Bagolwane—Thapisang ba Bangwe go Rwala Morwalo

MO DIPHUTHEGONG tsa Basupi ba ga Jehofa lefatshe ka bophara, go na le tlhokego e e potlakileng ya banna ba ba ka direlang mo maemong a bolebedi. Go na le mabaka a mararo a konokono a go bo go ntse jalo.

La ntlha, Jehofa o diragatsa tsholofetso ya gagwe ya gore o tla dira ‘yo mmotlana setšhaba se se thata.’ (Isaia 60:22) Ka bopelonomi jwa gagwe jo bo sa tshwanelang, go kolobeditswe barutwa ba basha ba ba batlileng ba tshwara milione go nna Basupi ba ga Jehofa mo dingwageng tse tharo tse di fetileng. Go tlhokega banna ba ba nang le maikarabelo go thusa batho bano ba ba kolobeditsweng bosheng gore ba gatele pele ba bo ba nne Bakeresete ba ba godileng sentle.—Bahebera 6:1.

La bobedi, bangwe ba ba diretseng e le bagolwane ka masomesome a dingwaga ba ile ba patelediwa ke go gola kgotsa ke mathata a botsogo gore ba fokotse selekanyo sa tiro e ba e sikereng mo phuthegong.

La boraro, bagolwane ba ba tlhoafetseng ba le bantsi ba Bakeresete jaanong ba direla e le maloko a Dikomiti Tsa Puisano le Dikokelo, a Dikomiti Tsa Kago Tsa Kgaolo kgotsa a Dikomiti Tsa Diholo Tsa Dikopano. Mo mabakeng a mangwe ba ile ba tshwanelwa ke gore ba nne tekatekano ka go rola mangwe a maikarabelo a ba nang le one mo diphuthegong tse ba leng mo go tsone.

Tlhokego eno e kgolo ya banna ba ba oketsegileng ba ba tshwanelegang e ka tladiwa jang? Tharabololo ke go thapisa. Baebele e kgothatsa balebedi ba Bakeresete gore ba thapise “banna ba ba ikanyegang, ba le bone ba tla tshwanelegang sentle go ruta ba bangwe.” (2 Timotheo 2:2) Lediri go thapisa le raya go ruta motho gore a tshwanelege, kgotsa a nne setswerere. A re sekasekeng kafa bagolwane ba ka thapisang banna ba bangwe ba ba tshwanelegang ka teng.

Latelang Sekao sa ga Jehofa

Jesu Keresete eleruri o ne a ‘tshwanelega, e bile a dira tiro ya gagwe ka botswerere’—mme seno ga se gakgamatse! O ne a thapisiwa ke Jehofa Modimo ka boene. Ke mabaka afe a a neng a dira gore thulaganyo eno ya go thapisa e nne le matswela thata jaana? Jesu o ne a umaka a mararo, jaaka go kwadilwe mo go Johane 5:20: “Rara [1] o rata Morwa mme [2] o mmontsha dilo tsotlhe tse ene ka boene a di dirang, e bile o tla mmontsha [3] ditiro tse dikgolo go feta tseno.” Go tlhatlhoba lengwe le lengwe la mabaka ano go tla re naya temogo mo kgannyeng ya go thapisa.

Ela tlhoko gore la ntlha Jesu o rile: “Rara o rata Morwa.” Go tloga kwa tshimologong ya popo, go ne go na le kamano e e lorato fa gare ga ga Jehofa le Morwawe. Diane 8:30 e re naya lesedi ka kamano eo: “Foo ke [Jesu] ne ke le fa thoko ga gagwe [Jehofa Modimo] ke le modiri yo o setswerere, mme ka nna yo o neng a ratwa ke ene ka tsela e e kgethegileng letsatsi le letsatsi, ke itumela fa pele ga gagwe ka dinako tsotlhe.” Go ne go se na pelaelo mo tlhaloganyong ya ga Jesu gore Jehofa o ne a mo ‘rata ka tsela e e kgethegileng.’ Mme Jesu ga a ka a fitlha ka fa a neng a itumelela ka teng go bereka fa thoko ga ga Rraagwe. Go molemo tota fa go na le kamano e e lorato le ya go buisana fa gare ga bagolwane ba Bakeresete le bao ba ba thapisang!

