Ko Hono Tauhi Fāʻūtaha ʻa e Tākanga ʻa e ʻOtuá

ʻOku fehuʻi ʻe ha niʻihi: ‘ʻOku anga-fēfē hono puleʻi ʻa e fakatahaʻanga ʻa e Kau Fakamoʻoni ʻa Sihová ʻi māmani lahí?’ ʻOku mau tali: ʻOku muimui ʻa e fokotuʻutuʻu fakaepulé ʻi he sīpinga ʻa e fakatahaʻanga Kalisitiane ʻo e ʻuluaki senitulí.

ʻI he 1870 tupú naʻe kamata ʻiate kinautolu pē ʻe Charles T. Russell mo hono kaungāmeʻá ke fakamafola atu ʻa e ola ʻenau ako mei he Tohitapú ʻaki ʻenau ngaahi malanga mo e ngaahi tohi naʻe pulusi. Takatakai ʻi he fonuá, naʻe hanga ʻa e faʻahinga naʻa nau fili ke kau ki he ngāué ni kia Russell mo hono kaungāmeʻa ofí ko e kau tangata taukei lahi taha ia ʻi hono fai ʻa e ngāue ʻa e ʻEikí pea meiate kinautolu ʻe lava ke nau maʻu akonaki mei ai ʻo kau ki heʻenau ngaahi ngāué.

ʻI he 1884 naʻe fokotuʻu ʻa e Zion’s Watch Tower Tract Society ʻi he malumalu ʻo e lao ʻa e Komoniueli ʻo Pennsylvania. Naʻe fekauʻaki ʻa Russell mo hono kaungāmeʻa ofí ʻi hono fakalele ʻa e Sōsaieti ko ʻení, pea pehē foki ki he ngaahi ngāue ʻa e Kau Ako Tohitapú. ʻI he 1909 naʻa nau hiki honau ʻuluʻi ʻōfisí ki Brooklyn, New York. Talu mei ai naʻe hoko leva ʻa e kau talēkita ʻo e Watch Tower Society fakataha mo e kau tangata paní ʻa ia naʻa nau kaungāmeʻa vāofi mo taau fakalaumālié, ko e kulupu pule maʻá e Kau Fakamoʻoni ʻa Sihová.

ʻOku kau ki he Kulupu Pulé ʻa e kau tangata Kalisitiane pani (toko 12 ʻi he 1988), kau ai ʻa e toko 7 ʻi he poate ʻo e kau talēkita ʻo e Watch Tower Society. Ko kinautolu ʻoku nau puleʻi ʻa e ngaahi ngāue ʻa e Kau Fakamoʻoni ʻa Sihová ʻi māmani lahi. ʻOku ʻikai ke fakamānavaʻi kinautolu ʻe he ʻOtuá pea ko ia ai ʻoku ʻikai ke taʻe ʻi ai haʻanau hala, ka ʻoku nau falala ki he Folofola moʻoni-maʻu-ai-pē ʻa e ʻOtuá ko e mafai māʻolunga taha ia ʻi he māmaní, pea ʻoku nau maʻu ha fakataukei fuoloa ʻaupito ʻi heʻenau anganofo ki he finangalo ʻo e ʻOtuá. Ko kinautolu taki taha kuo laka hake he taʻu ʻe 40 ʻenau ngāue taimi-kakato ʻi he ngāue fakafaifekau ʻa e Kau Fakamoʻoni ʻa Sihová.

ʻOku tokangaʻi ʻe he Kulupu Pulé ʻa e meʻa ʻoku pulusi ʻe he Sōsaietí. ʻOku makatuʻunga ʻa e ngaahi meʻa ʻoku tohí ʻi he vakai ki he ngaahi fiemaʻu fakalaumālie ʻa e tākangá, pea ko e ola ia ʻo e ako mo e fekumi fakaʻauliliki ki he Folofola ʻa e ʻOtuá. ʻI he hanganaki ako ʻo e Tohitapú ʻe he kau tangatá ni mo vakai ki he fakahoko hokohoko ʻo e ngaahi taumuʻa  ʻa e ʻOtuá, ki hono fakahoko ʻo e kikité ʻi he ngaahi meʻa ʻoku hoko ʻi he māmaní, pea mo e tuʻunga ʻo e kakai ʻa e ʻOtua ʻi he māmaní, ʻoku nau ʻilo nai ai ʻa e fiemaʻu ke fai ha liliu ʻi ha ngaahi akonaki. ʻI he foungá ni, ʻoku hoko ʻo hokohoko lahi ange ai ʻa e ʻilo ki he moʻoní.​—Sāme 97:11; Palōvepi 4:18; Tāniela 12:4.

