FA RRE le morwawe yo mmotlana ba ipaakanyetsa go kgabaganya mmila o o tlhanaselang, rre o raya morwawe a re: “Ntshwara ka seatla.” Morwa ga a boife e bile o ikutlwa a babalesegile fa seatlanyana sa gagwe se feletse mo seatleng sa ga rraagwe se se nonofileng. A o kile wa eletsa e kete mongwe a ka go tshwara ka seatla a bo a go tataisa gore o fete o babalesegile mo ditlhobaelong tsa botshelo? Fa go le jalo, o ka gomodiwa ke mafoko a a kwadilweng ke Isaia.—Bala Isaia 41:10, 13.

Isaia o ne a lebisitse mafoko a gagwe kwa Baiseraeleng. Le fa Modimo a ne a leba setšhaba seo e le ‘thuo ya gagwe e e kgethegileng,’ se ne se dikologilwe ke baba. (Ekesodo 19:5) A Baiseraele ba ne ba tshwanetse go boifa? Jehofa o ne a dirisa Isaia go ba bolelela molaetsa o o kgothatsang. Fa re ntse re sekaseka mafoko ao, re nne re gopotse gore a ama le baobamedi ba Modimo gompieno.—Baroma 15:4.

Jehofa o rotloetsa jaana: “O se ka wa boifa.” (Temana 10) O na le lebaka la go bo a bua jalo. Jehofa o tlhalosa gore ke eng fa batho ba gagwe ba sa tshwanela go boifa: “Gonne ke na le wena.” Ga a kgakala le rona e bile ga a solofetse gore o tla tla fela fa re tlhoka thuso ya gagwe. O batla gore batho ba gagwe ba itse gore o na le bone—jaaka e kete o fa thoko ga bone—a iketleeleditse go ba tshegetsa ka metlha. A seo ga se kgothatse?

Gape Jehofa o tlhomamisetsa baobamedi ba gagwe jaana: “O se ka wa leba kwa le kwa.” (Temana 10) Lediri la Sehebera le le dirisitsweng fano le ka kaya batho ba ba “lebang mo matlhakoreng otlhe go bona gore a ga go na sepe se se ka ba utlwisang botlhoko.” Jehofa o tlhalosa gore ke eng fa batho ba gagwe ba sa tshwanela go leba kwa le kwa ba boifa, a re: “Gonne ke Modimo wa gago.” Ruri mafoko ao a a kgothatsa? Jehofa ke “Mogodimodimo,” “Mothatayotlhe.” (Pesalema 91:1) E re ka ba na le Jehofa, Modimo wa bone yo o maatlaotlhe, tota ba tla bo ba boifa eng?

Ka jalo, ke eng se baobamedi ba ga Jehofa ba ka se lebelelang mo go ene? O solofetsa jaana: “Ruri ke tla go ngangatlela ka thata ka seatla sa me sa moja sa tshiamo.” (Temana 10) Gape a re: “Nna, Jehofa Modimo wa gago, ke tshwere seatla sa gago sa moja.” (Temana 13) Fa o utlwa mafoko ano o akanyang? Buka nngwe e tlhalosa jaana: “Fa ditemana tseno tse pedi di sekasekwa mmogo di dira gore re akanye ka motsadi le ngwana. [Rre] ga a lete fela gore a tle a femele ngwana wa gagwe fa go tlhokega mme gape o nna a le gaufi le ene; ga a ka ke a letla sepe se mo kgaoganya le ene.” Akanya fela—Jehofa ga a ka ke a letla sepe se mo kgaoganya le batho ba gagwe, tota le fa ba lebana le dinako tse di lebegang di le thata go gaisa tsotlhe mo botshelong.—Bahebera 13:5, 6.

Gompieno baobamedi ba ga Jehofa ba ka gomodiwa ke mafoko a Isaia a neng a a kwala. Mo ‘dinakong tseno tsa mathata tse go leng boima go lebana le tsone,’ ka dinako tse dingwe re ka ikutlwa re imelwa ke mathata a botshelo. (2 Timotheo 3:1) Mme ga re a tshwanela go lebana le dikgwetlho tseo re le rosi. Jehofa o iketleeleditse go re tshwara ka seatla. Fela jaaka bana ba ba ikanyang rraabone, re ka tshwara seatla sa gagwe se se maatla, re solofela gore o tla re kaela kwa go tshwanetseng a bo a re thusa fa re tlhoka thuso.—Pesalema 63:7, 8.

Dikgaolo tsa Baebele tse di ka balwang ka January:

▪ Isaia 24-42