Lebaka la bobedi le Jesu a le umakileng ke gore Rara “o mmontsha dilo tsotlhe tse ene ka boene a di dirang.” Mafoko ano a tlhomamisa se se bolelwang mo go Diane 8:30, e leng gore Jesu o ne a le “fa thoko” ga ga Jehofa fa go ne go bopiwa lobopo. (Genesise 1:26) Bagolwane ba ka latela sekao seo se se molemo ka go bereka mmogo ba le gaufi le batlhanka ba bodiredi, ba ba bontsha kafa ba ka dirang ditiro tsa bone ka tsela e e botswerere ka teng. Le fa go ntse jalo, batlhanka ba bodiredi ba ba sa tswang go tlhongwa ga se bone fela ba ba tlhokang go tswelela ba thapisiwa. Go tweng ka bakaulengwe ba ba ikanyegang ba ba sa bolong go nna ba kgaratlhela tiro ya bolebedi ka dingwaga tse dintsi mme ba ise nke ba tlhongwe? (1 Timotheo 3:1) Bagolwane ba tshwanetse go  naya banna ba ba ntseng jalo kgakololo e e maleba gore ba tle ba itse gore ba tokafatse fa kae.

Ka sekai, motlhanka wa bodiredi o ka tswa a ikanyega, a dira dilo ka nako e bile a le matlhagatlhaga fa a dira ditiro tse a di neilweng. Gape o ka tswa a le morutisi yo o molemo. O ka tswa a dira tiro e e molemo thata ka ditsela tse di farologaneng mo phuthegong. Le fa go ntse jalo, o ka tswa a sa lemoge gore o na le go nna makgwakgwa fa a dirisana le Bakeresete ka ene. Bagolwane ba tshwanetse go bontsha “bori jo e leng jwa botlhale.” (Jakobe 3:13) A go tla bo go se molemo gore mogolwane a bue le motlhanka yoo wa bodiredi, a mmolelele ka phepafalo gore bothata ke eng, a mo neye dikai tse di maleba, mme a mo neye dikakantsho tse di utlwalang tsa kafa a ka tokafatsang ka teng? Fa mogolwane ka kelotlhoko a ‘loka kgakololo ya gagwe ka letswai,’ se a se buileng se tshwanetse sa amogelwa sentle. (Bakolosa 4:6) Mme gone, motlhanka wa bodiredi o tla dira gore tiro ya mogolwane e nne motlhofo ka go nna le moya o montle le go amogela kgakololo nngwe le nngwe e a e newang.—Pesalema 141:5.

Mo diphuthegong tse dingwe, bagolwane ba thapisa batlhanka ba bodiredi ka metlha le ka tsela e e nang le matswela. Ka sekai, ba tsamaya le batlhanka ba bodiredi ba ba tshwanelegang fa ba etela balwetse kgotsa batsofe. Ka tsela eno batlhanka ba bodiredi ba bapala boitemogelo mo tirong ya bodisa. Mme gone, go na le dilo tse dintsi tse motlhanka wa bodiredi a ka di dirang gore a gatele pele semoyeng.—Bona lebokose le le fa tlase le le nang le setlhogo se se reng “Se Batlhanka ba Bodiredi Ba ka Se Dirang.”

