“Atamelang Modimo”
“Atamelang Modimo”
“Atamelang Modimo, mme o tla lo atamela.”—JAKOBE 4:8.
1, 2. (a) Gantsi batho ba dira maiphako afe? (b) Jakobe o ne a naya kgothatso efe, mme ke ka ntlha yang fa e ne e tlhokega?
“MODIMO o na le rona.” Ditshwantshetso tsa setšhaba tota le diaparo tsa masole di kgabisitswe ka mafoko ao. Mafoko a a reng “Re ikanya Modimo” a gabilwe mo mading a le mantsintsi a gompieno a tshipi e bile a kwadilwe le mo mading a pampiri. Go tlwaelegile gore batho ba bolele gore ba na le kamano e e gaufi le Modimo. Le fa go ntse jalo, a ga o dumalane le ntlha ya gore tota go nna le kamano e e ntseng jalo ga se kgang ya go bua ka gone fela kgotsa go kwala mafoko mangwe a moono mo a ka bonwang ke batho botlhe?
2 Baebele e bontsha gore go a kgonega gore motho a nne le kamano le Modimo. Le fa go ntse jalo, go tlhokega boiteko. Tota le Bakeresete bangwe ba ba tloditsweng mo lekgolong la ntlha la dingwaga ba ne ba tlhoka go nonotsha kamano ya bone le Jehofa Modimo. Molebedi wa Mokeresete e bong Jakobe o ne a tshwanelwa ke go tlhagisa bangwe malebana le ditshekamelo tsa bone tsa senama le go bo ba sa tlhole ba le phepa semoyeng. O ne a ba naya kgothatso eno e e maatla fa a ne a ba gakolola: “Atamelang Modimo, mme o tla lo atamela.” (Jakobe 4:1-12) Jakobe o ne a kayang fa a re “atamelang”?
3, 4. (a) Polelwana e e reng “atamelang Modimo” e ka tswa e ile ya dira gore bangwe ba babadi ba lokwalo lwa ga Jakobe ba lekgolo la ntlha la dingwaga ba gakologelwe eng? (b) Ke ka ntlha yang fa re ka tlhomamisega gore re ka kgona go atamela Modimo?
3 Jakobe o ne a dirisa polelwana e batho ba le bantsi ba ba neng ba tla bala lokwalo lwa gagwe ba neng ba e tlwaetse. Molao wa ga Moshe o ne o naya baperesiti ditaelo tse di rileng malebana le kafa ba neng ba ka ‘atamela’ Jehofa mo boemong jwa setšhaba sa gagwe ka teng. (Ekesodo 19:22) Ka jalo, babadi ba lokwalo lwa ga Jakobe ba ka tswa ba ile ba gakololwa gore go atamela Jehofa ga se kgang e e ka tsewang motlhofo. Jehofa ke motho yo o tlotlegang go gaisa botlhe mo lobopong.
4 Ka fa letlhakoreng le lengwe, jaaka mokanoki mongwe wa Baebele a bolela, “kgothatso [e e mo go Jakobe 4:8] e bontsha boikutlo jo bo nonofileng jwa go nna le tsholofelo.” Jakobe o ne a itse gore Jehofa ga a bolo go nna a laletsa batho ba ba sa itekanelang gore ba atamalane le Ene. (2 Ditiragalo 15:2) Setlhabelo sa ga Jesu se dirile gore batho ba kgone go atamela Jehofa ka tsela e kgolwane. (Baefeso 3:11, 12) Gompieno, batho ba le dimilione di le dintsintsi ba ka kgona go atamela Modimo! Le fa go ntse jalo, re ka dirisa jang thulaganyo eno e e molemolemo? Re tlile go sekaseka ka bokhutshwane ditsela di le tharo tse re ka kgonang go atamalana le Jehofa Modimo ka tsone.
Tswelelang lo “Tsenya Kitso” ka Modimo
5, 6. Sekao sa ga Samuele yo mmotlana se bontsha jang gore go “tsenya kitso” ka Modimo go akaretsa eng?
