Enoke O ne A Tsamaya le Modimo mo Lefatsheng Le le Sa Boifeng Modimo

DIABOLO o tatalalela gore a ka faposa batho botlhe gore ba se sale Modimo morago, mme ka dinako tse dingwe go ka tswa go ile ga lebega e kete o a atlega. Dingwaga di ka nna makgolo a matlhano morago ga loso lwa ga Abele, ga go ope yo o neng a itshupa e le motlhanka yo o ikanyegang wa ga Jehofa. Go fapaana le seo, boitshwaro jwa boleo le jwa go se boife Modimo bo ne bo setse bo amogelwa.

Enoke o ne a tshela mo lefatsheng ka nako eo ya go bola ga semoya. Tatelano ya ditiragalo tsa Baebele e bontsha fa a tshotswe ka 3404 B.C.E. Enoke o ne a sa tshwane le batho ba motlha wa gagwe ka gonne o ne a amogelwa ke Modimo. Moaposetoloi Paulo o ne a mmalela le batlhanka ba ga Jehofa ba tumelo ya bone e leng sekao mo Bakereseteng. Enoke e ne e le mang? O ne a tla kopana le mathata afe? O ne a a fenya jang? Mme bothokgami jwa gagwe bo re ama ka eng?

Mo metlheng ya ga Enoshe, mo e ka nnang makgolo a le manè a dingwaga pele ga nako ya ga Enoke, “go ne ga simololwa go bitsa leina la ga Jehofa.” (Genesise 4:26) Leina la Modimo le ne le sa bolo go dirisiwa fa e sa le batho ba nna teng. Ka gone, se se neng sa simologa mo metlheng ya ga Enoshe go bonala sentle gore e ne e se go bitsa Jehofa ka tumelo le ka kobamelo e e itshekileng. Bakanoki bangwe ba Sehebera ba dumela gore Genesise 4:26 e tshwanetse ya balega ka go re “ba simolola go tlhapatsa” kgotsa “foo go tlhapatsa ga simologa.” Batho ba ka tswa ba ile ba ipitsa ka leina la ga Jehofa kgotsa ba bitsa batho ba bangwe ka lone ba ba neng ba dira e kete ba tsena ka bone go obamela Modimo. Kgotsa gongwe ba ne ba bitsa medingwana ka leina la gagwe.

‘Enoke a Tsamaya le Modimo wa Boammaaruri’

Le fa Enoke a ne a dikologilwe ke batho ba ba sa boifeng Modimo, o ne a “nna a tsamaya le Modimo wa boammaaruri,” Jehofa. Ga go bolelwe gore rraagwe le borraagwemogolo—Sethe, Enoshe, Kenane, Mahalalele le Jarede—ba ne ba tsamaya le Modimo. Fa e le gore ba ne ba go dira ba ne ba sa go dire jaaka Enoke, yo go bonalang gore tsela e a neng a tshela ka yone e ne e mo farologanya le bone.—Genesise 5:3-27.

Go tsamaya le Jehofa go ne go kaya go itse le go atamalana le Modimo mo go neng go kgonega fela ka gonne Enoke o ne a tshela tumalanong le thato ya Modimo. Jehofa o ne a amogela boineelo jwa ga Enoke. E bile tota, Septuagint ya Segerika ya re ‘Enoke o ne a itumedisa Modimo thata,’ e leng ntlha e le moaposetoloi Paulo a e boletseng.—Genesise 5:22; Bahebera 11:5.

Selo sa konokono mo kamanong e ntle ya ga Enoke le Jehofa e ne e le tumelo ya gagwe. O tshwanetse a bo a ne a dumela mo ‘losikeng’ lo lo solofeditsweng lwa “mosadi” wa Modimo. Fa e le gore Enoke ka boene o ne a tlwaelane le Adame, a ka tswa a ile a kgona go itse sengwe ka ditirisano tsa Modimo le banyalani ba ntlha ba kwa Edene. Kitso e Enoke a neng a na le yone ka Modimo e ne e dira gore a nne motho yo o “mmatlang ka tlhoafalo.”—Genesise 3:15; Bahebera 11:6, 13.

