Ko e Ngaahi Taʻu Ki Muí
Vahe 13
Ko e Ngaahi Taʻu Ki Muí
1, 2. (a) Ko e hā ʻa e ngaahi palopalema ʻe mālanga hake nai ʻi he hili ʻa e mavahe mei ʻapi ʻa e fānaú? (e) Ko e hā ʻa e meʻa ʻoku fai ʻe he niʻihi ke fekuki ai mo e palopalema ʻo e fakaʻau ke motuʻá?
KAPAU ʻe ʻikai ke ʻi ai ha ngāue fakaesino pe fakaefakakaukau ke tau fai ʻi heʻetau moʻuí, te tau taʻeoliʻia ai. ʻOku hoko ai ʻa e moʻuí ʻo ʻikai ha taumuʻa, pea tau hoko ʻo taʻemanonga. ʻI he taimi ʻe niʻihi ʻoku hoko ʻa e palopalemá ni ki he faʻahinga kuo malí ʻi he taimi kuo tupu hake ai ʻa e fānaú pea mavahe mei ʻapí. ʻI honau ngaahi taʻu lahi ki muʻá naʻe fonu ʻa e moʻuí ʻi he ngaahi fatongia ʻo e hoko ko e mātuʻá. ʻOku hoko leva eni ʻo ngata fakafokifā ʻa e ngāue kotoa ko ení mo e fatongia ki hono tauhi hake ʻa e fāmilí.
2 ʻIkai ke ngata aí, ʻi he faai atu ʻa e ngaahi taʻú, ʻoku kamata ke hoko ʻa e ngaahi liliu ʻi he sinó. ʻOku hā mai ʻa e mingimingi ʻo e kilí, ʻoku kamata ke hinā ʻa e ʻulú, mo ngangana atu ʻa e louʻulu ʻe niʻihi, pea kamata ke fakatokangaʻi ʻa e ngaahi langa naʻe ʻikai ke teitei fakatokangaʻi ki muʻa. Ko e moʻoniʻi meʻá ʻoku tau fakaʻau ke motuʻa. ʻI hono fakataleʻi ʻa e ngaahi moʻoniʻi meʻa ko ení, ʻoku feinga lahi ʻa e faʻahinga ʻe niʻihi ke fakahā ʻoku nau kei talavou. ʻOku fakafokifā ʻenau hoko ʻo longomoʻui ʻaupito ʻi he ngaahi meʻa fakafiefia—ʻo nau ʻalu ki he ngaahi paati pe kau lahi ʻi he ngaahi sipoti. ʻOku maʻu mei he ngaahi meʻa lahi peheé ha meʻa ke fai, ka ʻoku maʻu nai mei ai ʻa e fiemālie ʻoku tuʻuloá? Te ne ʻai ha taha ke ne ongoʻi ʻoku fiemaʻu moʻoni ia kae mohu taumuʻa ʻene moʻuí?
3. Neongo ʻe fakamānako ʻa e ngaahi meʻa fakafiefiá, ko e hā ʻoku totonu ke fakaʻehiʻehi mei aí?
3 Ko hono moʻoní, ʻoku malava ke fakamānako ʻa e ngaahi meʻa fakafiefiá. Pea ʻi he ngaahi taʻu ki mui ʻo hoʻo moʻuí te ke ʻilo nai ai ʻe ʻi ai ʻa e faingamālie ke fai ʻa e ngaahi meʻa naʻe ʻikai malava ke fai ia ʻi he taimi naʻe kei iiki ai hoʻo fānaú. Ka ʻoku malava ke hoko ʻa e ngaahi palopalema mamafa ʻi hono ʻai ʻa e tuli ki he fakafiefiá ke hoko ko e meʻa mahuʻinga lahi tahá.—2 Tīmote 3:4, 5; Luke 8:4-8, 14.
KO E FAKAʻOFOʻOFA ʻO E HOKO ʻO ʻOFA-MATEAKÍ
4, 5. Ko e hā ʻa e meʻa ʻe malava ke hoko ʻi he fakakaukau ha tokotaha taʻumotuʻa kuo pau ke ne fakahā ʻoku kei manakoekina pē ia ʻe he fefiné pe tangatá?
