Nna le Boikutlo Jwa go Leta!

“Ke tla supa boikutlo jwa go leta mo Modimong wa poloko ya me. Modimo wa me o tla nkutlwa.”—MIKA 7:7, NW.

1, 2. (a) Boikutlo jo bo sa siamang bo ile jwa gobatsa Baiseraele jang kwa sekakeng? (b) Go ka direga eng ka Mokeresete yo o sa lweleng go nna le boikutlo jo bo siameng?

DILO di le dintsi mo botshelong di ka lejwa ka tsela e e molemo kana e e sa siamang go ikaegile ka boikutlo jwa rona. Fa Baiseraele ba ne ba le mo sekakeng, ba ne ba tlamelwa ka kgakgamatso ka mana. Ba ne ba tshwanetse go leba naga eo e e lokgere mme go ba dire gore ba anaanele tsela e Jehofa a neng a ba tlamela ka yone. Seo se ne se tla bontsha go nna le boikutlo jo bo siameng. Go na le moo, ba ne ba nnela go gopola dijo tsa mefutafuta tsa kwa Egepeto mme ba ngongoregela gore mana a ne a ba tlapela. A boikutlo jo bo sa siamang!—Dipalo 11:4-6.

² Le gompieno boikutlo jo Mokeresete a nang najo bo ka dira gore dilo di lebege di itumedisa kana di sa itumedise. Fa Mokeresete a se na boikutlo jo bo siameng, a ka nna a felelwa ke boitumelo, mme seo se ka nna masisi ka gonne Nehemia o ile a re: “Boitumelo jwa ga Jehofa ke thata ya [rona].” (Nehemia 8:10) Go nna le boikutlo jo bo siameng jwa boipelo go re thusa go nna re nonofile e bile go rotloetsa kagiso le kutlwano mo phuthegong.—Baroma 15:13; Bafilipi 1:25.

3. Boikutlo jo bo siameng bo ile jwa thusa Jeremia jang mo nakong ya mathata?

³ Le fa Jeremia a ne a tshela mo nakong e e thata, o ne a na le boikutlo jo bo siameng. Tota le fa a ne a bona matlhotlhapelo a go ripitlwa ga Jerusalema ka 607 B.C.E., o ne a sa ntse a kgona go bona dilo dingwe tse di molemo. Jehofa o ne a se kitla a lebala Iseraele, mme le setšhaba se ne se tla falola. Jeremia o ne a kwala jaana mo bukeng ya Dikhutsafalo: “Ke ditiro tsa bopelonomi jwa lorato tsa ga Jehofa, go bo re sa fela, ka gonne mautlwelobotlhoko a gagwe ruri ga a na go khutla. A masha moso mongwe le mongwe. Boikanyegi jwa gago bo bogolo.” (Dikhutsafalo 3:22, 23) Mo hisitoring yotlhe, batlhanka ba Modimo ba  ile ba nna ba boloka boikutlo jo bo molemo le e leng jwa boipelo mo maemong a a maswe go gaisa.—2 Bakorintha 7:4; 1 Bathesalonika 1:6; Jakobe 1:2.

4. Jesu o ile a nna le boikutlo jo bo ntseng jang, mme bo ile jwa mo thusa jang?

⁴ Dingwaga di le 600 morago ga Jeremia, Jesu o ne a thusiwa go itshoka ka ntlha ya go nna le boikutlo jo bo siameng. Re bala jaana: “Ka ntlha ya boipelo jo bo neng bo tlhomilwe fa pele ga [Jesu] o ne a itshokela kota ya tlhokofatso, a nyatsa ditlhong, mme o ntse kafa seatleng sa moja sa setulo sa bogosi sa Modimo.” (Bahebera 12:2) Le fa e le kganetso kana pogiso efe fela e Jesu a neng a tshwanelwa ke go e itshokela—tota le botlhoko jo bo gamolang pelo jwa thupa ya tlhokofatso—o ne a tlhoma mogopolo mo “[boipelong] jo bo neng bo tlhomilwe fa pele ga gagwe.” Boipelo joo e ne e le tshiamelo ya go tlotlomatsa bolaodi jwa ga Jehofa le go itshepisa leina la gagwe le tsholofelo ya go tlisetsa batho ba ba kutlo masego a magolo.

