Te Ke Ma‘u mei Fē ‘a e ‘Amanaki Mo‘oní?

‘OKU tu‘u ‘a e tā ho‘o uasí pea ‘oku hā ngali ‘oku maumau. Pea ‘i ho‘o feinga ke ngaahi iá, ‘okú ke fehangahangai mo ha ngaahi fili lahi. ‘Oku lahi fau ‘a e ngaahi tu‘uaki ki hono ngaahi ha uasi, pea ko e ni‘ihi ‘oku nau pehē te nau lava, ka ko e ni‘ihi ‘oku fepakipaki ‘enau fakamatalá. Kae fēfē kapau te ke ‘ilo‘i ko ho kaungā‘apí ‘a e tangata pōto‘i na‘á ne fa‘u ‘a e uasi tofu pē ko iá ‘i he ngaahi ta‘u ki mu‘á? ‘Ikai ko ia pē, ka ‘okú ke ‘ilo‘i ‘okú ne loto-lelei ke tokoni‘i koe, ‘o ta‘etotongi. ‘E hā ngali mahino ‘a e fili te ke faí, ‘ikai ko ia?

Fakahoa angé he taimí ni ‘a e uasi ko iá ki ho‘o malava ke ‘amanakí. Kapau te ke fakatokanga‘i kuo hōloa ho‘o ‘amanakí​—‘o hangē ko ia ‘oku hoko ki he tokolahi ‘i he taimi faingata‘a ko ení—​te ke hanga ki fē ki ha tokoni? ‘Oku tokolahi ‘a e kakai ‘oku nau pehē te nau lava ‘o fakalelei‘i ‘a e palopalemá, ka ko ‘enau ngaahi fokotu‘ú ‘oku lava ke fakapuputu‘u mo fepakipaki. Ko ia ko e hā ‘oku ‘ikai ai ke ke ‘alu ki he Tokotaha na‘á ne fa‘u ‘a e fa‘ahinga ‘o e tangatá mo e malava ke nau ma‘u ‘a e ‘amanakí? ‘Oku pehē ‘e he Tohi Tapú “‘oku ‘ikai te ne mama‘o mei ha taha ‘o kitautolu” pea ‘okú ne loto-lelei ‘aupito ke tokoni.​—Ngāue 17:27; 1 Pita 5:7.

Ko ha Fakamatala Loloto Ange ‘o e ‘Amanakí

Ko hono fakamatala‘i ‘e he Tohi Tapú ‘a e ‘amanakí ‘oku mata lahi mo loloto ange ‘i he fakakaukau anga-maheni he ‘ahó ni ‘oku ngāue‘aki ‘e he kau toketā sinó, kau faisaienisí mo e kau toketā faka‘atamaí. Ko e ngaahi fo‘i lea ‘i he mu‘aki lea na‘e ngāue‘aki ‘e he Tohi Tapú ki he “‘amanakí” ‘oku ‘uhingá ko e tatali vēkeveke mo ‘amanekina ha lelei. Ko ia ai, ko e ‘amanakí ‘oku kau ki ai ‘a e me‘a ‘e ua. ‘Oku kaunga ki ai ‘a e holi ki ha me‘a lelei pea mo e makatu‘unga ‘o e tui ‘e hoko mai ha lelei. Ko e ‘amanaki ‘oku ‘omai ‘i he Tohi Tapú ‘oku ‘ikai ko e fakakaukau faka‘ānaua pē. ‘Oku makatu‘unga mālohi ia ‘i ha mo‘oni‘i me‘a mo e fakamo‘oni.

‘I he tu‘unga ko ení, ko e ‘amanakí ‘oku hangē ia ko e tuí, ‘a ia kuo pau ke makatu‘unga ‘i ha fakamo‘oni​—‘o ‘ikai ko e tui kuikui pē. (Hepelū 11:1) Kae kehe, ‘oku fakafaikehekehe‘i ‘e he Tohi Tapú ‘a e tuí mo e ‘amanakí.​—1 Kolinitō 13:13.