Kuo fokotuʻu ʻe he Kulupu Pulé ha Kōmiti Vaʻa ʻo kau ki ai ha kau tangata taau fakalaumālie ʻe toko tolu pe lahi ange ʻi he ngaahi vaʻa ʻoku laka hake he 90 ʻa ia ʻoku nau tokangaʻi ʻa e ngaahi ngāue ʻi he ngaahi fonua mo e tukui motu ʻoku laka hake he 200. ʻOku fetuʻutaki ʻa e ngaahi vaʻá mo e ngaahi fakatahaʻanga ʻi honau malumalú. ʻOku ʻi ai ha fetuʻutaki maʻu pē ʻi he vahaʻa ʻo e Kulupu Pulé mo e ngaahi Kōmiti Vaʻá, pea ʻoku ʻaʻahi fakafoʻituitui ʻa e kau mēmipa ʻo e Kulupu Pulé ki he ngaahi vaʻa lahi ʻi he taʻu taki taha, pea ʻi he foungá ni ʻoku nau anga maheni mo ʻilo ai mo e ngaahi tuʻunga ʻoku hokó.

ʻOku ʻikai ko ha kau pule ʻa e kau tangatá ni ki honau kaungātuí ka ko e kau faifekau ʻoku nau ngāue mālohi koeʻuhi ke malava ai ha faʻahinga kehe ke ako ki he Folofola ʻa e ʻOtuá. ʻOku ʻikai ko ʻenau ngāue ke maʻu ha paʻanga, ka ʻoku nau maʻu ʻenau ngaahi fiemaʻu fakamatelié hangē pē ko ia ʻoku maʻu ʻe he kau mēmipa kehe ʻo e ngaahi fāmili Pētelí. Ko e fakamoʻoni ʻoku nau ngāue loto-tōnungá ʻoku hā ia he faivelenga, fāʻūtaha, tuʻunga fakaeʻulungaanga māʻolunga, pea mo e ʻofa mateaki ki he ngaahi akonaki faka-Tohitapu ʻoku fakahā ʻe he Kau Fakamoʻoni ʻa Sihová ʻi māmani lahí.​—1 Kolinitō 3:​5-9; 4:​1, 2; 2 Kolinitō 1:24; 3:​1-3; 1 Pita 5:2, 3.

• Ko e hā ʻa e fokotuʻutuʻu fakaepule naʻe tupu haké?

• Ko hai ʻoku kau ki he Kulupu Pule he ʻahó ní, pea ko e hā honau ngaahi fatongiá?

• ʻOku anga-fēfē hono tokangaʻi ʻa e ngāue ʻi he ngaahi fonua kehé?

[Mape ʻi he peesi 26]

(Ki he konga tohi kuo fokotuʻu kakato, sio ki he tohi)

Ngaahi Feituʻu ʻOku Fai Ai ʻe he Kau Fakamoʻoni ʻa Sihová ʻa e Finangalo ʻo e ʻOtuá

[Fakatātā ʻi he peesi 26]

Kau palesiteni ʻo e Watch Tower Society

C. T. Russell, 1884-1916

J. F. Rutherford, 1916-1942

N. H. Knorr, 1942-1977

F. W. Franz, 1977-1992

[Fakatātā ʻi he peesi 27]

Ko ha konga siʻi pē ʻeni ʻo e ngaahi vaʻa ʻoku lahi hake ʻi he 90 ʻa ia ʻoku tokangaʻi mei ai ʻa e ngāue ʻa e Kau Fakamoʻoni ʻa Sihová ʻi māmani lahí

Kānata

Semipia

Siamane

Siapani

ʻAositelēlia

Pelēsila