Go Tshela mo Maemong a a Diphatsa

“Sengwe le sengwe se motho a se dirang mo botshelong letsatsi le letsatsi—go akaretsa le go robala—se diphatsa mo e leng gore a ka nna a se ka a bona tlhabo ya letsatsi le le latelang.”—Makasine wa Discover.

BOTSHELO bo a tle bo tshwantshiwe le go tsamaya mo nageng e e tletseng dibomo tse di epelwang, ka gonne motho a ka gobala kgotsa a swa nako nngwe le nngwe, gantsi go se na tlhagiso epe. Diphatsa tse batho ba tshelang mo go tsone di farologana go ya ka dinaga. Di akaretsa dikotsi tsa tsela, ntwa ya selegae, leuba, AIDS, kankere, bolwetse jwa pelo le dilo tse dingwe tse dintsintsi. Ka sekai, mo Afrika e e kwa borwa jwa Sahara, AIDS e setse e le yone e bolayang batho go feta dilo tse dingwe tsotlhe, mme ngwaga mongwe bosheng jaana, “e ile ya bolaya batho ba le dimilione di le 2,2, e leng palo ya batho ba ba bolailweng mo dintweng tsotlhe tsa selegae tsa Afrika e menagane ga 10,” go bolela jalo U.S.News & World Report.

Go sa ntse go le jalo, lefatshe le dirisa madi a se kana ka sepe go dira gore batho ba tshele nako e telele le go fokotsa malwetse le bogole. Bontsi jwa megopolo e e rotloediwang, e e jaaka go ja le go nwa sentle le go itshidila mmele, e ka nna le diphelelo tse di mosola. Le fa go ntse jalo, go na le motswedi mongwe wa tshedimosetso e e ikanyegang malebana le karolo nngwe le nngwe e e botlhokwa ya botshelo o o ka go thusang go tshela botshelo jo bo sireletsegileng sentle. Motswedi oo ke Baebele. E na le dikaelo tse di ka thusang go lebana le mathata a a farologaneng a a amang botsogo le boitumelo jwa rona. Gone ke boammaaruri, Baebele ga e tlhalose bothata bongwe le bongwe ka botlalo. Mme gone, e re naya melaometheo e e molemolemo e e ka re kaelang mo dilong tse di jaaka mekgwa ya go ja, go itekanela mo mmeleng, boikutlo jwa mogopolo, tlhakanelodikobo, go nwa bojalwa, motsoko le diokobatsi tse go tweng ke tsa go intsha bodutu mmogo le dilo tse dingwe tse dintsi.

Gape batho ba le bantsi ba tshela ka mathata a mantsi a tsa itsholelo. Baebele e a re thusa le mo ntlheng eno. Ga e re kgothaletse fela go leba madi le tiriso ya one ka tsela e e botlhale mme e re bontsha kafa re ka nnang bathapi kgotsa bathapiwa ba ba botoka ka teng. Fa go buiwa ka tlhamalalo fela, Baebele ke mosupatsela, e seng fela mo go tsa madi le tsa boitekanelo, mme le mo botshelong ka bojone. A o ka rata go bona gore Baebele e ka nna mosola jang gompieno? He, bala go ya pele.