Dipotso Tse di Tswang Kwa Babading

A Satane Diabolo o kgona go bona se motho a se akanyang?

Le fa re ka se ka ra tlhomamisega ka seno, go bonala Satane le madimona a gagwe a sa kgone go bona se se mo megopolong ya rona.

Akanya ka maina a Satane a a filweng a a mo tlhalosang. O bidiwa Satane (Moganetsi), Diabolo (Mosebi), Noga (le le tshwanang le Motsietsi) Moraedi le Moaki. (Jobe 1:6; Mathaio 4:3; Johane 8:44; 2 Bakorintha 11:3; Tshenolo 12:9) Ga go na ape a maina a a mo tlhalosang ano a a kayang gore Satane o kgona go bona se re se akanyang.

Le fa go ntse jalo, go farologana le seo, Jehofa Modimo o tlhalosiwa e le “motlhatlhobi wa dipelo.” (Diane 17:3; 1 Samuele 16:7; 1 Ditiragalo 29:17) Bahebera 4:13 ya re: “Ga go na sebopiwa se se sa bonatshegeng mo ponong ya [ga Jehofa], mme dilo tsotlhe di senogile e bile di mo pontsheng fela mo matlhong a gagwe yo re ikarabelelang mo go ene.” Ga go gakgamatse gore Jehofa o file Morwawe Jesu bokgoni jwa go ka tlhatlhoba dipelo. Jesu yo o tsosiweng o ne a bolela jaana: “Ke nna yo o hukutsang diphilo le dipelo, mme ke tla naya mongwe le mongwe wa lona kafa ditirong tsa lona.”—Tshenolo 2:23.

Baebele ga e bolele gore Satane o kgona go tlhatlhoba dipelo le megopolo ya batho. Seno se botlhokwa ka gonne moaposetoloi Paulo o re tlhomamisetsa gore Bakeresete ‘ga se ba ba se nang kitso ka maano a ga Satane.’ (2 Bakorintha 2:11) Ka jalo, ga re tlhoke go boifa gore Satane o na le bokgoni bongwe jo bo tlhomologileng jo re sa itseng gotlhelele ka jone.

Le fa go ntse jalo, se ga se reye gore Mmaba wa rona ga a kgone go lemoga makoa a rona. Satane o ne nnile le makgolokgolo a dingwaga go ithuta kafa batho ba itshwarang ka teng. Ga a tlhoke go itse gore re akanya jang gore a tle a lemoge gore re itshwara jang, go tlhokomela gore re rata boitlosobodutu jo bo ntseng jang kgotsa go reetsa gore re bua ka dilo dife, jalo le jalo. Tebego ya rona ya sefatlhego le tsela ya rona ya go itlhalosa ka mmele le tsone di ka naya lesedi malebana le se re se akanyang kgotsa kafa re ikutlwang ka teng.

Le fa go ntse jalo, ka kakaretso fela, Satane o dirisa one maano a a neng a a dirisa kwa tshimong ya Edena—maaka, tsietso le tshedimosetso e e sa siamang. (Genesise 3:1-5) Le fa Bakeresete ba sa tlhoke go boifa gore Satane o tla bona se ba se akanyang, ba na le lebaka la go tshwenyega malebana le gore Satane a ka leka go tsenya megopolo efe mo teng ga ditlhaloganyo tsa bone. O batla gore Bakeresete ba ‘senyege mo mogopolong le go thukuthwa boammaaruri.’ (1 Timotheo 6:5) Ga go gakgamatse go bo lefatshe la ga Satane le dirile gore go nne le tshedimosetso le boitlosobodutu jo bontsi jo bo senyang. Gore Bakeresete ba kgone go emelana le tlhaselo eno, ba tshwanetse go sireletsa megopolo ya bone ka go rwala “tlhoro ya phemelo ya poloko.” (Baefeso 6:17) Ba dira seno ka go tlatsa megopolo ya bone ka dithuto tsa Baebele mme ba tila go ikamanya go sa tlhokege le tlhotlheletso e e sa siamang ya lefatshe la ga Satane.

Satane ke mmaba yo o nonofileng. Mme ga re a tshwanela go boifa ene le madimona a gagwe ka tsela e e sa siamang. Jakobe 4:7 e re tlhomamisetsa jaana: “Ganetsang Diabolo, mme o tla lo tshaba.” Fa re latela kgakololo eno, re tla kgona go bua jaaka Jesu, gore ga go na jaaka Satane a ka re tshwara.—Johane 14:30.