Lebaka la boraro le le neng le dira gore tsela e Jesu a neng a thapisiwa ka yone e nne le matswela ke gore Jehofa o ne a mo thapisa a akantse ka kgatelopele ya mo isagweng. Jesu o ne a bolela gore Rara o ne a tla bontsha Morwa “ditiro tse di fetang tseno.” Maitemogelo a Jesu a ileng a a bapala fa a ne a le mo lefatsheng a ne a mo thusa gore a kgone go nna le dinonofo tse a neng a tla di tlhoka gore a dire dikabelo tsa gagwe tsa mo isagweng. (Bahebera 4:15; 5:8, 9) Ka sekai, Jesu o tloga a amogela kabelo e e bokete tota—ya go tsosa le go atlhola dimilione tse di diketekete tsa batho ba jaanong ba suleng!—Johane 5:21, 22.

Gompieno fa bagolwane ba thapisa batlhanka ba bodiredi, ba tshwanetse gore ba bo ba akantse ka dilo tse di tla tlhokegang mo isagweng. Le fa go ka lebega go na le bagolwane le batlhanka ba bodiredi ba ba lekaneng go tlhokomela se se tlhokegang ka nako eo, a ba tla bo ba ntse ba lekane fa go tlhongwa phuthego e ntšha? Fa go tlhongwa diphuthego di le mmalwa? Mo dingwageng tse tharo tse di fetileng, go nnile le diphuthego di feta 6 000 tse disha lefatshe ka bophara. Go tlhokega palo e kgolo thata ya bagolwane le batlhanka ba bodiredi gore ba tlhokomele diphuthego tseo tse disha!

Bagolwane, a lo latela sekao sa ga Jehofa ka go nna le kamano e e lorato le banna ba lo ba thapisang? A lo ba bontsha gore ba dire tiro ya bone jang? A lo akantse ka se se tla tlhokegang mo isagweng? Go latela sekao sa ga Jehofa fa a ne a thapisa Jesu go tla felela ka masego a magolo mo go ba bantsi.

 Lo se Ka Lwa Tshaba go Naya ba Bangwe Maikarabelo

Bagolwane ba ba nang le bokgoni ba ba tlwaetseng go dira dikabelo tse dintsi tse di bokete ba ka nna ba se ka ba rata go naya ba bangwe taolo. Ba ka tswa ba kile ba leka go dira jalo mo nakong e e fetileng mme dilo tsa se ka tsa tsamaya sentle. Ka jalo ba ka nna ba nna le boikutlo jwa gore, ‘Fa o batla gore tiro e dirwe sentle, o tshwanetse gore o e dire ka bowena.’ A mme boikutlo jono bo tsamaisana le thato ya ga Jehofa, jaaka e bolelwa mo Dikwalong, gore banna ba ba se nang maitemogelo a a kalo ba thapisiwe ke ba ba nang le maitemogelo a magolwane?—2 Timotheo 2:2.

Moaposetoloi Paulo o ne a swabisiwa ke gore mongwe wa batho ba a neng a tsamaya le bone, Johane Mareko, o ne a tlogela kabelo ya gagwe kwa Pamfilia mme a boela gae. (Ditiro 15:38, 39) Le fa go ntse jalo, Paulo ga a ka a letla poelomorago eo gore e mo kgobe marapo gore a se ka a thapisa ba bangwe. O ne a tlhopha mokaulengwe yo mongwe yo mmotlana, Timotheo, mme a mo thapisa mo tirong ya borongwa. * (Ditiro 16:1-3) Kwa Berea barongwa ba ne ba ganediwa setlhogo mo e leng gore go ne go se na thuso gore Paulo a tswelele a nna teng. Ka jalo o ne a tlogela phuthego e ntšha mo tlhokomelong ya ga Silase, mokaulengwe yo o godileng sentle yo mogolwane, le Timotheo. (Ditiro 17:13-15) Ga go na pelaelo gore Timotheo o ne a ithuta dilo tse dintsi mo go Silase. Moragonyana fa Timotheo a ne a siametse go amogela maikarabelo a a oketsegileng, Paulo o ne a mo romela kwa Thesalonika gore a ye go kgothatsa phuthego ya teng.—1 Bathesalonika 3:1-3.

