Ga go na lebaka la go tshwenyega ka gore motho yo o kgaotsweng o nna fa kae mo Holong ya Bogosi. Makasine ono o ne wa kgothaletsa batsadi ba Bakeresete gore ba thuse ngwana wa bone yo o kgaotsweng yo o sa ntseng a nna mo gae ka dilo tsa semoya, fa go tshwanela gore ba dire jalo. Jaaka go tlhalositswe mo makasineng wa Tora ya Tebelo wa November 15, 1988, tsebe 19 le 20, batsadi ba ka nna ba ithuta Baebele le ngwana yo mmotlana yo o kgaotsweng yo o nnang le bone. Go solofelwa gore seo se tla thusa ngwana gore a bone kgothatso e a e tlhokang gore a baakanye ditsela tsa gagwe.

Ga go na bothata gore ngwana yo mmotlana yo o kgaotsweng a nne le batsadi ba gagwe kwa Holong ya Bogosi, mme gone a didimetse. E re ka e se molao gore motho yo o kgaotsweng a nne kwa morago mo holong, go ka se nne le bothata fa ngwana yo o kgaotsweng a nna le batsadi ba gagwe, gongwe le gongwe kwa ba ntseng gone. E re ka batsadi ba tshwanetse go tlhokomela ngwana wa bone ka dilo tsa semoya, ga go pelaelo gore ba batla go tlhomamisa gore o solegelwa molemo mo dipokanong. Go dira gore ngwana a nne le bone go ka ba thusa go dira jalo, go na le go mo tlogela gore a nne go sele a sa tlhokomelwa.

Mme go tweng fa ngwana yo o kgaotsweng a sa tlhole a nna le batsadi ba gagwe mo lelapeng? A go raya gore a ka se nne le batsadi ba gagwe kwa holong? Mo nakong e e fetileng, makasine ono o ne wa tlhalosa ka botlalo boikutlo jo bo siameng jo Mokeresete a tshwanetseng go leka go nna le jone malebana le go dirisana le wa lelapa yo o kgaotsweng mme a sa nne mo gae. * Mme gone, go letla motho yo o kgaotsweng gore a nne ka tidimalo le ba lelapa la gagwe ka nako ya dipokano, ga go tshwane gotlhelele le gore ba lelapa la gagwe ba batle go dirisana le ene go sa tlhokege. Fa ba lelapa la motho yo o kgaotsweng ba ba ikanyegang ba na le maikutlo a a siameng malebana le wa lelapa la bone yo o kgaotsweng mme ba leka go latela kgakololo ya Dikwalo malebana le go dirisana le ene, ga go na lebaka la gore ba bangwe ba tshwenyege.—1 Bakor. 5:11, 13; 2 Joh. 11.

Ga re a tshwanela go tshwenyega gore motho yo o kgaotsweng o nna gaufi le wa lelapa kgotsa gaufi le ope fela kwa Holong ya Bogosi, fa fela a itshwara sentle. Go baya molao wa gore motho a nne fa kae, go ka baka mathata a a farologaneng, go ikaegile ka maemo. Kgang ya gore motho yo o kgaotsweng o nna fa kae ga e a tshwanela go baka mathata fa botlhe ba ba leng gone mo dipokanong tsa Bokeresete, go akaretsa le ba lelapa la motho yo o kgaotsweng ba ba ikanyegang, ba leka ka natla go tlotla melaometheo ya Baebele e e malebana le go kgaola, e bile seo se sa kgopise bakaulengwe. *