Ba Tlhotlheletsega go Direla

KE ENG se se ka tlhotlheletsang banyalani ba le 24 mo nakong e e botlhokwa jaana ya botshelo jwa bone go tlogela malapa a bone, ditsala le tikologo e ba e tlwaetseng go ya go dira tiro ya borongwa kwa dinageng di sele? Ke eng fa ba ka itumelela go ya kwa mafelong a a jaaka Papua New Guinea le Taiwan, le kwa dinageng tsa Afrika le Latin America? A e ka tswa e le go rata go lekeletsa dilo? Nnyaa. Go na le moo, ba tlhotlhelediwa ke go bo ba rata Modimo le baagelani ka lorato lwa mmatota.—Mathaio 22:37-39.

Batho bano ke bomang? Ke baalogi ba setlhopha sa bo109 sa Sekolo sa Baebele sa Watchtower sa Gileate. Ka Matlhatso, September 9, 2000, go ne go phuthegile palogotlhe ya batho ba le 5 198 kwa Lefelong la Thuto la Watchtower—le le kwa Patterson, kwa New York—le kwa mafelong a a gokagantsweng ka satalaete go tla go reetsa kgakololo e e lorato e e ka thusang baalogi gore ba nne barongwa ba ba atlegileng.

Modulasetulo wa thulaganyo eno e ne e le Stephen Lett, yo e leng leloko la Komiti e e Rutang ya Setlhopha se se Laolang sa Basupi ba ga Jehofa. O ne a theile dikakgelo tsa gagwe tse di simololang mo go Mathaio 5:13, “Lona lo letswai la lefatshe.” Mokaulengwe Lett o ne a tlhalosa gore mafoko a ga Jesu a tshwanela baithuti sentle ba ba alogang. Ka sekai, letswai le na le nonofo ya go dira gore dilo di nne monate. Ka gone, barongwa le bone fa ba nna le matswela mo tirong ya bone ya go rera ba tshwana le letswai ka tsela ya tshwantshetso.

Kgothatso ya go Kgaogana

Morago ga foo Mokaulengwe Lett o ne a rola bangwe ba batho ba e leng nako e telele e le batlhanka ba ga Jehofa ba ba ileng ba neela dipuo tse di khutshwane tsa Dikwalo mme e le tse di nonofileng. Wa ntlha e ne e le John Wischuk, yo o direlang mo Lephateng la Bakwaledi. Setlhogo sa gagwe se se reng “Pesalema e e Khutshwane go di Gaisa Tsotlhe e Rotloetsa Moya wa Borongwa,” se ne se theilwe mo go Pesalema 117. Gompieno go tlhokega thata gore “ditšhaba” le “ditso” tsa lefatshe lotlhe di neelwe bosupi kaga Jehofa le Bogosi jwa gagwe. Baithuti ba ne ba kgothalediwa gore ba dire dilo go ya ka se Pesalema 117 e se bolelang ka go rotloetsa ba bangwe gore ba ‘Bake Jah.’

Go tswa foo modulasetulo o ne a bitsa Guy Pierce wa Setlhopha se se Laolang. Ene o ne a bua ka setlhogo se se reng “Nna yo o Obegang, Mme Gone, O Nitame.” Lefoko la Modimo le tlhomame. Jehofa Modimo o bidiwa Lefika mo go Duteronome 32:4, le fa go ntse jalo, Lefoko la gagwe le letla gore motho a obege ka gonne le ile la kwalelwa dipuo tsotlhe le ditso—ee, le kwaletswe batho botlhe. Baithuti ba ile ba kgothadiwa gore ba rere Lefoko la Modimo, ba dire gore molaetsa wa lone o ame dipelo le digakolodi tsa batho. (2 Bakorintha 4:2) Mokaulengwe Pierce o ne a kgothatsa jaana: “Kgomarela melaometheo e e siameng o nitame, mme gone, o obege. O se ka wa nyatsa batho ba lefelo le o abetsweng kwa go lone fela ka go bo setso sa bone se farologane.”