Nna le Boikutlo Jwa go Leta

5. Ke seemo sefe se se tshwanelang thata se mo go sone boikutlo jwa go leta bo ka thusang motho go leba dilo ka tsela e e siameng?

⁵ Fa re lwela go nna le boikutlo jwa mogopolo jo Jesu a neng a na najo ga re ne re felelwa ke boipelo jwa ga Jehofa le fa go ka direga gore dilo di se ka tsa direga ka tsela e re batlang ka yone kana ka nako e re di batlang ka yone. Moporofeti Mika o ile a re: “Mme fa e le nna, ke tla nna ke lebeletse Jehofa. Ke tla supa boikutlo jwa go leta mo Modimong wa poloko ya me.” (Mika 7:7, NW; Dikhutsafalo 3:21) Le rona re ka bontsha go nna le boikutlo jwa go leta. Jang? Ka ditsela tse dintsi. Go ka nna ga direga gore re ikutlwe gore mokaulengwe yo o nang le taolo o dirile sengwe se se phoso mme o tshwanetse a lolamisiwa ka yone nako eo. Boikutlo jwa go leta bo tla re naya tshono ya go akanyetsa dilo tse di jaaka gore, ‘A ruri o dirile sengwe se se phoso, a kgotsa ke nna ke sa bonang sentle? Fa e le gore o dirile phoso, a e ka tswa e le gore Jehofa o letlile gore seo se direge e le gore motho yono a tokafatse dilo mme ka jalo ga go tlhokege gore a lolamisiwe?’

6. Motho yo o lwang le bothata bongwe jwa botho a ka thusiwa jang ke go nna le boikutlo jwa go leta?

⁶ Re ka nna ra tshwanelwa ke go bontsha boikutlo jwa go leta fa re tshwenngwa ke bothata bongwe jwa botho kana fa re lwa le bokoa bongwe. A re re gongwe o kopa Jehofa gore a go thuse, mme bothata bo nna bo tswelela pele. Ke eng se o ka se dirang? Re tshwanetse go nna re dira sotlhe se re ka se kgonang go rarabolola bothata joo mme go tswa foo re tshepe mafoko ano a ga Jesu: “Nnang lo kope, mme lo tla newa; nnang lo senke, mme lo tla bona; nnang lo kokote, mme lo tla bulelwa.” (Luke 11:9) Nna o rapele, mme o letele Jehofa. Jehofa o tla araba dithapelo tsa gago ka nako ya gagwe e e tshwanetseng.—1 Bathesalonika 5:17.

7. Boikutlo jwa go leta bo ka thusa pono ya rona jang malebana le go tlhaloganya Baebele botoka kgato ka kgato?

⁷ Fa dipolelelopele tsa Baebele di ntse di diragala, tsela e re tlhaloganyang Dikwalo ka yone e nna e tokafala. Mme ka dinako tse dingwe re ka nna ra tlelwa ke kakanyo ya gore ditlhaloso dingwe di a diega. Fa di sa tle ka nako e re neng re e lebeletse,  a re tla iketleeletsa go leta? Se lebale, Jehofa o ile a bona go tshwanela gore a senole “sephiri se se boitshepo sa ga Keresete” kgato ka kgato mme e le ka lobaka lwa dingwaga di ka nna 4 000. (Baefeso 3:3-6) Jalo he, a re na le lebaka la go fela pelo? A ga re dumele gore “motlhanka yo o boikanngo le yo o bonokopela” o tlhomilwe go abela batho ba ga Jehofa “dijo tsa bone ka nako e e tshwanetseng?” (Mathaio 24:45) Ke eng fa re ka itetla go felelwa ke boipelo fela ka gonne re sa tlhaloganye dilo tsotlhe ka botlalo? Se lebale, ke Jehofa yo o swetsang gore o tla senola “leoma” la gagwe leng le gone jang.—Amose 3:7.