5 Go ya ka Johane 17:3, Jesu o ne a re: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.” Dithanolo di le dintsi tsa temana eno di farologana go sekae le Thanolo ya Lefatshe le Lesha. Mo boemong jwa go re “go tsenya kitso” ka Modimo, di dirisa fela lediri “go itse” Modimo. Le fa go ntse jalo, bakanoki ba le bantsi ba bolela gore bokao jwa lefoko le le neng le dirisiwa mo Segerikeng sa ntlhantlha bo akaretsa sengwe se se fetang seo—kgato e e tswelelang pele, e e ka nnang ya ba ya felela ka gore motho a nne le kamano e e gaufi le yo mongwe.
6 Go itse Modimo ka tsela e e gaufiufi e ne e se kgopolo e ntšha mo motlheng wa ga Jesu. Ka sekai, mo Dikwalong Tsa Sehebera, re bala gore fa Samuele a ne a sa ntse a le mmotlana “o ne a ise a itse Jehofa.” (1 Samuele 3:7) A seno se ne se raya gore Samuele o ne a itse go le gonnye fela ka Modimo wa gagwe? Nnyaa. Batsadi ba gagwe le baperesiti ba tshwanetse ba bo ba ile ba mo ruta go le gontsi. Le fa go ntse jalo, go ya ka mokanoki mongwe, lefoko la Sehebera le le dirisitsweng mo temaneng eo le ka “dirisediwa go kaya go itse mongwe ka tsela e e gaufiufi.” Samuele o ne a ise a itse Jehofa ka tsela e e gaufiufi, jaaka a ne a tla mo itse moragonyana e le mmueledi wa ga Jehofa. Fa Samuele a ntse a gola, o ne a simolola go itse Jehofa tota, a nna le kamano e e gaufiufi le ene.—1 Samuele 3:19, 20.
7, 8. (a) Ke ka ntlha yang fa re sa tshwanela go kgobiwa marapo ke dilo tse di boteng tse Baebele e di rutang? (b) Dingwe tsa dithuto tse di boteng tsa boammaaruri jo bo leng mo Lefokong la Modimo tse re tshwanetseng go di ithuta ke dife?
7 A o tsenya kitso ka ga Jehofa gore o tle o mo itse ka tsela e e gaufiufi? Gore o kgone go dira jalo, o tshwanetse go ‘tlhologelelwa’ dijo tsa semoya tse Modimo a re di nayang. (1 Petere 2:2) O se ka wa kgotsofalela go itse dithuto tsa motheo fela. Leka go ithuta dingwe tsa dilo tse di boteng tse Baebele e di rutang. (Bahebera 5:12-14) A o kgobiwa marapo ke dithuto tseno, o tsaya gore di thata go tlhaloganngwa? Fa go ntse jalo, gakologelwa gore Jehofa ke “Motlhatlheledi yo Mogolo.” (Isaia 30:20) O itse kafa a ka senolelang batho ba ba sa itekanelang dithuto tse di boteng tsa boammaaruri ka teng. Mme a ka go segofatsa fa o iteka ka bopeloephepa go tlhaloganya se a se go rutang.—Pesalema 25:4.
8 Ke eng fa o sa itlhatlhobe malebana le dingwe tsa “dilo tse di boteng tsa Modimo”? (1 Bakorintha 2:10) Tseno ga se dikgang tse di sa kgatlheng jaaka tse baithutabodumedi le baruti ba ka ganetsanang ka tsone. Ke dithuto tse di tletseng botshelo tse di re nayang lesedi malebana le dikakanyo le maikutlo a Rraarona yo o lorato. Ka sekai, thekololo, ‘sephiri se se boitshepo’ le dikgolagano tse di farologaneng tse Jehofa a di dirisitseng go segofatsa batho ba gagwe le go diragatsa maikaelelo a gagwe—dikgang tseno le tse dingwe tse dintsi tse di tshwanang le tsone ke dikgang tse di itumedisang le tse di solegelang molemo thata tse motho a ka batlisisang le go ithuta ka tsone a le esi.—1 Bakorintha 2:7.
9, 10. (a) Ke eng fa go ikgogomosa go le kotsi, mme ke eng se se tla re thusang gore re se ka ra ikgogomosa? (b) Mo kgannyeng ya go nna le kitso ka ga Jehofa, ke ka ntlha yang fa re tshwanetse go leka go ikokobetsa?