Ke fakatātaa‘í: ‘I ha‘o kole ki ha kaume‘a ‘ofeina ke ne fai atu ha me‘a ma‘au, te ke ‘amanaki nai te ne tokoni‘i koe. Ko ho‘o ‘amanakí ‘oku ‘ikai ta‘e‘iai hano makatu‘unga koe‘uhí ‘okú ke tui ki ho kaume‘á​—‘okú ke ‘ilo‘i lelei ia, pea kuó ke sio na‘á ne ngāue anga-‘ofa mo nima-homo ‘i he kuohilí. Ko ho‘o tuí mo ho‘o ‘amanakí ‘okú na felāve‘i vāofi mo fengāue‘aki, ka ‘okú na kehekehe. ‘E lava fēfē ke ke ma‘u ha ‘amanaki pehē ki he ‘Otuá?

Makatu‘unga ki he ‘Amanakí

Ko e ‘Otuá ‘a e matavai ‘o e ‘amanaki mo‘oní. ‘I he taimi ‘o e Tohi Tapú na‘e ui ‘a Sihova ko e “‘amanaki‘anga ‘o ‘Isileli.” (Selemaia 14:8) Ko ha ‘amanaki falala‘anga pē na‘e ma‘u ‘e hono kakaí na‘e ha‘u ia meiate ia; ko ia, na‘á ne hoko ko honau ‘amanaki‘angá. Ko e ‘amanaki ko iá na‘e ‘ikai ko e faka‘ānaua pē. Na‘e ‘oange ‘e he ‘Otuá kiate kinautolu ha makatu‘unga mālohi ‘o e ‘amanakí. ‘I he feangainga mo kinautolu ‘i he faai mai e senitulí, na‘á ne fakatupulekina ai ha lēkooti ‘o e fai ma‘u pē ki he‘ene ngaahi tala‘ofá. Ko honau takí ‘a Siosiua na‘á ne pehē ki ‘Isileli: “‘Oku mou ‘ilo‘i lelei . . . kuo ‘ikai ta‘efakahoko ha fo‘i lea ‘e taha ‘i he ngaahi tala‘ofa lelei kotoa kuo folofola‘aki ‘e Sihova ko homou ‘Otuá kiate kimoutolú.”​—Siosiua 23:14.

‘I he laui afe‘i ta‘u ki mui ai, ‘oku kei mo‘oni pē ‘a e lēkooti ko iá. ‘Oku fonu ‘a e Tohi Tapú ‘i he ngaahi tala‘ofa fakaofo pea pehē ki he lēkooti fakahisitōlia tonu mātē ‘o hono fakahokó. Ko ‘ene ngaahi tala‘ofa fakaekikité ‘oku nau falala‘anga ‘aupito ‘o fa‘a hiki ai kinautolu ‘i he taimi ‘e ni‘ihi ‘o hangē ia na‘e ‘osi fakahoko ia ‘i he taimi na‘e hiki aí.

Ko e ‘uhinga ia ‘oku lava ai ke tau pehē ko e Tohi Tapú ko e tohi ‘o e ‘amanaki. ‘I ho‘o ako ‘a e ngaahi lēkooti ‘o e feangainga ‘a e ‘Otuá mo e fa‘ahinga ‘o e tangatá, ko e ngaahi makatu‘unga ‘o ho‘o tui kiate iá ‘e tupu ‘o toe mālohi ange. Na‘e tohi ‘e he ‘apositolo ko Paulá: “Ko e ngaahi me‘a kotoa pē na‘e tohi ‘i mu‘á na‘e tohi ko hotau fakahinohino, koe‘uhí ke tau lava fakafou ‘i he‘etau kātakí pea fakafou ‘i he fakafiemālie mei he Folofolá ke tau ma‘u ai ha ‘amanaki.”​—Loma 15:4.

Ko e Hā ‘a e ‘Amanaki ‘Oku ‘Omai ‘e he ‘Otuá?

