Ki he Kau Fakamoʻoni ʻa Sihová, ʻoku ʻikai ha tohi ia ʻe toe mahuʻinga ange ʻi he Tohi Tapú. ʻOku nau ako tuʻumaʻu ia pea ngāueʻaki ia ki hono akoʻi ʻa e niʻihi kehé fekauʻaki mo e ongoongo lelei ʻo e Puleʻanga ʻo e ʻOtuá. (Mātiu 24:14) Ko hono toutou ngāueʻaki ko ení ʻoku ʻuhingá ʻe vave ʻa e maumau ʻenau Tohi Tapú. Ko ia, naʻe ngāue mālohi ʻa e Kau Fakamoʻoní ke fakapapauʻi ko hono toe fakaleleiʻi ʻo e New World Translation of the Holy Scriptures 2013 naʻe fakamānako mo tolonga.

Naʻe fiemaʻu ke fefeka ʻa e Tohi Tapú. ʻI he taimi naʻe lāulea ai ʻa e kau fakafofonga Fakamoʻoni ʻo e kau ngāue pulusi ʻi Wallkill, Niu ʻIoke, U.S.A. ki heʻenau palaní mo e palesiteni ʻo ha kautaha fakatakafi tohi, naʻá ne tala ange kia kinautolu, “ʻOku faingataʻa ke ngaohi ha Tohi Tapu ʻo hangē ko hoʻomou fiemaʻú.” Naʻá ne toe pehē, “ʻOku fakamamahi ka ʻoku moʻoni ko e lahi taha ʻo e ngaahi Tohi Tapú ʻoku faʻu ia ke hā fakaʻofoʻofa ʻi ha tēpile kofi pe ko ha funga laupapa​—kae ʻikai ke tolonga.”

Ko e ngaahi pulusinga ki muʻa ange ʻo e New World Translation naʻe ʻikai ke fuʻu tolonga​—ʻi he taimi ʻe niʻihi, naʻe aʻu ʻo movete ʻi he ʻea fuʻu velá. Naʻe sivisiviʻi ʻe he kau ngāue pulusí ʻa e takafi, ngaahi meʻa fakapipiki mo e ngaahi founga fakatakafí ʻi heʻenau feinga ke maʻu ha Tohi Tapu te ne matuʻuaki ʻa e ngaahi tuʻunga kehekehe ʻo e ʻeá. Makatuʻunga ʻi heʻenau ngaahi fekumí, naʻa nau faʻu ha Tohi Tapu ʻahiʻahi pea ʻave ia ke ʻahiʻahiʻi ʻi he malangá ʻe he Kau Fakamoʻoni ʻi he ngaahi fonua naʻe fuʻu vela ʻaupito ki he ngaahi fonua fuʻu momoko ʻaupito hono ʻeá.

Hili ha māhina ʻe ono, naʻe fakafoki ʻa e Tohi Tapú ki hano siviʻi. Naʻe fai leva ʻe he kau ngāue pulusí ha fakaleleiʻi pea toe ʻoatu ha toe ngaahi tatau ʻahiʻahi. Ko hono fakakātoá, ko e Tohi Tapu ʻe 1,697 naʻe ʻahiʻahiʻi ʻi he malaʻe malangá. Ko e niʻihi ʻo kinautolu naʻe maumau ʻaupito ʻi ha fehālaaki. Ko e fakatātaá, naʻe ngalo ʻa e Tohi Tapu ʻe taha ʻi tuʻa ʻi ha pō ʻuha, pea ko e taha naʻe uku ia ʻi he vai naʻe tafe mai ʻi ha afā. Ko e ola ʻo e ʻahiʻahi ʻi he malaʻe malangá mo e ngaahi fehālākí naʻá ne ʻomai ha fakamatala mahuʻinga fekauʻaki mo e tolonga fakalūkufua ʻa e tohí.

