“Thuso ya me e Tswa kwa go Jehofa”

Ba Direla Jehofa Ba se Mo Lenyalong Mme ba Kgotsofetse

MOSADI mongwe wa Mokeresete wa kwa Spain o ne a re: “Bontsi jwa rona re itumetse tota le fa re sa nyalwa.” Ke eng se se dirang gore a bo a kgotsofetse? “Re itumelela go bo re se na ditlhobaelo tse dintsi gore re kgone go direla Modimo wa rona, Jehofa, ka botlalo.”

Maikutlo ao a tsamaisana le se Lefoko la Modimo le se buang ka go se tsene mo lenyalong. Fa moaposetoloi Paulo a ne a bua ka dikgang tse di amanang le lenyalo, o ne a bua mafoko ano a a tlhotlheleditsweng: “Ke raya batho ba ba seng mo lenyalong le batlholagadi ke re, go molemo gore ba nne fela jaaka ke ntse.” Paulo ka boene o ne a sa nyala. Mme o ne a ntsha lebaka lefe la go bo a buelela go se tsene mo lenyalong? O ne a tlhalosa gore motho yo o mo lenyalong o kgaogane, mme monna yo o sa nyalang kana mosadi yo o sa nyalwang o “tlhobaela ka dilo tsa Morena.” (1 Bakorintha 7:8, 32-34) Go direla Jehofa ke lebaka la konokono le le dirang gore motho yo o seng mo lenyalong a itumele mme a kgotsofale.

Go se Tsene mo Lenyalong ka Boikaelelo jo bo Molemo

Batho ba ditso tsa bone di tsayang go le botlhokwa thata go tsena mo lenyalong le go nna le lelapa ba ka tsaya mafoko a ga Paulo a akabatsa. Le fa go ntse jalo, Jesu Keresete—yo ene ka boene a neng a sa nyala mme a itumetse e bile a kgotsofetse—o ne a umaka gore Bakeresete ba ba sa tsenang mo lenyalong ba ka nna le maikaelelo mangwe a a molemo. O ne a re: “Go na le baopafadiwa ba ba itirileng baopafadiwa ka ntlha ya bogosi jwa magodimo. A yo o ka go tsholang a go tshole.”—Mathaio 19:12.

Go dumalana le mafoko ao, batho ba bantsi ba ile ba lemoga gore go bo ba sa nyala kana ba sa nyalwa go ba bulela sebaka sa go direla Modimo ba se na dikgoreletsi tse di nnang teng mo lenyalong. (1 Bakorintha 7:35) Bakeresete ba le diketekete ba direla Jehofa ba itumetse ba se na molekane wa lenyalo, mme ba itumelela go thusa ba bangwe ba tlhagafetse. *

Bakeresete ba le bantsi ba ba seng mo lenyalong ba lemoga gore batho ba ba leng mo lenyalong ga se bone fela ba ba itumetseng le gore ga se batho botlhe ba ba seng mo lenyalong ba ba sa itumelang. Mo ditlhopheng tseo tsoopedi, bangwe ka dinako tse dingwe ba a itumela mme ka dinako tse dingwe ba a hutsafala. Tota Baebele e bua boammaaruri fa e re lenyalo ka bolone le tlisa “pitlagano mo nameng.”—1 Bakorintha 7:28.

Go se Tsene mo Lenyalong ka Ntlha ya Maemo Mangwe

Batho ba bantsi ba ba seng mo lenyalong ga ba itlhophela seo mme ba pateleditswe ke maemo. Ba ka tswa ba eletsa go bona lorato le botsala tse batho ba ba leng mo lenyalong ba di itumelelang. Le fa go ntse jalo, bangwe ba ka tswa ba sa kgone go tsena mo lenyalong gone jaanong ka ntlha ya madi kana mabaka a mangwe. Bakeresete bangwe—ba bontsi jwa bone e leng bokgaitsadi ba ba rategang—ga ba a nyalwa ka gonne ba ititeile sehuba  go ikobela taelo ya Baebele ya gore ba nyalwe “mo Moreneng fela.” (1 Bakorintha 7:39) Ba batla molekane wa lenyalo fela mo baobameding ba ga Jehofa ba ba ineetseng le ba ba kolobeditsweng.

