Jehofa, Modimo yo o Boammaaruri
Jehofa, Modimo yo o Boammaaruri
“O nkgolotse, wena Jehofa Modimo wa boammaaruri.”—PESALEMA 31:5.
1. Seemo e ne e le sefe kwa legodimong le mo lefatsheng ka nako ya fa go ne go se na maaka?
GO KILE ga nna le nako e ka yone go neng go se na maaka. Kwa magodimong a a sa bonaleng, go ne go nna dibopiwa tse di itekanetseng tsa semoya, di direla Mmopi wa tsone, “Modimo wa boammaaruri.” (Pesalema 31:5) Go ne go se na maaka, go se na tsietso. Jehofa o ne a bolelela bomorwawe ba semoya dilo tsa boammaaruri. O ne a dira jalo ka gonne a ba rata e bile a batla gore dilo di ba tsamaele sentle. Go ne go ntse jalo le mo lefatsheng. Jehofa o ne a bopa monna le mosadi ba ntlha, mme a dirisa thulaganyo e a neng a e tlhomile go buisana le bone ka metlha ka tsela e e utlwalang sentle, e e tlhamaletseng le e e boammaaruri. A bo go tshwanetse ga bo go ne go le monate jang ne!
2. Ke mang yo o neng a simolola maaka, mme ka ntlha yang?
2 Le fa go ntse jalo, moragonyana morwa mongwe wa semoya wa Modimo o ne a nna sebete mo go feteletseng mme a itira modimo, a ganetsa Jehofa. Motho yono wa semoya yo kgabagare a neng a bidiwa Satane Diabolo, o ne a batla gore go nne le bangwe ba ba mo obamelang. Gore a fitlhelele mokgele wa gagwe, o ne a simolola maaka mme a a dirisa go tsenya ba bangwe mo taolong ya gagwe. Ka go dira jalo, o ne a nna “moaki le ramaaka.”—Johane 8:44.
3. Adame le Efa ba ne ba itshwara jang fa Satane a ba aketsa, mme diphelelo ya nna dife?
3 Satane o ne a dirisa noga go bolelela mosadi wa ntlha e bong Efa gore fa a ne a ka roba molao wa Modimo, mme a ja loungo lo a lo ileditsweng o ne a se kitla a swa. E ne e le maaka. Gape o ne a mmolelela gore fa a ne a ka lo ja o ne a tla nna jaaka Modimo, a itse molemo le bosula. Le seo e ne e le maaka. Le fa e le gore Efa a ka tswa a ne a ise a ke a tsamaye a bolelelwe maaka, o tshwanetse a bo a ile a lemoga gore se a neng a utlwa se bolelwa ke noga se ne se sa dumalane le se Modimo a neng a se boleletse Adame monna wa gagwe. Le fa go ntse jalo, o ne a dumela Satane, e seng Jehofa. E re ka a ne a tsieditswe thata, o ne a tsaya loungo a lo ja. Moragonyana, Adame le ene o ne a ja loungo loo. (Genesise 3:1-6) Fela jaaka Efa, Adame o ne a ise a ke a tsamaye a bolelelwe maaka, le fa go ntse jalo, ene ga a ka a tsiediwa. (1 Timotheo 2:14) O ne a bontsha ka ditiro tsa gagwe gore o latlhile Modiri wa gagwe. Seo se ne sa felela ka ditlamorago tse di maswe mo bathong. Ka ntlha ya go sa utlwe ga ga Adame, boleo le loso—mmogo le ditiro tse di seng kafa molaong le tshotlego e kgolo—di ne tsa fetela mo baneng ba gagwe botlhe.—Baroma 5:12.
4. (a) Maaka a a neng a bolelwa kwa Edene ke afe? (b) Ke eng se re tshwanetseng ra se dira gore re se ka ra tsiediwa ke Satane?