Mo kgannyeng ya ga Enoke le mo go ya rona, gore re nne le kamano e ntle le Jehofa ga re tlhoke fela kitso ka Modimo. Fa re tseela kwa godimo thata botsala jwa rona le motho mongwe, a ga go boammaaruri gore dikakanyo tsa rona le ditiro tsa rona di tlhotlhelediwa ke tsela e a lebang dilo ka yone?  Ga re batle go bua dilo kgotsa go dira ditiro tse di ka senyang botsala joo. Mme fa re akanya ka go dira phetogo nngwe mo maemong a rona, a ga re akanyetse le kafa seo se tla amang botsala joo ka teng?

Ka tsela e e tshwanang, lebaka la go bo re eletsa go nna le kamano e e gaufiufi le Modimo le ama se re se dirang. Go tlhokega pele gore re nne le kitso ya boammaaruri ya se a se amogelang le se a sa se amogeleng. Go tswa foo re tlhoka go kaelwa ke kitso eo, re leka go mo itumedisa ka dikakanyo le ka ditiro tsa rona.

Ee, fa re batla go tsamaya le Modimo, re tshwanetse ra mo itumedisa. Ke sone se Enoke a neng a se dira ka makgolokgolo a dingwaga. E bile tota, mofuta wa lediri la Sehebera le le bontshang gore Enoke o ne a ‘tsamaya’ le Modimo, o supa tiro e e dirwang kgapetsa kgapetsa, e tswelela pele. Monna yo mongwe yo o ikanyegang yo o neng a ‘tsamaya le Modimo’ e ne e le Noa.—Genesise 6:9.

Enoke e ne e le rre wa lelapa yo o neng a na le mosadi e bile a na le “bana ba basimane le ba basetsana.” Mongwe wa bana ba gagwe ba basimane e ne e le Methusela. (Genesise 5:21, 22) Enoke o tshwanetse a bo a ile a dira sotlhe se a ka se kgonang go okamela lelapa la gagwe sentle. Le fa go ntse jalo, e re ka a ne a nna mo gare ga batho ba ba sa boifeng Modimo, go ne go se motlhofo gore a direle Modimo. Lameke, rraagwe Noa, e ka tswa e ne e le ene fela mo bathong ba ba neng ba tshela mo motlheng wa gagwe, yo o neng a dumela mo go Jehofa. (Genesise 5:28, 29) Le fa go ntse jalo, Enoke o ne a nna pelokgale mme a obamela ka boammaaruri.

Ke eng se se neng sa thusa Enoke go nna a ikanyega mo Modimong? Ga go pelaelo gore o ne a sa dirisane le batho ba ba tlhapatsang leina la ga Jehofa kgotsa le ba bangwe ba ba neng ba sa tshwanele go nna ditsala tsa mongwe yo o obamelang Modimo. Go batla thuso ya ga Jehofa ka thapelo le gone go tshwanetse ga bo go ile ga nonotsha maikaelelo a ga Enoke a gore a se ka a dira sepe se se neng se ka se itumedise Mmopi wa gagwe.

Boporofeti Kgatlhanong Le ba Ba sa Boifeng Modimo

Go tshegetsa ditekanyetso tse di kwa godimo ka bogone fela go thata fa re nna mo gare  ga batho ba ba sa boifeng Modimo. Mme gape Enoke o ne a bolela molaetsa o o gagametseng wa katlholo kgatlhanong le baikepi. Enoke o ne a kaelwa ke moya wa Modimo mme a porofeta jaana: “Bona! Jehofa o ne a tla le dimiriate tsa gagwe tse di boitshepo, go tla go diragatsa katlholo mo go botlhe, le go supa baikepi botlhe ba le molato mabapi le ditiro tsotlhe tsa bone tsa boikepo tse ba di dirileng ka boikepo, le ka ga dilo tsotlhe tse di tsitsibanyang tse baleofi ba e leng baikepi ba di buileng ka ene.”—Jude 14, 15.

