Go Ise go ye—Kae go Tla Nna le Lefatshe Le le Se Nang Tlalelo

BOTSHELO bo ntse bo nna thata le go feta, mme mabaka a go tlalelwa a mantsi. Fa re betilwe ke pelo, go ka nna thata gore re laole maikutlo a rona. Ebu, tota le batho ba ba ratang botshelo ba ka hutsafala thata! Akanya ka dikai di sekae.

Mo metlheng ya bogologolo, moporofeti Moshe o ne a kgobega marapo thata jaana mo e leng gore o ne a raya Modimo a re: “Tsweetswee mpolaele ruri, fa ke bone kamogelo mo matlhong a gago, mme mma ke se ka ka bona masetlapelo a me.” (Dipalo 11:15) Fa moporofeti Elija a ne a tshabela baba ba gagwe, o ne a tlhaeletsa jaana: “Go lekanye; jaanong, Jehofa, tlosa botshelo jwa me.” (1 Dikgosi 19:4) Mme moporofeti Jona o ne a bolela jaana: “Jehofa, ke a go rapela, ka re, o tle o mpolaye, gonne mo go nna go molemo go swa bogolo go go tshela.” (Jona 4:3) Mme ga go ope mo go Moshe, Elija tota le e leng Jona yo o ileng a ipolaya. Botlhe ba ne ba itse taelo eno ya Modimo: “O se ka wa bolaya motho.” (Ekesodo 20:13) E re ka ba ne ba na le tumelo e e nonofileng mo Modimong, ba ne ba itse gore ga go na boemo bope bo bo se nang tharabololo le gore botshelo ke mpho e e tswang go Modimo.

Go tweng ka mathata a re lebanang le one gompieno? Mo godimo ga go tlalelwa kana mathata a mmele, ka dinako tse dingwe re ka nna ra tshwanela  gore re itshokele go tshwarwa makgwakgwa ke maloko a lelapa, baagelani kana badirimmogo. Baebele e bua ka batho ba ba tletseng “ka tshiamololo yotlhe, boikepo, keletso ya bopelotshetlha, bosula, ba tletse go tswa pelo, polao ya ka boomo, kgogakgogano, tsietso, tshekamelo ya bopelotlhoi, ba le basebasebi, bajadirethe, batlhoi ba Modimo, ba ba se nang maitseo, ba ba mabela, baipegi, batlhami ba dilo tse di utlwisang botlhoko, ba ba sa utlweng batsadi, ba ba se nang tlhaloganyo, ba ba sa bolokeng ditumalano, ba ba se nang katamalano e e bothitho ya tlholego, ba ba se nang kutlwelobotlhoko.” (Baroma 1:28-31) Go kopana le batho ba ba ntseng jalo letsatsi le letsatsi go ka dira gore go bonale e kete botshelo ke mokgweleo. Re ka thusa jang batho ba ba tlhokang kgomotso le kgololesego?

Go Iketleetsa go Reetsa

Dikganetso le go boga di ka dira gore motho a se ka a kgona go akanya sentle. Monna yo o botlhale o ne a bolela jaana: “Kgatelelo fela e ka dira gore yo o botlhale a itshware jaaka setsenwa.” (Moreri 7:7, NW) Ka gone motho yo o buang ka go ipolaya o tshwanetse go tsewa masisi. Mathata a a nang nao, e ka tswa e le a maikutlo, a mmele, a tlhaloganyo kana a semoya, a ka nna a tlhoka go tseelwa kgato ka bonako. Gone mme, thuso ya dingaka le dikalafi di a farologana mme motho o tshwanetse go itirela tshwetso ka namana malebana le mofuta wa kalafi o a tla o dirisang.—Bagalatia 6:5.

Le fa mabaka a ka tswa e le afe a go bo motho a batla go ipolaya, fa go na le motho yo o tlhaloganyang, yo o kutlwelobotlhoko le yo o pelotelele yo o ka mo ikanyang go ka thusa thata. Ba lelapa le ditsala ba ba iketleeditseng go reetsa ba ka kgona go thusa. Mo godimo ga kutlwelobotlhoko le bopelonomi, dintlha tse di agang go tswa mo Lefokong la Modimo di ka thusa batho ba ba sa tlholeng ba na le tsholofelo.