4 ʻI he taimi ko eni ʻo e moʻuí ʻoku ngalingali ko e tokolahi ʻo e kakaí ʻoku nau fakakaukau kuo pau ke nau fakamoʻoniʻi ʻoku kei manakoekina kinautolu ʻo hangē ko e tangatá ki he fefiné mo e fefiné ki he tangatá. Te nau kamata ʻaki nai haʻanau fakamalinga mo ha taha ʻi ha fakatahataha fakafiefia pe ko ha feituʻu kehe. Ko e kakai tangatá, ʻoku tautautefito ʻenau “ʻalú” mo e kau fefine taʻu siʻi angé, pea ʻi he taimi ko ʻeni ʻo e “ngaahi ʻulungaanga foʻou ʻo e nofó” ʻoku toe lahi mo e kau fefine ʻoku nau kumi ke toe fakapapauʻi ʻoku manakoekina kinautolu ʻaki ʻenau “ʻalu” ki tuʻa mei he nofo malí. Neongo kuo ʻosi mali ha niʻihi ʻi ha ngaahi taʻu lahi, ʻoku nau kamata ke fakakaukau ʻo kau ki hono kamata ha “moʻui foʻou” mo ha hoa mali foʻou. Te nau feinga nai ke fakatonuhiaʻi ʻa e meʻa ʻoku nau faí ʻaki ʻenau fakahā ʻa e ngaahi hala ʻa honau hoa malí—lolotonga ia ʻoku nau faʻa fakasiʻisiʻi ʻenau ngaahi tō nounou ʻanautolú, ʻo kau ai ʻa e ʻikai te nau ʻofa-mateaki, fakatouʻosi ki honau hoa malí pea ki he ngaahi tefitoʻi moʻoni māʻoniʻoní.
5 ʻOku nau ʻilo nai naʻe pehē ʻe Sīsū: “Ka ai ha taha te ne liʻaki hono uaifi, ʻo ʻikai ʻi haʻane feʻauaki [porneia: ko e ʻulungaanga taʻetaau fakaefehokotaki fakasino kovi ʻaupito], pea ne toki mali mo ha fefine kehe, ʻoku ne feʻauaki.” Neongo naʻe fakahā heni ʻe Sīsū ʻoku ʻikai totonu ke te vete mo hoto hoa malí “ʻi ha meʻa pe,” ka ʻoku nau loto-lelei ke ngāueʻaki ha faʻahinga meʻa pē ke fai ha vete ʻa ia ʻoku fakangofua ia ʻe he lao fakamāmaní. (Mātiu 19:3-9) Pea ʻoku nau hoko atu leva ke maʻu ha hoa mali foʻou, pea ʻoku faʻa hoko ko e tokotaha ia ʻa ia naʻa nau feohi mo ia ki muʻa pea toki kamata ʻa hono fai ʻo e veté. Neongo ʻoku nau ʻilo ʻa e meʻa ʻoku fakahā mai ʻe he Folofola ʻa e ʻOtuá ʻo fekauʻaki mo e ʻulungaanga peheé, te nau fakakaukau ʻo aʻu ki he fakamulituku ʻo pehē ʻe “fakaʻatuʻi” pē ʻe he ʻOtuá koeʻuhi ko ʻene meesi lahí.
6. Ko e hā ʻa e anga ʻo e fakakaukau ʻa Sihova ko e ʻOtuá ki he taʻeʻapasia ki he fuakava malí?
6 ʻOku ʻaonga ke tau fakakaukau ki he meʻa naʻe folofolaʻaki ʻe Sihova ki he kakai ʻIsilelí ʻo fakafou ʻi heʻene palōfita ko Malakaí, koeʻuhi ke tau fakaʻehiʻehi mei hono fakataueleʻi kita ʻe he faʻahinga fakakaukau taʻetaau peheé: “Mo e toe meʻa ko eni kuo mou fai: hoʻomou pani ʻa e olita ʻo Sihova ʻaki ʻa e loʻimata, ʻaki ʻa e tangi mo e mapuhoi, ʻa eā ʻoku ʻikai te ne kei hangai fofonga ai [ʻi he hōifua] ki he feilaulau, pe tali fie tali mei homou nima. Ka ʻoku mou pehe, Koeʻuhi ko e hā? Koeʻuhi ko e fakamoʻoni ʻa Sihova ʻi he vahaʻa oʻou mo e uaifi ʻo hoʻo talavou, ʻa ia kuo ke fai kākā ki ai . . . Ko ia mou lama homou laumalie, ke ʻoua naʻa ai ha kākā ʻe fai ki he uaifi ʻo hoʻo talavou. He ʻoku fehiʻa ʻa ʻene ʻAfio ki he vete—ko e folofola ia ʻa Sihova ko e ʻOtua ʻo ʻIsileli.” (Malakai 2:13-16) ʻIo, ʻoku fakahalaiaʻi ʻe he ʻOtuá ʻa e fai kākā ʻi he meʻa fekauʻaki mo hoto hoa malí, pea mo e taʻeʻapasia ki he fuakava malí; ʻokú na maumauʻi ʻa hoto vā mo e Tokotaha-Foaki-Moʻuí.