8. Bopelotelele jwa ga Jehofa bo ile jwa solegela jang batho ba bantsi molemo?

⁸ Batho ba bangwe ba ka kgobiwa marapo ke go ikutlwa gore ba ka nna ba se ka ba bona “letsatsi le legolo le le le boitshegang la ga Jehofa” le mororo ba ile ba fetsa dingwaga tse dintsi ba mo direla ka boikanyegi. (Joele 2:30, 31, NW) Le fa go ntse jalo, ba ka kgothadiwa ke go leba dilo ka tsela e e molemo. Petere o ile a gakolola jaana: “Tsayang bopelotelele jwa Morena wa rona e le poloko.” (2 Petere 3:15) Bopelotelele jwa ga Jehofa bo ile jwa naya dimilione tse dingwe tsa batho ba ba ikanyegang tshono ya go ithuta boammaaruri. A seno ga se selo se se molemo? Mo godimo ga moo, fa Jehofa a nna pelotelele ka lobaka lo loleele o re naya nako e ntsi ya go ‘nna re direla poloko ya rona ka poifo le go roroma.’—Bafilipi 2:12; 2 Petere 3:11, 12.

9. Go nna le boikutlo jwa go leta go ka re thusa go itshokela seemo jang fa re sa kgone go dira go le kalo mo tirelong ya ga Jehofa?

⁹ Boikutlo jwa go leta bo re thusa go se kgobege marapo fa kganetso, bolwetse, botsofe kana mathata a mangwe a re kgoreletsa mo tirelong ya rona ya Bogosi. Jehofa o lebeletse gore re mo direle ka pelo yotlhe. (Baroma 12:1) Le fa go ntse jalo, Morwa Modimo, yo o ‘tlhomogelang bahumanegi le batlhoki pelo,’ ga a re batlake dilo tse re ka se kang ra di kgona; mme go ntse jalo le ka Jehofa. (Pesalema 72:13) Ka gone, re kgothalediwa go dira sotlhe se re ka se kgonang, re leta ka bopelotelele go fitlha maemo a fetoga—e ka ne e le mo tsamaisong eno ya dilo kana mo go e e tlang. Se lebale: “Modimo ga o tshiamololo mo o ka lebalang tiro ya lona le lorato lo lo le bontshitseng leina la one, ka lo diretse baitshepi e bile lo tswelela lo direla.”—Bahebera 6:10.

10. Motho yo o nang le boikutlo jwa go leta a ka tila mokgwa ofe o o sa siamang? Tlhalosa.

¹⁰ Boikutlo jwa go leta gape bo re thusa go tila boikgodiso. Batho bangwe ba ba fetogileng batlhanogi ba ne ba sa batle go leta. Ba ka tswa ba ne ba ikutlwa gore go ne go tlhokega diphetogo dingwe, e ka ne e le mo dilong tse di amanang le go tlhaloganya ga rona Baebele kana go rulaganya dilo. Le fa go ntse jalo, ba ile ba itlhokomolosa kgang ya gore moya wa ga Jehofa o tlhotlheletsa motlhanka yo o boikanyo le yo o bonokopela go baakanya dilo ka nako ya Gagwe e e tshwanetseng, e seng ka nako e re akanyang gore di tshwanetse tsa fetolwa ka yone. Mme diphetogo dipe tse di dirwang di tshwanetse tsa dirwa go dumalana le thato ya ga Jehofa, e seng go dumalana le megopolo ya rona. Batlhanogi ba letla boikgodiso go reketlisa tsela ya bone ya go akanya le go ba kgopisa. Mme fa ba ka bo ba na le boikutlo jwa mogopolo jo Keresete a neng a na najo, ba ka bo ba ile ba se ka ba felelwa ke boipelo mme ba tswelela ba le gareng ga batho ba ga Jehofa.—Bafilipi 2:5-8.

