“Ba ba Fologelang mo Lewatleng ka Dikepe”

GO LEBAGANA le boemakepe jwa kwa Gloucester, kwa Massachusetts, U.S.A., go na le sefikantswe se se boronse sa mokgweetsi wa sekepe, yo o ikaeletseng go kgweetsa sekepe sa gagwe mo matsubutsubung. Sefikantswe seo ke sa go gopola batshwaraditlhapi ba le diketekete ba kwa Gloucester ba go itsiweng gore ba swetse mo lewatleng. Kwa tlase mo sefikantsweng seo le mo letlapeng le le kwadilweng le le fa gaufi go na le mafoko a Pesalema 107:23, 24: “Ba ba fologelang mo lewatleng ka dikepe, ba ba dirang tiro mo metsing a mantsi; Bano ba bona ditiro tsa Morena le ditiro tsa gagwe tse di gakgamatsang kwa botennyeng.”—King James Version.

Go tshwara ditlhapi mo mafelong a a boteng a Atlantic a go tletseng ditlhapi mo go one go kotsi thata. Fa dingwaga di ntse di feta banna ba le 5 368 ba kwa Gloucester, e jaanong e nang le batho ba ka nna 30 000, ba ne ba swela kwa lewatleng fa ba ne ba tshwara ditlhapi. Segopodiso seo se na le mafoko ano: “Bangwe ba ne ba pheulwa ke diphefo tse dikgolo le makhubu a magolo a matsubutsubu a bokonebotlhaba. Bangwe ba ne ba swa ba le bosi mo mokorong o monnye o o neng wa katogela kgakala le sekepe se se neng se ba tlisitse mo mafelong a go tshwara ditlhapi. Dikepe dingwe di ne tsa thulana mo matsubutsubung mme ka maswabi tsa nwela. Tse dingwe di ne tsa thulwa ke dikepe tse dikgolo mo ditselaneng tse dikepe di tsamayang ka tsone.”

Segopodiso seo ke bosupi jo bo utlwisang botlhoko jwa tiro e e boitshegang le dikotsi tse batshwaraditlhapi ba ileng ba lebana le tsone ka makgolokgolo a dingwaga. Akanya kafa batho ba ileng ba lela ka teng ka kutlobotlhoko ka gonne ba swetswe ke banna, borraabone, bomogoloabone le bomonnaabone ba basimane le barwa ba bone. Le fa go ntse jalo, Jehofa Modimo ga a lebale batlholagadi, dikhutsana le ba ba swetseng mo lewatleng. Moaposetoloi Johane o ne a bua ka se se tla diragalang mo nakong e e tlang fa a re: “Lewatle la ntsha baswi ba ba mo go lone, le loso le Hadese tsa ntsha baswi ba ba mo go tsone.” (Tshenolo 20:13) Ka nako ya fa ba tsosiwa, ba ba ‘fologetseng mo lewatleng ka dikepe’ ba tla bona “ditiro tsa Morena” tse di gakgamatsang ruri.