Kamano fa gare ga Paulo le Timotheo e ne e se fela ya go dira tiro, e e se nang lorato, kgotsa e e se nang kamego ya botho. Ba ne ba na le kamano ya lorato magareng ga bone. Fa Paulo a ne a kwalela phuthego e e kwa Korintha, o ne a bua ka Timotheo, yo a neng a ikaeletse go mo romela teng, a re ke “ngwanake yo o rategang le yo o ikanyegang mo Moreneng.” O ne a oketsa ka go re: “[Timotheo] o tla lo gopotsa mekgwa ya me ka ga Keresete Jesu.” (1 Bakorintha 4:17) Timotheo o ne a amogela thapiso e a neng a e newa ke Paulo, a ba a tshwanelega go diragatsa dikabelo tsa gagwe. Bakaulengwe ba bantsi ba babotlana ba ile ba nna batlhanka ba bodiredi ba ba nang le bokgoni, bagolwane, kgotsa balebedi ba ba etang ka gonne ba ile ba solegelwa molemo ke go thapisiwa ke banna ba bagolwane ba ba amegang ka bone ba ba neng ba ba kgatlhegela ka tsela ya mmatota, jaaka Paulo a ne a dira ka Timotheo.

Bagolwane, Thapisang ba Bangwe!

Kwantle ga pelaelo, boporofeti jo bo mo go Isaia 60:22 bo a diragadiwa gompieno. Jehofa o dira ‘yo mmotlana setšhaba se se thata.’ Gore setšhaba seo se nne se le “thata,” se tshwanetse go bo se rulagantswe sentle. Bagolwane, ke ka ntlha yang fa lo sa sekaseke ditsela tse ka tsone go ka thapisiwang banna ba ba ineetseng ba ba tshwanelegang go thapisiwa? Tlhomamisang gore motlhanka mongwe le mongwe wa bodiredi o itse sentle gore o tshwanetse go tokafatsa fa kae gore a kgone go gatela pele. Mme lona bakaulengwe ba ba kolobeditsweng, lo soleng molemo tlhokomelo epe ya botho e lo e newang. Solang molemo ditshono tsa go oketsa bokgoni jwa lona, kitso le boitemogelo. Eleruri Jehofa o tla segofatsa thulaganyo e e ntseng jalo ya thuso e e lorato.—Isaia 61:5.

[Ntlha e e kwa tlase]

[Lebokoso mo go tsebe 30]

Se Batlhanka ba Bodiredi Ba ka Se Dirang

Le fa bagolwane ba tshwanetse go thapisa batlhanka ba bodiredi, go na le dilo tse dintsi tse batlhanka ba bodiredi ba ka di dirang go oketsa kgatelopele ya bone ya semoya.

—Batlhanka ba bodiredi ba tshwanetse go dira ka tlhoafalo le go nna batho ba ba ka ikanngwang fa ba diragatsa dikabelo tsa bone. Gape ba tshwanetse go nna le mekgwa e mentle ya go ithuta. Ka selekanyo se segolo, kgatelopele ya bone e ikaegile ka go ithuta le go dirisa dilo tse ba di ithutileng.

—Fa motlhanka wa bodiredi a baakanyetsa go baya polelo mo pokanong ya Bokeresete, ga a tshwanela go okaoka go botsa mogolwane yo o nang le bokgoni gore a mo neye dikakantsho tsa kafa a ka bayang polelo ya gagwe ka teng.

—Motlhanka wa bodiredi gape o ka nna a kopa mogolwane mongwe gore a lebelele kafa a bayang puo ya Baebele ka teng mme a mo neye kgakololo ya kafa a ka tofakatsang ka teng.

Batlhanka ba bodiredi ba tshwanetse go batla, go amogela le go dirisa kgakololo ya bagolwane. Ka tsela eno, botswelelopele jwa bone bo tla ‘bonatshega mo bathong botlhe.’—1 Timotheo 4:15.