11. Re ka dirisa nako e re letileng ka yone jang ka tsela e e molemo, re etsa sekao sa ga mang?

¹¹ Ke boammaaruri gore, go nna le boikutlo jwa go leta ga go bolele gore motho a nne botshwakga kana go nna fela a sa dire sepe. Re na le dilo tse re tshwanetseng go di dira. Ka sekai, re tshwanetse go tlhoafalela go nna le thuto ya motho ka namana ya Baebele mme ka go dira jalo re bontshe go kgatlhegela dilo tsa semoya thata jaaka go ne go ntse ka baporofeti ba ba ikanyegang le e leng baengele. Fa Petere a ne a bua ka tlhoafalo e e ntseng jalo, o ile a re: “Malebang le yone poloko eno, baporofeti . . . ba ne ba tlhotlhomisa ka manontlhotlho ba ba ba batlisisa ka kelotlhoko.  . . . Mo go tsone dilo tseno baengele ba eletsa go tlhodumela.” (1 Petere 1:10-12) Go botlhokwa thata gore re nne le thuto ya motho ka namana le go nna gone ka metlha mo dipokanong le go rapela. (Jakobe 4:8) Batho ba ba lemogang go tlhoka ga bone ga semoya ka go ikotla ka metlha ka dijo tsa semoya le go kopanela le Bakeresetekabone ba bontsha gore ba na le boikutlo jwa mogopolo jwa ga Keresete.—Mathaio 5:3.

Nna le Pono e e Siameng

12. (a) Adame le Efa ba ile ba batla boitaolo ka tsela efe? (b) Dilo di ile tsa felela jang ka go bo batho ba ile ba latela sekao sa ga Adame le Efa?

¹² Fa Modimo a ne a bopa banyalani ba ntlha, e ne e le ene fela yo o neng a na le tshwanelo ya go tlhoma melao ya se se siameng le se se sa siamang. (Genesise 2:16, 17) Adame le Efa ba ne ba batla go nna ba sa kaelwe ke Modimo, mme seno se ne sa felela ka gore lefatshe le nne ka tsela e re le bonang le ntse ka yone gompieno. Moaposetoloi Paulo o ile a re: “Boleo bo ne jwa tsena mo lefatsheng ka motho a le mongwe le loso ka boleo, mme ka gone loso lo ne lwa anamela kwa bathong botlhe ka gonne ba leofile botlhe.” (Baroma 5:12) Dingwaga tse di dikete tse thataro tsa hisitori ya batho fa e sa le ka nako ya ga Adame di bontshitse gore mafoko ano a ga Jeremia a boammaaruri: “Jehofa, ke a itse fa tsela ya motho e se mo go ene ka esi; ga goyo mo mothong yo o tsamayang ka dinao go siamisa dikgato tsa gagwe.” (Jeremia 10:23) Go tsaya mafoko ano a ga Jeremia a le boammaaruri ga se go inyatsa. Ke go leba dilo ka tsela e e siameng. Go re thusa go tlhaloganya lebaka la go bo go fetile makgolo a a kana kana a dingwaga ‘motho a laola motho yo mongwe go mo utlwisa botlhoko’ ka gonne batho ba ntse ba ipusa kwantle ga kaelo ya Modimo.—Moreri 8:9.