4 Maaka le one a ne a anama. Re tshwanetse go lemoga gore maaka ao a a neng a bolelwa kwa tshimong ya Edene a ne a ganetsa ntlha ya gore Jehofa ka boene o boammaaruri. Satane o ne a bolela gore Modimo o ne a tima banyalani ba ntlha sengwe se se molemo ka boferefere. Mme go ne go sa nna jalo. Adame le Efa ga ba a ka ba solegelwa molemo ke go sa utlwe ga bone. Ba ne ba swa, fela jaaka Jehofa a ne a boletse. Le fa go ntse jalo, Satane o ne a tswelela pele a tlhasela Jehofa ka go mo senya leina, mo e leng gore makgolo a dingwaga moragonyana moaposetoloi Johane o ne a tlhotlhelediwa go kwala gore Satane o ‘tsietsa lefatshe lotlhe le le nang le banni.’ (Tshenolo 12:9) Gore re se ka ra tsiediwa ke Satane Diabolo, re tshwanetse ra ikanya Jehofa gore o boammaaruri le gore Lefoko la gagwe le boammaaruri. O ka dira jang gore o ikanye Jehofa o bo o tswelele pele o mo ikanya mme o kgone go itshireletsa mo tsietsong le mo maakeng a a anamisiwang ke Mmaba wa gagwe?
Jehofa o Itse Boammaaruri
5, 6. (a) Jehofa o na le kitso efe? (b) Kitso ya batho e ntse jang fa e bapisiwa le ya ga Jehofa?
5 Ka dinako tsotlhe Baebele e bolela fa Jehofa e le ene yo o “bopileng dilo tsotlhe.” (Baefeso 3:9) Ke ene “yo o neng [a] dira legodimo le lefatshe le lewatle le dilo tsotlhe tse di mo go tsone.” (Ditiro 4:24) E re ka Jehofa e le Mmopi, o itse boammaaruri ka sengwe le sengwe. Re ka tshwantsha jaana: Akanya ka monna yo o dirang polane ya ntlo ya gagwe a bo a e aga yotlhe ka boene. O tla itse ntlo eo go tswa le go tsena mme o tla e tlhaloganya sentle go feta motho yo o sa e agang. Batho ba itse sengwe le sengwe ka dilo tse ba di tlhamang ba bo ba di dira. Ka tsela e e tshwanang, Mmopi o itse sengwe le sengwe ka se a se bopileng.
6 Moporofeti Isaia o ne a tlhalosa sentle selekanyo sa kitso e Jehofa a nang le yone. Re bala jaana: “Ke mang yo o lekantseng metsi mo legofing fela la seatla sa gagwe, mme a lekanya magodimo ka paralatso ya seatla fela mme a tsenya lorole lwa lefatshe mo selekanyong, kgotsa a lekanya dithaba ka selekanyi, le dithota ka sekale? Ke mang yo o lekantseng moya wa ga Jehofa, mme ke mang yo o ka dirang gore a itse sengwe jaaka motho yo o mo gakololang? O ne a gakololana le mang gore a dire gore a tlhaloganye, kgotsa ke mang yo o mo rutang tselana ya tshiamiso, kgotsa yo o mo rutang kitso, kgotsa yo o dirang gore a itse tsela ya go tlhaloganya ga mmatota?” (Isaia 40:12-14) Ee ruri, Jehofa ke “Modimo wa kitso,” e bile o ‘itekanetse mo kitsong.’ (1 Samuele 2:3; Jobe 36:4; 37:16) A bo re itse go le gonnye jang ne fa re bapisiwa le ene! Le fa batho ba ka tswa ba ile ba nna le kitso e ntsi go le kana kang, tsela e re tlhaloganyang dilo tse di bopilweng ka yone ga e fitlhe le go “dintlha fela tsa ditsela tsa [Modimo].” E ‘nnye fela’ fa e bapisiwa le “tumo ya . . . maru e e maatla.”—Jobe 26:14.