Ko fē ‘a e taimi ‘oku tau ongo‘i fiema‘u lahi taha ai ‘a e ‘amanakí? ‘Ikai ko e taimi ‘oku tau fehangahangai ai mo e maté? Ka, ki he tokolahi, ko e fo‘i mōmeniti ko iá​—‘i he taimi ‘oku mole ai ha ‘ofa‘anga ‘i he maté—​‘a e taimi ‘oku hā ngali faingata‘a ‘aupito ai ke manatu‘i ‘a e ‘amanakí. He ko ē, ko e hā ha me‘a ‘oku toe fakamamahi lahi ange he maté? ‘Okú ne tulimui holo ‘iate kitautolu taki taha. ‘E lava ke tau faka‘ehi‘ehi mei ai ‘i ha ki‘i taimi nounou pē pea ‘oku ‘ikai ha‘atau mālohi ke ta‘ofi ia. He fe‘ungamālie ē, hono ui ‘e he Tohi Tapú ‘a e maté ko e “fili faka‘osí.”​—1 Kolinitō 15:26.

‘E lava fēfē leva, ke tau ma‘u ha ‘amanaki ‘i he fehangahangai mo e maté? Ko e veesi Tohi Tapu ‘okú ne ui ‘a e maté ko e fili faka‘osí ‘oku toe pehē ai ko e fili ko ení “‘e to‘o ‘osi atu ia.” ‘Oku mālohi ange ‘a Sihova ko e ‘Otuá ‘i he maté. Kuó ne ‘osi fakamo‘oni‘i ia ‘i he ngaahi taimi lahi. Anga-fēfē? ‘I hono fokotu‘u hake ‘a e maté. ‘Oku fakamatala‘i ‘e he Tohi Tapú ‘a e taimi kehekehe ‘e hiva na‘e ngāue‘aki ai ‘e he ‘Otuá hono mālohí ke fakafoki mai ‘a e ni‘ihi tāutaha mei he maté ke mo‘ui.

‘I ha tu‘unga makehe ‘e taha, na‘e fakaivia ‘e Sihova hono ‘Aló, ‘a Sīsū, ke ne fokotu‘u mai hono kaume‘a ‘ofeina ko Lāsalosí, ‘a ia na‘á ne ‘osi mate ‘i ha ‘aho ‘e fā. Na‘e fakahoko eni ‘e Sīsū, ‘o ‘ikai fakapulipuli, kae ‘i he ‘ao ‘o ha fu‘u kakai.​—Sione 11:38-48, 53; 12:9, 10.

Te ke fifili nai, ‘Ko e hā na‘e fokotu‘u hake ai ‘a e kakaí? ‘Ikai na‘a nau toe hoholo ‘o motu‘a pea faai atu pē ‘o nau toe mate?’ Na‘e pehē. Ka, koe‘uhi ko e ngaahi fakamatala alafalala‘anga hangē ko eni ‘o e toetu‘ú, ‘e lava ke tau ma‘u ai ha me‘a lahi ange ‘i he holi pē ke toe mo‘ui mai hotau ngaahi ‘ofa‘anga kuo maté; ‘oku tau ma‘u ha makatu‘unga ke tui te nau toe mo‘ui. ‘I hono toe fakalea ‘e tahá, ‘oku tau ma‘u ‘a e ‘amanaki mo‘oni.

Na‘e pehē ‘e Sīsū: “Ko au ‘a e toetu‘ú pea mo e mo‘uí.” (Sione 11:25) Ko ia ‘a e Tokotaha ‘e fakaivia ‘e Sihova ke fakahoko ‘a e toetu‘ú ‘i ha tu‘unga fakaemāmani lahi. Na‘e pehē ‘e Sīsū: “‘Oku ha‘u ‘a e houa ‘a ia ko e fa‘ahinga kotoa ‘i he ngaahi fonualoto fakamanatú te nau fanongo ki hono le‘ó [‘o Sīsuú] pea te nau hū mai ki tu‘a.” (Sione 5:28, 29) ‘Io, ko kinautolu kotoa ‘oku mohe ‘i he ngaahi fonua lotó ‘oku nau ma‘u ‘a e ‘amanaki ke toetu‘u mai ke mo‘ui ‘i ha māmani palataisi.