13. Basupi ba ga Jehofa ba na le pono efe e e lekalekaneng malebana le se batho ba ka kgonang go se dira?

¹³ Ka ntlha ya maemo a batho ba leng mo go one, Basupi ba ga Jehofa ba a lemoga gore go na le dilo tse batho ba ka se kang ba kgona go di dira mo tsamaisong ya jaanong ya dilo. Go nna le boikutlo jo bo siameng go ka re thusa go se felelwe ke boipelo jwa rona, mme gone ga se tharabololo ya sengwe le sengwe. Mo masimologong a bo1950 moruti mongwe wa Amerika o ile a gatisa buka e e neng ya rekwa thata e e bidiwang The Power of Positive Thinking. Buka eno e ne e akantsha gore motho a ka fenya bontsi jwa dikgoreletsi ka go lebana le tsone ka boikutlo jo bo siameng. Gone ee, go akanyetsa dilo ka tsela e e siameng go gontle. Le fa go ntse jalo, maitemogelo a bontsha gore kitso, bokgoni, dithoto le dilonyana tse dingwe tse dintsi di ka kgoreletsa dilo tse batho ba ka kgonang go di dira. Mme go ya ka selekanyo sa lefatshe lotlhe, mathata ano a magolo thata mo batho ba sa kgoneng go a rarabolola—le fa ba ka tswa ba na le boikutlo jo bo siameng go le kana kang!

14. A Basupi ba ga Jehofa ba na le boikutlo jo bo sa siamang? Tlhalosa.

¹⁴ E re ka Basupi ba ga Jehofa ba na le pono e e lekalekaneng mo dilong tse di ntseng jalo, ka dinako tse dingwe ba pegwa molato wa gore ba na le boikutlo jo bo sa siamang. Go na le moo, ba tlhagafaletse go bolelela batho ka Yo o nosi fela yo o ka kgonang go tokafatsa maemo a batho go ya go ile. Le mo go seno ba etsa boikutlo jwa mogopolo jwa ga Keresete. (Baroma 15:2) E bile ba semeletse mo tirong ya go thusa batho go nna le botsala le Modimo. Ba a itse gore kgabagare seno se tla solegela batho molemo thata.—Mathaio 28:19, 20; 1 Timotheo 4:16.

15. Tiro ya Basupi ba ga Jehofa e tokafatsa batho jang?

¹⁵ Basupi ba ga Jehofa ga ba itlhokomolose mathata a loago—segolobogolo mekgwa e e leswe e e seng ya dikwalo e e re dikologileng. Pele ga motho yo o kgatlhegang a nna mongwe wa Basupi ba ga Jehofa, o dira diphetogo, gantsi o tshwanelwa ke go fenya mekgwa e e tshwakgolang e e sa itumediseng Modimo. (1 Bakorintha 6:9-11) Ka gone Basupi ba ga Jehofa ba thusitse batho ba ba reetsang go fenya botagwa, go tshwakgolwa ke diokobatsi, boitsholo  jo bo maswe le go lemalela go betšha. Batho ba ba ntseng jalo ba ba fetogileng ba ile ba ithuta go tlamela malapa a bone ka tsela e e molemo le ka boikanyegi. (1 Timotheo 5:8) Fa batho le malapa ba thusiwa ka tsela eno, mathata a loago a a fokotsega—palo ya batho ba ba tshwakgolwang ke diokobatsi e a fokotsega, palo ya batho ba ba dirisang dikgoka mo malapeng le yone e a fokotsega, jalo le jalo. Basupi ba ga Jehofa ba fokoletsa ditheo tse di lepalepanang le mathata a loago tiro ka go nna baagi ba ba ikobelang melao bone ka bobone le go thusa batho ba bangwe go fetola matshelo a bone.