Thuso ya Semoya ya Batho ba ba Ngomogileng Pelo

O tla gakgamala go itse gore mmalo wa Baebele o kgothatsa jang. Le fa gone Baebele e se buka ya kalafi ya tlhaloganyo, e ka re thusa go anaanela botshelo. Kgosi Solomone o ne a bolela jaana: “Ke a itse go re, ga go na sepe se se molemo mo go bone bogolo go go itumela le go dira molemo ka metlha yotlhe ya go tshela ga bone. Le gone ke neo ya Modimo gore motho mongwe le mongwe a je a nwe, mme a je monate ka letsapa lotlhe la gagwe.” (Moreri 3:12, 13) Kwantle ga tiro e e kgotsofatsang e e dirang gore botshelo bo nne le bokao, dilo tse di tlwaelegileng—tse di jaaka mowa o o phepa, phatsimo ya letsatsi, dithunya, ditlhare le dinonyane—ke dimpho tse Modimo a di re fileng gore re di itumelele.

Se se kgothatsang le go feta ke tlhomamisetso ya Baebele ya gore Jehofa Modimo le Morwawe Jesu Keresete, ba amega ka rona. (Johane 3:16; 1 Petere 5:6, 7) Ke gone ka moo mopesalema a ileng a bolela jaana: “A go bakwe Morena yo o rwalang merwalo ya rona ka malatsi, e bong Modimo o e leng poloka ya rona.” (Pesalema 68:19) Le fa gone re ka ikutlwa re se botlhokwa kana re sa tshwanelege, Modimo o re laletsa gore re mo rapele. Tlhomamisega gore ga go na ope yo o kopang thuso ya gagwe ka boikokobetso e bile a tlhoafetse yo o tla swabisiwang.

Ga go na ope yo o ka lebelelang go tshela botshelo jo bo se nang mathata gompieno. (Jobe 14:1) Le fa go ntse jalo, boammaaruri jwa Lefoko la Modimo bo ile jwa bontsha batho ba bantsi gore go ipolaya ga se tsela e e siameng ya go rarabolola mathata a bone. Akanya fela ka fa moaposetoloi Paulo a ileng a thusa modisakgolegelo ka teng yo e rileng “a tsoga mo borokong e bile a bona gore ditswalo tsa kgolegelo di ne di bulegile, a somola tšhaka ya gagwe mme o ne a tloga a itlosa, a ithaya a re magolegwa a ne a falotse.” Ka bonako fela modisakgolegelo o ne a sweditse ka gore go ipolaya go botoka go na le go swa loso lwa matlhabisaditlhong gongwe e bile go feta nako e telele pele a swa ka ntlha ya go palelwa ga gagwe. Moaposetoloi o ile a tlhaeletsa jaana: “O se ka wa ikutlwisa botlhoko, gonne rotlhe re fano!” Paulo ga a ka a fetsa ka mafoko ao fela. Tota e bile, ene le Silase ba ile ba gomotsa modisakgolegelo mme ba araba potso eno ya gagwe: “Borra, ke tshwanetse go dirang gore ke bolokwe?” Bone ba ne ba araba ka gore: “Dumela mo go Morena Jesu mme o tla bolokwa, wena le ba ntlo ya gago.” Morago ga foo ba ne ba bua le ene le ba ntlo ya gagwe ka lefoko la ga Jehofa mme ga felela ka gore ‘ene le ba gagwe ba kolobediwe kwantle ga tiego.’ Modisakgolegelo yoo le bantlo ya gagwe ba ile ba itumela thata mme ba bona bokao jo bosha mo botshelong.—Ditiro 16:27-35.

Gompieno a bo go itumedisa jang ne go itse gore Modimo ga se ene a bakang boikepo! Lefoko la gagwe le tlhalosa moya mongwe o o boikepo “[o o] bidiwang Diabolo le Satane,” e le yo o “timetsang  lefatshe lotlhe le le nang le banni.” Mme nako ya gagwe e a fela. (Tshenolo 12:9, 12) Go ise go ye kae, tlalelo yotlhe e Satane le badimona ba gagwe ba e bakelang banni ba lefatshe e tla fela fa Modimo a tsaya kgato. Morago ga foo, lefatshe le lesha la Modimo le le solofeditsweng la tshiamo le tla fedisetsa ruri dilo tse di bakang go itlhoboga le go ipolaya ga batho.—2 Petere 3:13.

Kgomotso Mo go Ba ba Ikuelang ba Kopa Thuso

Tota le gone jaanong, batho ba ba se nang tsholofelo ba ka gomodiwa ke Dikwalo. (Baroma 15:4) Mopesalema Dafide o ne a opela jaana: “Pelo e e phatlogileng, e e ngomogileng ga o ketla o e nyatsa Modimo.” (Pesalema 51:17) Gone ke boammaaruri gore re kopana le diteko le fa re sa batle e bile re utlwa ditlamorago tsa go sa itekanela. Mme le fa go ntse jalo, fa re nna le kitso ya boammaaruri ka Rraarona wa selegodimo yo o pelonomi, yo o lorato le yo o tekatekano seo se tla re tlhomamisetsa gore re botlhokwa mo matlhong a gagwe. Modimo e ka nna Tsala le Mokaedi wa rona yo o botlhokwa. Fa re leka go nna le kamano e e gaufi le Jehofa Modimo, le ka motlha a ka se ka a re swabisa. Mmopi wa rona o bolela jaana: “Ke nna Jehofa, Modimo wa gago, yo ke go rutang go itsholegela molemo, yo ke go gogang mo tseleng e o tshwanetseng go tsamaya ka yone.”—Isaia 48:17.

