Ithute mo Lefokong la Modimo

Dikgang Tse di Molemo Tse Di ka Ga Bodumedi ke Dife?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba ka itumelela go tlotla ka dikarabo tseno le wena.

1. A madumedi otlhe a siame?

Mo madumeding a le mantsi go na le batho ba le bantsi ba ba peloephepa ba ba batlang go itumedisa Modimo. Modimo o bona batho bao e bile o amega ka bone. Le fa go ntse jalo, ka maswabi, batho bangwe ba ile ba dirisa bodumedi go diragatsa maikaelelo a bone a a bosula. Mo nakong e e fetileng, baeteledipele ba bodumedi ba ne ba bo ba bogisa batho ba ba neng ba le kgatlhanong le bone. (2 Bakorintha 4:3, 4; 11:13-15) Go ya ka dipego tsa dikgang, gompieno bangwe ba baeteledipele ba bodumedi ba kgothaleditse thubakanyo kgotsa ba nnile le seabe mo dintweng kgotsa mo go sotleng bana.—Bala Mathaio 24:3-5, 11, 12.

Baebele e ruta gore go na le mefuta e le mebedi ya bodumedi—bodumedi jwa boammaaruri le bodumedi jwa maaka. Bodumedi jwa maaka ga bo rute boammaaruri ka Modimo. Le fa go ntse jalo, Jehofa Modimo o batla gore batho ba itse boammaaruri ka ene.—Bala 1 Timotheo 2:3-5.

2. Dikgang tse di molemo tse di ka ga bodumedi ke dife?

Modimo ga a batle gore batho ba tsiediwe ke madumedi a a ipolelang gore a a mo rata mme a sa rute boammaaruri ka ene. E bile maloko a madumedi ao a rata go nna ditsala tsa lefatshe leno le le laolwang ke Satane Diabolo. (Jakobe 4:4; 1 Johane 5:19) Madumedi a a ikobelang dipuso tsa batho go na le go ikobela Modimo, a tlhalosiwa jaaka seaka mo Lefokong la Modimo. Baebele e bitsa seaka seno e re ke “Babelona yo Mogolo” e leng leina la motse mongwe wa bogologolo o bodumedi jwa maaka bo simologileng kwa go one morago ga Morwalela wa motlha wa ga Noa. Go ise go ye kae, Modimo o tla fedisa bodumedi jo bo tsietsang le jo bo gatelelang batho.—Bala Tshenolo 17:1, 2, 5, 17; 18:8, 23, 24.

 3. Modimo o tla tlisa jang boipelo mo lefatsheng lotlhe?

Go atlholwa ga bodumedi jwa maaka mo go tlogang go direga ke dikgang tse di molemo. Go tla golola batho ba ba mo lefatsheng lotlhe mo kgatelelong. Bodumedi jwa maaka ga bo ka ke jwa tlhola bo tsietsa le go kgaoganya batho. Batho botlhe ba ba tshelang ba tla nna seoposengwe mo kobamelong ya Modimo a le mongwe fela wa boammaaruri.—Bala Isaia 11:9; Tshenolo 18:20, 21; 21:3, 4.

4. Batho ba ba peloephepa ba tshwanetse go dira eng?

Jehofa ga a lebala batho ba ba peloephepa ba ba leng mo madumeding a maaka a a mo lefatsheng lotlhe. O dira gore batho bao ba nne seoposengwe ka go ba ruta boammaaruri.—Bala Mika 4:2, 5.

Jehofa o amogela mo lelapeng la gagwe batho ba ba batlang go mo direla. Tota le fa ditsala tsa rona le ba losika ba sa itumele fa re simolola go direla Jehofa, re solegelwa molemo tota. Re nna le kamano e e molemo le Modimo, lelapa la tshwantshetso le lesha le le le lorato le tsholofelo ya go tshelela ruri.—Bala Mareko 10:29, 30; 2 Bakorintha 6:17, 18.

Fa o batla tshedimosetso e e oketsegileng, bona kgaolo 15 le 16 ya buka ya Totatota Baebele e Ruta Eng? e e gatisitsweng ke Basupi ba ga Jehofa.

[Motswedi wa Setshwantsho mo go tsebe 16]

The Complete Encyclopedia of Illustration/​J. G. Heck