7. Ko e hā ʻoku ʻikai ke iku ai ki he fiefiá ʻa e taʻeʻapasia ki he fuakava malí?
7 Ko e founga eni ke maʻu ai ha moʻui ʻoku lelei ange? ʻIkai. ʻE tuʻu ʻi he tuʻunga taʻepau ha nofo mali foʻou ʻe fai ʻe he faʻahinga peheé. Ko e meʻa ʻe taha, kuo nau ʻosi fakahā he ʻikai malava ke falala kiate kinautolu ʻo aʻu ki he vā mahuʻinga lahi taha ko ení. ʻOku moʻoni, te nau sio nai ki ha meʻa fakamānako ʻi he tōʻonga ʻa e hoa mali foʻoú ʻa ia naʻe ʻikai ke maʻu ʻe he hoa ki muʻá. Ka naʻa nau kumi ʻa e fiemālie ʻanautolu pē neongo ʻoku fakatupunga ai ʻa e loto-lavea mo e loto-mamahí ka nau maʻu ʻa e meʻá ni. ʻOku pau ʻoku ʻikai ko ha ʻulungaanga eni ʻe tokoni ki he fiefia ʻi he malí.
8. ʻI he nofo malí, ko e hā ʻa e meʻa ʻoku mahuʻinga ange ia ʻi he fakaʻofoʻofa fakaesinó?
8 ʻOku lakasi ʻe he fakaʻofoʻofa ʻo e tōnunga ki he hoa malí ʻa e fakaʻofoʻofa fakaesinó. ʻOku ʻikai malava ke taʻofi ʻa e mole atu ʻo e fakaʻofoʻofa fakaesinó ʻi he faai mai ʻa e ngaahi taʻú, ka ʻoku tupulaki ʻi he taʻu kotoa pē ʻa e fakaʻofoʻofa ʻo e līʻoa mo e ʻofa-mateakí. Ko e fekumi ki he fiefia ʻa ha tokotaha kehe, pea ke loto-lelei ke fakamuʻomuʻa ʻa e lelei ʻaʻaná ʻi he lelei ʻaʻaú, ʻoku malava ke ne fakahoko mai ʻa e fiemālie ʻoku tuʻuloa, he ʻoku moʻoni “ʻoku te monuʻia [“fiefia,” NW] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) Kapau kuo mali ha ongo meʻa ʻi ha ngaahi taʻu lahi, pea kapau kuó na fetalanoaʻaki mo fefalalaʻaki ʻo fakahā ʻena taki taha ongoʻi moʻoni, kapau kuó na kau fakataha ʻi he ngāue mo e ngaahi taumuʻa mo e ngaahi ʻamanaki, mo kau fakataha ʻi he ngaahi taimi faingataʻa mo e ngaahi taimi lelei—pea kuó na fai eni ʻi he ʻofá—ʻe fāʻūtaha pea fetuiaki moʻoni ʻa ʻena moʻuí. ʻOkú na meʻa-taha ʻi he ngaahi meʻa lahi—fakaʻatamai, fakaeongo mo e fakalaumālie. Ko e ʻofa tuʻunga ʻi he manakó ʻa ia naʻá ne taʻofi nai kinaua mei heʻena sio ki heʻena ngaahi tō nounou taki taha ki muʻa peá na toki malí ʻe hoko ia ko e anga-līʻoa fakamātoato ʻo ne ʻai kinaua taki taha ke sio ki he ngaahi tō nounou ʻa e tokotaha ko ē ko ha faingamālie ia ke fai ai ha tokoni, ke fakalato ha fiemaʻu. ʻOku ʻi ai ʻa e ongoʻi ʻo e falala moʻoni ʻi hona vahaʻá, ko e ongoʻi malu, ʻo na ʻilo te na fepoupouaki neongo pe ko e hā ha faʻahinga palopalema ʻe hoko. ʻOku hangē ko e meʻa fakaenatula pē kiate kinaua ke na ʻofa-mateaki. Hangē ko ia ʻoku pehē ʻi he Maika 6:8 (PM): “Kuo ne fakaha kiate koe, e tagata aia oku lelei; bea koeha oku amanaki e Jihova iate koe, ka koeuhi ke ke fai totonu mo ke loto ki he ofa [“ʻofa ki he ʻofa-mateaki,” NW, fakamatala ʻi lalo], mo ke aeva mo ho Otua i he agavaivai.”