7. Dafide o ne a lemoga eng ka kitso ya ga Jehofa, mme re tshwanetse ra dumela eng?
7 E re ka Jehofa e le ene a re bopileng, go a utlwala gore a bo a re itse sentle. Kgosi Dafide o ne a itse seno. O ne a kwala jaana: “Wena Jehofa, o ntlhatlhobile, mme o a nkitse. O itse go nna ga me le go ema ga me. O akanyeditse kakanyo ya me go tswa kgakala. O lekantse go eta ga me le go namalala ga me, e bile o tlwaelane le ditsela tsa me tsotlhe. Gonne ga go na lefoko lepe mo lolemeng lwa me, mme bona! wena Jehofa, o setse o le itse lotlhe fela.” (Pesalema 139:1-4) Gone ke boammaaruri gore Dafide o ne a lemoga gore batho ba na le kgololesego ya go itlhophela—Modimo o re neile kgololesego ya gore re ka mo ikobela kgotsa ra se ka ra mo ikobela. (Duteronome 30:19, 20; Joshua 24:15) Le fa go ntse jalo, Jehofa o re itse botoka thata go feta kafa rona re ikitseng ka teng. O re eleletsa se se molemo, e bile o kgona go kaela ditsela tsa rona. (Jeremia 10:23) Eleruri, ga go na morutisi, moitse, kgotsa mogakolodi ope yo o ka kgonang go re ruta boammaaruri jaaka ene le go dira gore re nne botlhale re bo re itumele.
Jehofa o Boammaaruri
8. Re itse jang gore Jehofa o boammaaruri?
8 Go itse boammaaruri le go bua boammaaruri ka dinako tsotlhe, ke gore, go nna boammaaruri, ke dilo tse pedi tse di sa tshwaneng. Ka sekai, Diabolo o ne a tlhopha gore a se ka a “itsetsepela mo boammaaruring.” (Johane 8:44) Mme Jehofa ene o “letlotlo la . . . boammaaruri.” (Ekesodo 34:6, Baebele e e Boitshepo) Ka dinako tsotlhe Dikwalo di supela gore Jehofa o boammaaruri. Moaposetoloi Paulo o ne a bolela gore ‘ga go kgonege gore Modimo a ake,’ le gore Modimo ‘a ka se ka a aka.’ (Bahebera 6:18; Tito 1:2) Go nna boammaaruri ke karolo ya botlhokwa ya botho jwa Modimo. Re ka ikaega ka Jehofa ra ba ra mo ikanya ka gonne o boammaaruri; ga a ke a tsietsa batho ba gagwe ba ba ikanyegang.
9. Leina la ga Jehofa le amana jang le boammaaruri?
9 Leina la ga Jehofa ka bolone le supela gore o boammaaruri. Leina la Modimo le raya gore “O Dira Gore go Diragale.” Seno se raya gore fa nako e ntse e tsamaya Jehofa o nna Modiragatsi wa dilo tsotlhe tse a di solofetsang. Ga go na motho ope o sele yo o ka kgonang go dira jalo. E re ka Jehofa e le ene Yo Mogolo, ga go na sepe se se ka thibelang maikaelelo a gagwe go diragala. Ga se fela gore Jehofa o boammaaruri mme gape ke ene fela a nang le maatla le botlhale jwa go dira gore sengwe le sengwe se a se bolelang se diragale.
10. (a) Joshua o ne a bona jang kafa Jehofa a leng boammaaruri ka teng? (b) Ke ditsholofetso dife tsa ga Jehofa tse o boneng di diragadiwa?
