Pego ya Baboledi ba Bogosi

Tumelo ya Bone e Ile ya Duelwa

MOAPOSETOLOI PAULO e ne e le monna yo o nang le tumelo e e tlhomologileng mme o ne a kgothaletsa badumedikaene gore le bone ba tlhagolele tumelo. O ne a re: “Yo o atamelang Modimo o tshwanetse go dumela gore o gone le gore o nna moduedi wa ba ba o senkang ka tlhoafalo.” (Bahebera 11:6) Maitemogelo a a latelang a a tswang kwa Mozambique a bontsha kafa Jehofa a duelang tumelo e e nonofileng ka gone le kafa a arabelang dithapelo tse di tlhoafetseng ka teng.

• Kgaitsadi mongwe wa motlholagadi wa kwa porofensing ya Niassa o ne a tshwenyegile ka gore ene le bana ba gagwe ba barataro ba tla ya jang kwa Kopanong ya Kgaolo ya “Tsela ya Modimo ya Botshelo.” O ne a bona madi fela ka go rekisa dilo mo mmarakeng, mme fa letlha la kopano le atamela, o ne a na le madi a a lekaneng go duelela loeto lwa gagwe le lelapa la gagwe lwa go ya fela kwa kopanong. Le fa go ntse jalo, o ne a swetsa gore a ikanye thuso ya ga Jehofa mme a tswelela ka dithulaganyo tsa go nna teng kwa kopanong.

Ene le bana ba gagwe ba barataro ba ne ba palama terena. Fa ba ntse ba le mo loetong kontai ya terena e ne ya mo atamela go kopa thekete ya gagwe. Fa a bona betšhe e a e tsentseng, o ne a mmotsa gore ke karata ya boikitsiso ya eng e a e tsentseng. Kgaitsadi o ne a mmolelela gore e ne e le boikitsiso jwa gore ke mongwe wa batlakopanong ya kgaolo ya Basupi ba ga Jehofa. Kontai ya terena e ne ya botsa ya re: “Kopano eno e tla tshwarelwa kae?” Fa a sena go utlwa gore kopano e tla bo e le mo porofenseng e e bapileng le ya Nampula, mo e ka nnang bokgakala jwa dikilometara di le 300, o ne a duedisa kgaitsadi sephatlo sa tlhwatlhwa ya thekete e e tlwaelegileng, kgaitsadi a sa lebelela! Go tswa foo a naya ene le lelapa la gagwe dithekete tsa go boa ka sephatlo sa madi a a neng a tshwanetse go a duela. A bo kgaitsadi a ile a itumela jang ne go bo a ile a ikanya Jehofa!—Pesalema 121:1, 2. 

• Mo e ka nnang ka dingwaga di le 25 mosadi mongwe yo o ratang bodumedi thata o ne a rapela Modimo gore a mo kaele tsela e e siameng ya go mo obamela. Kereke e a neng a e tsena e ne e kopanya mediro ya bodumedi le meetlo ya setso mme o ne a belaela gore a mofuta ono wa kobamelo o itumedisa Modimo.

O anela jaana: “Ka metlha ke ne ke gakologelwa mafoko a ga Jesu a a kwadilweng mo go Mathaio 7:7: ‘Nnang lo kope, mme lo tla newa; nnang lo senke, mme lo tla bona; nnang lo kokote, mme lo tla bulelwa.’ Ke ntse ke akantse ka lokwalo lono, ke ne ka rapela Modimo ka metlha gore a nkaele go bona boammaaruri. Ka letsatsi lengwe moruti wa kereke ya rona o ne a kopa gore batho botlhe ba ba berekang mo mmarakeng ba mo tlisetse selekanyo se se rileng sa madi le dingwe tsa dilo tsa bone gore a tle a ba segofatse. Ke ne ke bona kopo eno e sa tshwanela go ya ka dikwalo, ka jalo botlhe ba ne ba tlisa sengwe fa e se nna fela. Fa moruti a lemoga gore ga ke a tlisa ‘neo,’ o ne a simolola go nkgoba mo pele ga maloko otlhe a kereke. Ka letsatsi leo ke ne ka lemoga gore tsela eo e ne e se e Modimo a batlang go obamelwa ka yone, ka jalo ke ne ka tlogela kereke eo. Go ntse go ntse jalo, ke ne ka tswelela pele ke rapelela go bona boammaaruri.

“Kgabagare, ke ne ka ititaya sehuba mme ka ikgolaganya le wa losika yo e leng mongwe wa Basupi ba ga Jehofa. O ne a nnaya pampitshana, mme fa ke e bala ke ne ka lemoga ka bonako gore Modimo o araba dithapelo tsa me. Fa nako e ntse e ya, molekane wa me le ene o ne a simolola go anaanela boammaaruri jwa Baebele mme re ne ra kwadisa lenyalo la rona kafa molaong. Le fa go ntse jalo, moragonyana, monna wa me o ne a lwala thata. Mme le fa go ntse jalo, go fitlha a swa, o ne a nkgothaletsa gore ke itshoke mo tseleng ya boammaaruri gore re tle re kopane gape mo Paradaiseng.

“Ke leboga Jehofa thata go bo a ile a araba dithapelo tsa me mme a mpontsha tsela e e siameng ya go mo obamela. Dithapelo tsa me di ile tsa arabiwa gape ka gore ke ile ka bona bongwanake botlhe ba ba robedi ba nna batlhanka ba ba ineetseng ba ga Jehofa.”