FĀNAU KUO LALAHI—KO HA VĀ FOʻOU
9-11. (a) Ko e taumuʻa ia ʻa e ʻOtuá ke tuʻumaʻu tatau ai pē ʻa e vā ʻo e ongo mātuʻá mo ʻena fānaú ʻi he moʻuí kotoa? (e) Ko e hā ʻa e kaunga ʻa e meʻá ni ki he faleʻi ʻoku fai nai ʻe he ongo mātuʻá ki heʻena fānau kuo lalahí? (f) ʻI he taimi kuo mali ai ʻa ʻena fānaú, ko e tuʻunga ʻulu ʻo hai ʻoku totonu ke tokaʻi ʻe he ongo mātuʻá?
9 Neongo ʻoku totonu ke nofo fakataha ʻa e husepānití mo e uaifí ʻi he moʻuí kotoa, ka ʻoku ʻikai ko e fokotuʻutuʻu ia ʻa e Tokotaha-Fakatupú ke fai pehē ʻa e ngaahi mātuʻá pea mo ʻenau fānaú. ʻOku moʻoni, ʻi he tupu hake ʻa hoʻomo fānaú naʻa nau fiemaʻu kimoua ʻi he ʻaho kotoa pē. Naʻe ʻikai ngata pē ʻi he ngaahi fiemaʻu fakaesino naʻe pau ke fai ki ai ha tokangá, ka naʻe toe fiemaʻu ʻa e tataki. ʻI he taimi naʻe ʻikai te nau tali lelei ai iá, mahalo naʻá mo vili taki ʻi ha ngaahi meʻa ko ha lelei maʻanautolu. Ka ʻi he taimi ʻoku nau fokotuʻu ai honau taki taha fāmili pē ʻonautolú, ʻe liliu ʻi ha faʻahinga founga ʻa e vā ʻi he vahaʻa ʻo kimoua mo kinautolú. (Sēnesi 2:24) ʻOku ʻikai ʻuhinga eni ia ʻoku liliu ai ʻa e anga ʻo hoʻomo ngaahi ongoʻi kiate kinautolú, ka ʻoku ʻi ai ha hiki ʻo hono fai ʻo e fatongiá. Ko ia ʻoku fiemaʻu ke liliu ʻa e founga ʻokú mo fai ai ʻa e ngaahi meʻa kiate kinautolú.
10 ʻI he taimi ʻe niʻihi ʻoku kei fiemaʻu nai kiate kinautolu ʻa e faleʻí. Pea ko e fakamoʻoni ia ʻo e potó ʻo kapau te nau fanongo ki he faleʻi lelei mei he faʻahinga kuo nau taukei ange ʻi he moʻuí. (Palōvepi 12:15; 23:22) Ka ʻi hono fai ha faleʻi ki he ngaahi foha pe ngaahi ʻofefine ʻoku nofo mavahé, ʻoku fakapotopoto ke fai ia ʻi he founga ʻoku fakahā ai ʻokú mo ʻilo ʻa e moʻoniʻi meʻa ko ia ko hono fai ha fili ʻi he taimi ko ení ko e meʻa pē ia ʻanautolu.