10 Joshua ke mongwe wa batho ba bantsi ba ba boneng ditiragalo tse di gakgamatsang tse di neng di supela gore Jehofa o boammaaruri. Joshua o ne a le kwa Egepeto fa Jehofa a ne a tlisa dipetso tse di lesome mo setšhabeng seo, mme a bolelela pele nngwe le nngwe ya tsone pele e diragala. Sengwe sa dilo tse Joshua a neng a di bona ke go diragadiwa ga ditsholofetso tsa ga Jehofa tsa gore o tla golola Baiseraele kwa Egepeto a bo a ba isa kwa Lefatsheng le le Solofeditsweng, a fenya masole a a maatla a Bakanana a a neng a ba thibela. Fa Joshua a ne a setse a le gaufi le go swa, o ne a raya banna ba bagolwane ba setšhaba sa Iseraele a re: “Lo itse sentle ka dipelo tsa lona tsotlhe le ka meya ya lona yotlhe gore ga go na lefoko le le lengwe le le sa diragadiwang mo mafokong otlhe a a molemo a Jehofa Modimo wa lona a a buileng le lona. A lo diragaletse otlhe fela. Ga go na le fa le le lengwe la one le le sa diragalang.” (Joshua 23:14) Le fa o sa bona dikgakgamatso tse Joshua a di boneng, a fa o ntse o tshela o bone kafa ditsholofetso tsa Modimo di leng boammaaruri ka teng?
Jehofa o Senola Boammaaruri
11. Ke eng se se bontshang gore Jehofa o batla go bolelela batho boammaaruri?
11 Akanya fela ka motsadi yo o nang le kitso e ntsi mme a buisana le bana ba gagwe sewelo fela. A ga o itumelele gore Jehofa ga a nna jalo? Jehofa o buisana le batho ka lorato, mme o dira jalo a sa ikgogone. Dikwalo di mmitsa “Motlhatlheledi yo Mogolo.” (Isaia 30:20) Ka ntlha ya bopelonomi jwa gagwe jo bo lorato, e bile o buisana le batho ba ba sa batleng go mo reetsa. Ka sekai, Esekiele o ne a romiwa go ya go rerela batho ba Jehofa a neng a itse gore ba ka se amogele molaetsa. Jehofa o ne a re: “Morwa motho, tsamaya, tsena mo gare ga ba ntlo ya Iseraele, mme o bue mafoko a me le bone.” Go tswa foo o ne a tlhagisa jaana: “Ga ba kitla ba batla go go reetsa, gonne ga ba batle go ntheetsa; ka gonne botlhe ba ntlo ya Iseraele ba tlhogoethata e bile ba na le pelo e e logwadi.” Eo e ne e le kabelo e e bokete, mme Esekiele o ne a e dira ka boikanyegi, mme ka go dira jalo a bontsha bopelotlhomogi jo bo tshwanang le jwa ga Jehofa. Fa o na le kabelo e e bokete ya go rera mme o ikaega ka Modimo, o ka tlhomamisega gore o tla go nonotsha fela jaaka a ile a nonotsha moporofeti wa gagwe Esekiele.—Esekiele 3:4, 7-9.
12, 13. Modimo o ile a buisana le batho ka ditsela dife?
12 Jehofa o batla gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Timotheo 2:4) O buile a dirisa baporofeti, baengele, tota le Morwawe yo o rategang, Jesu Keresete. (Bahebera 1:1, 2; 2:2) Jesu o ne a raya Pilato a re: “Ke tsaletswe sone seo, e bile ke tletse sone seo mo lefatsheng, gore ke supe ka ga boammaaruri. Mongwe le mongwe yo o mo letlhakoreng la boammaaruri o reetsa lentswe la me.” Pilato o ne a bulegetswe ke sebaka se se molemo thata sa gore Morwa Modimo ka boene a mo rute boammaaruri ka ga thulaganyo ya ga Jehofa ya poloko. Le fa go ntse jalo, Pilato o ne a se mo letlhakoreng la boammaaruri, e bile o ne a sa batle go rutiwa ke Jesu. Mo boemong jwa moo, Pilato o ne a fetola jaana a belaela: “Boammaaruri ke eng?” (Johane 18:37, 38) A bo a ne a utlwisa botlhoko jang ne! Le fa go ntse jalo, batho ba le bantsi ba ne ba reetsa boammaaruri jo bo neng bo bolelwa ke Jesu. O ne a raya barutwa ba gagwe a re: “Go itumela matlho a lona ka gonne a a bona, le ditsebe tsa lona ka gonne di a utlwa.”—Mathaio 13:16.