Karl Adams, yo e leng mongwe wa batlhatlheledi ba Gileate, yo o ntseng a direla kwa ntlokgolo ya lefatshe lotlhe ka dingwaga tse di  ka nnang 53, o ne a bua ka setlhogo seno se se dirang gore motho a akanye “Lo Tla ya Kae go Tloga Fano?” Gone ke boammaaruri gore banyalani bano ba ba 24 ba ile ba abelwa go ya go dira tiro ya borongwa kwa dinageng di le 20 tse di farologaneng go ralala lefatshe, mme go ile ga tsoga potso ya gore, Fa lo setse lo fitlhile koo, lo tla fitlha lo dira eng? Re tshela mo lefatsheng le le nang le moya wa go sa ritibale. Batho ba batla go ya kwa mafelong a masha le go dira dilo tse disha e le fela gore ba iitumedise. Kafa letlhakoreng le lengwe, baithuti bone ba amogela kabelo e e tswang go Jehofa go ya kwa lefelong le ene a batlang gore ba ye go tlhokomela “dinku” tsa gagwe ka bopelotshweu kwa go lone. Ga ba a tshwanela go tshwana le Baiseraele bale ba bogologolo ba ka ntlha ya bopelotshetlha ba ileng ba latlhegelwa ke tshono ya gore ba dirisiwe ke Jehofa go segofatsa batho botlhe. Go na le moo, ba tshwanetse go etsa Jesu Keresete, yo ka metlha a dirang go rata ga ga Rraagwe ka bopelotshweu le yo a ileng a nna kutlo mo maemong le fa e le afe a a neng a lebana le one.—Johane 8:29; 10:16.

Setlhogo se se reng “Anaanela Dilo Tse di Boteng Tsa Modimo” e ne e le sa ga Wallace Liverance, yo e leng mokwadisi wa Sekolo sa Gileate. Gangwe le gape Dikwalo di bua ka Lefoko la Modimo e le dikhumo, maje a a tlhokegang, tshipi e e tlhwatlhwakgolo le dilo tsa maemo a a kwa godimo tse di tlhokegang  thata. Diane 2:1-5 e bontsha gore go bona “e e leng kitso ya Modimo,” re tshwanetse go e batla jaaka “matlotlo a a fitlhegileng.” Sebui se ile sa kgothaletsa baithuti gore ba tswelele pele ba epa mo teng ga dilo tse di boteng tsa Modimo fa ba ntse ba direla mo dikabelong tsa bone tse disha. Mokaulengwe Liverance o ne a tlhalosa jaana: “Seo se mosola, ka gonne se dira gore motho a nne le tumelo mo go Jehofa le go mo tshepa e bile go nonotsha boikaelelo jwa gago jwa go ngaparela kabelo ya gago. Go tla lo thusa gore lo bue ka tlhoafalo le gore lo nne barutisi ba ba nang le matswela thata fa lo ntse lo tlhalosetsa ba bangwe kaga maikaelelo a Modimo.”

Ka go dirisa tlelase, motlhatlheledi yo mongwe wa Sekolo sa Gileate o ne a bontsha kafa Jehofa a ileng a segofatsa baithuti ka teng mo tirelong ya tshimo mo dikgweding tse tlhano tse di fetileng. Lawrence Bowen o ne a tlhalosa mafoko a ga moaposetoloi Paulo a a mo go Ditiro 20:20 malebana le bodiredi jwa phatlalatsa kwa Efeso, a gatelela kafa Paulo a ileng a dirisa ditshono tsotlhe ka teng go neela bosupi. Maitemogelo a baithuti a ile a bontsha gore, jaaka moaposetoloi Paulo, batho ba ba tlhotlhelediwang ke go bo ba rata Modimo le baagelani ba gagwe mo motlheng wa rona ga ba ke ba ikgogona go bua boammaaruri le go dira gore maatla a Lefoko la Modimo a dire mo go ba bangwe. Se se felela ka masego a magolo a a tswang go Jehofa.

Go Bua ba ba Nang le Maitemogelo

Ka nako ya sekolo, baithuti ba tlelase eno ya Gileate ba ile ba solegelwa molemo thata ke go kgona go kopana le maloko a Dikomiti Tsa Makala go tswa kwa dinageng di le 23, ba le bone ba neng ba le kwa Lefelong la Thuto la Patterson go neelwa thapiso e e kgethegileng. Leon Weaver le Merton Campbell ba Lephata la Tirelo ba ile ba botsolotsa maloko a a farologaneng a Dikomiti Tsa Makala, bangwe ba bone e le ba e kileng ya bo e le baalogi ba Gileate. Go ne go kgothatsa baithuti le ba malapa a bone le ditsala go utlwa barongwa bano ba ba nang le maitemogelo.

