A o Ne o Itse?

Tlwaelo ya go ronopa e ne e le eng, mme e ne e solegela bomang molemo?

▪ Molao wa ga Moshe o ne o thibela balemi go roba sengwe le sengwe se se mo tshimong. Go na le moo, ba ba neng ba roba dijo tsa ditlhaka ba ne ba sa tshwanela go roba go fitlha kwa dintlheng tsa tshimo. Batho ba ba neng ba phutha morara ba ne ba sa tshwanela go phutha o o neng o gasame kgotsa go boa ba ya go roba o o neng o sa butswa fa ba ne ba roba la ntlha. Ba ba neng ba photha dikala tsa ditlhare tsa motlhware ba ne ba tshwanetse go tlogela maungo a a neng a sa wa. (Lefitiko 19:9, 10; Duteronome 24:19-21) Go tswa foo bahumanegi, masiela, batlholagadi le baagi ba baeng ba ne ba ka ronopa—kgotsa go sela—mo go neng go setse ka nako ya thobo.

Molao ono wa go ronopa o ne o solegela Baiseraele botlhe molemo. O ne o kgothaletsa mong wa tshimo go nna pelotshweu, go se nne pelotshetlha le go ikaega ka Modimo gore a mo segofatse. O ne o kgothaletsa ba ba neng ba ronopa gore e nne dinatla, ka gonne go ronopa go ne go tlhoka gore motho a dire ka natla. (Ruthe 2:2-17) Go ronopa go ne go dira gore bahumanegi ba se ka ba bolawa ke tlala kgotsa ba nna morwalo mo setšhabeng. Gape go ne go dira gore ba se ka ba ikutlwa e se batho ba sepe ka gonne ba tshwanelwa ke go kopa kgotsa go tshela ka go fiwa.

Ke ka ntlha yang fa Solomone a ne a laela gore go tsewe dikgong kgakala jaana kwa Lebanona gore di dirisediwe go aga tempele kwa Jerusalema?

▪ Pego e e mo go 1 Dikgosi 5:1-10 e tlhalosa tumalano e Solomone a neng a e dira le kgosi ya Ture e bong Hirame. Go ya ka tumalano eo, ditlhomeso tsa mosedara le dikgong tsa mofira di ne di tla pegwa mo makaweng a dikota di bo di isiwa kwa Iseraele ka lewatle go tswa kwa Lebanona di bo di dirisediwa go aga tempele.

Kwa dinageng tsa bogologolo tsa Botlhabagare, ditlhare tsa mosedara di ne di rekwa thata. Kwa Egepeto le kwa Mesopotamia, logong lwa mofuta ono lo ne lo dirisiwa ka metlha go dira ditlhomeso le go kgabisa ditempele le matlo a segosi. Direkoto tsa segosi, dibuka le mekwalo e e gabilweng di bontsha gore dikgong tsa mosedara di ne di isiwa kwa dikgaolong tse di farologaneng tsa borwa jwa Mesopotamia, ka dinako tse dingwe di thopilwe kwa ntweng kgotsa e le mpho e e newang kgosi. Kwa Egepeto, di ne di dirisediwa go aga mekoro ya segosi, makesi le dilo tse dingwe tse di neng di dirisiwa mo phitlhong.

Dikgong tsa mosedara tsa kwa Lebanona di ne di itsege ka gore di thata, di dintle, di nkga monate e bile di sa jewe ke ditshenekegi. Ka jalo, Solomone o ne a dirisa didirisiwa tse di molemo go gaisa fa a aga tempele. Gompieno mo dithabeng tsa Lebanona tse di kileng tsa bo di apesitswe ke dikgwa tsa ditlhare tsa mosedara, go setse dikgwa di sekae fela tse dinnye tse di sa kitlanang.

[Setshwantsho mo go tsebe 15]

Go thothiwa ga dikgong tsa mosedara go tswa kwa Lebanona, setshwantsho se se gabilweng sa kwa Asiria se se tswang kwa ntlong ya segosi ya ga Saragone

[Motswedi wa Setshwantsho]

Erich Lessing/Art Resource, NY