A Eno e ka Nna Tiro e e Molemolemo mo go Wena?

FA E le gore o Mokeresete yo o kolobeditsweng, ga go na pelaelo gore go rata Modimo go tla go tlhotlheletsa go dira go rata ga gagwe. Mo godimo ga moo, ga go na pelaelo gore bodiredi e tshwanetse ya bo e le tiro e o e ratang thata. Gone e bile, Jesu Keresete o ile a laela balatedi ba gagwe gore ba dire barutwa. (Mathaio 28:19, 20) Ee, o ka tswa gone jaanong o dira tiro ya boitshediso go itlamela. Mme jaaka molatedi wa ga Jesu le mongwe wa Basupi ba ga Jehofa selo se se botlhokwatlhokwa ke gore o modiredi wa Mokeresete—yo tiro ya go rera ka Bogosi e tlang pele mo botshelong jwa gagwe.—Mathaio 24:14.

Gongwe o mo dingwageng tsa gago tsa bofelo tsa bolesome kana mo tshimologong ya dingwaga tsa bo20. Go ka direga gore o ile wa akanya thata ka gore o tla dira eng mo botshelong. Fa o ntse o sekaseka dilo tse o ka di dirang, go ikgotsofatsa e ka nna sengwe sa dilo tse di botlhokwa.

Akanya ka se Jørgen wa kwa Denmark a ileng a se bolela ka tlhopho e a ileng a e dira. Jørgen o e tlhalosa e le “tsela e e molemolemo ya botshelo e mo go yone o ka tlhomang mogopolo mo tirong e e botlhokwa go di gaisa tsotlhe.” Eva, mosadi mongwe wa dingwaga di le 31 kwa Greece, o bolela jaana: “Fa ke bapisa botshelo jwa me le jwa dithaka tsa me, ka metlha ke swetsa gore jwa me bo na le bokao jo bogolo, bo kgotsofatsa ka mo go oketsegileng e bile bo itumedisa thata.” Ke tiro efe e e go neelang kgotsofalo e e ntseng jalo? O ka dira jang gore o latelele tsela e e ntseng jalo ya botshelo?

A Modimo o go Bontsha Tsela?

Go tlhopha tiro go ka nna boima thata. Tota e bile, bangwe ba ka nna ba bo ba eletsa gore Modimo a ba kaele ka tlhamalalo gore o batla gore ba dire eng.

Fa Moshe a ne a le kwa Midiana, Jehofa o ne a mo kaela gore a boele kwa Egepeto mme a etelele Baiseraele pele go tswa mo bokgobeng. (Ekesodo 3:1-10) Moengele wa Modimo o ne a tlhaga mo go Gidione, yo o neng a tlhomilwe go ntsha Iseraele mo kgatelelong. (Baatlhodi 6:11-14) Dafide o ne a disitse dinku fa Modimo a ne a bolelela Samuele gore a mo tlotse go nna kgosi e e latelang ya Iseraele. (1 Samuele 16:1-13) Ga re kaelwe ka tsela eo gompieno. Go na le moo, re tlhoka go sekaseka mabaka mme re bo re dira tshwetso ya gore re tla dirisa bokgoni jwa rona jo re bo filweng ke Modimo jang.

Jehofa o bulela Bakeresete ba basha “kgoro e kgolo e e isang kwa tirong” gompieno. (1 Bakorintha 16:9) Jang? Mo dingwageng tse di lesome tse di fetileng, palo ya baboledi ba Bogosi e ile ya oketsega ka palo e e fetang 2 125 000 mme ba feta 6 000 000 go ralala lefatshe. Ke bomang ba ba thusang go aba dimilionemilione tsa Dibaebele, dibuka, diboroutšhara, dimakasine le dipampitshana tse di tlhokegang go tshegetsa batho ka dilo tsa semoya le ka tiro ya lefatshe lotlhe ya go rera dikgang tse di molemo? Tshiamelo eno e e segofaditsweng e itumelelwa ke maloko a lelapa la Bethele mo lefatsheng lotlhe.

Botshelo jo bo Duelang

Bethele, e raya “Ntlo ya Modimo,” mme malapa a Bethele ke mafelo a mo go one go nnang baithaopi ba Bakeresete ba ba berekang kwa ntlokgolo le kwa diofising tsa makala tsa Mokgatlho wa Watch Tower. (Genesise 28:19, ntlhanyana e e kwa tlase) Malapa a Bethele a motlha wa segompieno a ka tshwantshiwa le ‘matlo a a agilweng ka botlhale’ a a rulagantsweng sentle e bile a le teng ka ntlha ya go rata Jehofa.—Diane 24:3.

