Puisano le Moagelani A Jesu ke Modimo?

BASUPI BA GA JEHOFA ba itumelela go tlotla le baagelani ba bone ka Baebele. A go na le kgang nngwe ya Baebele e o kileng wa ipotsa ka yone? A o ka rata go itse sengwe ka se Basupi ba ga Jehofa ba se dumelang kgotsa dilo dingwe tse ba di dirang mo bodumeding jwa bone? Fa go le jalo, mo nakong e e tlang fa o kopana le Mosupi mongwe o se ka wa okaoka go mmotsa ka kgang eo. A ka itumelela go tlotla le wena ka dikgang tse di ntseng jalo.

Motlotlo o o latelang ke o o tlwaelegileng o mongwe wa Basupi ba ga Jehofa a ka nnang le one le moagelani. A re re Mosupi mongwe yo o bidiwang Boitshoko o etetse mosadi mongwe yo o bidiwang Kutlo kwa legaeng la gagwe.

A ke Boammaaruri Gore ga lo Dumele mo go Jesu?

Kutlo: Moruti wa me a re Basupi ba ga Jehofa ga ba dumele mo go Jesu. A ke boammaaruri?

Boitshoko: Mma ke go tlhomamisetse gore re dumela mo go Jesu. Tota e bile, re dumela gore go dumela mo go Jesu go botlhokwa gore motho a bolokwe.

Kutlo: Seo ke se le nna ke se dumelang.

Boitshoko: Ka jalo, seno ke sengwe se nna le wena re dumalanang ka sone. Pele ke lebala, leina la me ke Boitshoko. Wena o bidiwa mang?

Kutlo: Ke nna Kutlo. Ke itumelela go go itse.

Boitshoko: Le nna ke itumelela go go itse, Kutlo. Gongwe o ka tswa o ipotsa gore, ‘Fa e le gore tota Basupi ba ga Jehofa ba dumela mo go Jesu, ke ka ntlha yang fa batho ba re ga ba dumele mo go ene?’

Kutlo: Ee, nka rata go itse.

Boitshoko: Ka bokhutshwane fela nka re, re dumela mo go Jesu mme ga re dumele sengwe le sengwe se se buiwang ka ene.

Kutlo: A o ka mpolelela gore ke eng se lo sa se dumeleng ka ene?

Boitshoko: Ee. Batho bangwe ba re Jesu e ne e le monna yo o molemo fela. Mme ga re dumalane le kgopolo eo.

Kutlo: Le nna ga ke dumalane le yone.

Boitshoko: Ka jalo seno ke selo se sengwe gape se nna le wena re dumalanang ka sone. Selo sa bobedi se se dirang gore Basupi ba ga Jehofa ba se ka ba dumela sengwe le sengwe se se buiwang ka ga Jesu ke dithuto tse di ganetsanang le se Jesu ka boene a neng a se bua malebana le kafa ene le Rraagwe ba amanang ka gone.

Kutlo: O raya jang?

Boitshoko: Madumedi a le mantsi a ruta gore Jesu ke Modimo. Gongwe le wena o rutilwe jalo.

Kutlo: Ee, moruti wa me a re Modimo le Jesu ke motho a le mongwe.

Boitshoko: Le fa go ntse jalo a ga o dumalane gore tsela e e molemo ya go ithuta boammaaruri ka ga Jesu ke go sekaseka se ene ka boene a se buileng?

Kutlo: Ee, ke a dumalana.

Jesu O ne A Reng?

Boitshoko: A re sekaseke temana ya Baebele e e re thusang go tlhaloganya kgang eno. Tsweetswee ela tlhoko se se mo go Johane 6:38. Jesu o ne a re: “Ke fologile kwa legodimong go tla go  dira, e seng thato ya me, fa e se thato ya yo o nthomileng.” Polelwana eno e ne e ka tlhakanya tlhogo tota fa e le gore Jesu ke Modimo.

Kutlo: O raya jang?

Boitshoko: Ela tlhoko gore Jesu o ne a re ga a ka a fologa kwa legodimong go tla go dira thato ya gagwe.

Kutlo: Ee, o rile o ne a tletse go dira thato ya yo o mo romileng.

Boitshoko: Mme fa e le gore Jesu ke Modimo, ke mang yo o mo romileng go tswa kwa legodimong? E bile go ne go ka direga jang gore Jesu a ineele fela go dira thato ya motho yoo?

Kutlo: Ke tlhaloganya se o se bolelang. Mme ga ke tlhomamisege gore temana e le nngwe eno e ka neela bosupi jwa gore Jesu ga se Modimo.

