Vahe 84

Ko e Fatongia ʻo e Tuʻunga-Ākongá

ʻI HE hili ʻa e mavahe mei he fale ʻo ha Fālesi ʻiloa, ʻa ia ʻoku hā ngalingali ko ha mēmipa ia ʻo e Sanetalimí, naʻe hoko atu ʻa Sīsū ki Selusalema. Naʻe muimui ha fuʻu kakai tokolahi ʻiate ia. Ka ko e hā ʻa ʻenau ngaahi taumuʻá? Ko hono moʻoní, ko e hā ʻoku kaunga ki he hoko ko ʻene toko taha muimui moʻoní?

ʻI he fai atu ʻo ʻenau fonongá, naʻe hanga ʻa Sīsū ki he fuʻu kakai tokolahí pea naʻa nau ʻohovale nai ʻi heʻene pehē: “Kapau ʻoku ʻikai ke fehiʻa ʻe ha tangata ki heʻene tamaí, mo ʻene faʻeé, mo hono uaifí, mo ʻene fānaú, mo hono ngaahi tokouá, mo hono ngaahi tuofāfiné, ʻio mo ʻene moʻui ʻaʻaná foki, neongo ʻene haʻu kiate aú ka ʻe ʻikai te ne faʻa hoko ko ʻeku ako.”

Ko e hā ʻa e ʻuhinga ʻa Sīsuú? Naʻe ʻikai ko e ʻuhinga ia ʻa Sīsuú ke fehiʻa moʻoni ʻa hono kau muimuí ki honau ngaahi kāingá. Ka, kuo pau ke nau fehiʻa ʻiate kinautolu ʻi he ʻuhinga ke siʻi ange ʻenau ʻofa kiate kinautolú ʻi he ʻofa kiate iá. Naʻe pehē ʻo fekauʻaki mo e kui ʻa Sīsū ko Sēkopé naʻá ne “fehiʻa” kia Lia kae ʻofa kia Lesieli, ʻa ia ko hono ʻuhingá naʻe siʻi ange ʻa e ʻofa kia Liá ʻi hono tokoua ko Lesielí.

Toe fakakaukau foki, naʻe pehē ʻe Sīsū ʻoku totonu ke fehiʻa ʻe ha ākonga ki he “ʻene moʻui ʻaʻaná” pē. ʻOku toe ʻuhinga heni ʻa Sīsū kuo pau ke ʻofa lahi ange kiate Ia ʻe ha ākonga moʻoni ʻi heʻene ʻofa ki he moʻui pē ʻaʻaná. Naʻe fakamamafaʻi ai ʻe Sīsū ko e hoko ko ʻene ākongá ko ha fatongia mamafa. ʻOku ʻikai ko ha meʻa ke fai ʻo taʻefai ha fakakaukau lelei ki ai.

Ko e faingataʻá mo e fakatangá ʻoku kau ia ʻi he hoko ko e ākonga ʻa Sīsuú, ʻo hangē ko ia naʻá ne hoko atu ke fakahaaʻí: “Pea ko ia ʻe ʻikai te ne fua ʻene ʻakau fakamamahí, ʻo muimui kiate aú, he ʻikai malava ke ne hoko ko ʻeku ākonga.” Ko ia ai, kuo pau ke loto-lelei ʻe ha ākonga moʻoni ke ne foua ʻa e kavenga tatau ʻo e manukiʻanga naʻe kātekina ʻe Sīsuú, ʻo kau ai, kapau ʻoku fiemaʻu, ʻa e mate ʻi he nima ʻo e ngaahi fili ʻo e ʻOtuá, ʻa ia naʻe vave ke hoko kia Sīsuú.

Ko ia ai, ko e hoko ko e ākonga ʻa Kalaisí, ko ha meʻa ke mātuʻaki fakakaukau fakalelei ki ai ʻa e fuʻu kakai tokolahi naʻa nau muimui kiate iá. Naʻe fakamamafaʻi ʻe Sīsū ʻa e moʻoniʻi meʻa ko ʻení ʻi ha talanoa fakatātā. “ʻE,” ko ʻene leá ʻeni, “tau lau ʻoku ai hamou toko taha ʻokú ne loto ke langa ha fuʻu taua, ʻikai te ne nofo muʻa ʻo fatu hono totongí, pe ʻoku feʻunga ʻene paʻangá mo hono fai ke ʻosí? Naʻa ʻiloange, kuo hili ʻene ʻai ʻa e tuʻungá, ʻoku ʻikai te ne lava ke fakaʻosi, pea ko e kakai kotoa pē te nau sio ki aí te nau hanga ʻo lumaʻi ia, heʻenau pehē, ‘Uē! ko e sianá ni naʻá ne kamata ke langa, ka naʻe ʻikai te ne lava ke fakaʻosi.’”

