“Ka ko kinautolu ʻoku ʻamanaki kia Sihová te nau maʻu ʻa e mālohi. Te nau puna ʻo hangē ʻoku nau maʻu ha kapakau ʻo e fanga ʻīkalé. Te nau lele pea ʻe ʻikai te nau ongosia; te nau lue ʻo ʻikai ke helaʻia.”​—‘Aisea 40:31, Liliu Tohi Tapu Māmani Foʻoú.

 “Ka ko kinautolu oku tatali kia Jihova e fakafoou ho nau malohi; te nau buna hake aki ae kabakau o hage koe faga ikale; te nau lele ka e ikai vaivai; bea te nau eveeva ka e ikai bogia.”—‘Aisea 40:31, Paaki Motuʻa.

 Ko Sihova a ko e ʻOtuá ʻokú ne fakapapauʻi ki heʻene kau lotú te ne ʻoange kiate kinautolu ʻa e mālohi ʻoku fiemaʻú ke ikuʻi pe kātekina ha faʻahinga palopalema pē te nau fehangahangai nai mo ia.

 “Ko kinautolu ʻoku ʻamanaki kia Sihová te nau maʻu ʻa e mālohi.” Ko e faʻahinga ʻoku nau maʻu ʻa e ʻamanakí pe falala ki he malava mo e loto-lelei ʻa e ʻOtuá ke ne tokoniʻi ʻene kakaí ʻe lava ke nau fakapapauʻi te ne poupouʻi kinautolu. (Palōveepi 3:5, 6) Ko e founga ʻe taha ʻe lava ke fakaivimālohiʻi ai ʻe he ʻOtuá ʻa e faʻahinga ʻoku nau lotu kiate iá ʻoku fakafou ia ʻi hono laumālie māʻoniʻoní pe ivi ngāué.—Luke 11:13.

 “Te nau puna ʻo hangē ʻoku nau maʻu ha kapakau ʻo e fanga ʻīkalé.” Ko e lea fakaefakatātā ko ení ʻokú ne fakatātaaʻi ʻa e anga ʻo e ngāue ʻa e mālohi ʻa Sihová ʻi ha tokotaha. Ko ha ʻīkale ʻokú ne fakafalala ki ha ngaahi fokotuʻunga ʻea māfana ke puna hake mo tētē ʻi he ʻataá. ʻI hono fakatokangaʻi pē ʻe ha ʻīkale ha fokotuʻunga ʻea mafana ʻoku mafola hake leva hono kapakaú pea puna takatakai ʻi he fokotuʻunga ʻea ko iá ʻo puna māʻolunga hake ki ʻolunga pea toe māʻolunga ange. ʻI heʻene puna mei ha fokotuʻunga ʻea māfana ki ha fokotuʻunga ʻea mafana ʻe taha, ʻoku lava ai ʻa e ʻīkalé ʻo tētē ʻi he ʻeá ʻi ha laui houa, ʻo ngāueʻaki ʻa e ivi siʻisiʻi pē lolotonga ʻene puna ki ha feituʻu pau.

 “Te nau lele pea ʻe ʻikai te nau ongosia.” Ko e ngaahi palopalema ʻi he moʻuí ʻe lava ke ne fakavaivaiʻi fakaesino mo fakaeongo kitautolu, ka ʻoku lava ke tau kei hokohoko atu pē ʻi he mālohi ʻoku ʻomai ʻe he ʻOtuá. ʻOku lava ke ne fakaivia kitautolu ke fai ʻa e meʻa ʻoku totonú neongo ʻa e ngaahi faingataʻa kakahá. Ko e ʻapositolo ko Paulá, ʻa ia naʻá ne kātekina ha ngaahi ʻahiʻahi kakaha, naʻá ne tohi: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”—Filipai 4:13.

 Ko e ʻOtuá naʻá ne fakamānavaʻi ʻa e palōfita ko ʻAiseá ke hiki ʻa e ngaahi lea ko ení ʻi he senituli hono valu K.M. Neongo ko e konga Tohi Tapu ko ení ʻoku ngāueʻaki ia ki he kotoa ʻo e kau sevāniti faitōnunga ʻa e ʻOtuá, naʻe tokonaki nai ʻe Sihova ʻa e ngaahi lea ko ení ke fakalototoʻaʻi ʻa e kau Siu ʻa ia naʻe ʻave ki Pāpilone ʻi he taʻu ʻe 70. ʻI he taimi naʻe foki ai ʻa e kau Siú ki honau fonua tupuʻangá hili hono ʻave fakamālohi kinautolú, naʻa nau sio ki hono fakahoko ʻa e ngaahi lea ʻa e ʻOtuá. (ʻAisea 40:1-3) Naʻe ʻoange kiate kinautolu ʻe he ʻOtuá ʻa e mālohi ke fakakakato ʻa e fononga b loloa mo faingataʻa ko ia mei Pāpilone ki Selusalema ʻi he 537 K.M.—ʻAisea 40:29.