11 ʻOku fuʻu mahuʻinga ʻa e meʻá ni ʻo kapau kuo nau mali. ʻOku ʻi ai ʻa e ngaahi fonua ʻe niʻihi ʻa ia ʻoku ʻi ai ha anga fakafonua kuo fuoloa hono fokotuʻú ʻokú ne ʻai ʻa e fefine malí ke ʻi he malumalu ʻo e tataki ʻa e faʻē ʻa hono husepānití. ʻI he ngaahi feituʻu kehe, ʻoku mālohi ʻa e tākiekina ʻa e ngaahi kāinga-ʻi-he-fonó ʻi he ngaahi meʻa ʻa e fāmilí. Ka ʻoku iku moʻoni ʻa e meʻá ni ki he fiefiá? ʻOku ʻilo ʻe he Tokotaha-Fakatupu ʻo e fāmilí ʻa e meʻa ʻoku lelei tahá, pea ʻokú ne folofola mai: “Ko ia ʻe tukuange ʻe he tangata ʻene tamai mo ʻene faʻe, kae pikitai ki hono uaifi.” (Sēnesi 2:24) Ko e fatongia ki hono fai ha ngaahi fili ʻi he taimi ko ení ʻoku fakatuʻunga ia ʻi he husepānití, kae ʻikai ʻi he ongo mātuʻa ʻa e husepānití pe ko e ongo mātuʻa ʻa e uaifí. ʻOku pehē ʻe he Folofola ʻa e ʻOtuá: “He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi.” (ʻEfesō 5:23) Ko e fiefia ʻi hono fai ʻa e ngaahi meʻa ki hoʻomo fānau kuo lalahí, pea ki mui mai ki homo ngaahi makapuná, ʻoku malava ke fakalahi atu ia ʻi he taimi ʻoku ʻi ai ai ʻa e ʻapasia ki he fokotuʻutuʻu ko ení.
MAʻU ʻA E FIEFIA ʻI HONO FAI HA MEʻA MAʻÁ E NIʻIHI KEHÉ
12. (a) ʻI he hili ʻa hono fokotuʻu ʻe heʻena fānaú ʻa honau ngaahi fāmili pē ʻonautolú, ko e hā ʻa e meʻa ʻe fai nai ʻe he ongo mātuʻá ke ʻai ke loloto ange ʻa ʻena feʻofaʻakí? (e) Ko e hā mo ha toe ngaahi meʻa te na fai nai ke ʻai ʻena moʻuí ke mohu taumuʻa ange?
12 ʻOku fiemaʻu kiate kitautolu kotoa ke tau ongoʻi ʻoku ʻaonga ʻetau moʻuí, ʻoku ʻi ai hono taumuʻa. Ko hono fakafiemālieʻi ʻa e fiemaʻu ko ení ʻoku mahuʻinga ia ki hoʻo moʻui leleí. Tuku kehe ʻa hoʻo fānaú, ʻoku ʻi ai mo e tokolahi kehe ʻa ia te ke lava ʻo tokoni ki ai ke fakahoko ha fiemaʻu ʻi heʻenau moʻuí. Fēfē ho hoa malí tonu? ʻI he lolotonga ʻa e tupu hake ʻa hoʻomo fānaú, ko e lahi ʻa hoʻomo tokangá naʻe fakahanga kiate kinautolu. ʻOkú mo lolotonga maʻu eni ʻa e faingamālie ke fai ha ngaahi meʻa lahi ange ʻi ha founga fakaekimoua. ʻE lava ke tokoni eni ke toe loloto ange ai homo vaá. Ka ko e hā ke fakangatangata ai ʻa hoʻo ngaahi ngāue anga-ʻofá ki ho fāmilí pē? Te ke lava ʻo ‘fano atu’ ʻaki haʻo fai ha tokoni ki ho ngaahi kaungāʻapi ʻoku nau puké pe ke fakamoleki ha taimi mo e faʻahinga taʻumotuʻa ʻoku nau tuēnoá pe ko hono fai ha tokoni fakamatelie, ʻi ha founga pē ʻokú ke malavá ki he faʻahinga ʻa ia kuo nau hoko ʻo lahi haʻanau fiemaʻu fakamatelie kae ʻikai ko ha foʻui ʻonautolu. (2 Kolinitō 6:11, 12) ʻOku tala mai ʻe he Tohitapú ʻo kau kia Toakase, ko e fefine naʻá ne maʻu ʻa e ʻofa lahi koeʻuhi “naʻe mohu ʻi he ngaahi ngaue lelei, mo e fai ʻofa ki he tuʻutamaki, ʻa ia naʻa ne toutou fai” ki he kau uitoú. (Ngāue 9:36, 39) ʻOku fakaongoongoleleiʻi ʻe he Tohitapú ʻa e faʻahinga ʻoku nau anga-ʻofa ki he faʻahinga ʻoku tuʻutāmakí. (Palōvepi 14:21) ʻOku fakakau atu ʻe he Tohitapú ʻa e ‘tokanga ki he kau paeá mo e kau uitoú ʻi heʻenau mamahí’ ko e konga mātuʻaki mahuʻinga ia ʻo e lotu ʻoku fakahōifua ki he ʻOtuá. (Sēmisi 1:27) Pea ʻoku fakalototoʻaʻi mai ʻe he Tohitapú ʻa kitautolu kātoa: “Kaeʻumaʻā, ʻoua naʻa ngalo ʻa e fai ʻofa mo e fai tokoni: he ko e alā feilaulau pehe ʻoku hohóʻia ai ʻa e ʻOtua.”—Hepelū 13:16.
