A o eletsa go nna le botsogo jo bo siameng le gore wena le ba lelapa la gago lo tshele nako e telele? A o eletsa go tshela mo lefatsheng le mo go lone dilo tse di jaaka botlhoko, pogo le loso e tla bong e le dilo tsa nako e e fetileng? Lefatshe le le ntseng jalo ga se toro fela. Go na le moo, lefatshe le lesha la tshiamo e tla tloga e nna selo sa mmatota, ka gonne ke boikaelelo jwa ga Jehofa Modimo. Ela tlhoko kafa go diragadiwa ga maikaelelo a gagwe go tlhalosiwang ka teng mo go Tshenolo 21:3-5.—Bala.

“[Modimo] o tla phimola dikeledi tsotlhe mo matlhong a bone.” (Tshenolo 21:4) O tla phimola dikeledi tse di ntseng jang? E ka se ka ya nna dikeledi tsa boitumelo kgotsa tse di sireletsang matlho a rona. Tsholofetso eno ya Modimo e bua ka dikeledi tse di bakiwang ke go boga le kutlobotlhoko. Modimo a ka se phimole fela dikeledi tse di ntseng jalo; o tla di phimola gotlhelele ka go tlosa dilo tse di bakang dikeledi tse di sa batlegeng—go boga le kutlobotlhoko.

“Loso lo tla bo lo seyo.” (Tshenolo 21:4) A go na le sengwe se se re baketseng dikeledi tse di sa tlhokegeng go gaisa mmaba, e leng loso? Jehofa o tla dira gore batho ba ba kutlo ba se ka ba tlhola ba swa. Jang? Ka go fedisa selo se tota se bakang loso: boleo jo re bo ruileng mo go Adame. (Baroma 5:12) Jehofa o tla dira gore batho ba ba kutlo ba itekanele, a dira seo mo motheong wa setlhabelo sa thekololo sa ga Jesu. * Go tswa foo, mmaba wa bofelo e leng loso, o tla “nyelediwa.” (1 Bakorintha 15:26) Batho ba ba ikanyegang ba tla kgona go tshela ka tsela e Modimo a neng a ikaeletse gore ba tshele ka yone—go tshelela ruri ba na le botsogo jo bo itekanetseng.

‘Le fa e le botlhoko bo tla bo bo sa tlhole bo le gone.’ (Tshenolo 21:4) Ke botlhoko jwa mofuta ofe jo bo tla bong bo sa tlhole bo le gone? Botlhoko jotlhe jwa tlhaloganyo, maikutlo le jwa mmele jo bo bakilweng ke boleo le bosaitekanelang mme jwa dira gore botshelo jwa batho ba ba dimilione tse dintsi e nne jo bo utlwisang botlhoko, bo tla bo bo sa tlhole bo le gone.

Go ise go ye kae, botshelo kwantle ga loso le botlhoko e tla tloga e nna selo sa mmatota. Mme o ka nna wa ipotsa gore ‘Gone go tla direga kae?’ A gongwe tsholofetso eno ya Modimo e bua ka botshelo jwa kwa legodimong?’ Nnyaa. Ela tlhoko gore ke ka ntlha yang e se jwa kwa legodimong. Sa ntlha, tsholofetso eno e simolola ka mafoko a a reng “mogope wa Modimo o mo bathong,” mme batho ba nna mo lefatsheng. (Tshenolo 21:3) Sa bobedi, tsholofetso eno e tlhalosa ka lefatshe le mo go lone ‘loso lo tla bong lo seyo’—lefatshe le go kileng ga bo go na le loso mo go lone, mme le tla bo le sa tlhole le le gone. Ga go ise go ke go nne le loso kwa legodimong, mme ga lo bolo go nna teng mo lefatsheng. Ka jalo, ga go pelaelo gore tsholofetso ya Modimo ka ga botshelo jo bo botoka e tla diragadiwa gone mo lefatsheng.

Jehofa o batla gore re dumele tsholofetso ya gagwe kaga lefatshe le lesha la tshiamo. Fa a sena go tlhalosa masego a a tlang, o re tlhomamisetsa ka go bolela jaana ka tsholofetso ya gagwe: “Bona! Ke dira dilo tsotlhe disha.” A bo a oketsa ka gore: “Mafoko ano a a ikanyega e bile a boammaaruri.” (Tshenolo 21:5) Ke eng o sa ithute mo go oketsegileng malebana le kafa wena le baratiwa ba gago lo ka nnang bangwe ba baobamedi ba ba itumetseng, ba ba tla bonang go diragadiwa ga tsholofetso ya Modimo ka tsela e e itumedisang ka gone?