A o A Gakologelwa?

A o ile wa itumelela go bala dimakasine tsa bosheng tsa Tora ya Tebelo? Fa go ntse jalo, bona gore a o ka kgona go araba dipotso tse di latelang:

• Ke ditsela dife tse dingwe tse Ruthe a neng a supa ka tsone gore ke sekao se se molemo?

O ne a tlhoma sekao ka lorato lo a neng a rata Jehofa ka lone, lorato lwa gagwe lo lo ikanyegang mo go Naomi, le ka go bontsha dinonofo tsa bonatla le boikokobetso. Ga go gakgamatse go bo batho ba ne ba mo tsaya e le “mosadi yo o molemo thata.” (Ruthe 3:11)—4/15, tsebe 23-6.

• Re itse jang gore Jehofa o amega ka batho ba maemo a a kwa tlase?

O ne a bolelela Baiseraele ba bone ka bobone ba kileng ba sotliwa kwa Egepeto gore ba se ka ba sotla bahumanegi. (Ekesodo 22:21-24) Jesu yo o neng a etsa Rraagwe, o ne a kgatlhegela thata batho ba maemo a a kwa tlase, mme banna ba a neng a ba tlhopha gore e nne baaposetoloi ba gagwe e ne e le “ba ba sa rutegang e bile e le batho fela.” (Ditiro 4:13; Mathaio 9:36) Re ka etsa Modimo ka go amega ka batho ba bangwe, ba ba jaaka basha.—4/15, tsebe 28-31.

• Re ka tlhomamisega jang gore Jehofa o ela tlhoko se re se dirang?

Dipego tsa Baebele di bontsha gore Jehofa o ela tlhoko dilo tse batho ba di dirang. O ne a bona setlhabelo se Abele a neng a mo ntshetsa sone mme o ela tlhoko ‘ditlhabelo tsa rona tsa pako, ke gore, leungo la dipounama.’ (Bahebera 13:15) Jehofa o ne a lemoga gore Enoke o ne a leka ka natla go mo kgatlha ka go tshela botshelo jwa boitsholo jo bo phepa. Mme Modimo o ne a ela tlhoko fa motlholagadi yo e neng e se Moiseraele, yo o neng a nna kwa Sarepata, a ne a abelana le Elija dijo tse dinnye tse a neng a na le tsone. Le rona Jehofa o ela tlhoko ditiro tsa rona tsa go bontsha tumelo.—5/1, tsebe 28-31.

• Ke ka ntlha yang fa go ka twe morago ga Pentekosete ya 33 C.E., Bajuda ba ba neng ba nna Bakeresete ba ne ba tshwanetse gore bone ka bobone ba ineele mo Modimong?

Ka 1513 B.C.E., Baiseraele ba bogologolo ba ne ba nna le kamano e e kgethegileng le Jehofa ka go ineela mo go ene. (Ekesodo 19:3-8) Go tloga ka nako eo, Bajuda ba ne ba nna setšhaba se se ineetseng ka fa tlase ga kgolagano ya Molao. Mme Jehofa o ne a fedisa kgolagano ya Molao ka loso lwa ga Keresete ka 33 C.E. (Bakolosa 2:14) Morago ga moo, Bajuda ba ba neng ba batla go direla Modimo ka tsela e a e amogelang ba ne ba tshwanetse go ineela mo go ene mme ba kolobediwe mo leineng la ga Jesu Keresete.—5/15, tsebe 30-1.

• A go fisa maswalo go tshwanetse ga dirwa mo kobamelong ya boammaaruri gompieno?

Go fisa maswalo e ne e le karolo ya kobamelo ya boammaaruri kwa Iseraeleng wa bogologolo. (Ekesodo 30:37, 38; Lefitiko 16:12, 13) Mme kgolagano ya Molao go akaretsa le go dirisa maswalo go ne ga fela fa Keresete a ne a swa. Bakeresete ba ka itirela tshwetso ya gore a ba dirise maswalo fa fela go sa amane ka gope le dilo tsa bodumedi, mme gone ga se karolo ya kobamelo ya boammaaruri gompieno. Ba tshwanetse go akanyetsa maikutlo a ba bangwe gore ba se ka ba ba kgopisa.—6/1, tsebe 28-30.

• Ke dikgang dife tsa bosheng tse di dirileng gore batho ba le bantsi ba akanyetse thata boammaaruri jwa kgang eno ya gore Jesu o kile a tshela mo lefatsheng?

Go bonwe bosupi jo bontsi mo lebokosong la polokelo ya marapo a ditopo, le le fitlhetsweng kwa Iseraele. Go bonala le sa le le nnile teng go tswa mo lekgolong la ntlha la dingwaga mme le ne le na le mokwalo o o balegang jaana: “Jakobe, morwa Josefa, morwarraagwe Jesu.” Bangwe ba tsaya seno e le “bosupi jwa bogologolo thata jo bo sa fitlhelweng mo Baebeleng jwa thutamarope” jo bo bontshang gore Jesu o kile a nna teng.—6/15, tsebe 3-4.

• Motho o ithuta jang go bontsha lorato?

Batho ba simolola go ithuta go bontsha lorato go tswa mo sekaong se batsadi ba bone ba se ba tlhomelang le mo tseleng e ba ba thapisang ka yone. Fa monna le mosadi ba ratana e bile ba tlotlana, bana ba ka ithuta lorato. (Baefeso 5:28; Tito 2:4) Tota le fa motho a tswa mo lelapeng le le se nang lorato, a ka ithuta go bontsha lorato ka go amogela kaelo e e tswang kwa go rre yo o lorato Jehofa, ka go thusiwa ke moya o o boitshepo le ka go solegelwa molemo ke go tshegediwa ke bakaulengwe ba ba lorato ba Bakeresete.—7/1, tsebe 4-7.

• Eusebius e ne e le mang, mme re ka ithuta thuto efe mo botshelong jwa gagwe?

Eusebius ke rahisitori wa bogologolo yo ka 324 C.E., a neng a konela buka ya gagwe ya dibolumo di le lesome e e nang le setlhogo se se reng History of the Christian Church. Le fa a ne a dumela gore Rre o nnile teng pele ga Morwa, Eusebius o ne a amogela mogopolo o o farologaneng kwa lekgotleng la Nicaea. Go lebega Eusebius a ne a itlhokomolosa taelo ya ga Jesu ya gore balatedi ba Gagwe ba se ka ba ‘nna karolo ya lefatshe.’ (Johane 17:16)—7/15, tsebe 29-31.

• A Jehofa o fetotse tsela e a lebang go nyala lefufa ka yone?

Nnyaa, Jehofa ga a fetola tsela e a lebang go nyala lefufa ka yone. (Malaki 3:6) Modimo o ne a rulagantse gore monna wa ntlha a “ngaparele mosadi wa gagwe” mme ba nne nama e le nngwe. (Genesise 2:24) Jesu o ne a re fa motho a tlhala e se ka ntlha ya kgokafalo mme a nyala gape o dira boaka. (Mathaio 19:4-6, 9) Go letlelela ga ga Jehofa go nyala lefufa go ne ga fela fa go ne go tlhomiwa phuthego ya Bokeresete.—8/1, tsebe 28.