Molaetsa oo o ne o tla ama jang batho ba ba sa dumeleng ba ba dirang ditiro tse di maswe mo go feteletseng? Go a utlwala go akanya gore mafoko a a tlhabang jalo a ne a dira gore Enoke a se ka a ratega, gongwe e bile a dira gore batho ba mo sotle le go mo tshosetsa. Bangwe ba ka tswa ba ne ba batla go mo didimaletsa ruri. Le fa go ntse jalo, Enoke ga a ka a tshoga. O ne a itse gore Abele wa mosiami o ne a diragaletswe ke eng, mme jaaka ene, Enoke o ne a ititeile sehuba gore o tla direla Modimo, go sa kgathalesege maemo.

“Modimo O ne A mo Tsaya”

Go bonala gore Enoke o ne a le mo kotsing ya go bolawa fa ‘Modimo a ne a mo tsaya.’ (Genesise 5:24) Jehofa ga a ka a letla moporofeti wa gagwe yo o ikanyegang a bogisiwa ke baba ba ba gaketseng. Moaposetoloi Paulo a re: “Enoke o ne a fudusiwa gore a se ka a bona loso.” (Bahebera 11:5) Batho ba le bantsi ba re Enoke ga a ka a swa—Modimo o ne a mo isa legodimong, koo a neng a tswelela pele a tshela teng. Le fa go ntse jalo, Jesu o ne a bolela jaana ka phepafalo: “Ga go na motho ope yo o tlhatlogetseng kwa legodimong fa e se yo o fologileng kwa legodimong, e bong Morwa motho.” Jesu e ne e le “moetapele” wa botlhe ba ba tlhatlogelang kwa legodimong.—Johane 3:13; Bahebera 6:19, 20.

Ka jalo go ne ga diragalang ka Enoke? Fa go twe “o ne a fudusiwa gore a se ka a bona loso” go ka tswa go tewa gore Modimo o ne a mo tsenya mo maibing a diponatshegelo a bo a fedisa botshelo jwa gagwe a ntse a le mo seemong seo. Fa a le mo seemong seo, Enoke o ne a ka se utlwe botlhoko jwa loso. Mme “o ne a se ka a fitlhelwa gope” gongwe e le ka gonne Jehofa o ne a tlosa mmele wa gagwe, fela jaaka a ile a tlosa mmele wa ga Moshe.—Duteronome 34:5, 6.

Enoke o ne a tshela dingwaga di le 365—dingwaga tse di kwa tlase thata ga tsa bontsi jwa batho ba motlha wa gagwe. Mme selo sa botlhokwa mo bathong ba ba ratang Jehofa ke gore ba mo direle ka boikanyegi go fitlha kwa bokhutlong jwa malatsi a bone. Re a itse gore Enoke o ne a dira jalo ka gonne “pele ga go fudusiwa ga gagwe o ne a na le bosupi jwa gore o ne a itumedisitse Modimo sentle.” Dikwalo ga di bontshe gore Jehofa o ne a bolelela Enoke seno jang. Le fa go ntse jalo, pele Enoke a swa, o ne a tlhomamisediwa gore Modimo o a mo amogela, mme re ka tlhomamisega gore Jehofa o tla mo gakologelwa mo tsogong.

Etsa Tumelo ya ga Enoke

Go a tshwanela gore re etse tumelo ya batho ba ba boifang Modimo. (Bahebera 13:7) Enoke o ne a direla ka tumelo jaaka moporofeti wa ntlha yo o ikanyegang wa Modimo. Lefatshe la motlha wa ga Enoke le ne le tshwana le la rona—le tletse thubakanyo, go tlhapatsa, le go se boife Modimo. Le fa go ntse jalo, Enoke o ne a sa nna jalo. O ne a na le tumelo ya boammaaruri e bile o ne a tlhoma sekao sa boineelo jwa bomodimo. Ee, Jehofa o ne a mo naya molaetsa o o botlhokwa thata wa katlholo gore a o bolele, mme gape o ne a mo nonotsha gore a o bolele. Enoke o ne a diragatsa thomo ya gagwe ka bopelokgale, mme Modimo o ne a mo tlhokomela fa a ganediwa ke baba.

