Ngaka ya Matlho e Jala Peo

Maiteko a a dirilweng ke ngaka ya matlho kwa Lviv, kwa Ukraine, a amana jang le go tlhomiwa ga phuthego ya Basupi ba ga Jehofa ya batho ba ba buang Se-Russia kwa Haifa, kwa Iseraele, e e leng bokgakala jwa dikilometara tse di ka nnang 2 000 e bile e le kgakala le dinaga di le mmalwa? Eno ke kgang e e supang boammaaruri jwa mafoko ano a Baebele mo go Moreri 11:6: “Mo mosong o jale peo ya gago mme o se ka wa letla seatla sa gago gore se ikhutse go fitlha maitseboa; gonne ga o itse kwa seno se tla nnang le katlego teng.”

KGANG ya rona e simolola ka 1990 fa Ella, mosadi yo mosha yo o godisitsweng ka tsela ya Sejuda, a ne a nna kwa Lviv. Ella le ba lelapa la gaabo ba ne ba ipaakanyetsa go fudugela kwa Iseraele. Pelenyana ga fa ba tsamaya, Ella o ne a tshwanetse go ya go bona ngaka ya matlho e e neng e le mongwe wa Basupi ba ga Jehofa. Ka nako eo, tiro ya Basupi ba ga Jehofa e ne e thibetswe kwa Ukraine. Le fa go ntse jalo, ngaka ya matlho e ile ya simolola go bolelela Ella ka dilo tse a di dumelang tse di theilweng mo Baebeleng. O ne a mo gakgamatsa ka go mmolelela gore Modimo  o na le leina. Seo se ile sa dira gore Ella a batle go itse mo go oketsegileng, mme go ne ga nna le motlotlo o o monate wa Baebele.

Ella o ile a itumelela motlotlo thata jaana mo e leng gore o ne a kopa gore ba nne le motlotlo o mongwe gape beke e e latelang le e nngwe morago ga eo. Kgatlhego ya gagwe e ne e gola, mme le fa go ntse jalo go ne go na le bothata. Nako ya gore lelapa le tsamaye go ya Iseraele e ne e atamela ka bonako. Ella o ne a sa ntse a na le mo gontsi thata mo a neng a tshwanetse go go ithuta! Gore a tle a dirise nako e e setseng ka botlalo, o ne a kopa go ithuta Baebele letsatsi le letsatsi go fitlha a tsamaya. Le fa gone Ella a ile a se ka a tswelela ka thuto ya gagwe fa a fitlha la ntlha kwa Iseraele, peo ya boammaaruri e ne e medile mo pelong ya gagwe. Kwa bofelong jwa ngwaga oo, o ne a boetse a ithuta Baebele ka tlhoafalo.

Go ile ga tsoga ntwa kwa Kgogometsong ya Peresia mme Iraq e ne ya tlhasela Iseraele ka dimmisaele. Seno e ne e le sone se gantsi go neng go tlotliwa ka sone. Ka letsatsi lengwe kwa lebenkeleng le legolo, Ella o ne a utlwa lelapa lengwe le le buang Se-Russia le le sa tswang go fudugela koo le tlotla. Le mororo Ella a ne a sa ntse a ithuta Baebele ka boene, o ne a atamela lelapa leno mme a ba bolelela ka tsholofelo ya Baebele ya lefatshe le le nang le kagiso. Ka ntlha ya seo, mmèmogolo e bong Galina; mmè e bong Natasha; morwa e bong Sasha (Ariel); le morwadi e bong Ilana, ba ne ba kopanela botlhe le Ella mo thutong ya Baebele.

Sasha e nnile wa ntlha mo lelapeng go fitlha bokgakaleng jwa gore a kolobediwe—le fa gone go ne go na le diteko tse dintsi. Le mororo e ne e le moithuti yo o botlhale thata, o ne a kobiwa kwa sekolong ka gonne segakolodi sa gagwe sa Bokeresete se ne se sa mo letlelele go nna le seabe mo go ikatisetseng bosole, mo e neng e le patlafalo ya thulaganyo ya sekolo. (Isaia 2:2-4) Kgetsi ya ga Sasha e ile ya isiwa kwa Kgotlatshekelokgolo ya Israele kwa Jerusalema, e ka boitumelo e ileng ya laela gore Sasha a busediwe kwa sekolong gore a fetse sekolo. Kgetsi eno e ne ya gasiwa mo nageng eo yotlhe. Ka ntlha ya seo, batho ba le bantsi ba kwa Iseraele ba ne ba simolola go itse ka ditumelo tsa Basupi ba ga Jehofa. *

Morago ga gore Sasha a aloge kwa sekolong se segolwane, o ne a tsena mo bodireding jwa nako e e tletseng jwa Basupi ba ga Jehofa. Gompieno o direla e le mmulatsela yo o kgethegileng e bile ke mogolwane wa phuthego. Kgaitsadiagwe Sasha e bong Ilana, o kopanetse le ene mo bodireding jwa nako e e tletseng. Mmaabone le mmèmogolo wa bone ke Basupi ba ba kolobeditsweng ka bobedi jwa bone. Peo e ngaka ya matlho e e jadileng e ne e sa ntse e ungwa maungo!