Ko ia naʻe fakatātaaʻi ʻe Sīsū ki he fuʻu kakai tokolahi naʻa nau muimui kiate iá ʻoku totonu ke nau fili fakapapau ʻi he ki muʻa ke hoko ko ʻene kau ākongá pe ʻe lava ke nau fakahoko ʻa e ngaahi meʻa ʻoku fekauʻaki mo iá, ʻo hangē pē ko ha tangata ʻoku fiemaʻu ke ne langa ha taua, ʻokú ne fakapapauʻi ki muʻa peá ne kamatá ʻokú ne maʻu ha paʻanga feʻunga ke fakaʻosiʻaki ia. Naʻe hoko atu ʻe Sīsū ʻaki ʻene toe ʻai mo ha talanoa fakatātā ʻe taha:

“Pea tau lau ko ha tuʻi ʻokú ne ʻalu ke fakahoko ʻa e tau mo ha tuʻi ʻe taha, ʻikai te ne nofo muʻa ʻo fifili, pe te ne lava mo ʻene taha manó ke tali ʻa e ʻeiki ʻoku haʻu ke tauʻi ia mo ha ua manó? Pea ka hā ʻe ʻikai, pea lolotonga ʻoku kei mamaʻo ʻa e filí te ne fekau atu ha fakafofonga ke kole ʻa e fakalelei.”

Naʻe fakamamafaʻi leva ʻe Sīsū ʻa e taumuʻa ʻo ʻene ngaahi talanoa fakatātaá, ʻaki ʻene pehē: “Pehē foki, ʻilonga kimoutolu ʻoku ʻikai te ne fai ʻene tatau ki he ngaahi meʻa kotoa pē ʻoku ʻaʻaná, ʻe ʻikai te ne faʻa hoko ko ʻeku ako.” Ko e meʻa ia naʻe pau ke loto-lelei ʻa e fuʻu kakai tokolahi naʻe muimui kiate iá ke nau faí, pea pehē ki he toko taha kotoa pē ʻokú ne ako ʻo fekauʻaki mo Kalaisí. Kuo pau ke nau mateuteu ke feilaulauʻi ʻa e meʻa kotoa pē ʻoku nau maʻú​—ʻenau ngaahi koloá, kau ai mo e moʻuí tonu pē​—kapau te nau hoko ko ʻene kau ākonga. ʻOkú ke loto-lelei ke fai ʻa e meʻa ko ʻení?

“Ko e meʻa ʻaonga ʻa e māsimá,” ko e hoko atu ia ʻa Sīsuú. ʻI heʻene Malanga ʻi he Moʻungá, naʻá ne pehē ko ʻene kau ākongá ko e “māsima ʻo māmani,” ko hono ʻuhingá ʻoku ʻiate kinautolu ha ivi tākiekina fakatolonga ki he kakaí, ʻo hangē pē ko e māsimá ko e meʻa fakatolonga. “Ka ʻo ka mole mei he māsimá foki hono koná, pea ʻe fakakonokonaʻaki ia ʻa e hā? ʻOku ʻikai tāu ke laku ki he ngoué, pe ki he tuʻungavevé,” ko e fakamulituku ia ʻa Sīsuú. “Ka ʻoku laku pe kituaʻā. Ko ia ʻoku maʻu telinga ke ongoʻakí, ke ne ongoʻi.”

Ko ia naʻe fakahāhā ʻe Sīsū naʻa mo kinautolu kuo nau ʻosi hoko fuoloa ko ʻene kau ākongá kuo pau ke ʻoua te nau fakavaivai ʻi heʻenau fakapapau ke hoko atú. Kapau te nau hoko ʻo pehē, te nau hoko ʻo taʻeʻaonga, ko ha lumaʻanga ki he māmani ko ʻení pea taʻefeʻunga ʻi he ʻao ʻo e ʻOtuá, ko hono moʻoní, ko e manukiʻanga ia ki he ʻOtuá. Ko ia, ʻo hangē ko e māsima kuo mole hono koná, pe kuo ʻuliʻí, ʻe lī kinautolu ki tuaʻā, ʻio, ʻo fakaʻauha. Luke 14:​25-35; Senesi 29:​30-33; Mātiu 5:13.

▪ Ko e hā hono ʻuhinga ke “fehiʻa” ki hoto ngaahi kāingá pea mo kita tonu?

▪ Ko e hā ʻa e ongo talanoa fakatātā naʻe ʻomai ʻe Sīsuú, pea ko e hā hona ʻuhingá?

▪ Ko e hā ʻa e taumuʻa ʻo e fakamatala fakaʻosi ʻa Sīsū ʻo fekauʻaki mo e māsimá?