9 Fa o ntse o oketsa kitso ya gago ya dithuto tse di boteng tsa boammaaruri, ela tlhoko kotsi e e ka nnang teng fa o na le kitso—go ikgogomosa. (1 Bakorintha 8:1) Go ikgogomosa go kotsi ka gonne go tlhoboganya batho le Modimo. (Diane 16:5; Jakobe 4:6) Gakologelwa gore ga go na motho ope yo o nang le lebaka la go ikgogomosa ka go bo a na le kitso. Go tshwantsha, akanya ka mafoko ano a ketapele ya buka e e tlhalosang dilo tse batho ba gatetseng pele mo go tsone bosheng jaana mo go tsa saense: “Fa re tswelela re nna le kitso e e oketsegileng, re lemoga gore ga re itse sepe se se kalo. . . . Sengwe le sengwe se re se ithutileng ga se sepe fa se bapisiwa le se re sa ntseng re tlhoka go se ithuta.” Go a kgatlha go bona boikokobetso jo bo ntseng jalo jo bo sa tlwaelegang. Jaanong, mo kgannyeng ya go nna le kitso e kgolo go di feta tsotlhe—kitso ka ga Jehofa Modimo—re na le lebaka le legolo le go feta la go nna re ikokobeditse. Ka ntlha yang?
10 Ela tlhoko dipolelwana dingwe tse di mo Baebeleng tse di buang ka ga Jehofa. “Dikakanyo tsa gago di boteng thata.” (Pesalema 92:5) “Tlhaloganyo ya [ga Jehofa] e ka se ka ya anelwa.” (Pesalema 147:5) “Tlhaloganyo ya [ga Jehofa] ga e ka ke ya hukudiwa.” (Isaia 40:28) “A boteng jwa dikhumo tsa Modimo le botlhale le kitso!” (Baroma 11:33) Go bonala sentle gore ga re kitla re tsamaya re itse dilo tsotlhe ka ga Jehofa. (Moreri 3:11) O re rutile dilo di le dintsi tse di gakgamatsang, mme go tla nna go na le dilo tse dintsi thata tse re ka di ithutang. A ga re fitlhele go kgatlha e bile go dira gore re ikokobetse go itse gore re sa ntse re tla ithuta go le gontsi? Ka jalo, fa re ntse re ithuta, a re diriseng kitso ya rona ka metlha jaaka sengwe se se ka re thusang go atamalana le Jehofa le go thusa ba bangwe go dira jalo—e seng jaaka sengwe se re ka se dirisetsang go ikgogomosetsa ba bangwe ka sone.—Mathaio 23:12; Luke 9:48.
Bontsha ka Ditiro Gore o Rata Jehofa
11, 12. (a) Kitso e re e tsenyang ka ga Jehofa e tshwanetse go re ama jang? (b) Ke eng se se bontshang gore motho o rata Modimo ka lorato lwa mmatota?
11 Go a tshwanela go bo moaposetoloi Paulo a ne a amanya kitso le lorato. O ne a kwala jaana: “Seno ke se ke tswelelang ke se rapelela, gore lorato lwa lona lo tote fela thata ka kitso ya boammaaruri le temogo e e tletseng.” (Bafilipi 1:9) Thuto nngwe le nngwe e e botlhokwa ya boammaaruri e re e ithutang ka ga Jehofa le maikaelelo a gagwe e tshwanetse go godisa lorato lo re ratang Rraarona yo o kwa legodimong ka lone go na le go dira gore re ikgogomose.
12 Ke boammaaruri gore batho ba le bantsi ba ba bolelang gore ba rata Modimo, tota ga ba mo rate. Ba ka tswa ba na le maikutlo a gore tota ba rata Modimo. Go siame go nna le maikutlo a a ntseng jalo, fa fela a tsamaisana le kitso ya boammaaruri. Mme one ka boone ga a bolele gore motho o rata Modimo ka lorato lwa mmatota. Ka ntlha yang? Ela tlhoko kafa Lefoko la Modimo le tlhalosang lorato loo ka teng: “Seno ke se lorato lwa Modimo lo se kayang, gore re boloke ditaelo tsa gagwe.” (1 Johane 5:3) Ka jalo, motho a ka rata Jehofa ka lorato lwa mmatota fa fela a lo bontsha ka ditiro tsa go nna kutlo.