Go sa ntse go ntse jalo, Ella o ne a tswelela go gatela pele semoyeng mme go ise go ye kae ke fa a rera ka ntlo le ntlo. Mo ntlong ya gagwe ya ntlha fela, Ella o ne a kopana le Faina yo o neng a sa tswa go goroga go tswa kwa Ukraine. Faina o ne a tshwenyegile thata mo maikutlong. Moragonyana Ella o ne a utlwa gore pelenyana fela ga a kokota mo lebating la ga Faina, mosadi yo o neng a tshwenyegile mo maikutlong yono o ne a rapetse Modimo jaana: “Ga ke itse gore o mang, mme fa o nkutlwa, nthuse.” Ene le Ella ba ne ba nna le motlotlo o o kgatlhang thata. Faina o ne a botsa dipotso tse dintsi mme a sekaseka dikarabo tse a neng a di newa ka kelotlhoko. Fa nako e ntse e tsamaya, o ne a tlhatswega pelo gore Basupi ba ga Jehofa ba ruta boammaaruri jo bo tswang mo Baebeleng. O ne a fetola thulaganyo ya dithuto tsa gagwe tsa yunibesithi gore a tle a nne le nako e e oketsegileng le phuthego le mo tirong ya go rera. Ka May 1994, Faina o ne  a kolobediwa. O ne a tsenela tirelo ya bobulatsela, a itlamela ka go dira tiro ya nakwana mo tirong ya go bereka ka dikhomputara.

Ka November 1994, fa Ella a ne a ntse a le mo tirong ya go rera, o ne a ikutlwa a le bokoa fela a sa lebelela. O ne a ya kwa kokelong koo ditlhatlhobo di neng tsa supa gore o na le ntho e e dutlang mo maleng. Mo maitseboeng selekanyo sa hemoglobin sa ga Ella se ile ya wela kwa tlase sa fitlha go 7,2. Mogolwane mongwe kwa phuthegong ya ga Ella, yo e leng modulasetulo wa Komiti ya Puisano le Dikolelo (Hospital Liaison Committee [HLC]), ya lefelo la bone, o ne a naya dingaka tshedimosetso e ntsi ya kalafi e go sa tlhokweng gore go dirisiwe madi mo go yone. * Ella o ne a ariwa ka katlego go sa dirisiwe madi mme o ne a fola ka botlalo.—Ditiro 15:28, 29.

Ngaka ya ga Ella ya malwetse a sesadi e bong Karl, yo e leng Mojuda yo o tsholetsweng kwa Jeremane, o ne a kgatlhega thata. Morago ga foo o ne a gakologelwa gore batsadi ba gagwe, ba ba neng ba falotse Polao ya Kgailo, ba ne ba itse Basupi ba ga Jehofa go tswa kwa dikampeng tsa pogisetso. Karl o ne a botsa dipotso tse dintsi. Le mororo Karl a ne a tshwaregile thata ka tiro ya gagwe ya bongaka, o ne a ipha nako ya go ithuta Baebele ka metlha. Mo ngwageng o o latelang, o ne a setse a nna teng kwa dipokanong tsa beke le beke tsa Bokeresete.

Go jala ga ngaka ya matlho peo go nnile le matswela afe? Re setse re bone gore go diragetse eng ka Sasha le ba lelapa la gaabo. Ella ene ke modiredi wa mmulatsela yo o kgethegileng. Morwadie e bong Eina, yo o sa tswang go fetsa sekolo se segolwane, o simolola tiro ya gagwe ya go nna mmulatsela. Faina le ene ke mmulatsela yo o kgethegileng. Karl ene, yo e leng ngaka ya ga Ella ya malwetse a sesadi, e setse e le Mosupi yo o kolobeditsweng jaanong e bile ke motlhanka wa bodiredi, yo o thusang balwetse ba gagwe le ba bangwe ka maatla a a fodisang a boammaaruri jwa Baebele.

Setlhophanyana sa bafudugi ba ba buang Se-Russia se se ileng sa simologa e le karolo ya Phuthego ya Sehebera ya Haifa e setse jaanong e le phuthego ya batho ba ba buang Se-Russia e e tlhoafetseng e e nang le baboledi ba Bogosi ba ba fetang 120. Bontlhanngwe jwa koketsego eno bo nnile teng ka ntlha ya gore ngaka ya matlho ya kwa Lviv e ne ya dirisa tshono ya go jala peo!

[Dintlha tse di kwa tlase]

[Mmapa mo go tsebe 29]

(Go bona mokwalo o o feletseng, leba kgatiso)

UKRAINE

ISRAEL

[Motswedi wa Setshwantsho]

Mountain High Maps® Copyright © 1997 Digital Wisdom, Inc.

[Ditshwantsho mo go tsebe 30]

Ella le morwadie e bong Eina

[Setshwantsho mo go tsebe 31]

Setlhopha se se itumetseng sa Basupi ba ba buang Se-Russia kwa Haifa. Go tswa kafa molemeng go ya kwa mojeng: Sasha, Ilana, Natasha, Galina, Faina, Ella, Eina le Karl