Ikanye Jehofa—Modimo yo e Leng wa Mmatota

A o kile wa leba loapi bosigo go se na maru mme wa bona dinaledi tse dintsintsi? O akanya gore di tswa kae?

MO TIDIMALONG ya bosigo dinaledi di ne tsa bua le Kgosi Dafide wa Iseraele wa bogologolo, di mo tlhotlheletsa go kwala jaana: “Magodimo a bolela kgalalelo ya Modimo; mme phuthologo e bolela tiro ya diatla tsa gagwe.” (Pesalema 19:1) Ee, Mmopi, e seng popo, ke ene yo tshwanelwang ke “go amogela kgalalelo le tlotlo le maatla.”—Tshenolo 4:11; Baroma 1:25.

Baebele ya re: “Yo o agileng dilo tsotlhe ke Modimo.” (Bahebera 3:4) Ebu, Modimo wa boammaaruri, ‘yo leina la gagwe e leng Jehofa, ke Mogodimodimo yo o okametseng lefatshe lotlhe.’ (Pesalema 83:18) Mme ga se sengwe se e seng sa boammaaruri—se se jaaka moenene. Jesu Keresete o ne a bolela jaana malebana le Rraagwe wa selegodimo, Jehofa: “Yo o nthomileng ke wa mmatota.”—Johane 7:28.

Jehofa—Modiragatsi wa Maikaelelo a Gagwe

Leina la Modimo le le sa tshwaneng le lepe, la Jehofa, le tlhaga ka makgetlo a a ka nnang 7 000 mo Dikwalong Tsa Sehebera fela. Lone leina leo le supa gore ke wa mmatota. Leina la Modimo tota le raya “O Dira Gore go Diragale.” Ka tsela eo Jehofa Modimo o itlhalosa e le Modiragatsi wa maikaelelo a gagwe. Fa Moshe a ne a botsa Modimo gore leina la gagwe ke mang, Jehofa o ne a tlhalosa bokao jwa leina la gagwe ka tsela eno: “Ke tla nna se ke tla nnang sone.” (Ekesodo 3:14) Thanolo ya ga Rotherham e tlhalosa jaana ka tlhamalalo: “Ke tla nna sengwe le sengwe se ke ratang go nna sone.” Jehofa o nna se a batlang go nna sone kana se a tlhophang go nna sone, mo go sengwe le sengwe se se tlhokegang go diragatsa maikaelelo a gagwe le ditsholofetso tsa gagwe tse di siameng. Ka gone, o na le direto tse dintsi, tse di jaaka Mmopi, Rre, Morena Molaodimogolo, Modisa, Jehofa wa masomosomo, Moutlwi wa thapelo, Moatlhodi, Motlhatlheledi yo Mogolo, Morekolodi.—Baatlhodi 11:27; Pesalema 23:1; 65:2; 73:28; 89:26; Isaia 8:13; 30:20; 40:28; 41:14.

Ke Modimo wa boammaaruri fela yo o ka bidiwang ka leina la Jehofa, ka gonne batho ba ka se ka le ka motlha ba tlhomamisega gore maikaelelo a bone a tla atlega. (Jakobe 4:13, 14) Ke Jehofa a le esi yo o ka bolelang jaana: “Fela jaaka pula e e nang e fologa, le kapoko, e tswa kwa magodimong mme e sa boele kwa lefelong leo, mme e kolobetsa lefatshe e dira gore le tlhagise maungo le bo le tlhogise, mme mojadi a newe peo le moji a newe senkgwe, lefoko la me le le tswang mo molomong wa me le tla nna fela jalo. Ga le kitla le boela mo go nna le se na matswela, ruri le tla dira selo se se intumedisang, ruri le tla atlega mo go se ke le rometseng kwa go sone.”—Isaia 55:10, 11.

Jehofa o diragatsa maikaelelo a gagwe ka tlhomamo jaana mo e leng gore tota le se se bonalang se ka se direge mo matlhong a batho mo go ene se tla direga. Nako e telele morago ga gore Aborahame, Isake, le Jakobe ba swe, Jesu o ne a ba umaka mme a bolela jaana: “[Jehofa] ke Modimo, e seng wa baswi, mme wa batshedi gonne botlhe ba a tshela mo go ene.” (Luke 20:37, 38) Ditlhogo  tseno tse tharo tsa lotso tse di ikanyegang di ne di sule, mme boikaelelo jwa Modimo jwa go ba tsosa bo ne bo tlhomamisegile jaana mo e leng gore mo go ene go ne go tshwana le go re ba a tshela. Go dira gore batlhanka bano ba ba ikanyegang ba bogologolo ba boe ba tshele gape ga go boima mo go Jehofa fela jaaka go ne go se go boima go bopa monna wa ntlha go tswa mo leroleng lwa mmu.—Genesise 2:7.

Moaposetoloi Paulo o neela sekai se sengwe sa go bontsha gore Modimo o dira gore se a se ikaeletseng se diragale. Mo Dikwalong, Aborahame o bidiwa “rre wa ditšhaba di le dintsi.” (Baroma 4:16, 17) Ka nako ya fa Aborame a ne a se na ngwana, Jehofa o ne a fetola leina la gagwe gore e nne Aborahame, mo go rayang “Rre wa Boidiidi (Matshutitshuti).” Jehofa o ne a dira gore bokao jwa leina leo bo diragale ka go dira gore ka tsela ya kgakgamatso maatla a go tshola bana a ga Aborahame yo o tsofetseng le mosadi wa gagwe Sara, a dire gape.—Bahebera 11:11, 12.

