Tota go Diregang fa Motho a Swa?

“Meya yotlhe ga e swe, tota le ya batho ba ba boikepo . . . E re ka e newa kotlhao e e sa feleng ya molelo o o ka se tingweng, mme e sa swe, ga go kafa tlhokofatso ya yone e ka felang ka gone.”—Clement wa Alexandria, mokwadi wa lekgolo la bobedi le la boraro la dingwaga C.E.

FELA jaaka Clement, batho ba ba rotloetsang thuto ya gore dihele ke lefelo la tlhokofatso ba akanya gore batho ba na le moya o o sa sweng. A Baebele e tshegetsa thuto eno? Ela tlhoko gore Lefoko la Modimo la reng fa le araba dipotso tse di latelang.

A motho wa ntlha, Adame, o ne a na le moya o o sa sweng? Fa thanolo ya Baporotesetanta e e itsegeng e le King James Version kgotsa Authorized Version e bua ka go bopiwa ga ga Adame ya re: “MORENA Modimo o ne a bopa motho ka lorole lwa mmu, mme a budulela moya wa botshelo mo marobeng a dinko tsa gagwe; mme motho a nna moya o o tshelang.” (Genesise 2:7) Ela tlhoko gore temana eno ga e re Adame o ne a newa moya.

Ke eng se kgabagare se neng sa diragalela Adame fa a sena go leofa? Kotlhao e Modimo a neng a e ntsha e ne e se ya gore a tlhokofadiwe ka bosakhutleng mo diheleng. Go na le moo, thanolo ya Katoliki ya New American Bible e tlhalosa se Modimo a neng a se bolela: “O tla ja dijo ka mofufutso wa sefatlhego sa gago go fitlha o boela mo leroleng, le o ntshitsweng mo go lone; ka gonne o mmu, mme o tla boela mo mmung.” (Mokwalo o o sekameng ke wa rona; Genesise 3:19) Se Modimo a se buileng ga se reye gore go na le karolo nngwe ya ga Adame e e neng ya tswelela e tshela fa a sena go swa. Fa Adame a ne a swa, moya wa gagwe o ne wa swa.

A go na le motho yo o nang le moya o o sa sweng? Modimo o ne a raya moporofeti Esekiele a re: “Moya o o leofang ke one o o tla swang.” (Esekiele 18:4, The Holy Bible—New International Version) Moaposetoloi Paulo o ne a kwala jaana: “Boleo bo ne jwa tsena mo lefatsheng ka motho [Adame] a le mongwe, mme loso ka boleo, mme  loso lwa aparela batho botlhe, e re ka botlhe ba leofile.” (Baroma 5:12, NAB) Fa e le gore batho botlhe ba leofile, go a utlwala gore meya yotlhe e a swa.

A moya o o suleng o a utlwa kgotsa o itse sengwe? Lefoko la Modimo la re: “Batshedi ba a itse gore ba tla swa, mme baswi ga ba tlhole ba itse sepe.” (Moreri 9:5, NAB) Fa Baebele e tlhalosa se se diragalang fa motho a swa ya re: “O boela mo mmung wa gagwe; ka lone letsatsi leo dikakanyo tsa gagwe di a nyelela.” (Pesalema 146:4, KJ) Fa e le gore baswi “ga ba tlhole ba itse sepe” le ‘dikakanyo tsa bone di a nyelela,’ ba ka utlwa botlhoko jang fa ba tlhokofadiwa kwa diheleng?

Jesu Keresete o ne a se ka a tshwantsha loso le boemo jo motho a ka ikutlwang fa a le mo go jone, go na le moo o ne a lo tshwantsha le boroko. * (Johane 11:11-14) Le fa go ntse jalo, bangwe ba ka nna ba re Jesu o ne a ruta gore dihele di a fisa le gore baleofi ba ne ba tla latlhelwa mo molelong wa dihele. A re sekasekeng se tota Jesu a ileng a se bua ka dihele.

[Ntlha e e kwa tlase]