13. Go boifa Modimo go ka re thusa jang go bontsha kafa re ratang Jehofa ka teng?
13 Poifo ya bomodimo e tla re thusa gore re ikobele Jehofa. Re kgona go sisimoga Jehofa le go mo tlotla ka tsela eno e kgolo fa re tsenya kitso ka ga gagwe, re ithuta ka dinonofo tsa gagwe tse di se nang selekanyo tse di jaaka boitshepo jwa gagwe, kgalalelo, maatla, tshiamiso, botlhale le lorato lwa gagwe. Poifo e e ntseng jalo e ka re thusa thata gore re atamalane le ene. Tota e bile, ela tlhoko se Pesalema 25:14 e se bolelang: “Go atamalana thata le Jehofa ke ga ba ba mmoifang.” Ka jalo, fa re boifa ka tsela e e siameng go utlwisa Rraarona yo o kwa legodimong botlhoko, re ka kgona go atamalana le ene. Poifo ya bomodimo e tla re thusa go tsaya tsia kgakololo eno e e kwadilweng mo go Diane 3:6: “Mo tseye tsia mo ditseleng tsotlhe tsa gago, mme o tla tlhamalatsa ditselana tsa gago.” Seno se kayang?
14, 15. (a) Dingwe tsa ditshwetso tse re tshwanetseng go di dira letsatsi le letsatsi ke dife? (b) Re ka dira ditshwetso jang ka tsela e e bontshang gore re boifa Modimo?
14 O tshwanetse go dira ditshwetso letsatsi le letsatsi, tse dikgolo le tse dinnye. Ka sekai, o tlile go nna le motlotlo o o ntseng jang le batho ba o berekang le bone, ba o tsenang sekolo le bone, le baagelani ba gago? (Luke 6:45) A o tla dira tiro e o e filweng ka natla, kgotsa a o tla batla ditsela tsa go e wetsa o sa e tseela matsapa? (Bakolosa 3:23) A o tla tsalana le batho ba ba sa rateng Jehofa go le kalo kgotsa ba ba sa mo rateng gotlhelele, kgotsa a o tla leka go nonotsha kamano ya gago le batho ba ba ratang dilo tsa semoya? (Diane 13:20) O tla dira eng gore o kgone go baya kwa pele dilo tse di direlwang Bogosi Jwa Modimo, le fa e ka nna ka ditsela tse dinnye fela? (Mathaio 6:33) Fa melaometheo e e ntseng jalo ya Dikwalo e e umakilweng fano e kaela ditshwetso tse o di dirang letsatsi le letsatsi, fa o dira jalo, o tsaya Jehofa tsia “mo ditseleng tsotlhe tsa gago.”
15 Re ka re, nako le nako fa re dira tshwetso re tshwanetse go kaelwa ke kgopolo eno: ‘Jehofa o ne a tla batla gore ke direng? Ke tsela efe e e neng e ka mo itumedisa thata?’ (Diane 27:11) Go bontsha poifo e e ntseng jalo ya bomodimo ke tsela e e molemo thata ya go bontsha gore re rata Jehofa. Gape poifo ya bomodimo e tla re tlhotlheletsa gore re nne re le phepa—mo semoyeng, mo maitsholong le mo mmeleng. Gakologelwa gore mo go yone temana eno e Jakobe a rotloetsang Bakeresete gore ba ‘atamele Modimo,’ gape o ba kgothatsa jaana: “Ntlafatsang diatla tsa lona, lona baleofi, mme lo itshekise dipelo tsa lona, lona ba lo sa kgoneng go dira tshwetso.”—Jakobe 4:8.
16. Fa re naya Jehofa, ke eng se re ka se kang ra se fitlhelela le ka motlha, mme re ka kgona go dira eng ka dinako tsotlhe?
16 Gone ke boammaaruri gore go rata Jehofa ga se kgang fela ya go tila go dira se se bosula. Gape lorato lo re tlhotlheletsa go dira se se siameng. Ka sekai, re tsibogela jang bopelotshweu jwa ga Jehofa jo bogolo? Jakobe o ne a kwala jaana: “Mpho nngwe le nngwe e e molemo le neo nngwe le nngwe e e itekanetseng e tswa kwa godimo, gonne e fologa e tswa kwa go Rara wa masedi a selegodimo.” (Jakobe 1:17) Ke boammaaruri gore fa re abela Jehofa dilo tse re nang le tsone, ga re mo humise. Dilo tsotlhe tse di molemo tse di leng teng e setse e le tsa gagwe. (Pesalema 50:12) Mme fa re naya Jehofa nako le maatla a rona, ga re mo neye sengwe se a se tlhokang se a neng a ka se ka a se bona ka tsela epe e sele. Tota le fa re ne re ka gana go rera dikgang tse di molemo tsa Bogosi Jwa Modimo, o ne a ka dira gore maje a goe! Ka jalo, ke ka ntlha yang fa re naya Jehofa dilo tsa rona tse di bonalang, nako le maatla a rona? Lebaka la konokono ke gore fa re dira jalo re bontsha gore re mo rata ka pelo yotlhe ya rona, ka moya otlhe, ka mogopolo otlhe le ka nonofo yotlhe ya rona.—Mareko 12:29, 30.