Na‘e fakamatala‘i ‘e he palōfita ko ‘Aiseá ‘a e fakatātā fakaue‘iloto ko eni ki he toetu‘ú: “‘E mo‘ui ‘a ho‘o kau maté. Ko e ngaahi ‘anga‘anga ‘o hoku kakaí te nau tu‘u hake. ‘Ā hake ‘o kaila fiefia, ‘a kimoutolu kau nofo ‘i he efú! He ko ho hahaú ‘oku hangē ko e hahau ‘o e pongipongí, pea ko e kelekelé te ne tuku mai ‘a e fa‘ahinga kuo mole honau mālohi ‘i he maté ke nau mo‘ui.”​—‘Aisea 26:19.

‘Ikai ‘oku fakafiemālie ia? Ko e kau maté ‘oku nau ‘i he tu‘unga malu taha ‘e ala fakakaukau atu ki ai ha tahá, ‘o hangē ko e malu ‘a ha ki‘i tama ‘i he manava ‘o ‘ene fa‘eé. Ko e mo‘oni, ko e fa‘ahinga ‘oku nau mohe ‘i fa‘itoká ‘oku nau malu ‘i he manatu ta‘efakangatangata ‘a e ‘Otua Māfimafi-Aoniú. (Luke 20:37, 38) Pea ‘oku vavé ni ke fakafoki mai kinautolu ki he mo‘uí, ‘o talitali lelei kinautolu ki ha māmani ‘o hangē ko hano talitali lelei ha ki‘i pēpē toki fā‘ele‘i ‘e ha fāmili ‘ofa! Ko ia, ‘oku ‘i ai ‘a e ‘amanaki na‘a mo e taimi ‘oku tau fehangahangai ai mo e maté.

Me‘a ‘e Lava ke Fai ‘e he ‘Amanakí Ma‘au

‘Oku ako‘i mai ‘e Paula kiate kitautolu ‘a e me‘a lahi fekau‘aki mo e mahu‘inga ‘o e ‘amanakí. Na‘á ne lave ki he ‘amanakí ko ha konga mahu‘inga ‘o ha teunga tau fakalaumālié​—ko e tataá. (1 Tesalonaika 5:8) Ko e hā na‘á ne ‘uhinga ki aí? ‘I he taimi ‘o e Tohi Tapú ko ha sōtia na‘á ne tui ha tatā mētale ki he taú, ‘i ‘olunga ‘i ha tupenu molū pe leta. He mālō mo e tataá, ko e lahi taha ‘o e fana ki he ‘ulú na‘e fa‘a heke ia ‘o ‘ikai tāmate‘i ai ia. Ko e hā ‘a e poini ‘a Paulá? Hangē pē ko hono malu‘i ‘e he tataá ‘a e ‘ulú, ko e ‘amanakí ‘okú ne malu‘i ‘a e ‘atamaí, ‘a e ngaahi mafai fakaefakakaukaú. Kapau ‘okú ke ma‘u ha ‘amanaki mālohi ‘a ia ‘oku fehoanaki mo e ngaahi taumu‘a ‘a e ‘Otuá, he‘ikai uesia ‘a e nonga ho ‘atamaí ‘e he hoha‘a tu‘ú pe mafasiá ‘i ho‘o fehangahangai ko ia mo e ngaahi faingata‘á. Ko hai ia ‘iate kitautolu ‘oku ‘ikai ke ne fiema‘u ha tatā pehē?