Dikgakololo tse di neng di neelwa setlhopha se se alogang go ba thusa go tlwaela dikabelo tsa bone tsa dinaga di sele di ne di akaretsa dikakgelo tse di jaaka tseno: “Nna le boikutlo jo bo siameng. Fa o kopana le sengwe se se sa tlwaelegang kana se o sa se tlhaloganyeng, o se ka wa kgobega marapo. Ikanye Jehofa”; “ithute go itumelela se se leng teng mme o tshepe gore Jehofa o tla lo naya dilo tse lo di tlhokang mo botshelong.” Dikakgelo tse dingwe di ne di remeletse thata mo go thuseng baithuti gore ba nne ba itumetse mo kabelong ya bone. Dikakgelo dingwe di ne di re: “O se ka wa bapisa kabelo e o leng mo go yone le lefelo le o tswang kwa go lone”; “ithute puo e e buiwang mo lefelong leo mme o e bue sentle gore o tle o kgone go buisana le batho”; “ithute dingwao le ditso tsa batho ba teng, ka gonne seno se tla go thusa gore o kgomarele kabelo ya gago.” Dikakgelo tseno di ile tsa kgothatsa barongwa ba basha thata.

Morago ga dipotsolotso tseno, David Splane, yo e kileng ya bo e le morongwa e bile e le moalogi wa setlhopha sa bo42 sa tlelase ya Gileate yo gone jaanong e leng leloko la Setlhopha se se Laolang sa Basupi ba ga Jehofa, o ne a neela puo e e botlhokwatlhokwa ka setlhogo se se neng se goga kgatlhego se se reng “A lo Baithuti Kana Baalogi?” O ile a botsa tlelase ya baalogi a re: “Lo ile go iteba jang fa lo ya kwa kabelong ya lona ya borongwa? A lo tla iteba lo le baalogi ba ba itseng sengwe le sengwe ka tiro ya borongwa kana lo le baithuti ba ba sa ntseng ba tshwanetse go ithuta go le gontsi?” Mokaulengwe Splane o ne a tlhalosa gore moalogi yo o botlhale o tla iteba e le moithuti. Barongwa ba tshwanetse go nna le boikutlo jwa gore mongwe le mongwe yo ba kopanang nae mo kabelong ya bone ya borongwa o na le bokgoni jwa go ba ruta sengwe. (Bafilipi 2:3) Baithuti ba ne ba kgothadiwa gore ba dirisane mmogo thata le barongwakabone, ofisi ya lekala, le phuthego e ba leng mo go yone. Mokaulengwe Splane o ne a kgothatsa jaana: “Lo falotse ditlhatlhobo tsa lona tsa makgaolakgang, mme ga lo a kgaotsa go nna baithuti. Dirang gore mongwe le mongwe a itse gore o tletse go ithuta.”

Morago ga puo eno, baithuti ba ne ba amogela didipoloma tsa bone mme dikabelo tsa bone di ile tsa itsisiwe bareetsi. Go ne ga ama baithuti ba ba alogang pelo tota fa morago ga foo moemedi wa tlelase a ne a bala maitlamo a a neng a bua ka boikaelelo jwa baalogi jwa go dira gore se ba se ithutileng mo Lefokong la Modimo se ba tlhotlheletse go dira ditiro tse dikgolwane tsa tirelo e e boitshepo.

Ga go na pelaelo gore botlhe ba ba neng ba le teng ba ne ba dumela gore kgakololo e baalogi ba e amogetseng e nonotshitse boikaelelo jwa bone jwa go rata Modimo le baagelani. Mme gape e ile ya dira gore ba ititeye sehuba le go feta pele gore ba tla thusa batho mo kabelong ya bone ya borongwa mo semoyeng.

[Lebokoso mo go tsebe 25]

DIPALOPALO TSA SETLHOPHA

Palo ya dinaga tse di emetsweng: 10

Palo ya dinaga tse ba abetsweng kwa go tsone: 20

Palo ya baithuti: 48

Palogare ya dingwaga tsa bone tsa bogodi: 33,7

Palogare ya dingwaga tsa bone ba le mo boammaaruring: 16,2

Palogare ya dingwaga tsa bone ba le mo bodireding jwa nako e e tletseng: 12,5

[Setshwantsho mo go tsebe 26]

Setlhopha se se Alogang sa Bo109 sa Sekolo sa Baebele sa Watchtower sa Gileate

Mo lenaaneng le le fa tlase, dinomoro tsa mela eno di kwadilwe di balwa go tswa kwa pele go ya kwa morago, mme maina a thathamisitswe go tswa ka fa molemeng go ya ka fa mojeng wa mola mongwe le mongwe.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.