Boitshoko: Ela tlhoko se Jesu a neng a se bua mo lekgetlhong le lengwe. O ne a bua se se tshwanang mo kgaolong e e latelang ya Johane. Ke kopa gore o bale Johane 7:16.

Kutlo: Ee, ke tla e bala. “Jesu, le ene, a ba araba a re: ‘Se ke se rutang ga se sa me, mme ke sa yo o nthomileng.’”

Boitshoko: Ke a leboga, Kutlo. Go ya ka temana eno, a Jesu o ne a ruta dikgopolo tsa gagwe?

Kutlo: Nnyaa, o ne a re se a se rutang ke sa yo o mo romileng.

Boitshoko: Go ntse jalo. Gape seo se dira gore re ipotse gore: ‘Ke mang yo o romileng Jesu? E bile ke mang yo o mo neileng boammaaruri jo a neng a bo ruta?’ A motho yoo ga a tshwanela a bo a le mogolo mo go Jesu? Boammaaruri ke gore, motho yo o romang yo mongwe o mogolo mo go yo a mo romang.

Kutlo: A masha mo ditsebeng tsa me. Ga ke ise ke ko ke bale temana eo.

Boitshoko: Ela tlhoko le mafoko ano a ga Jesu a a mo go Johane 14:28: “Lo utlwile gore ke lo reile ka re, ke a tsamaya e bile ke boela morago kwa go lona. Fa lo ne lo nthata, lo ne lo tla ipelela gore ke a tsamaya ke ya kwa go Rara, ka gonne Rara o mogolo bogolo go nna.” Go ya ka temana eo, o akanya gore Jesu o ne a leba jang tsela e ene le Rara ba amanang ka yone?

Kutlo: O ile a re Rara o mogolo bogolo mo go ene. Ka jalo, ke akanya gore o ne a tsaya Modimo a le mogolo mo go ene.

Boitshoko: Ee, go ntse fela jalo. Go bona sekai se sengwe, ela tlhoko se Jesu a ileng a se bolelela barutwa ba gagwe jaaka go kwadilwe mo go Mathaio 28:18. Temana eo ya re: “Taolo yotlhe ke e neilwe kwa legodimong le mo lefatsheng.” A Jesu o ne a re o ne a ntse a na le taolo yotlhe?

Kutlo: Nnyaa, o ne a re o neilwe taolo.

Boitshoko: Mme fa e le gore Jesu ke Modimo, a ka newa taolo e e oketsegileng jang? Mme ke mang yo o neng a e mo naya?

Kutlo: Tota ga ke itse.

O ne A Bua le Mang?

Boitshoko: Go na le selo se sengwe gape se se gakgamatsang fa e le gore tota Jesu ke Modimo.

Kutlo: Ke eng seo?

Boitshoko: Ke se re se balang ka ga go kolobediwa ga ga Jesu. Ela tlhoko pego e e mo go Luke 3:21, 22. Ke kopa gore o bale ditemana tseno.

Kutlo: “Jaanong e rile batho botlhe ba kolobediwa, Jesu le ene a kolobediwa, ya re a ntse a rapela, legodimo la bulwa mme moya o o boitshepo o le mo popegong ya mmele o o tshwanang le wa lephoi wa fologela mo go ene, mme lentswe la tswa kwa legodimong la re: ‘O Morwaake, moratwa; ke go amogetse.’”

Boitshoko: A o tlhokometse gore Jesu o ne a dira eng fa a ne a kolobediwa?

Kutlo: O ne a rapela.

Boitshoko: Ee. Gone mme re ka ipotsa gore, ‘Fa e le gore Jesu ke Modimo, o ne a rapela mang?’

Kutlo: Ke potso e ntle eo. Ke tla tshwanelwa ke go e botsa moruti wa me.

Boitshoko: Go na le se sengwe gape se re tshwanetseng go akanya ka sone, ela tlhoko gore fa Jesu a sena go tswa mo metsing, mongwe o ne a bua go tswa kwa legodimong. A o etse tlhoko gore motho yoo o ne a reng?

Kutlo: O ne a re Jesu ke Morwawe, yo a mo ratang le gore o mo amogetse.

Boitshoko: Ee. Mme fa e le gore Jesu ke Modimo, ke mang yo o neng a bua go tswa kwa legodimong?

Kutlo: Ga ke ise ke ko ke e akanye ka tsela eo.

 Ke Eng fa ba Bidiwa “Rara” le “Morwa”?

Boitshoko: Gape ela tlhoko gore: Re badile gore Jesu o ne a bua ka Modimo a re ke Rraagwe yo o kwa legodimong. Mme fa Jesu a ne a kolobediwa, go ne ga utlwala lentswe go tswa kwa legodimong le re Jesu ke Morwawe. Tota e bile, Jesu o ne a ipitsa Morwa Modimo ka tlhamalalo. Jaanong, fa e le gore o ne o batla go ntlhalosetsa gore batho ba babedi ba a lekana, o ne o tla dirisa sekai sefe sa batho ba ba mo lelapeng go tlhalosa seo?