Na‘e toe ngāue‘aki ‘e Paula ha fakatātā fe‘ungamālie ki he fehoanaki ‘a e ‘amanakí mo e finangalo ‘o e ‘Otuá. Na‘á ne tohi: “‘Oku tau ma‘u ‘a e ‘amanakí ni ko ha taula ia ki he‘etau mo‘uí, ‘oku pau mo mālohi.” (Hepelū 6:19) Koe‘uhi na‘e ‘osi hokosia ‘e Paula ia ‘a e hao mo‘ui mai ‘i ha ngaahi vaka tūkia, na‘á ne ‘ilo‘i lelei ‘a e mahu‘inga ‘o e taulá. ‘I he fetaulaki mo ha afā, ko e kau kauvaká te nau tuku hifo ‘a e taula ‘o e vaká. Kapau ‘e ‘alu hifo ki lalo ki he kilisi tahí ‘o lave ki ha fu‘u maka, ‘e ‘i ai ‘a e faingamālie ke hao atu ‘a e vaká ‘i he afaá kae ‘ikai puhi‘i ia ki he matāfangá ke tūkia ‘i he ngaahi maká.

Pehē foki, kapau ko e ngaahi tala‘ofa ‘a e ‘Otuá kiate kitautolú ko ha ‘amanaki ia ‘oku “pau mo mālohi,” ko e ‘amanaki ko iá ‘e lava ke ne tokoni‘i kitautolu ke tau hao atu ‘i he ngaahi taimi afā ko ení. ‘Oku tala‘ofa ‘e Sihova ‘oku vavé ni ke hoko mai ha taimi ‘a ia ko e fa‘ahinga ‘o e tangatá he‘ikai ke toe lōmekina kinautolu ‘e he taú, faihiá, mamahí pe na‘a mo e maté. (Sio ki he puha ‘Ngaahi ‘Uhinga ki he ‘Amanakí.’) Ko e piki ma‘u ki he ‘amanaki ko iá ‘e lava ke ne tokoni‘i kitautolu ke tau fakamama‘o mei he fakatu‘utāmakí, ‘o ‘omai ai kiate kitautolu ‘a e fakaue‘iloto ‘oku tau fiema‘u ke mo‘ui‘aki ‘a e ngaahi tu‘unga ‘a e ‘Otuá kae ‘ikai ko e tō ki he laumālie moveuveu mo e ‘ulungaanga ta‘etaau ‘oku failahia ‘i he māmaní he ‘aho ní.

Ko e ‘amanaki ‘oku ‘omai ‘e Sihová ‘oku toe kaunga fakafo‘ituitui ia kiate koe. ‘Okú ne loto ke ke ma‘u ‘a e mo‘ui na‘á ne fakataumu‘a ke ke mo‘ui‘akí. ‘Okú ne holi “ke fakahaofi ‘a e fa‘ahinga kakai kotoa pē.” Anga-fēfē? ‘Uluakí, ko e tokotaha taki taha kuo pau “ke nau a‘usia ha ‘ilo totonu ki he mo‘oní.” (1 Tīmote 2:4) ‘Oku mau fakalototo‘a‘i koe ke ke ma‘u ‘a e ‘ilo foaki-mo‘ui fekau‘aki mo e mo‘oni ‘o e Folofola ‘a e ‘Otuá. Ko e ‘amanaki ‘e ‘oatu ‘e he ‘Otuá kiate koé ‘e mahu‘inga mama‘o ange ia ‘i ha toe ‘amanaki pē ‘oku lava ke ke ma‘u ‘i he māmani ko ení.

‘I ho‘o ma‘u ‘a e ‘amanaki peheé, he‘ikai ‘aupito te ke ongo‘i ‘oku siva ho‘o ‘amanakí, he ‘e lava ke ‘oatu kiate koe ‘e he ‘Otuá ‘a e mālohi ‘okú ke fiema‘ú ke ke a‘usia ai ha fa‘ahinga taumu‘a pē ‘okú ke ma‘u ‘oku fehoanaki mo hono finangaló. (2 Kolinitō 4:7; Filipai 4:​13) ‘Ikai ko e fa‘ahinga ‘amanaki ia ‘okú ke fiema‘ú? Ko ia kapau ‘okú ke fiema‘u ha ‘amanaki pea kapau kuó ke fekumi ki ai, hoko ‘o loto-to‘a. Ko e ‘amanakí ‘oku ‘i mu‘a pē ‘iate koe. ‘E lava ke ke ma‘u ia!

