Tlolaganyo ya bofelo e Jesu a neng a tla e keteka e ne e tla nna ya botlhokwa tota. O ne a tloga a swa mme o ne a rulaganya gore a je dijo tsa Tlolaganyo le baaposetoloi ba gagwe, go tswa foo, o ne a tla simolola thulaganyo ya ngwaga le ngwaga ya Sejo sa Morena sa Maitseboa. Ka ntlha ya seno, o ne a roma Petere le Johane gore ba ye go baakanya phaposi e ba neng ba tla jela Tlolaganyo mo go yone. (Luk 22:7-13; bona setshwantsho sa khabara.) Seno se re gopotsa gore re tshwanetse go baakanyetsa Segopotso se se tla tshwarwang ka March 27. Mo diphuthegong, go setse go dirilwe dithulaganyo tsa gore ke mang yo o tla neelang puo, yo o tla dirang ditshwantshetso le dilo tse dingwe. Mme gone, mongwe le mongwe wa rona a ka dira eng gore a ipaakanyetse Segopotso?

Bontsha gore o lebogela setlhabelo sa ga Jesu. Bala o bo o tlhatlhanye ka mmalo wa Baebele wa Segopotso. Ditemana tseno di ka fitlhelwa mo bukaneng ya Go Tlhatlhoba Dikwalo ka Malatsi Otlhe. Mo bukaneng ya Kaedi ya go Ithuta Lefoko la Modimo, kgaolo 16, o tla fitlhela ditemana tse di oketsegileng. (Gape o ka bala Bukana ya Botshelo le Bodiredi ya April 2020.) Fa malapa a batla go ithuta ka botlhokwa jwa thekololo ka nako ya kobamelo ya lelapa, ba ka dirisa Watch Tower Publications Index kgotsa Kaedi ya go Dira Dipatlisiso ya Basupi ba ga Jehofa.

Laletsa ba bangwe. Ka letsholo la Segopotso, laletsa batho ba le bantsi ka mo go ka kgonegang. O se ka wa lebala ba o kileng wa boela kwa go bone, ba o kileng wa ithuta Baebele le bone, ba o kileng wa kopana le bone mmogo le ba masika. Bagolwane ba se ka ba lebala go laletsa ba ba tsidifetseng. Fa mongwe a nna kgakala le wena, mme o batla go mo laletsa, o ka mmatlela nako le lefelo le le gaufi le ene le Segopotso se tla tshwarelwang kwa go lone ka go tsena mo jw.org o bo o tobetsa karolo ya KA GA RONA o bo o tobetsa “Segopotso.”

Re ka dira eng gape go ipaakanyetsa Segopotso?