ʻOku mau lau ʻa e faʻahinga pē ʻoku nau malangaʻi longomoʻui ʻa e ongoongo lelei ʻo e Puleʻanga ʻo e ʻOtuá ʻi he māhina taki taha ko e Kau Fakamoʻoni ʻa Sihova. (Mātiu 24:14) ʻOku kau heni ʻa e faʻahinga kuo nau papitaiso ko e Kau Fakamoʻoni, pehē ki he faʻahinga neongo ʻoku teʻeki ai ke nau papitaiso, ʻoku nau taau ke kau ʻi he ngāue fakamalangá.

 ʻIkai. ʻOku ʻikai ha kaunga ʻa e paʻangá ki he hoko ha taha ʻo lau ko ha Fakamoʻoni pe maʻu ha faʻahinga ngāue pe monū makehe ʻi heʻemau kautahá. (Ngāue 8:​18-​20) Ko hono moʻoní, ko e lahi taha ʻo e ngaahi tokoní ʻoku ʻikai ke ʻiloʻi ia ʻe ha taha. ʻOku foaki ʻe he Fakamoʻoni taki taha hono taimí, iví mo e koloá ki heʻemau ngāue ʻi māmani lahí ʻo fakatatau ki he holi mo e ngaahi tuʻunga pē ʻaʻaná.​​​—2 Kolinitō 9:7.

 ʻI he māhina taki taha, ʻoku ʻave ʻe he Kau Fakamoʻoní ʻenau līpooti ngāue fakamalangá ki heʻenau fakatahaʻanga fakalotofonuá. ʻOku nau ʻave ʻa e līpooti ko ení ʻi he loto-lelei.

 ʻOku fokotuʻutuʻu ʻa e ngaahi līpooti ʻa e fakatahaʻangá, pea ʻoatu ʻa e fakakātoá ki he ʻōfisi vaʻa fakalotofonuá. ʻOku ʻave ʻe he vaʻá ʻa e fakakātoa ʻo e līpooti ʻa e fonua pe feituʻu taki taha ki heʻemau ʻuluʻi ʻapitanga ʻi māmaní.

 ʻI he ngataʻanga ʻo e taʻu fakangāue kotoa pē, a ʻoku fakapapauʻi ai ʻa e tumutumu ʻo e tokolahi ʻo e Kau Fakamoʻoni ʻi he fonua taki taha he lolotonga ʻo e taʻu ko iá. ʻOku tānaki fakataha ʻa e ngaahi fika ko ení ke fakapapauʻi ʻa e tokolahi ʻo e Kau Fakamoʻoni ʻi māmani lahí. Ko e fakaikiiki ʻo e ngaahi līpooti ki he fonua taki taha, kau ai ʻa e ngaahi hokosia mei he ngāue fakamalangá, ʻoku pulusi ia ʻi he Yearbook of Jehovah’s Witnesses. ʻOku fakalototoʻaʻi kimautolu ʻe he ngaahi līpooti ko ení, ʻo hangē pē ko hono fakalototoʻaʻi ʻa e muʻaki kau Kalisitiané ʻe he ngaahi līpooti meimei tatau.​​​—Ngāue 2:​41; 4:4; 15:3.

 Neongo ʻoku ʻikai ke mau fakakau ʻa e faʻahinga ko iá ʻi he tokolahi ʻo e Kau Fakamoʻoní, ʻoku mau talitali lelei kinautolu ʻi heʻemau ngaahi fakatahaʻangá. Ko e tokolahi taha ʻo kinautolu ʻoku nau maʻu ʻa e Fakamanatu fakataʻu ʻo e pekia ʻa Kalaisí, ko ia ko e tokolahi ʻo e faʻahinga ko iá ʻe lava ke fakafuofuaʻi ʻe he faikehekehe ʻo e kau maʻu fakataha ʻi he fakataha ko ení mo e tokolahi ʻo e Kau Fakamoʻoní. ʻI he 2023, ko e maʻu fakataha ʻi he Fakamanatú naʻe toko 20,461,767.

 ʻOku maʻu ʻaonga ʻa e tokolahi ʻoku ʻikai ke nau maʻu ʻemau ngaahi fakatahá mei heʻemau polokalama ako Tohi Tapu taʻetotongi ʻi ʻapí. Lolotonga ʻa e 2023, naʻa mau fakahoko ai ha ako Tohi Tapu ʻoku fakaʻavalisi ki he toko 7,281,212 ʻi he māhina taki taha, ko e niʻihi ai naʻe fakahoko mo e faʻahinga kehekehe ʻi he taimi tatau.

 ʻOku faʻa fakapapauʻi ʻe he ʻōfisi ʻo e puleʻangá ʻenau fiká ʻaki ʻenau ʻeke ki he kakaí pe ko e lotu fē ʻoku nau kau ki aí. Ko e fakatātaá, ʻoku pehē ʻe he ʻŌfisi Savea ʻa ʻAmeliká ko ʻenau saveá “ʻoku nau feinga ke fakapapauʻi pe ʻoku vakai ʻa e kau talí kia kinautolu ʻoku nau maʻu ha tui fakalotu,” ʻo toe pehē ko e ola ʻo e fiká “ʻoku fakatuʻunga ʻi he fakakaukau fakafoʻituitui kae ʻikai ʻi he ngaahi moʻoniʻi meʻá.” ʻI hono kehé, ʻoku mau lau ko e Kau Fakamoʻoni ʻa Sihova ʻa e faʻahinga pē ʻoku nau malanga ki he niʻihi kehé pea līpooti ʻa e ngāue ko iá, ʻikai ko e faʻahinga ʻoku nau fakahaaʻi pē ko e Kau Fakamoʻoni kinautolu.