13. Ko e hā ʻa e fakaueʻiloto ʻokú ne ʻai ʻa e tokoni ki he niʻihi kehé ke ʻaongá?
13 ʻOku ʻuhinga ení ko e hoko ʻo femoʻuekina ʻi he ngaahi ngāue anga-ʻofá ko e meʻa tefito ia ki he fiefiá? Ko hono moʻoní, kapau ko e meʻa fakaueʻilotó ʻoku ʻikai fakalaumālie, pea ʻoku ʻikai ko ha holi ke faʻifaʻitaki ki he ʻOtuá ʻi hono fakahāhā ʻa e ʻofá, ʻe lava ke iku atu ia ki he koto kulanoa. (1 Kolinitō 13:3; ʻEfesō 4:32, 33 [ʻEfesō 5:1, 2, PM]) Ko e hā hono ʻuhingá? Koeʻuhi ʻe ʻi ai nai ha loto-mamahi ʻi he ʻikai ke houngaʻia ha faʻahinga ʻi hoʻo ngāue anga-ʻofá pe ko ʻenau feinga ke ngāuekoviʻaki ʻa hoʻo loto-fiefoakí.
14, 15. Ko e hā ʻa e meʻa ʻokú ne ʻai ʻa e moʻuí ke fiefia mo fiemālie moʻoní?
14 ʻI he tafaʻaki ʻe tahá, ʻi he ngāueʻaki moʻoni ʻe ha taha ʻa ʻene moʻuí ʻi he ngāue ki he ʻOtuá, ʻoku maʻu ʻa ʻene fiemālie lahi tahá mei heʻene ʻilo ko e meʻa ʻokú ne faí ʻoku fakahōifua ki hono Tokotaha-Fakatupú. Pea ʻoku ʻikai fakangatangata ʻe he ngaahi meʻa fakamatelie ʻokú ne maʻú ʻa ʻene malava ke fai ha ngaahi meʻa maʻá e niʻihi kehé. ʻOkú ne maʻu “ʻa e ongoongo lelei lāngilangiʻia ʻo e ʻOtua fiefia,” ko Sihová, pea mo e monūʻia ke fakahā atu ia ki he niʻihi kehé. (1 Tīmote 1:11, NW) ʻOkú ne ʻilo mei he Tohitapú ʻa e founga ke fekuki ai mo e ngaahi palopalema ʻo e moʻuí ʻi he taimi ní, pea mo e ʻamanaki maʻongoʻonga ʻoku tuku tauhi ʻe he ʻOtuá ki he kahaʻú. Pea ko ha fiefia ē ke fakahā atu ʻa e ongoongo lelei peheé ki he niʻihi kehé, pea tohoaki leva ʻenau tokangá ki he Matavai ʻo iá, ko Sihova ko e ʻOtuá! Hangē ko ia naʻe pehē ʻe he tangata tohi fakamānavaʻi ʻo e Sāme 147:1 (PM): “Mou fakamalo kia Jihova: he oku lelei ke hiva fakamalo ki ho tau Otua; he oku malie ia; bea oku gali ae fakamalo.”