Go tweng ka moya wa sekalelapa mo Bethele? Leloko lengwe la lelapa la Bethele la kwa Estonia la dingwaga di le 25 le bolela jaana: “Ke itumelela go nna gare ga ditsala tsa ga Jehofa ka dinako tsotlhe. Seno e sa ntse e le selo se se botlhokwa thata mo go nna mo Bethele.”—Pesalema 15:1, 2.

Mo lefatsheng lotlhe, batho ba ba ka nnang  19 500 gone jaanong ba itumelela tshiamelo ya tirelo ya Bethele. (Pesalema 110:3) Kwa United States, diperesente di le 46 tsa bao ba leng kwa Bethele ba fa gare ga dingwaga di le 19 le 29. Le bone jaaka Isaia, ba ile ba bolela jaana: “Ke fano! Roma nna.” (Isaia 6:8) Isaia—yo o neng a setse a ineetse mo go Jehofa—o ne a ithaopela tshiamelo e nngwe ya tirelo. Go bonala fa seno se ne se kaya gore a itime melemo mengwe. Ba ba leng mo tirelong ya Bethele ba tlogela magae a bone le mafelo a ba a tlwaetseng, mmogo le bommè, borre, bomorwarre, bokgaitsadi le ditsala. Go intsha setlhabelo jalo go dirwa ka go rata “ka ntlha ya dikgang tse di molemo.”—Mareko 10:29, 30.

Kafa letlhakoreng le lengwe, a bo go na le masego a mantsi jang ne a semoya kwa Bethele! Leloko lengwe la lelapa la Bethele la motho yo o sa leng mosha la kwa Russia le tlhalosa jaana: “Ka go intsha setlhabelo, re ka kgona go ithuta mo gontsi go go ka re thusang go tshela mo lefatsheng le lesha. Nka re mo kgannyeng ya me, masego a ga Jehofa a magolo thata go gaisa dilo tse ke ileng ka di ithontsha.”—Malaki 3:10.

Botshelo mo Bethele

Botshelo bo ntse jang mo Bethele? Maloko a lelapa la Bethele a dumela gore bo phepa e bile bo a kgotsofatsa mme gape bo a itumedisa. Jens, yo o nang le dingwaga di le 43 o itumelela tirelo ya Bethele. Ka ntlha yang? O bolela jaana: “Ka gonne ke akanya gore re bopa karolo e kgolo ya bao ba dirang maiteko a magolo go dira tiro e e botlhokwa thata. Ke kgona go bona bogolo le botlhokwa jwa tiro ya ga Jehofa.”

Go tloga ka Mantaga go fitlha ka Matlhatso, letsatsi mo Bethele le simololwa ka kobamelo ya mo mosong. Ke motlotlo wa Baebele, o o tshwarwang ke mogolwane yo o nang le maitemogelo. Ka Bomantaga maitseboa go dirisiwa ura go tshwara thuto ya lelapa ya Baebele go dirisiwa Tora ya Tebelo, mme ka dinako tse dingwe morago ga foo go nne le puo e e theilweng mo setlhogong se se tswang mo Dikwalong se se tshwanelang thatathata lelapa la Bethele.

Go diragala eng fa motho a fitlha la ntlha mo Bethele? Go tlwaetsa maloko a masha botshelo jwa Bethele, bakaulengwe ba ba godileng ba lelapa ba neela dipuo tse di malebana le dikarolo tse di farologaneng tsa tirelo ya Bethele. Mo dibekeng di le mmalwa mo ngwageng wa ntlha, leloko le lesha la Bethele le tsena sekolo se se molemo sa beke le beke se se diretsweng go mo thusa go tlhaloganya Dikwalo botoka. Batlabosheng ba itumelela gape thulaganyo e e kgethegileng ya go bala Baebele. Mo ngwageng wa bone wa ntlha wa tirelo ya Bethele, maloko a masha a lelapa a bala Baebele yotlhe.