Fa re na le tumelo fela jaaka Enoke, Jehofa o tla re nonotsha gore re bolele molaetsa wa gagwe mo metlheng eno ya bofelo. O tla re thusa go lebana le kganetso ka bopelokgale, mme boineelo jwa rona jwa bomodimo bo tla dira gore re farologane thata le batho ba ba sa boifeng Modimo. Tumelo e tla dira gore re kgone go tsamaya le Modimo re bo re itshware ka tsela e e itumedisang pelo ya gagwe. (Diane 27:11) Ka tumelo, Enoke wa mosiami o ne a kgona go tsamaya le Jehofa mo lefatsheng le le sa boifeng Modimo, mme le rona re ka kgona.

[Lebokoso mo go tsebe 30]

A Baebele e Nopola go Tswa mo Bukeng ya ga Enoke?

Buka ya ga Enoke ke buka e go sa tlhomamisiweng boammaaruri jwa yone e bile e sa tsenngwa mo dibukeng tse di dirang Dikwalo Tse di Boitshepo. Go bolelwa fa e kwadilwe ke Enoke, mme seo ga se boammaaruri. Go ka direga gore e kwadilwe nako nngwe mo lekgolong la bobedi le la ntlha la dingwaga B.C.E., mme mo go yone go kgobokantswe dikinane tse dintsi tse di seng boammaaruri e bile di sa dumalane le hisitori ya Bojuda, go bonala e le ditlhaloso tsa dilo tse dikhutshwane tse buka ya Genesise e di buang ka Enoke. Ntlha eno ka boyone fela e lekane go dira gore batho ba ba ratang Lefoko le le tlhotlheleditsweng la Modimo ba se ka ba e tsaya tsia.

Mo Baebeleng, ke buka ya ga Jude fela e e nang le mafoko ano a boporofeti a ga Enoke: “Bona! Jehofa o ne a tla le dimiriate tsa gagwe tse di boitshepo, go tla go diragatsa katlholo mo go botlhe, le go supa baikepi botlhe ba le molato mabapi le ditiro tsotlhe tsa bone tsa boikepo tse ba di dirileng ka boikepo, le ka ga dilo tsotlhe tse di tsitsibanyang tse baleofi ba e leng baikepi ba di buileng ka ene.” (Jude 14, 15) Bakanoki ba le bantsi ba bolela gore boporofeti jono jwa ga Enoke jo a neng a bo bua kgatlhanong le batho ba motlha wa gagwe ba ba boikepo bo nopotswe ka tlhamalalo go tswa mo Bukeng ya ga Enoke. A Jude o ne a ka nopola go tswa mo bukeng eno e e seng karolo ya Dikwalo Tse di Boitshepo e e ka se kang ya ikanngwa?

Mo Dikwalong ga re bolelelwe gore Jude o itsile jang ka boporofeti jwa ga Enoke. A ka nna a bo a ile a nopola fela motswedi mongwe o o neng o le teng ka nako eo, polelo nngwe ya bogologolo e e neng ya fetisediwa mo go bone go tswa metlheng ya bogologolo tala. Go bonala Paulo a ile a dira sengwe se se tshwanang le seo fa a ne a umaka Janese le Jamberese ba ba sa umakiweng gope go sele gore e ne e le boramaselamose ba kgotla ya ga Faro ba ba neng ba emelane le Moshe. Fa mokwadi wa Buka ya ga Enoke a ile a kgona go nna le tshedimosetso ka dilo tsa bogologolo ka tsela eno, go ne go ka pala kae gore Jude le ene a nne le yone? *—Ekesodo 7:11, 22; 2 Timotheo 3:8.

Gore Jude o amogetse jang tshedimosetso e e malebana le molaetsa o Enoke a neng a o bolela mo baikeping ga se kgang e e botlhokwa go le kalo. Re ka tlhomamisega gore tshedimosetso eo e boammaaruri ka gonne Jude o ne a e kwala ka tlhotlheletso ya Modimo. (2 Timotheo 3:16) Moya o o boitshepo wa Modimo o ne o etse tlhoko gore a se ka a kwala sepe se se neng se se boammaaruri.

[Ntlha e e kwa tlase]

[Setshwantsho mo go tsebe 31]

Enoke o ne a bolela molaetsa wa ga Jehofa ka bopelokgale