E re ka Jesu Keresete a ne a filwe maatla le taolo e kgolo, o ne a bua dilo tse di tla diragalang a bua go ya ka pono e e fetang ya batho thata. Le mororo tsala e kgolo ya ga Jesu, Lasaro a ne a sule, o ne a raya barutwa ba gagwe a re: “Lasaro tsala ya rona o ile go ikhutsa, mme ke tsaya loeto go ya gone go mo tsosa mo borokong.” (Johane 11:11) Ke eng fa Jesu a ne a bua ka monna yo o suleng a re o robetse fela?

Fa Jesu a fitlha kwa nagagaeng ya gaabo Lasaro kwa Bethani, o ne a ya kwa lebitleng la gagwe mme a laela gore leje le ntshiwe mo botsenong jwa lone. Fa a sena go rapelela kwa godimo, o ne a laela jaana: “Lasaro, tswa!” Mme fa babogedi ba ntse ba tlhomile matlho mo lebitleng, “monna yo o neng a sule a tswa, dinao tsa gagwe le diatla di hapilwe ka dihapi, mme sefatlhego sa gagwe se ne se bofilwe gotlhe ka letsela.” Morago ga foo Jesu o ne a re: “Mmofololeng lo mo lese a tsamaye.” (Johane 11:43, 44) Jesu o ne a tsosa Lasaro—a dira gore monna yo o neng a sule ka malatsi a le manè a tshele gape! Keresete o ne a sa sokamise boammaaruri fa a ne a re tsala ya gagwe e robetse. Go ya ka Jehofa le Jesu, go ne go ntse fela jaaka e kete Lasaro yo o suleng o robetse. Ee, Jesu le Rraagwe wa selegodimo ba tlhokomela ka dilo tse e leng tsa mmatota.

Jehofa a ka Dira Gore Ditsholofelo Tsa Rona di Diragale

A bo medingwana e e tsietsang e farologana thata jang ne le Modimo wa mmatota! Baobamedi ba medingwana ka phoso ba tlotlomatsa dilo tse ba di obamelang ka gore di na le maatla a a fetang a batho. Le fa go ntse jalo, ga go na tlotlo epe e e ka dirang gore medingwana eno e nne le bokgoni jwa go dira dikgakgamatso. Kafa letlhakoreng le lengwe, Jehofa Modimo o kgona go bua ka tshwanelo ka batlhanka ba gagwe ba ba sa bolong go swa jaaka e kete ba sa ntse ba tshela, ka gonne o kgona go ba naya botshelo gape. “Jehofa ke Modimo ka boammaaruri,” mme le ka motlha ga a ke a tsietsa batho ba gagwe.—Jeremia 10:10.

A bo go gomotsa jang ne go itse gore ka nako e Jehofa a e beileng, baswi ba ba mo mogopolong wa gagwe ba tla tsosiwa—ba tshela gape! (Ditiro 24:15) Ee, tsogo ya baswi e akaretsa gore motho a busediwe mokgwa wa gagwe wa go tshela. Go gakologelwa mekgwa ya batho ba ba suleng le go ba tsosa ga se bothata mo Mmoping, yo o nang le botlhale le maatla a a sa feleng. (Jobe 12:13; Isaia 40:26) E re ka Jehofa a na le lorato lo logolo, o tla dirisa mogopolo wa gagwe o o itekanetseng go tsosa baswi gore ba tshele mo lefatsheng la paradaise ba na le botho jo ba neng ba na le jone pele ga ba swa.—1 Johane 4:8.

 Jaaka fa bokhutlo jwa lefatshe la ga Satane bo ntse bo atamela, isagwe ya batho ba ba ikanyang Modimo wa boammaaruri e ntle tota. (Diane 2:21, 22; Daniele 2:44; 1 Johane 5:19) Mopesalema o re tlhomamisetsa jaana: “Mo lobakanyaneng fela, moikepi o tla bo a sa tlhole a le teng; . . . mme ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso.” (Pesalema 37:10, 11) Bokebekwa le thubakanyo e tla nna dilo tsa nako e e fetileng. Go tla nna le tshiamiso, mme mathata a tsa ikonomi a tla bo a sa tlhole a le gone. (Pesalema 37:6; 72:12, 13; Isaia 65:21-23) Metlhala yotlhe ya go tlhaolwa ka ntlha ya maemo, setso, bomorafe e tla bo e phimotswe. (Ditiro 10:34, 35) Dintwa le dibetsa tsa ntwa di tla bo di sa tlhole di le gone. (Pesalema 46:9) Ka nako eo “ga go na monni ope yo o tla reng: ‘Ke a bobola.’” (Isaia 33:24) Mongwe le mongwe o tla bo a na le botsogo jo bo molemo le jo bo itumedisang. (Tshenolo 21:3, 4) Paradaise ya mo lefatsheng e tla tloga e nna selo sa mmatota. Jehofa o ikaeletse go dira jalo!

Ee, ditsholofetso tsotlhe tse di theilweng mo Baebeleng di tla tloga di diragadiwa. Ke eng fa re tshwanetse go letla gore re tsiediwe ke dilo tse batho ba di obamelang mo lefatsheng ntswa re ka kgona go ikanya Jehofa ka botlalo? Ke thato ya gagwe gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Timotheo 2:3, 4) Go na le gore re dirise nako ya rona le dithoto tsa rona mo dilong tse e seng tsa boammaaruri kana tse di tshwanang fela le moenene, tsa tsamaiso eno ya dilo le medimo ya yone, a re godiseng kitso ya rona ka Modimo yo e leng wa mmatota mme re mo ikanye ka pelo ya rona yotlhe.—Diane 3:1-6; Johane 17:3.

[Setshwantsho mo go tsebe 6]

Go ya ka Jehofa le Jesu, Lasaro o ne a ithobaletse fela

[Ditshwantsho mo go tsebe 7]

Paradaise ya mo lefatsheng e tla tloga e nna selo sa mmatota