Matswela a thapiso eno yotlhe ke eng? Joshua, wa dingwaga tse 33 yo e leng leloko la lelapa la Bethele kwa Hong Kong, o araba jaana: “Bethele e ile ya godisa kanaanelo ya me mo go Jehofa. Ke kgona go tsalana le bakaulengwe ba bantsi ba ba nang le maitemogelo bao bontsi jwa botshelo jwa bone ba ileng ba direla Jehofa. Ke itumelela thata dithulaganyo tsa semoya, tse di jaaka kobamelo ya mo mosong le Thuto ya lelapa ya Tora ya Tebelo. Mo godimo ga moo, ke rata tsela ya botshelo e e nang le thulaganyo e e sa raraanang. Seno se nthusa gore ke se ka ka tlhobaela go sa tlhokege. Mme gape ke ithuta go rarabolola dilo ka tsela ya Bokeresete, mme seno se ile sa ntsholegela molemo ka metlha.”

Maloko a lelapa la Bethele a dirisa bontsi jwa nako ya bone le maatla a bone go dira seo ba ithaopetseng go se dira. Go raya gore ba dirisa maatla le tlhaloganyo ya bone segolobologolo go dira kabelo e ba e filweng mo Bethele. Go na le dilo tse dintsi tse di tlhokang go dirwa. Bangwe ba bereka mo metšhineng e e gatisang kana mo go tshwaraganngwang dibuka gone, ba dira dibuka tse di romelwang kwa diphuthegong tse dintsi. Ba bangwe ba bereka mo kitšhining, mo ntlong ya bojelo kana kwa botlhatswetsong. Dikabelo tseno di akaretsa tiro ya go phepafatsa, ya go lema, ya go aga, jalo le jalo. Bangwe ba na le boikarabelo jwa go tlhokomela didirisiwa mo maphateng ano. Ba bangwe ba dira mo go tsa boitekanelo kana tiro ya diofisi. Dikabelo tsotlhe tsa tiro ya Bethele di akaretsa dikgwetlho tse di monate e bile di na le molemo o mogolo. Tiro e e dirwang mo Bethele e kgotsofatsa thata ka gonne e tsweletsa dilo tse di direlwang Bogosi kwa pele e bile e dirwa ka ntlha ya go rata Modimo.

Maloko a lelapa la Bethele a abelwa kwa diphuthegong tse kwa go tsone ba ka kgonang go bona melemo ya tiro e ba e dirang. Ba itumelela go nna teng kwa dipokanong tsa phuthego le go nna le  seabe mo tirong ya go rera. Ka ntlha ya seo, maloko a lelapa la Bethele a bopile botsalano jo bogolo le bakaulengwe le bokgaitsadi ba bone ba diphuthego tse ba leng kwa go tsone.—Mareko 10:29, 30.

Rita, yo e leng leloko la lelapa la Bethele kwa Boritane, o bolela jaana: “Ke lebogela phuthego eno thata! Fa ke le kwa dipokanong le mo bodireding, go nonotsha tumelo ya me thata go bona bakaulengwe, bokgaitsadi le bana ba ba rategang, le ba ba setseng ba godileng ba le teng! Go sa kgathalesege gore go diragala eng, ba nna teng. Seo se nthusa gore ke tlhoafale le go feta mo tirelong ya me ya Bethele.”

Botshelo jwa Bethele ga se go bereka fela, go ya dipokanong, tirelo ya tshimo le go ithuta. Lelapa le na le dinako tse le itapolosang ka tsone. Gangwe le gape, go na le dithulaganyo tsa “Maitseboa a Lelapa” tse di tlosang bodutu le tse di re solegelang molemo mo semoyeng, tse di re thusang go nna le ditshono tsa go bona ditalenta tsa ba bantsi le go ithuta ka dilo tse di kgothatsang ka matshelo a ba bangwe ba ba direlang mo Bethele. Se se itumedisang gape ke fa ba bangwe ba etela ba bangwe e le maeto fela a a agang a botsalano. Mo gongwe go na le mafelo a go itapolosa mmogo le dilaeborari tse o ka ipalelang le go dira dipatlisiso mo go tsone. Mme selo se sengwe se re sa se lebaleng ke metlotlo e e monate e re nang nayo mo ditafoleng ka nako ya dijo.

Tom, yo e leng leloko la lelapa la Bethele kwa Estonia, o bolela jaana: “Lewatle le bokgakala jwa seterata se le sengwe fela go tswa mo Bethele, mme gaufi le lone go na le sekgwa se sentle se nna le mosadi wa me re ratang go tsamaya mo go sone. Ka dinako tse dingwe ke a tle ke tshameke kolofo, hoki le thenese le ditsala kwa phuthegong le mo Bethele. Mme fa maemo a bosa a re letla, re iphokisa phefo ka dibaesekele tsa rona.”

Ke Eng Se o Ka se Dirang Gore o Tshwanelege?