16. Ke eng fa Basupi ba ga Jehofa ba sa inaakanye le mekgatlho ya lefatshe ya diphetogo?

¹⁶ A mme Basupi ba ga Jehofa ba fetotse le maemo a boitsholo a lefatshe? Ebu, mo masomeng a dingwaga a a fetileng, palo ya Basupi ba ba tlhagafetseng e ne ya oketsega go sekae go tloga go mo e ka nnang 3 800 000 go ya go mo e ka nang 6 000 000. Seo ke koketsego ya batho ba ba ka tshwarang 2 200 000, ba bontsi jwa bone ba neng ba tlogela mekgwa e e sa siamang fa ba ne ba nna Bakeresete. Botshelo jwa batho ba le bantsi bo ile jwa tokafala! Le fa go ntse jalo, palo eno e potlana thata fa e bapisiwa le palo ya baagi ba lefatshe e e neng ya oketsega mo go yone nako eo—875 000 000! Basupi ba ga Jehofa ba ile ba itumedisiwa ke go thusa batho ba ba reetsang le fa ba lemoga gore ke batho ba sekae fela ba ba tla tsayang tsela e e isang botshelong. (Mathaio 7:13, 14) Fa Basupi ba ntse ba letile diphetogo tse di tla amang lefatshe lotlhe tse di tla tokafatsang dilo tse e leng Modimo fela a tla di lereng, ga ba inaakanye le mekgatlho ya lefatshe ya diphetogo, e gantsi e simololang ka maitlhomo a a siameng mme e bo e felela ka maswabi le e leng tirisodikgoka.—2 Petere 3:13.

17. Jesu o ne a dira eng go thusa batho ba a neng a tshela le bone, mme ke eng se a ileng a se ka a se dira?

¹⁷ Fa Basupi ba ga Jehofa ba tsaya kgato eno, ba a bo ba bontsha go tshepa Jehofa ka tsela e e tshwanang le e Jesu a ileng a mo tshepa ka yone fa a ne a le mo lefatsheng. Bogologolo kwa mo lekgolong la ntlha la dingwaga, Jesu o ne a dira dikgakgamatso  tsa go fodisa batho. (Luke 6:17-19) O ile a ba a tsosa baswi. (Luke 7:11-15; 8:49-56) Mme gone, ga a ka a tlosa bothata jwa malwetse kana go nyeletsa mmaba loso. O ne a itse gore e ne e ise e nne nako e e tshwanetseng ya Modimo go dira seno. E re ka Jesu a ne a na le bokgoni jo bogolo jwa motho yo o itekanetseng, o ne a ka nna a dira go ka tlala seatla go rarabolola mathata a a masisi a tsa dipolotiki le a loago. Go bonala bontsi jwa batho ba nako ya ga Jesu ba ile ba batla gore a tseye taolo mme a dire jalo, mme gone, o ile a gana. Re bala jaana: “E rile batho ba bona ditshupo tse a neng a di dira, ba simolola gore: ‘Ruri yono ke moporofeti yo o neng a tshwanetse go tla mo lefatsheng.’ Jalo Jesu, ka a itse gore ba ne ba tloga ba tla go mo tshwara go mo dira kgosi, a tloga gape a ya kwa thabeng a le esi fela.”—Johane 6:14, 15.

18. (a) Ka metlha Jesu o ile a bontsha jang boikutlo jwa go leta? (b) Tiro ya ga Jesu e ile ya fetoga jang fa e sa le ka 1914?

¹⁸ Jesu o ile a gana go inaakanya le dipolotiki kana tiro ya loago ka gonne o ne a itse gore nako ya gore a tseye taolo ya puso mme a dire ditiro tsa go fodisa motho mongwe le mongwe le gongwe le gongwe e ne e ise e goroge. Tota le morago ga gore a tlhatlogele kwa legodimong go ya go tshela botshelo jwa bosasweng, o ne a iketleeleditse go letela nako e Jehofa a e tlhomileng pele ga a ka tsaya kgato. (Pesalema 110:1; Ditiro 2:34, 35) Le fa go ntse jalo, fa e sa le a tlhomiwa go nna Kgosi ya Bogosi jwa Modimo ka 1914, o tswelela pele “a fenya a ba a digela phenyo ya gagwe.” (Tshenolo 6:2; 12:10) A bo rona re itumelela go ikobela bolaodi jwa gagwe jang ne, fa batho ba bangwe bone ba ba ipolelang gore ke Bakeresete ba itlhokomolosa dithuto tsa Baebele tse di malebana le Bogosi!

