tlhotlheletsa bareetsi gore ba nne le poifo e e tshwanelang ya bomodimo fa a ne a re: “Ruri e tla bo e le tiragalo e e boitshegang fa Jehofa a tla bo a dirisa maatla otlhe a gagwe a magolo.”

Setlhogo sa terama e e amang maikutlo ya kopano se ne se re “Go Anaanela Boswa Jwa Rona Jwa Semoya.” Terama eno e e hukutsang maikutlo a motho e ne e bapisa maikutlo a ga Jakobe le Esau malebana le dilo tsa semoya. Esau o ne a sa anaanele boswa jwa gagwe jwa semoya, mo e leng gore bo ile jwa fiwa Jakobe yo o neng a bo anaanela. Batlakopanong ba ne ba bodiwa jaana: “Ke eng se Jehofa a re fileng sone [e le boswa jwa semoya]?” Sebui se ne sa araba ka go re: “Boammaaruri jwa Lefoko la gagwe, Baebele; tsholofelo ya botshelo jo bo sa khutleng; le tlotla ya go nna baemedi ba gagwe ka go nna baboledi ba dikgang tse di molemo.”

Karolo e e latelang e ne e na le setlhogo se se reng “Boswa Jwa Rona jo bo Botlhokwa bo Kaya Eng mo go Wena?” Re bontsha boikutlo jo bo tshwanetseng ka boswa jwa rona jwa semoya fa re dira gore tirelo ya ga Jehofa le ditshiamelo tsa rona tsa semoya di tle pele ga dilo tsa botho kana dilo tse di bonalang tseo re di kgatlhegelang. Ka tsela eno re dira gore re nne le kamano le Jehofa mo botshelong jwa rona, mme re farologana gotlhelele le Adame le Esau le Baiseraele ba ba sa ikanyegeng.

Puo ya phatlalatsa, e e neng e re “Go Dira Dilo Tsotlhe Sesha—Jaaka go Boleletswe Pele,” e ne ya kgobokanya dipolelelopele tse nnè tsa botlhokwa tse di buang ka “magodimo a masha” le “lefatshe le lesha.” (Isaia 65:17-25; 66:22-24; 2 Petere 3:13; Tshenolo 21:1, 3-5) Go phepafetse gore Jehofa o ne a akantse go diragadiwa ka tsela e kgolwane ga dipolelelopele tseno go na le tiragatso e e neng ya diragala ka 537 B.C.E. mo bathong ba gagwe ba ba tsosolositsweng. Ee, o ne a akantse ka puso ya Bogosi jwa gagwe (“magodimo a masha”) le babusiwa ba yone ba ba mo lefatsheng (“lefatshe le lesha”), ba ba tla nnang mo paradaiseng e ntle ya lefatshe lotlhe.

Puo e e neng ya konela kopano ka tsela e e itumedisang le e e tlhotlheletsang e ne e le e e reng “Dilo Tse re di Lebeletseng fa re Ntse re Kaelwa ke Lefoko la Modimo.” E ne ya gopotsa botlhe gore “nako e e setseng e khutshwafetse” go wetsa tiro ya go bolela ka Bogosi. (1 Bakorintha 7:29) Ee, re gaufi thata le gore Jehofa a diragatse katlholo ya gagwe kgatlhanong le Satane le tsamaiso ya gagwe yotlhe e e boikepo. E kete re ka nna le maikutlo a a tshwanang le a mopesalema yo o neng a opela jaana: “Mowa wa rona o ntse o lebeletse Jehofa; ke ene thuso ya rona, le thebe ya rona.” (Pesalema 33:20) A bo batho ba ditebelelo tsa bone di theilweng mo lefokong la Modimo la boporofeti ba na le tsholofelo e e itumedisang jang ne!

[Setshwantsho mo go tsebe 7]

Terama e e amang maikutlo e ne ya oketsa kanaanelo ya batlhanka ba ga Jehofa malebana le boswa jwa bone jwa semoya

[Setshwantsho mo go tsebe 7]

Ba le bantsi ba ba ileng ba tsaya lefoko la Modimo la boporofeti tsia ba ile ba kolobediwa