Jehofa Modimo ke Motswedi wa botshelo. (Pesalema 36:9) Ka jalo, a ga go utlwale gore Modimo a ka kgona go tsosa baswi? Baebele e re tlhomamisetsa gore o tla dira sone seo mo nakong e e tlang. (Bala Ditiro 24:15) Mme goreng a tlile go dira jalo?

Mmopi wa rona o ne a ikaeletse gore batho ba tshelele ruri mo lefatsheng. (Genesise 1:31; 2:15-17) O sa ntse a batla gore batho ba tshelele ruri. O utlwisiwa botlhoko ke go bona gore re lebana le eng gompieno—matshelo a a tletseng bohutsana le a a makhutshwane.—Bala Jobe 14:1, 14, 15.

A Modimo o bopetse batho go tshela kwa legodimong? Nnyaa. Modimo o bopetse baengele gore ba tshele kwa legodimong. O bopetse batho gore ba tshele mo lefatsheng. (Genesise 1:28; Jobe 38:4, 7) O ntse o akantse ka seo, akanya ka batho ba Jesu a neng a ba tsosa. O ne a ba tsosa gore ba tshele mo lefatsheng. Ka tsela e e tshwanang, bontsi jwa batho ba ba tla tsosiwang mo nakong e e tlang ba tla tshela mo lefatsheng.—Bala Johane 5:28, 29; 11:44.

Le fa go ntse jalo, Modimo o tlhophile batho ba le mmalwa ba ba tsosediwang go ya go tshela kwa legodimong ka mebele ya moya. (Luke 12:32; 1 Bakorintha 15:49, 50) Ba ba tsosiwang gore ba ye go tshela kwa legodimong ba tla busa lefatshe le Keresete e le dikgosi.—Bala Tshenolo 5:9, 10.