Babadi ba a Botsa

A Basupi ba ga Jehofa ba Dumela Gore ke Bone Fela ba ba Tla Bolokwang?

Basupi ba ga Jehofa ba dumela gore ba bone bodumedi jwa boammaaruri. Fa go ne go sa nna jalo, ba ne ba tla fetola bodumedi jwa bone. Jaaka badumedi ba ditumelo tse dintsi, Basupi ba ga Jehofa ba solofetse gore ba tla bolokwa. Le fa go ntse jalo, gape ba dumela gore ga ba a newa boikarabelo jwa go atlhola gore ke bomang ba ba tla bolokwang. Kwa bofelong, Modimo ke Moatlhodi. Ke ene a dirang tshwetso.—Isaia 33:22.

Lefoko la Modimo le senola gore ba ba tla bolokwang ga ba a tshwanela go batla go bolokwa fela mme ba tshwanetse go dirisana le Mmoloki. Go tshwantsha: A re re motho yo o tsamayang mo sekgweng o a timela. O leka ka natla go batla tsela e e ka mo isang kwa a batlang go ya teng. A o tla timelela ruri kgotsa o tla bona tsela? Seo se tla ikaega ka gore o itshwara jang fa a thusiwa. Boikgogomoso bo ka dira gore a gane thuso. Kgotsa a ka amogela thuso mme a goroga a babalesegile kwa a yang gone.

Ka tsela e e tshwanang, go tla bolokiwa ba ba dirisanang mmogo le Mmoloki wa batho, Jehofa Modimo. Poloko ke mpho e e tswang kwa Modimong, mme le fa go ntse jalo, ga se batho botlhe ba ba tla e bonang. Morwa wa Modimo e bong Jesu o ne a re: “Ga se mongwe le mongwe yo o nthayang a re, ‘Morena, Morena,’ yo o tla tsenang mo bogosing jwa magodimo, mme yo o dirang thato ya ga Rre yo o kwa magodimong o tla tsena.”—Mathaio 7:21.

Basupi ba ga Jehofa ba dumela gore Modimo o boloka fela batho ba ba bontshang tumelo mo setlhabelong sa thekololo sa ga Jesu mme ba latela dithuto tsa gagwe. (Ditiro 4:10-12) Ela tlhoko dilo tse tharo tse di botlhokwa tse di tlhokegang gore motho a bolokwe tse di senotsweng mo Lefokong la Modimo.

(1) Jesu o ne a raya ditsala tsa gagwe a re: “Botlhe ba tla itse gore lo barutwa ba me ka seno, fa lo ratana.” (Johane 13:35) Sekao sa ga Jesu sa go swela ba bangwe se ne se gatelela botlhokwa jwa go ratana. Batho ba ba ratang ba bangwe ba bontsha nonofo e e botlhokwatlhokwa ya go bona poloko.

(2) Jesu o ne a rapela Rraagwe jaana: “Ke ba itsisitse leina la gago.” (Johane 17:26) Jesu o ne a itse kafa leina la Modimo, e leng Jehofa, le neng le le botlhokwa ka gone mo go Rraagwe. Jesu o ne a rapelela gore leina la ga Rraagwe “le itshepisiwe.” (Mathaio 6:9) Go itshepisa leina la Modimo go akaretsa go itse leina leo le go le tsaya le le botlhokwa e bile le le boitshepo. Fela jaaka Jesu, ba ba batlang go bolokwa ba tshwanetse go dirisa leina la Modimo. Gape ba tshwanetse go ruta ba bangwe ka leina la Modimo le dinonofo tsa gagwe. (Mathaio 28:19, 20) Tota e bile, go tla bolokwa fela ba ba bitsang leina la Modimo.—Baroma 10:13.

(3) Jesu o ne a raya Ponto Pilatwe a re: “Bogosi jwa me ga se karolo ya lefatshe leno.” (Johane 18:36) Gompieno ga se batho ba le bantsi ba ba bontshang tumelo mo Bogosing jwa Modimo kgotsa mo pusong ya Modimo, e Jesu e leng Kgosi ya yone. Go na le moo, ba ikanya dipuso tsa batho. Go farologana le seo, batho ba ba tla bolokwang ba ema nokeng Bogosi jwa Modimo ka boikanyegi e bile ba ruta batho kafa bo tla gololang batho botlhe ba ba ikanyegang ka teng.—Mathaio 4:17.

Fa barutwa ba ga Jesu ba sena go itse dilo tse di tlhokegang gore motho a bolokwe, ba ne ba re: “Ke mang yo gongwe o ka bolokwang?” Jesu o ne a re: “Dilo tse di sa kgonegeng mo bathong di a kgonega mo Modimong.” (Luke 18:18-30) Basupi ba ga Jehofa ba leka ka natla go dira dilo tseno tse di tlhokegang gore ba bone poloko. Gape ba dira ka natla go thusa ba bangwe gore le bone ba bolokwe.