Go Leta—A go Bolaisa Pelo Kana go a Itumedisa?

19. Ke leng go leta go ‘ngodiegisang pelo,’ mme ke leng go leretseng motho boipelo?

¹⁹ Solomone o ne a itse gore go leta go ka bolaisa motho pelo. O ile a kwala jaana: “Tsholofelo e e diegisiwang e tle e ngodise pelo.” (Diane 13:12) Ga go pelaelo gore fa motho a nnela go letela dilo tse di se kitlang di direga, a ka nna a ngodiega pelo ka ntlha ya go swaba. Le fa go ntse jalo, go letela ditiragalo tse di itumedisang—gongwe letsatsi la lenyalo, go tsholwa ga ngwana kana go kopana gape le batho ba re ba ratang—go ka dira gore re nne le boipelo jwa go leta lobaka lo loleele pele ga seo se direga. Boipelo joo bo oketsega thata fa motho a dirisa nako eo ya go leta ka tsela e e molemo, a ipaakanyetsa tiragalo eo e e tlang.

20. (a) Ke ditiragalo dife tse di molemo tse re di letileng re sena pelaelo gore re tla di bona di direga? (b) Re ka bona boipelo jang fa re ntse re letile gore Jehofa a diragatse maikaelelo a gagwe?

²⁰ Fa re dumela re sa belaele gore dilo tse re di letetseng di tla diragala—tota le fa re sa itse gore di tla diragala leng—go leta go ka se ka ga re ‘ngodiegisa pelo.’ Baobamedi ba ba ikanyegang ba Modimo ba a itse gore Puso ya ga Keresete ya Dingwaga Tse di Sekete e gaufi. Ba dumela ba sa belaele gore ba tla bona loso le bolwetse di fedisiwa. Ka boipelo ba letetse ka tlhoafalo nako ya fa ba tla bo ba amogela dimilione di le dikete tsa batho ba ba tsositsweng mo baswing, go akaretsa le baratiwa ba bone ba ba suleng. (Tshenolo 20:1-3, 6; 21:3, 4) Mo dinakong tseno tsa mathata a tsa ikonomi, ba itumelela go nna le tsholofelo e e tlhomameng ya gore ba tla bona lefatshe le dirilwe Paradaise. (Isaia 35:1, 2, 7) A bo go le molemo jang ne gore re dirise nako eno ya go leta ka tsela e e botlhale, “ka metlha [re] na le mo gontsi go go dira mo tirong ya Morena”! (1 Bakorintha 15:58) Tswelela pele o ikotla ka dijo tsa semoya. Nna le botsala jo bogolo le Jehofa. Senka batho ba bangwe ba ba batlang go direla Jehofa. Kgothatsa badumedikawena. Solegela molemo nako epe fela e Jehofa a sa ntseng a tla letla gore e fete. Fa o dira jalo, go letela Jehofa go ka se ka ga go ‘ngodiegisa pelo.’ Go na le moo, go tla dira gore o nne le boipelo jo bogolo!

A o Ka Tlhalosa?

• Jesu o ile a bontsha jang boikutlo jwa go leta?

• Ke maemo afe a a tlhokang gore Bakeresete ba nne le boikutlo jwa go leta?

• Ke eng fa Basupi ba ga Jehofa ba kgotsofalela go letela Jehofa?

• Go letela Jehofa go ka dirwa jang gore e nne nako e e ipedisang?

[Dipotso Tsa Thuto]

[Ditshwantsho mo go tsebe 12]

Jesu o ile a itshoka ka ntlha ya boipelo jo a neng a bo beilwe pele

[Setshwantsho mo go tsebe 13]

Re ka tswelela pele re ipela le fa re na le dingwaga tse dintsi mo tirelong

[Ditshwantsho mo go tsebe 15]

Dimilione tsa batho di ile tsa tokafatsa matshelo a tsone ka go nna Basupi ba ga Jehofa