Ka dinako tse dingwe, bangwe ba batho bano ba jewa ke bodutu. Fa Mokeresete mongwe yo o sa nyalwang a sena go dumela gore o jewa ke bodutu, o ne a re: “Re itse molao wa ga Jehofa mme ga re batle go Mo utlwisa botlhoko ka tsela epe. Re ka tswa re batla go nna le botsalano le molekane wa lenyalo mme le fa batho ba lefatshe ba leka go re ‘rulaganyetsa’ gore re nyalwe ke mongwe, re ititeile sehuba go ngaparela tshwetso ya rona. Ga re batle le fa e le go nna mo gare ga banna kgotsa basadi ba ba sa dumeleng.” Bakeresete ba ba ntseng jalo ba tshwanetse go akgolelwa go dirisa kgakololo ya Baebele le go dirisa melao e e kwa godimo ya boitsholo gore ba itumedise Jehofa le fa ba ka tswa ba tshwenyegile mo maikutlong.

Thuso e Kgolo E ba E Newang ke Modimo

Jehofa o a ikanyega mo go ba ba ikanyegang mo go ene mo dikgannyeng tse di jaaka go gana go nyalana le batho ba ba sa mo direleng. Kgosi Dafide o ne a ka bolela jaana ka ntlha ya se se mo diragaletseng: “[Jehofa] o tla dira ka boikanyegi le motho yo o ikanyegang.” (Pesalema 18:25) Mme Modimo o solofetsa batho ba ba mo ikobelang ka boikanyego jaana: “Ruri ga ke na ke go tlogela ka gope le fa e le go go latlha ka gope.” (Bahebera 13:5) Re ka etsa Jehofa ka go akgola Bakeresete ba dingwaga tsotlhe ba ba seng mo lenyalong ba ba utlwang Lefoko la Modimo ka botlalo. Gape re ka rapela gore Jehofa a ba nonotshe gore ba kgone go lepalepana le mathata a ba lebanang le one.—Baatlhodi 11:30-40.

Bakeresete ba bantsi ba ba seng mo lenyalong ba lemoga gore go dira tiro ya go ruta Baebele ka botlalo go dira gore matshelo a bone a nne le bokao. Ka sekai, akanya ka Patricia, mosadi yo o sa nyalwang yo o mo dingwageng tsa bo30 yo e leng mmulatsela, kana moreri wa nako e e tletseng. A re: “Le fa go se nyalwe go na le diteko tse dintsi, go dirile gore ke bulegelwe ke sebaka sa go nna mmulatsela wa ka metlha. E re ka ke sa nyalwa, ke kgona go fetofetola thulaganyo ya me motlhofo, mme seo se nnaya nako e e oketsegileng ya go ithuta. Gape ke ithutile go ikaega thata ka Jehofa, segolobogolo ka dinako tsa mathata.”

Mafoko ao a theilwe mo tsholofetsong ya Baebele e e gomotsang: “Pitikela tsela ya gago mo go Jehofa, o mo ikanye, mme o tla tsaya kgato.” (Pesalema 37:5) Ee ruri, baobamedi botlhe ba ba ikanyegang ba ga Jehofa, ba ba mo lenyalong le ba ba seng mo lenyalong, ba ka gomodiwa le go nonotshiwa ke mafoko ano a a tlhotlheleditsweng: “Thuso ya me e tswa kwa go Jehofa.”—Pesalema 121:2.

[Ntlha e e kwa tlase]

[Mafoko a a mo go tsebe 9]

“Monna yo o sa nyalang o tlhobaela ka dilo tsa Morena, kafa a ka bonang kamogelo ya Morena ka gone.”—1 BAKORINTHA 7:32

[Lebokoso mo go tsebe 8]

GO SOLEGELWA MOLEMO KE GO SE TSENE MO LENYALONG

Jesu, yo o neng a sa nyala, o ne a re: “Dijo tsa me ke gore ke dire thato ya yo o nthomileng le go wetsa tiro ya gagwe.”—Johane 4:34.

Bomorwadia Filipo ba ba sa nyalwang ba ne ba nna ba “porofeta.”—Ditiro 21:8, 9.

Bokgaitsadi ba ba sa nyalwang ba Bakeresete ba ba bolelang molaetsa wa Bogosi ke karolo ya ‘lesomo le legolo la basadi ba ba bolelang dikgang tse di molemo.’—Pesalema 68:11.