13 Jehofa o dirisitse Baebele go dira gore boammaaruri bo nne bo le teng e bile o dirile gore batho gongwe le gongwe ba bo bone. Baebele e senola dilo fela jaaka di ntse. E tlhalosa dinonofo tsa Modimo, maikaelelo a gagwe le ditaelo tsa gagwe mmogo le kafa tota maemo a batho a leng ka teng. Jesu o ne a bolela jaana a rapela Jehofa: “Lefoko la gago ke boammaaruri.” (Johane 17:17) Ka ntlha ya seno, Baebele ke buka e e sa tshwaneng le epe e sele. Ke yone fela e e kwadilweng ka tlhotlheletso ya Modimo yo o itseng dilo tsotlhe. (2 Timotheo 3:16) Ke mpho e e tlhwatlhwakgolo e e neilweng batho, e batlhanka ba Modimo ba e tsayang e le botlhokwa thata. Re tla bo re dira sentle fa re e bala letsatsi le letsatsi.
Ngaparela Boammaaruri
14. Dingwe tsa dilo tse Jehofa a reng o tla di dira ke dife, mme ke ka ntlha yang fa re tshwanetse go mo dumela?
14 Re tshwanetse ra tsaya se Jehofa a re bolelelang sone mo Lefokong la gagwe se le masisi. O ntse fela jaaka a itlhalosa, e bile o tla dira se a reng o tla se dira. Re na le mabaka a a utlwalang a go ikanya Modimo. Re ka dumela fa Jehofa a re o tla tlisa “pusoloso mo go ba ba sa itseng Modimo le ba ba sa reetseng dikgang tse di molemo kaga Morena wa rona Jesu.” (2 Bathesalonika 1:8) Gape re ka ikanya Jehofa fa a re o rata batho ba ba batlang go dira tshiamo, fa a re o tla naya batho ba ba nang le tumelo botshelo jo bo sa khutleng, le fa a re o tla fedisa botlhoko, selelo, le loso tota. Jehofa o ne a gatelela kafa tsholofetso eno ya bofelo e ka ikanngwang ka teng fa a ne a naya moaposetoloi Johane taelo eno: “Kwala, ka gonne mafoko ano a a ikanyega e bile a boammaaruri.”—Tshenolo 21:4, 5; Diane 15:9; Johane 3:36.
15. Mangwe a maaka a Satane a a anamisang ke afe?
15 Satane o farologane gotlhelele le Jehofa. Mo boemong jwa go naya batho lesedi, o a ba faposa. Satane o ikaeletse go faposa batho mo kobamelong e e itshekileng, mme gore a kgone go dira seo o anamisa maaka a mantsintsi. Ka sekai, Satane o batla re dumela gore Modimo ga a batle go atamalana le rona le gore ga a amege ka go boga mo go leng teng mo lefatsheng. Le fa go ntse jalo, Baebele e bontsha gore Jehofa o amega thata ka dibopiwa tsa gagwe e bile o utlwisiwa botlhoko ke bosula le go boga. (Ditiro 17:24-30) Gape Satane o batla batho ba dumela gore go dira dilo tsa semoya ke tshenyo ya nako. Go farologana le seo, Dikwalo di re tlhomamisetsa gore “Modimo ga a tshiamololo mo a ka lebalang tiro ya lona le lorato lo lo le bontshitseng leina la gagwe.” Mo godimo ga moo, di bontsha sentle gore “o nna moduedi wa ba ba mmatlang ka tlhoafalo.”—Bahebera 6:10; 11:6.