Go ikaega ka Modimo go ile ga thusa batho ba le bantsi. Ka sekai: Mara o ne a setse a le bokoa ka ntlha ya go tshwenyega thata mo maikutlong ka nako e telele fa a ne a swelwa ke morwawe yo o esi mo kotsing ya koloi. * O ne a tlalelwa mme a leka go ipolaya. Le fa go ntse jalo, gone jaanong, o tsoga phakela moso mongwe le mongwe go dira ditiro tsa ntlo ya gagwe. O rata go reetsa mmino le go thusa ba bangwe. Tsholofelo ya gore “go tlile go nna le tsogo ya ba ba siameng mmogo le ba ba sa siamang,” e ile ya fokotsa botlhoko jwa loso lo lo setlhogo lwa morwawe yo a mo ratang e bile e ile ya nonotsha tumelo ya gagwe mo Modimong. (Ditiro 24:15) E re ka Mara a ise a ko a eletse go tshwana le moengele kwa legodimong, mafoko a Pesalema 37:11 a ile a mo ama pelo: “Bapelonomi ba tlaa rua lefatshe; ba tlaa inatefisa mo letlotlong la kagiso.”

Mosadi yo mongwe wa kwa Brazil e bong Sandra, o ne a dira ka natla gore a nne mmè yo o molemo wa bana ba gagwe ba bararo. O dumela jaana: “Ke ne ke tshwaregile thata mo e leng gore fa rre a tlhokafala ke sa lebelela mme ka nako e e tshwanang ke lemoga  gore monna wa me o ratana le mosadi yo mongwe, ke ne ke sa kgone tota le go akanya ka go rapela Modimo gore a nthuse.” Ka ntlha ya tlalelo Sandra o ne a leka go ipolaya. Ke eng se se ileng sa mo thusa go rarabologelwa? Ke ka go bo a ne a anaanela dilo tsa semoya. “Maitseboa mangwe le mangwe pele ga ke ya go robala, ke bala Baebele, mme ke leka go ipaya mo boemong jwa batho ba ke balang ka bone. Ke bala gape le dimakasine tsa Tora ya Tebelo le Tsogang!, mme ke rata thata dikgang tsa botshelo ka gonne di nthusa go kgotsofalela se ke nang naso mo botshelong.” E re ka a itse gore Jehofa ke tsala ya gagwe e e botlhokwa, o ile a ithuta go tlhamalala ka se a se batlang mo dithapelong tsa gagwe.

Isagwe E e Se Nang Tlalelo

A bo go gomotsa jang ne go itse gore go boga ga batho ke ga nakwana! Mo pusong ya Bogosi jwa Modimo, bana le bagolo bao gone jaanong ba tlhaselwang ka bokebekwa, go siamololelwa kana tlhaolele, ba tla itumela. Jaaka go boleletswe pele mo pesalemeng ya boporofeti, Kgosi ya ga Jehofa e e tlhomilweng e bong Jesu Keresete, “o tlaa golola motlhoki mogang o lelang; le mohumanegi yo o se nang mothusi.” Mo godimo ga moo, “o tlaa tlhomogela bahumanegi le batlhoki pelo; mme mewa ya batlhoki o tlaa e boloka.” Ebu, “o tlaa golola mewa ya bone mo pogisong le mo thubakong; mme madi a bone a tlaa tlotlega mo matlhong a gagwe.”—Pesalema 72:12-14.

Nako ya gore mafoko ao a boporofeti a diragale e atametse. A kgopolo ya go tshelela ruri mo lefatsheng mo maemong a a ntseng jalo e a go kgatlha? Fa go ntse jalo, o na le lebaka la go itumela le go anaanela botshelo jaaka mpho e e tswang go Modimo. Mme fa o bolelela ba bangwe ka ditsholofetso tse di gomotsang tseno tsa Dikwalo, o ka nna wa dira gore batho ba ba batlang thuso ba ba mo lefatsheng leno le le se nang kutlwelobotlhoko le lorato ba itumele thata.

[Ntlha e e kwa tlase]

[Setshwantsho mo go tsebe 6]

Go na le dinako tse dintsi tse motho a ka itumelang ka tsone gompieno

[Setshwantsho mo go tsebe 7]

A o lebile pele go bona lefatshe le le se nang tlalelo?