15 ʻI heʻetau maʻu ʻa e mahino ʻo kau ki he finangalo ʻo Sihova ʻo fekauʻaki mo e moʻuí pea ʻi heʻetau fakalāngilangiʻi iá ʻe hoko leva ʻo mohu taumuʻa ʻetau moʻuí. (Fakahā 4:11) Te ke maʻu ʻa e fiemālie moʻoní ʻo kapau te ke kau kakato ki hono fakahā atu ʻo e ngaahi moʻoni ʻo e Tohitapú ki he kakai kehé, ʻo fakatatau ki he lahi ʻoku fakaʻatā atu ʻe he ngaahi tuʻunga ʻokú ke ʻi aí. Neongo kuo tupu hake nai hoʻo fānaú tonu, ʻe malava ke ke maʻu ʻa e fiefia ʻi hoʻo tokoniʻi ha ‘fānau fakalaumālie’ ke tupu hake. Pea ʻi hoʻo sio ʻoku nau tupu ʻo hoko ko e kau Kalisitiane matuʻotuʻá, te ke ongoʻi leva ʻo hangē ko e ʻaposetolo ko Paulá ʻi he taimi naʻá ne tohi ai ki he faʻahinga naʻá ne hanga ʻo tokoniʻí: “He kofaʻā ia homau ʻamanakiʻanga, mo e fiefiaʻanga mo e pale te mau polepole ai. . . . ʻikai ko kimoutolu foki? ʻIo, ko kimoutolu ko homau fakalangilangi, mo homau fakafiefia.”—1 Tesalonaika 2:19, 20.
KE NGAOFENGOFUA ʻI HE LILIU ʻA E NGAAHI TUʻUNGÁ
16, 17. (a) ʻI he fekauʻaki mo e ngaahi palopalemá, ko e hā ʻa e meʻa ʻoku totonu ke fakaʻehiʻehi mei aí? (e) Naʻa mo e mole atu ha hoa mali ʻo ha taha ʻi he maté, ko e hā ʻa e meʻa ʻoku malava ke ne tokoniʻi ia ke ʻoua te ne tuʻu tokotaha ʻi he fekuki mo e ngaahi meʻa foʻoú?
16 Ko hono moʻoní, ʻi he faai atu ʻa e taimí, ʻoku ʻilo ʻe he tokolahi taha ʻo e kakaí ʻoku ʻikai te nau kei malava ke fai ha meʻa ʻo lahi ʻo hangē ko ia naʻa nau fai ki muʻá. ʻOku fiemaʻu ke nau ngaofengofua, ke nau loto-lelei ke fai ha ngaahi liliu. ʻI he ʻi ai ʻa e ngaahi palopalema fekauʻaki mo e moʻui lelei fakasinó, ʻoku fiemaʻu ke fai ha tokanga ki ai. Ka ʻoku fakapotopoto ke fakakaukau mafamafatatau, ʻo ʻoua ʻe hoko ʻo hamumu ʻi he ngaahi meʻá ni ʻo ʻikai malava ai ke te fakatokangaʻi ʻa e ngaahi faingamālie ʻoku hoko mai ʻi he ʻaho taki taha. ʻE ʻi ai ʻa e ngaahi palopalema, pea kapau ʻokú te malava ke fai ha faʻahinga meʻa ʻaonga ki ai, ʻoku fakapotopoto ke fai ia. Ka ʻoku taʻeʻaonga ʻa e loto-hohaʻá, pea ko e fakaʻamu ke te ʻi ha tuʻunga kehé he ʻikai te ne fai ʻa e liliú. Ko ia, ʻi he lelei ange ke ʻoua ʻe fakaʻānaua ki he kuo hilí, ngāueʻaki ʻa e ngaahi faingamālie ʻoku lolotonga maʻú.
17 ʻOku toe kaunga eni ʻo kapau ʻokú ke toe ʻi he tuʻunga taʻehoá ʻi he ngaahi taʻu ki mui ʻo e moʻuí. Kapau naʻe fiefia hoʻo nofo malí, ʻoku ʻikai ha veiveiua te ke tukulotoa ʻa e ngaahi manatu fakafiefia ki ai. Ka ʻoku hoko atu pē ʻa e moʻuí, pea ko e taimi eni ʻoku fiemaʻu ai ke fai ha ngaahi liliú. ʻOku ʻi ai ʻa e ngaahi meʻa foʻou ke ke fekuki mo ia, pea kapau ʻokú ke moʻui ʻi ha founga ʻoku fakahāhā ai ʻa e tui ki he ʻOtuá, he ʻikai te ke tuʻu tokotaha pē ʻi he fekuki mo e ngaahi meʻa ko iá.—Sāme 37:25; Palōvepi 3:5, 6.