16. Ke ka ntlha yang fa Bakeresete ba tshwanetse go nna ba ntshitse matlho dinameng e bile ba ngaparetse boammaaruri?
16 Moaposetoloi Paulo o ne a kwala jaana malebana le Satane: “Modimo wa tsamaiso eno ya dilo o [foufaditse] megopolo ya ba ba sa dumeleng, gore go bonesa ga dikgang tse di molemo tse di galalelang ka ga Keresete, yo e leng setshwano sa Modimo, go se ka ga ba phatsimela.” (2 Bakorintha 4:4) Fela jaaka Efa, bangwe ba tsiediwa thata ke Satane Diabolo. Ba bangwe ba latela tsela e e tserweng ke Adame, yo o neng a sa tsiediwa mme a tlhopha ka bogagagwe fela gore a tlhoke kutlo. (Jude 5, 11) Ka gone go botlhokwa gore Bakeresete ba nne ba ntshitse matlho dinameng e bile ba ngaparetse boammaaruri.
Jehofa o Batla ‘Tumelo E e Se Nang Boitimokanyo’
17. Re tshwanetse ra dirang gore re amogelwe ke Jehofa?
17 E re ka Jehofa a le boammaaruri mo go sotlhe se a se dirang, o letetse gore ba ba mo obamelang le bone ba nne boammaaruri. Mopesalema o ne a kwala jaana: “Jehofa, ke mang yo o tla nnang molalediwa mo mogopeng wa gago? Ke mang yo o tla agang mo thabeng ya gago e e boitshepo? Ke yo o tsamayang ka go tlhoka molato le yo o dirang tshiamo e bile a bua boammaaruri mo pelong ya gagwe.” (Pesalema 15:1, 2) Kwantle ga pelaelo, mo Bajudeng ba ba neng ba opela mafoko ao, go umakiwa ga thaba ya ga Jehofa e e boitshepo go ne go ba gopotsa Thaba ya Siona, kwa Kgosi Dafide a neng a isa letlole la kgolagano teng mo mogopeng o a neng a o tlhomile koo. (2 Samuele 6:12, 17) Thaba le mogope di ne di ba gopotsa lefelo le Jehofa a neng a nna mo go lone ka tsela ya tshwantshetso. Batho ba ne ba ka bua le Modimo koo fa ba batla go mo kopa gore a ba amogele.
18. (a) Ke eng se se tlhokegang gore motho a nne tsala ya Modimo? (b) Go tla tlhalosiwa eng mo setlhogong se se latelang?
18 Motho ope fela yo o batlang go nna tsala ya ga Jehofa o tshwanetse a bua boammaaruri “mo pelong ya gagwe,” e seng ka molomo fela. Ditsala tsa Modimo tsa boammaaruri di tshwanetse go nna le pelo e e ikanyegang gape di tshwanetse go naya bosupi jwa gore di na le ‘tumelo e e se nang boitimokanyo,’ gonne ditiro tsa boammaaruri di tswa mo pelong. (1 Timotheo 1:5; Mathaio 12:34, 35) Tsala ya Modimo ga e leferefere e bile ga e tsietse, gonne “Jehofa o tlhoile motho . . . yo o tsietsang.” (Pesalema 5:6) Basupi ba ga Jehofa mo lefatsheng lotlhe ba leka ka natla gore ba nne boammaaruri gore ba etse Modimo wa bone. Kgang eno e tla sekasekiwa mo setlhogong se se latelang.
O ka Araba Jang?
• Ke ka ntlha yang fa Jehofa a itse boammaaruri ka sengwe le sengwe?
• Ke eng se se bontshang gore Jehofa o boammaaruri?
• Jehofa o senotse boammaaruri jang?
• Ke eng se re tshwanetseng ra se dira malebana le boammaaruri?
[Dipotso Tsa Thuto]
[Ditshwantsho mo go tsebe 10]
Modimo wa boammaaruri o itse sengwe le sengwe ka dilo tse a di bopileng
[Ditshwantsho mo go tsebe 12, 13]
Ditsholofetso tsa ga Jehofa di tla diragala