Gone ke boammaaruri gore Bethele ke lefelo le mo go lone Bakeresete ba ba godileng ba direlang Jehofa tirelo e e boitshepo le go direla badumedimmogo go ralala lefatshe. Bao ba nnang maloko a lelapa la Bethele ba tshwanetse go nna le ditshwanelego  tse di rileng. Ke eng se o ka se dirang gore o tshwanelegele tirelo ya Bethele?

Fela jaaka Timotheo yo o neng a dira le moaposetoloi Paulo, batho ba ba amogelwang go dira tirelo ya Bethele ba tshwanetse ba bo ba na le boemo jo bontle le phuthego. (1 Timotheo 1:1) Timotheo “o ne a bolelwa ka molemo ke bakaulengwe kwa Lisetera le Ikonio.” (Ditiro 16:2) Le mororo Timotheo a ne a le mosha, o ne a itse Dikwalo e bile a nitame mo boammaaruring. (2 Timotheo 3:14, 15) Ka mo go tshwanang, go lebeletswe gore batho ba ba amogelwang mo tirelong ya Bethele ba bo ba na le kitso ya Baebele.

Maloko a lelapa la Bethele a tshwanetse go nna le moya wa go intsha setlhabelo. Moya wa go intsha setlhabelo le go iketleeletsa ga ga Timotheo go baya dilo tse di direlwang Bogosi kwa pele o ne o bonala thata mo e leng gore Paulo o ne a ka bolela jaana ka ene: “Ga ke na ope yo mongwe wa maikutlo a a tshwanang le a gagwe yo ruri a tla tlhokomelang dilo tse di lo amang. Gonne ba bangwe botlhe ba ipatlela melemo, e seng  ya ga Keresete Jesu. Mme lo itse bosupi jo a neng a bo naya kaga gagwe, gore jaaka ngwana le rraagwe o ne a nna motlhanka le nna mo go tsweledisetseng pele dikgang tse di molemo.”—Bafilipi 2:20-22.

Tirelo ya Bethele e tlhoka banna le basadi ba semoya. Dithulaganyo tse di direlwang maloko a lelapa la Bethele di dira gore ba kgone go gola semoyeng ka go ithuta Baebele, go nna teng ka metlha kwa dipokanong le mo bodireding jwa tshimo le go kopanela le Bakeresete ba ba godileng. Ka gone bao ba leng mo Bethele ba thusiwa gore ba latele kgakololo eno ya ga Paulo: “Tswelelang lo tsamaya lo le seoposengwe le [Keresete Jesu], lo namile medi e bile lo agiwa mo go ene gape lo tsepamisiwa mo tumelong, fela jaaka lo ne lwa rutwa, lo penologa ka tumelo mo go ntshiweng ga ditebogo.”—Bakolosa 2:6, 7.

Ka ntlha ya mofuta wa tiro e e dirwang mo Bethele, batho ba ba amogelwang go nna le tshiamelo eno ya tirelo ba tshwanetse ba bo ba itekanetse mo mmeleng e bile ba na le botsogo jo bo siameng. Fa o na le ditshwanelego tse re di umakileng, o na le dingwaga di le 19 kana o le mogolwanyane e bile o kolobeditswe mo e ka nnang bobotlana ngwaga, re go kgothaletsa gore o akanye ka tirelo ya Bethele.

Rotlhe Re na Le Seabe

Ga go na pelaelo gore rotlhe jaaka Bakeresete, re eletsa go baya dilo tse di direlwang Bogosi kwa pele mo botshelong le go dira ka moya otlhe mo tirelong ya rona e re e direlang Jehofa. (Mathaio 6:33; Bakolosa 3:23) Mme gape re ka kgothaletsa bao ba direlang mo Bethele gore ba tswelele ba dire tirelo e e boitshepo moo. Mme go tshwanetse ga kgothadiwa segolobogolo bakaulengwe ba basha ba ba tshwanelegelang tirelo ya Bethele gore ba leke go tshwanelegela tshiamelo eno e e segofaditsweng.

Tirelo ya Bethele ke tsela ya botshelo e e kgotsofatsang semoyeng—e ruri e ka nnang tiro e e molemolemo mo go wena. Ke tiro e e molemolemo mo go Nick, yo o ileng a simolola go direla mo Bethele a le dingwaga di le 20. Morago ga go direla ka dingwaga di le lesome mo Bethele, o bolela jaana: “Gantsi ke rapela Jehofa go mo lebogela bopelonomi jwa gagwe jo bo sa ntshwanelang. Ke eng se se fetang seo se nka se batlang? Fano re dikologilwe ke Bakeresete ba ba ikanyegang ba ba dirang bojotlhe jwa bone go direla Jehofa.”