[Puha/Fakatātā]

Ngaahi ‘Uhinga ki he ‘Amanakí

‘E lava ke tokoni‘i koe ‘e he ngaahi fakakaukau Fakatohitapu ko ení ke langa hake ho‘o ‘amanakí:

▪ ‘Oku tala‘ofa mai ‘e he ‘Otuá ha kaha‘u fiefia.

‘Oku pehē ‘e he‘ene Folofolá ‘e hoko ‘a e māmaní ko ha palataisi fakamāmani lahi ‘o nofo‘i ‘e ha fāmili fiefia mo fā‘ūtaha ‘o e fa‘ahinga ‘o e tangatá.​—Saame 37:11, 29; ‘Aisea 25:8; Fakahā 21:​3, 4.

▪ ‘Oku ‘ikai lava ke loi ‘a e ‘Otuá.

‘Okú ne fehi‘a ‘i he loi kotoa pē. ‘Oku mā‘oni‘oni pe ma‘a faka‘aufuli ‘a Sihova, ko ia ai ‘oku ‘ikai malava ke ne loi.​—Palōveepi 6:​16-​19; ‘Aisea 6:​2, 3; Taitusi 1:2; Hepelū 6:​18.

▪ ‘Oku ma‘u ‘e he ‘Otuá ‘a e mālohi ta‘efakangatangata.

Ko Sihova toko taha pē ‘a e māfimafi-aoniú. ‘Oku ‘ikai ‘aupito ha me‘a ‘i he ‘univēsí ‘e lava ke ne ta‘ofi ia mei hono fakahoko ‘ene ngaahi tala‘ofá.​—‘Ekisoto 15:11; ‘Aisea 40:25, 26.

▪ ‘Oku loto ‘a e ‘Otuá ke ke mo‘ui ta‘engata.

​—Sione 3:​16; 1 Tīmote 2:​3, 4.

▪ ‘Oku vakai mai ‘a e ‘Otuá kiate kitautolu mo e ‘amanaki.

‘Okú ne fili ke tokangataha, ‘o ‘ikai ki hotau ngaahi tōnounoú mo e ngaahi fehālaakí, ka ki hotau ngaahi ‘ulungaanga leleí mo e ngaahi feingá. (Saame 103:12-​14; 130:3; Hepelū 6:​10) ‘Okú ne ‘amanaki te tau fai ‘a e me‘a ‘oku tonú pea ‘okú ne fiefia ‘i he‘etau fai iá.​—Palōveepi 27:11.

▪ ‘Oku tala‘ofa ‘e he ‘Otuá te ne tokoni‘i koe ke ke a‘usia ho‘o ngaahi taumu‘a faka‘otuá.

‘Oku ‘ikai ‘aupito totonu ke ongo‘i li‘ekina ‘ene kau sevānití. ‘Oku foaki nima-homo mai ‘e he ‘Otuá hono laumālie mā‘oni‘oní, ‘a e ivi mālohi tahá, ke ne tokoni‘i kitautolu.​—Filipai 4:​13.

▪ He‘ikai ‘aupito kulanoa ‘a e ‘amanaki ki he ‘Otuá.

‘Okú ne alafalala‘anga faka‘aufuli, pea he‘ikai ‘aupito te ne li‘aki koe.​—Saame 25:3.

[Fakatātā]

Hangē pē ko hono malu‘i ‘e he tataá ‘a e ‘ulú, ko e ‘amanakí ‘okú ne malu‘i ‘a e ‘atamaí

[Fakatātā]

Hangē ko e taulá, ko e ‘amanaki ‘oku ‘i ai hono makatu‘unga mālohí ‘e lava ke ne ‘omai ‘a e nonga

[Credit Line]

Courtesy René Seindal/Su concessione del Museo Archeologico Regionale A. Salinas di Palermo