Kutlo: Ke ne nka dirisa sekai sa motho le morwarraagwe.

Boitshoko: Ee—gongwe le e leng mawelana. Mme Jesu o ne a re Modimo ke Rara mme a re ene ke Morwa. O akanya gore Jesu o ne a batla go re bontsha ntlha efe?

Kutlo: Ke tlhaloganya se o se buang. Jesu o tlhalosa gore motho yo mongwe o mogolo mo go yo mongwe e bile o na le taolo e e oketsegileng go feta ya yo mongwe.

Boitshoko: Ke boammaaruri. Akanya ka seno: O kgonne go akanya ka sekai se se tshwanelang se se bontshang sentle go lekana ga batho, sekai sa bomorwarramotho kgotsa mawelana. Fa e le gore tota Jesu ke Modimo, a ga o akanye gore Jesu jaaka Morutisi yo Mogolo, o ne a ka bo a akantse ka sekai se se tshwanang—kgotsa le e leng se se tlhaloganyegang sentle le go feta?

Kutlo: Ee, a ka bo a ile a dira jalo.

Boitshoko: Go na le moo, o ne a dirisa mafoko “Rara” le “Morwa” go tlhalosa kamano ya gagwe le Modimo.

Kutlo: O bua ntlha e e kgatlhang.

Balatedi ba ga Jesu ba Bogologolo Ba ne Ba Reng?

Boitshoko: Pele ga ke tsamaya, nka rata gore re sekaseke ntlha e nngwe e e amanang le kgang eno, fa e le gore o na le nako.

Kutlo: Ee, ke na le metsotso e sekae.

Boitshoko: Fa e le gore tota Jesu ke Modimo, a barutwa ba gagwe ba ka bo ba sa bua jalo ka tlhamalalo?

Kutlo: Go a utlwala gore ba ne ba tla dira jalo.

Boitshoko: Le fa go ntse jalo, ga go na gope mo Dikwalong mo re balang gore ba ile ba ruta seo. Go na le moo, ela tlhoko se mongwe wa balatedi ba bogologolo ba ga Jesu e bong moaposetoloi Paulo a ileng a se kwala. Mo go Bafilipi 2:9, o tlhalosa jaana se Modimo a ileng a se dira morago ga loso le tsogo ya ga Jesu: “Modimo o ne a . . . godisetsa [Jesu] kwa boemong jo bo kwa godimo mme ka bopelonomi a mo naya leina le le kwa godimo ga leina lengwe le lengwe le sele.” Go ya ka temana eno, Modimo o ne a direla Jesu eng?

Kutlo: Temana eno ya re Modimo o ne a mo godisetsa mo boemong jo bo kwa godimo.

Boitshoko: Ee. Mme fa e le gore Jesu o ne a lekana le Modimo pele ga a swa mme moragonyana Modimo a mo godisetsa mo boemong jo bo kwa godimo, a seo se ne se se kitla se dira gore Jesu a nne mo boemong jo bo kwa godimo ga jwa Modimo? Tota go ka tla jang gore motho a nne le maemo a a fetang a Modimo?

Kutlo: Ga go kgonege.

Boitshoko: Ke dumalana le wena. Ka jalo, go ya ka bosupi jono jotlhe, a o ka re Baebele e ruta gore Jesu ke Modimo?

Kutlo: Nnyaa, ga go bonale jalo. Baebele ya re ke Morwa Modimo.

Boitshoko: Go ntse jalo. Mme gone, mma ke go tlhomamisetse gore Basupi ba ga Jehofa ba tseela Jesu kwa godimo thata. Re dumela gore loso lwa gagwe e le Mesia yo o solofeditsweng lo dirile gore batho botlhe ba ba ikanyegang ba bolokwe.

Kutlo: Le nna ke dumela jalo.

Boitshoko: Ka jalo, o ka tswa o ipotsa gore, ‘Re ka bontsha Jesu jang gore re anaanela go bo a ile a re ntshetsa botshelo jwa gagwe?’ *

Kutlo: Ke ntse ke ipotsa gore nka dira seo jang.

Boitshoko: Gongwe ke tla boa ke tlotla le wena gape ka karabo e e tswang mo Baebeleng. A o tla bo o le mo gae beke e e tlang ka yone nako eno?

Kutlo: Ee, ke tla bo ke le teng.

Boitshoko: Go siame, ke tla go bona.

[Ntlha e e kwa tlase]