[Lebokoso/Setshwantsho mo go tsebe 22]

BAGOLWANE LE BATSADI BA KA DIRA ENG?

Bagolwane le balebedi ba ba etang ba tshwanetse gore ba kgothaletse segolobogolo makawana go dira kopo ya go tla Bethele. Bosheng jaana, patlisiso e e dirilweng mo malokong a lelapa la Bethele a batho ba ba sa ntseng ba le basha e ile ya supa gore diperesente di le 34 tsa one di ile tsa kgothadiwa thatathata ke balebedi ba Bakeresete gore ba dire tirelo ya Bethele mokgele wa bone. Ee, diphuthego tse ba tswang kwa go tsone di ka tswa di ba tlhologelela ka ntlha ya tiro e ba neng ba e dira. Mme go molemo go gakologelwa gore le fa gone Timotheo a ne a na le tlhotlheletso e ntle mo basheng ba bangwe kwa Lusetera le kwa Ikonia, bagolwane ba koo ga ba ka ba mo thibela go ya go dira le Paulo. Ga ba ka ba swetsa ka gore go tlogela Timotheo gore a pate moaposetoloi go tla dira gore ba latlhegelwe thata mo phuthegong ya bone.—1 Timotheo 4:14.

Batsadi ba Bakeresete ke bone segolobogolo ba tshwanetseng go batla go tlhotlheletsa bana ba bone ka tsela e e siameng mo kgannyeng eno. Mo patlisisong e e sa tswang go umakiwa, diperesente di le 40 tsa bao ba ileng ba bodiwa ba ile ba umaka gore batsadi ba bone ke bone ba ileng ba ba kgothaletsa thata gore ba tsenele tirelo ya Bethele. Kgaitsadi mongwe yo o ntseng a direla mo Bethele dingwaga di le mmalwa o ile a bolela jaana: “Botshelo jwa batsadi ba me mo tirelong ya ga Jehofa ke jone jo bo ileng jwa ntlhotlheletsa thata gore ke tsenele tirelo ya Bethele. Ka go bona sekao sa bone mo bodireding jwa nako e e tletseng, ke ne ke itse fela gore eno ke yone tsela e e molemolemo le e e kgotsofatsang thata ya botshelo e nka e tlhophang.”

[Lebokoso mo go tsebe 24]

BA ANAANELA TIRELO YA BETHELE

“Ke rata tirelo ya me ya Bethele. Go a nkgotsofatsa go itse gore ke ile ka direla Jehofa letsatsi lotlhe le gore ke tla boa ke dira jalo gape ka moso, le letsatsi le le latelang morago ga foo, jalo jalo. Seno se dira gore ke nne le segakolodi se se siameng e bile se tlatsa tlhaloganyo ya me ka megopolo e e siameng.”

“Bethele ke lefelo le o ka dirisang nako le maatla a gago otlhe mo tirelong ya ga Jehofa o sa iteege tsebe. Se se dira gore o itumele. Mme gape o kgona go bona phuthego ya ga Jehofa ka tsela e nngwe. O ikutlwa o le gaufi thata le phuthego eno e ditiro tsotlhe di dirwang go tswa mo go yone, mme seno se kgatlha thata.”

“Go tla mo Bethele e nnile selo se se molemo go di gaisa tsotlhe se se kileng sa ntiragalela. Fano, thuto ga e ke e fela. E bile fano, ga ke ithutele gore nna ka bonna ke fitlhelele sengwe, go na le moo ke ithuta ka ntlha ya ga Jehofa. Tiro ya me fano e ka se ka le ka motlha ya nna ya lefela.”

“Go dirisa ditalenta tsa me mo Bethele go dira gore ke ikutlwe ke kgotsofetse e bile ke ritibetse ka gonne di dirisediwa Jehofa le bakaulengwe.”

“Ke ne ke sa kgone go bona kgotsofalo ya mmatota le boitumelo mo tirong ya me ya pele. Ke ile ka eletsa ka dingwaga di le dintsi go bereka le bakaulengwe le bokgaitsadi ba me le go ba berekela. Ke ka lebaka leo ke ileng ka tla mo Bethele. Ke kgotsofala tota go itse gore maiteko a me otlhe a tla solegela ba bangwe molemo semoyeng e bile a tla tlisetsa Jehofa pako.”