Loso lwa ga Jesu ke tiragalo e e botlhokwa thata mo hisitoring—o ne a re swela gore re bone botshelo jo Modimo a neng a batla gore re bo tshele. Motho o ne a sa bopiwa a na le tshekamelo ya go dira bosula, go lwala kgotsa go swa. (Genesise 1:31) Mme boleo bo tsene mo lefatsheng ka motho a le mongwe e bong Adame. Jesu o ne a swa gore a re golole mo boleong le mo losong.—Bala Mathaio 20:28; Baroma 6:23.

Fa Modimo a ne a romela Morwawe mo lefatsheng gore a re swele, o ne a bontsha gore o a re rata. (1 Johane 4:9, 10) Jesu o ne a bolelela barutwa ba gagwe gore ba gopole loso lwa gagwe ka go dira moletlo o monnye o mo go one go nang le beine le senkgwe. Go dira jalo ngwaga le ngwaga go bontsha gore re anaanela tsela e Modimo le Jesu ba re ratang ka yone.—Bala Luke 22:19, 20.

Fa Jesu a ne a re barutwa ba gagwe ba gopole loso lwa gagwe, o ne a bua ka kgolagano kgotsa tumalano. (Mathaio 26:26-28) E ne e tla dira gore bone le batho ba bangwe ba palo e e lekanyeditsweng ba nne dikgosi le baperesiti kwa legodimong. Le fa gone batho ba le dimilione ba gopola loso lwa ga Jesu, ke ba ba mo kgolaganong eo fela ba ba jang senkgwe le go nwa beine.—Bala Tshenolo 5:10.

Mo e ka nnang dingwaga di le 2 000, Jehofa o ntse a tlhopha ba ba tla nnang dikgosi. (Luke 12:32) Ba mmalwanyana fela fa ba bapisiwa le ba ba tla tshelelang ruri mo lefatsheng.—Bala Tshenolo 7:4, 9, 17.