Maikutlo a a Nnetseng Ruri

NGWAGA le ngwaga, Basupi ba ga Jehofa kwa dinageng tsa bone tse di farologaneng ba phuthega kwa dikopanong tsa bone tsa Bokeresete tse dinnye le tse dikgolo. Ba dira seno gore ba tle ba bone thuto le bokopano jo bo agang jwa semoya. Mme dikarolo tse dingwe tsa go phuthega ga bone le tsone di ka dira gore baeng ba nne le maikutlo a a nnetseng ruri.

Ka sekai, ka July 1999, diketekete tsa Basupi kwa Mozambique ba ne ba phuthega ka malatsi a le mararo a a itumedisang kwa Dikopanong Tsa Kgaolo Tsa “Lefoko la Modimo la Boporofeti.” Bontsi jwa batho ba ba neng ba le teng kwa kopanong e ne e le lekgetlo la ntlha ba nna teng. Ba ne ba kgatlhwa e seng fela ke se ba se utlwileng go tswa kwa seraleng mme gape le ke se ba neng ba se bona go ba dikologa.

Motho mongwe o ne a bolela jaana kwa Holong ya Dikopano ya Maputo: “Ga ke ise ke ko ke bone lefelo le lentle jaana mo botshelong jwa me jotlhe! Matlwana a boithomelo a ne a na le sesepa le diipone e bile a ne a nkga bophepa. Tikologo e ne e ritibetse go se na modumo wa go lwa ga bana. E bile batho ba ne ba sa kgorometsane! Ke ne ka bona basha ba ba itumetseng ba ba tlotlang ka tsela e e agang. Ke ile ka kgatlhwa gape ke go bona kafa mongwe le mongwe a apereng sentle ka teng. Mo nakong e e tlang, ke tla tla le bongwanake mme ke tla dira gore monna wa me a bone gore re tshwanetse go nna teng mo kopanong eno.”

Ebu, go ikanyega, bothokgami le go nna phepa mo mmeleng ga Basupi ba ga Jehofa go bonwa ke batho ba bangwe. Ke ka ntlha yang fa Basupi ba farologane le batho ba bangwe? Ke ka go bo ba leka tota go dirisa se ba se ithutang mo Baebeleng. Ke eng fa o sa kopanele le bone monongwaga kwa dikopanong tsa bone tsa kgaolo tsa mo nageng ya lona kana kwa dipokanong tsa bone tsa beke le beke kwa Holong ya bone ya Bogosi mme o iponele ka matlho?

[Setshwantsho mo go tsebe 32]

ZAMBIA

[Setshwantsho mo go tsebe 32]

KENYA

[Setshwantsho mo go tsebe 32]

MOZAMBIQUE