ʻI he 2011, lolotonga hono fai ʻa e ʻahiʻahi ʻi he malaʻe malangá, naʻe fakatau ʻe he Kau Fakamoʻoní ha meʻa ngāue fakatakafi vave foʻou ki heʻenau fale pulusi ʻi Wallkill mo Ebina, Siapani. Ko e taumuʻá ke ʻikai ngata pē ʻi hono aʻusia ʻenau fiemaʻú kae pehē foki ke pulusi ʻa e Tohi Tapu tatau ʻi he ongo feituʻú.

ʻI he 2012, naʻe faʻu ʻe he ongo fale pulusí ʻa e pulusinga ʻo e New World Translation ʻi he lanu ʻuliʻuli mo e lanu maluni ʻo ngāueʻaki ʻa e naunau takafi polyurethane. Kae kehe, naʻe ngāueʻaki ʻe he mīsiní ha kulū mo ha meʻa ki hono takafí ʻa ia naʻe teʻeki ke ʻahiʻahiʻi ʻi he malaʻe malangá, pea ko e takafi naʻa nau faʻú naʻe mapelungofua hili ʻi hono fakapipiki ki he Tohi Tapú. Ko e ngaahi fuofua feinga ke fakaleleiʻi ʻa e palopalemá naʻe ʻikai lavameʻa, ko ia naʻe taʻofi ia.

Naʻe fakatokangaʻi ʻe he tokotaha ʻo e kau ngāué ko e palopalema ʻo e mapelupelú ʻoku ʻiloa ia ʻi he ngaahi takafi ngaofengofuá pea ʻe lava ke faingataʻa hano solova. Ko ia, ʻi he ʻikai hiki ki ha takafi fefeká, naʻe fakapapauʻi ʻe he Kau Fakamoʻoní ke faʻu ha Tohi Tapu takafi ngaofengofua te ne tauhi maʻu ha fōtunga lelei. Hili ha māhina ʻe fā hono ʻahiʻahiʻi, ʻo kau ai hono toutou fakatahaʻi ʻa e kulū mo e ngaahi meʻa takafi, naʻa nau maʻu ʻa e meʻa totonu ke hoko atu ʻa e pulusí—ʻi he taimi ko ení ko ha Tohi Tapu takafi ngaofengofua ʻo ʻikai toe mapelupelu.

ʻI Sepitema 2012, naʻe taʻofi ʻa e fale pulusí hono pulusi ʻa e pulusinga lolotongá, tufaki kotoa ʻa e sitoká pea tatali ke toe fakaleleiʻi ʻa e pulusinga ʻo e New World Translation. Naʻe fakataimitēpileʻi ʻa hono tukuangé ki ʻOkatopa 5, 2013, ʻi he fakataha fakataʻu ʻa e Watch Tower Bible and Tract Society of Pennsylvania.

Naʻe maʻu ʻe he fale pulusí ʻa e faile fakaʻilekitulōnika ʻo e Tohi Tapu foʻoú ʻi he Falaite, ʻAokosi 9, 2013, pea kamata ʻa e pulusí ʻi he ʻaho hokó. Naʻe kakato ʻa e fuofua Tohi Tapú ʻi ʻAokosi 15. ʻI he uike ʻe fitu hono hokó, ko e kau ngāue ʻi Wallkill mo Ebina naʻa nau ngāue ʻaho mo e pō ke pulusi mo fakafolau ʻa e Tohi Tapu ʻe 1,600,000, ʻo feʻunga mo e tokotaha kotoa te ne maʻu ʻa e fakataha fakataʻú ke maʻu ha tatau.

Lolotonga ko e Tohi Tapu foʻoú ʻoku fakaʻofoʻofa mo tolonga, ko e pōpoaki foaki moʻui ʻi aí ʻoku mātuʻaki mahuʻinga ange. Ko e ʻaho hili ʻene maʻu ʻene Tohi Tapu foʻoú, naʻe tohi ʻe ha fefine mei he ʻIunaite Seteté, “Koeʻuhi ko e pulusinga foʻoú, ʻoku malava ke u mahinoʻi lelei ange ʻa e Tohi Tapú.”