17. Ke eng se se ka re tlhotlheletsang go abela Jehofa dilo ka boitumelo?
17 Fa re abela Jehofa dilo dingwe, re tshwanetse go di aba re itumetse “gonne Modimo o rata yo o nayang ka boitumelo.” (2 Bakorintha 9:7) Molaomotheo ono o o kwadilweng mo go Duteronome 16:17 o ka re thusa go aba ka boitumelo: “Mpho ya seatla sa mongwe le mongwe e lekane le tshegofatso ya ga Jehofa Modimo wa gago e a e go neileng.” Fa re akanya kafa Jehofa a ntseng a re bontsha bopelotshweu ka teng, re ikutlwa re eletsa go mo abela dilo ka bopelotshweu. Go aba ka tsela eno go ipedisa pelo ya gagwe, fela jaaka motsadi a itumedisiwa ke mpho e nnye e a e newang ke ngwana wa gagwe yo o rategang. Go bontsha lorato lwa rona ka tsela eno go tla re thusa go atamalana le Jehofa.
Atamalana le Ene ka Thapelo
18. Ke ka ntlha yang fa go le molemo go sekaseka tsela e re ka tokafatsang boleng jwa dithapelo tsa rona ka yone?
18 Dinako tse re rapelang ka tsone kwa thoko di re naya sebaka sa botlhokwa—dinako tsa go bolelela Rraarona yo o kwa legodimong dikgang tsa rona tsa botho le tsa sephiri. (Bafilipi 4:6) E re ka thapelo e le tsela ya botlhokwa ya go atamalana le Modimo, go molemo gore re eme mme re sekaseke boleng jwa dithapelo tsa rona. Ga se gore di tshwanetse go buiwa ka mokgwa o o tlhomologileng wa botswerere, mme di tshwanetse go bewa ka mafoko a a buiwang ka bopeloephepa go tswa pelong. Re ka tokafatsa boleng jwa dithapelo tsa rona jang?
19, 20. Ke ka ntlha yang fa re tshwanetse go tlhatlhanya pele re rapela, mme dingwe tsa dikgang tse re ka tlhatlhanyang ka tsone ke dife?
19 Re ka nna ra leka go tlhatlhanya pele re rapela. Fa re tlhatlhanya go sa le gale, re ka kgona go dira gore dithapelo tsa rona di nne maleba di bo di nne le bokao, mme ka jalo re tile mokgwa wa go boaboeletsa mafoko a a utlwalang a tlwaelegile thata e bile re a gopola ka bonako. (Diane 15:28, 29) Gongwe go akanya ka dingwe tsa ditlhogo tse Jesu a neng a di umaka mo thapelong ya gagwe ya sekao le go sekaseka kafa di amanang ka gone le maemo a rona go ka re thusa. (Mathaio 6:9-13) Ka sekai, re ka nna ra ipotsa gore ke seabe sefe se sennye se re eletsang go nna le sone mo go direng thato ya ga Jehofa mo lefatsheng mono. A re ka bolelela Jehofa gore re eletsa gore a re dirise kafa go ka kgonegang ka teng, re bo re kopa gore a re thuse go dira dikabelo dipe fela tse a re neileng tsone? A re tshwenyegile thata ka dilo tse re di tlhokang mo nameng? Re tlhoka gore re itshwarelwe maleo afe, mme re tshwanetse go itshwarela bomang thata? Re tshwenngwa ke dithaelo dife, mme a re lemoga kafa re tlhokang tshireletso ya ga Jehofa ka potlako ka gone mo kgannyeng eno?
