Ke Eng se se Tlhokegang go Nna le Segakolodi se se Phepa?

“PUSO e Laelwa go Amogela R$20,000.” Setlhogo seno se se sa tlwaelegang se ile sa tlhaga bosheng jaana mo lokwalodikgannyeng lwa kwa Brazil e leng Correio do Povo. Setlhogo seo se ne se tlhalosa kgang ya ga Luiz Alvo de Araújo, modiri wa poso ya koo yo o neng a rekiseditse puso setsha. Fa Luiz a sena go saena ditlankana tsa go rekisa setsha sa gagwe, o ne a gakgamala fa a lemoga gore o duetswe R$20,000 (mo e ka nnang R70 000) go feta tlhwatlhwa e go neng go dumalanwe ka yone!

Go busa madi ao a a fetileng selekanyo go ne go se motlhofo jaaka fa o ne o ka akanya. Morago ga gore Luiz a etele maphata a puso ka makgetlo a sekae mme go sa mo thuse sepe, o ne a gakololwa gore a hire mmueledi mme a baakanye bothata ka kgotlatshekelo. Moatlhodi yo o neng a atlhola puso gore e amogele madi ao le gore e duelele ditshenyegelo tsa tsheko o ne a akgela jaana: “Go bonala mongwe a ile a dira phoso, mme ka ntlha ya go raraana ga dithulaganyo tsa puso tse di tsayang lobaka lo loleele go ne go se ope yo o neng a itse gore kgang e ka rarabololwa jang. Ke la ntlha ke bona kgetsi e e ntseng jaana.”

Luiz, yo e leng mongwe wa Basupi ba ga Jehofa, o tlhalosa jaana: “Segakolodi sa me se se thapisitsweng ka Baebele se ne se ka se ntetle go tsaya madi a e seng a me. Ke ne ke tshwanetse go leka go busa madi ao.”

Batho ba le bantsi ba ne ba ka akanya gore boikutlo jo bo ntseng jalo ga bo a tlwaelega kana gore ga bo tlhaloganyesege. Mme Lefoko la Modimo le bontsha gore Bakeresete ba boammaaruri ba tseela go nna le segakolodi se se phepa kwa godimo thata fa ba dirisana le balaodi. (Baroma 13:5) Basupi ba ga Jehofa ba ikemiseditse go boloka ‘segakolodi se se ikanyegang le go itshwara ka boikanyegi mo dilong tsotlhe.’—Bahebera 13:8.