18-20. Naʻa mo e lolotonga ʻo e ngaahi taʻu ki mui ʻo e moʻuí, ko e hā ʻa e ngaahi meʻa ʻoku malava ke nau ʻai ʻa e moʻuí ke mohu taumuʻá?
18 Neongo ʻa e ngaahi tafaʻaki taʻefakafiemālie ʻo e moʻuí, ʻoku lahi ʻa e ngaahi meʻa ʻoku malava ke nau fakahoko mai kiate kitautolu ʻa e fiefiá—ngaahi kaumeʻa lelei, ngaahi faingamālie ke fai ha ngaahi meʻa maʻá e kakai kehé, ko e fiefia ʻi ha meʻakai lelei, ko e fakaʻofoʻofa ʻa e tō hifo ʻa e laʻaá, ko e hiva ʻa e fanga manupuná. ʻIkai ko ia pē, neongo ko hotau ngaahi tuʻunga lolotonga ní ʻoku ʻikai ko e lelei tahá nai ia, ka ʻoku tau maʻu ʻa e fakapapau mei he ʻOtuá te ne fakangata ʻa e anga-fulikivanú pea te ne toʻo atu mei he faʻahinga ʻo e tangatá ʻa e loto-mamahí, mo e loto-moʻuá, mo e ngaahi mahaki kotoa pea naʻa mo e maté.—Fakahā 21:4.
19 Ko e moʻoni, ko e tokotaha naʻe fuʻu lahi ʻene tokanga ki he meʻa fakamatelié ʻi he moʻuí te ne ʻiloʻi nai ʻi he ngaahi taʻu ki mui ʻo ʻene moʻuí ʻoku tuēnoa. Naʻe fakamatalaʻi ʻe he tokotaha tohi ʻo e Koheletí ʻa e ngaahi nunuʻa ʻo e faʻahinga moʻui peheé ʻaki ʻene pehē: “Ko e muna ʻa e meʻa kotoa pe.” (Koheleti 12:8) Ka ʻi he fekauʻaki mo e kau tangata ʻo e tuí, ʻo hangē ko ʻĒpalahame mo ʻAisake, ʻoku pehē ʻe he Tohitapú naʻa nau aʻu ki he ngataʻanga ʻo ʻenau moʻuí ʻo “motuʻa mo fiemālie.” (Sēnesi 25:8, NW; Sēnesi 35:29) Ko e hā naʻa nau pehē aí? Ko e kau tangata ko ení naʻa nau maʻu ʻa e tui ki he ʻOtuá. Naʻa nau tui pau ʻe toe moʻui mai ʻa e maté ʻi he taimi kotofa ʻa e ʻOtuá, pea naʻa nau fakatuʻamelie atu ki he taimi ʻe fokotuʻu ai ʻe he ʻOtuá tonu ha founga pule māʻoniʻoni maʻá e faʻahinga ʻo e tangatá hono kotoa.—Hepelū 11:10, 19.
20 ʻI ho tuʻungá foki, kapau ʻoku ʻikai te ke fakaʻatā ʻa e ngaahi palopalema ʻo e lolotonga ní ke nau taʻofi ʻa hoʻo sio ki he ngaahi meʻa lelei lahi ʻoku takatakai kiate koé pea mo e kahaʻu fakaofo ʻoku tuku tauhi ʻe he ʻOtuá ki heʻene kau sevānití, ʻe mohu taumuʻa ʻa hoʻo moʻuí, pea te ke maʻu ʻa e fiemālie ʻi he ʻaho kotoa, ʻo fai atu ʻi he ngaahi taʻu ki mui ʻo e moʻuí.
[Fehuʻi ki he Ako]
[Fakatātā ʻi he peesi 176]
Ko e lahi ange ʻa e fehopeʻaki ʻa ha moʻui ʻe ua, ko e lahi ange ia ʻa e hoko ʻa e ua ko iá ko e taha