20 Mo godimo ga moo, re ka nna ra akanya ka batho ba re ba itseng ba ba tlhokang thuso ya ga Jehofa thata. (2 Bakorintha 1:11) Le fa go ntse jalo, ga re a tshwanela go lebala kgang ya go leboga. Fa re ema re bo re akanya ka kgang eno, ga go pelaelo gore re ka bona mabaka a go leboga Jehofa le go mmaka letsatsi le letsatsi ka ntlha ya bomolemo jwa gagwe jo bogolo. (Duteronome 8:10; Luke 10:21) Go dira jalo go na le molemo o mongwe gape—go ka re thusa go leba botshelo ka tsholofelo le ka kanaanelo go feta pele.
21. Re ka thusiwa ke go sekaseka dikai dife tsa Dikwalo fa re atamela Jehofa ka thapelo?
21 Go ithuta le gone go ka tokafatsa dithapelo tsa rona. Go na le dithapelo tse di tlhomologileng tsa banna le basadi ba ba ikanyegang tse di kwadilweng mo Lefokong la Modimo. Ka sekai, fa re lebane le bothata bongwe jo bogolo, bo dira gore re tlhobaele re bo re tshogele boitekanelo jwa rona kgotsa jwa baratiwa ba rona, re ka nna ra bala thapelo ya ga Jakobe e e malebana le nako ya fa a ne a tla tloga a kopana le morwarraagwe yo o neng a batla go ipusolosetsa e bong Esau. (Genesise 32:9-12) Kgotsa re ka nna ra sekaseka thapelo e Kgosi Asa a neng a e rapela fa mophato wa Baethiopia ba ka nna milione o ne o tshosetsa batho ba Modimo. (2 Ditiragalo 14:11, 12) Fa e le gore re tshwenngwa ke bothata jo bo ka tlisang kgobo mo leineng le lentle la ga Jehofa, go ka nna molemo fa re ka sekaseka thapelo e Elija a neng a e rapela fa pele ga baobamedi ba ga Baale kwa Thabeng ya Karemele, le thapelo ya ga Nehemia fa a ne a rapela malebana le boemo jo bo sa itumediseng jwa kwa Jerusalema. (1 Dikgosi 18:36, 37; Nehemia 1:4-11) Go bala le go tlhatlhanya ka dithapelo tse di ntseng jalo go ka nonotsha tumelo ya rona e bile go ka re naya ditsela tse di molemo tse ka tsone re ka bolelelang Jehofa mathata a a re imelang.
22. Temana ya ngwaga ya 2003 ke efe mme ke dipotso dife tse re ka ipotsang tsone gangwe le gape mo ngwageng?
22 Go bonala sentle gore ga go na tshiamelo le fa e le mokgele ope o mogolo go feta go utlwa kgakololo ya ga Jakobe ya gore re ‘atamele Modimo.’ (Jakobe 4:8) E kete re ka dira jalo ka go oketsa kitso ya rona ka Modimo, ka go leka go bontsha kafa re mo ratang ka teng le ka go atamalana thata le ene ka dithapelo tsa rona. Mo ngwageng otlhe wa 2003, fa re ntse re akantse ka Jakobe 4:8 e e leng temana ya ngwaga, a re nneng re itlhatlhobe gore a ruri re atamalana le Jehofa. Mme go tweng ka karolo ya bofelo ya mafoko ao? Jehofa o tla “lo atamela” ka tsela efe mme seo se tla lo solegela molemo jang? Setlhogo se se latelang se tla sekaseka kgang eno.
A o A Gakologelwa?
• Ke ka ntlha yang fa go atamela Jehofa e le kgang e re tshwanetseng go e tsaya masisi?
• Re ka ipeela mekgele efe malebana le go tsenya kitso ka ga Jehofa?
• Re ka bontsha jang gore re rata Jehofa ka lorato lwa mmatota?
• Thapelo e ka re thusa ka ditsela dife go nna le kamano e e gaufiufi le Jehofa?
[Dipotso Tsa Thuto]
[Mafoko a a mo go tsebe 12]
Temana ya ngwaga ya 2003 e tla bo e re: “Atamelang Modimo, mme o tla lo atamela.”—Jakobe 4:8.
[Setshwantsho mo go tsebe 8, 9]
Fa Samuele a ntse a gola, o ne a simolola go itse Jehofa ka tsela e e gaufiufi
[Setshwantsho mo go tsebe 12]
Thapelo e Elija a neng a e rapela kwa Thabeng ya Karemele ke sekao se se molemo mo go rona